1 Kɛ̀ Dauda gagurↄↄ kà kĩi, à lɛ́ dìɛ a nɛ́ Sulemanunɛ à bè: 2 Mɛ́ɛ gaa anduna gbɛ̃ píngi gákiia. Ǹ zɛ gbãa, nɛ́ n zĩnda ↄdↄa kɛ̀ nɛ́gↄ̃gbɛ̃n n ũ! 3 Ǹgaegↄ̃ Dii n Luda yãnↄ kũna, nɛ́gↄ̃ tɛ́ à zɛ́zi, nɛ́gↄ̃ à ↄdↄkii gwaa, nɛ́gↄ̃ à yãdiɛnanↄ kũna kↄ̃n à dokayãnↄ kↄ̃n à yã'onnɛnanↄ, lán à kú Musa doka takadan nà, yã kɛ̀ nɛ́ɛ kɛɛ píngi égↄ̃ bↄↄ maa, n tá píngi égↄ̃ nna. 4 Lɛn Dii é yã kɛ̀ à òmɛɛ papa lɛ à bè, tó ma nɛ́nↄ ń zĩnda kũna dↄ̃ bensↄ̃ aↄ̃ↄ tɛ́ ma zɛ́zi kↄ̃n nↄ̀sɛo do kↄ̃n pↄyezinao píngi, ma boriinↄ égↄ̃ vɛ̃ɛna Isarailinↄ kpatan gurↄ píngi.

5 Ń yã kɛ̀ Zeruya nɛ́ Yoabu kɛ̀mɛɛ dↄ̃, lán à Isaraili zĩ̀kpɛ dↄn'aɛde gↄ̃ↄn plaaanↄ dɛ̀dɛ nà, Nɛɛ nɛ́ Abana kↄ̃n Yɛta nɛ́ Amasao. À gbɛ̃ pìnↄ dɛ̀dɛ, èe kɛ sↄ̃ zĩ̀ gurↄnlo. Aↄ̃ aru gↄ̃̀ à musu, à kù à asaaa kↄ̃n à kyateenↄ. 6 Ǹ yã kɛnɛ n ↄ̃ndↄ̃na lɛ́n. Ǹton tó à mìkã pura kũ gbasa à daɛ miran yĩi guuro. 7 Ǹ gbɛ̃kɛɛ kɛ Giliada gbɛ̃ Bazilai nɛ́gↄ̃gbɛ̃nↄnɛ. Ǹ ń diɛ gbɛ̃ kɛ̀ égↄ̃ pↄ́ blee lɛdoonↄ tɛ́, zaakɛ aↄ̃mbe aↄ̃ zɛ̀mao gurↄↄ kɛ̀ mɛ́ɛ bàa sii n vĩ̀i Abusalomunɛ. 8 Bɛyãmi bori Gera nɛ́ Simɛi, Bahurimu gbɛ̃ kúnyo dↄ. À ma ka pãsĩpãsĩ gurↄↄ kɛ̀ mɛ́ɛ gaa Manaimu. Kɛ̀ à mↄ̀ à ma le Yodazi, má sìnɛ kↄ̃n Diio kɛ̀ mɛ́ à dɛro. 9 Baa kↄ̃n beeeo ǹton à tó pã wɛ́ɛtãmma sairo. Ń ↄ̃ndↄ̃, ń dↄ̃ dian nɛ́ kɛnɛ nà à ga zɛ́gbãn à gɛ̃ miran.

10 Ben Dauda gà. Yerusalɛmu fáandi kɛ̀ wà à vĩ̀in wè be Dauda wɛ́tɛ. 11 À kɛ̀ Isarailinↄ kí ũ ai wɛ̃̀ baplaa, Ɛblↄnu wɛ̃̀ swɛɛplaa, Yerusalɛmu wɛ̃̀ baaakuri awɛɛ'aagↄ̃. 12 Sulemanu vɛ̃̀ɛ a de gbɛ̀n bensↄ̃ à kpata kãsãa pɛɛna.

13 Agi nɛ́ Adonia gàa à Sulemanu da Basɛba lè, ben Basɛba à là à bè: Aafian n mↄↄ́? À wèàla à bè: Aafiamɛ! 14 Adonia ɛ̀ara à bè: Má yã vĩ mà onnɛ. Basɛba bè: Ǹ o! 15 Ben Adonia bè: Ń dↄ̃ kɛ̀ kpata nɛ́ ma pↄ́mɛ yã. Isarailinↄ wɛ́ɛ kúma ń píngi mà kɛ ń kí ũ, ben yã lìɛ, ma dãaro bé à kpata blè, zaakɛ Dii bé à à kà. 16 Tia sa yã mɛ̀n doon mɛ́ɛ wɛ́ɛ kɛɛmma, ǹton gí kɛmɛziro. Basɛba bè: Ǹ o! 17 Ben à bè: Ǹ wɛ́ɛ kɛmɛ kí Sulemanua à Sunɛmu nↄgbɛ̃ Abisaga kpáma nↄↄ ũ, zaakɛ eé gíonnɛro. 18 Basɛba bènɛ: Tↄ̀, mɛ́ onɛnnɛ.

19 Kɛ̀ Basɛba gàa à kí Sulemanu lè Adonia yã pì musu, ben kína pì fɛ̀ɛ à gàa à dààlɛ à kùɛnɛ, ben à ɛ̀ara à mↄ̀ à vɛ̃̀ɛ a kíblekitan. Ben wà mↄ̀ Basɛbanɛ kↄ̃n kíblekita pãndeo, ben à vɛ̃̀ɛ kí ↄplaazi. 20 Basɛba bè: Pↄ́ken má yezi mà wɛ́ɛ kɛmma, ǹton ma tɛ̃ro. Ben kí bè: Ǹ wɛ́ɛ kɛ Naa, mɛ́ n tɛ̃ro. 21 Ben Basɛba bè: Ǹ tó wà Sunɛmu nↄgbɛ̃ Abisaga kpá n vĩ̀i Adoniaa à à sɛ́ nↄↄ ũ. 22 Ben kí Sulemanu a da là à bè: Bↄ́yãnzin nɛ́ɛ Sunɛmu nↄgbɛ̃ Abisaga wɛ́ɛ kɛɛ Adonianɛzi? Ǹ kpata wɛ́ɛ kɛnɛ gↄ̃ↄmɛee! Zaakɛ ma vĩ̀imɛ. Nɛ́ɛ kpata wɛ́ɛ kɛɛnɛ kↄ̃n sa'ori Abiatao kↄ̃n Zeruya nɛ́ Yoabuomɛ. 23 Ben kí Sulemanu sì kↄ̃n Diio à bè: Tó Adonia e kora a wɛ̃̀ndizi yã kɛ̀ à wɛ́ɛ kɛ̀ kɛ̀ yãnziro, Luda yã kɛmɛ pãsĩpãsĩ. 24 Zaakɛ Dii ma ka kpatan, à ma diɛ ma de Dauda gɛ̃ɛ ũ, à ma borii gbà gbãaa lán à à lɛ́ gbɛ̃̀ nà, má sì kↄ̃n Diio Adonia é ga gbã̀amɛ. 25 Ben kí Sulemanu Yoyada nɛ́ Bɛnaya dà, à gàa à Adonia lɛ̀ à dɛ̀.

26 Kína bè sa'ori Abiatanɛ: Ǹ ɛara ǹ tá n guun Anato. À kↄ̃ sìo ǹ gamɛ, mↄde mɛ́ n dɛ tiaro, zaakɛ ḿbe n Dii Luda àkpati sɛ̀ n dↄo ma de Daudanɛ aɛ, bensↄ̃ n zɛo à nawɛ̃a píngi guu. 27 Lɛn Sulemanu pɛ̀ Abiataa lɛ, à à bↄ̀ Dii gbãgbãna zĩin, lɛ yã kɛ̀ Dii ò Ɛli bɛdeenↄ musu zaa Silo e à papa yãnzi.

28 Kɛ̀ Yoabu yã pì baaru mà, ben à bàa sì à gàa Dii bisakuta kiia, à nà Dii gbãgbãkiizi à à koba kũ̀. Yoabu zɛ̀ kↄ̃n Adoniaomɛ yã, mↄde èe zɛ kↄ̃n Abusalomuoro. 29 Wà ò kí Sulemanunɛ kɛ̀ Yoabu bàa lɛ̀ à gàa Dii bisakuta kiia, à kú sa'okii pì saɛ, ben Sulemanu bè Yoyada nɛ́ Bɛnayanɛ à gá à yãao gwe. 30 Kɛ̀ Bɛnaya kà Dii bisakuta kiia, à bènɛ: Kína bè ǹ bↄ gwe! Ben Yoabu bè: Auo! Gura kɛ̀n mɛ́ gan. Ben Bɛnaya gbɛ̃nↄ zĩ̀ kínaa à bè: Lán Yoabu wèmala nàn yɛ̀. 31 Ben kína bènɛ: Ǹ kɛnɛ lán à ò nà. Ǹ à dɛ, nɛ́ à vĩi, lɛ à gbɛ̃dɛna pã yã tón wí mapi kↄ̃n ma de bɛdeenↄ musuro. 32 Dii é tó à gbɛ̃dɛna yã wí à musu, zaakɛ à lɛ̀ɛ taarisaide gↄ̃ↄn plaaa kɛ̀ aↄ̃ maaa dɛalaanↄa. À Nɛɛ nɛ́ Abana, Isaraili zĩ̀kpɛ dↄn'aɛde kↄ̃n Yɛta nɛ́ Amasa, Yuda zĩ̀kpɛ dↄn'aɛdeeo dɛ̀dɛ ma de lɛ́ saɛ. 33 Aↄ̃ dɛna yã égↄ̃ wii Yoabu kↄ̃n a boriinↄ musu gurↄ píngi, mↄde Dii égↄ̃ Dauda kↄ̃n a boriinↄ kↄ̃n a uao kↄ̃n a kpatao gbaa aafia gurↄ sãnda píngia. 34 Ben Yoyada nɛ́ Bɛnaya gàa à Yoabu lɛ̀ à dɛ̀, ben wà à vĩ̀i a bɛ zaa gbáan. 35 Ben kína Yoyada nɛ́ Bɛnaya dìɛ zĩ̀kpɛ dↄn'aɛdee ũ Yoabu gbɛ̀n, sa'ori Zadↄki sↄ̃, Abiata gbɛ̀n.

36 Kína gbɛ̃nↄ zĩ̀ aↄ̃ Simɛi sìsi, ben à bènɛ: Ǹ bɛɛ bo Yerusalɛmu kɛ̀ ǹgↄ̃ kún. Ǹton bↄ bɛa kɛ̀ ǹ gá gukearo. 37 Ǹgↄ̃ dↄ̃ sãnsãn zĩ kɛ̀ n bikũ̀ Kidironua, n gan gwe. Mↄde ḿbe n n zĩnda dɛ̀. 38 Ben Simɛi bè kínɛ: Yã maaan ń ò ma dii kí. Mamↄma n zↄ̀bleri mɛ́ kɛ lán ń ò nà. Ben à kú Yerusalɛmu lɛ ai à gì kɛ̀.

39 Wɛ̃̀ aagↄ̃ↄ gbɛra Simɛi zↄ̀ gↄ̃ↄn plaaanↄ bàa sì wà tà Maaka nɛ́ Akisi, Gata kína kiia, ben wà bè Simɛinɛ: N zↄ̀nↄↄ kú Gata. 40 Ben Simɛi fɛ̀ɛ à gàari yì a zaakinɛ, à gàa Akisi kiia Gata a zↄ̀ pìnↄ wɛtɛ. Kɛ̀ à ń é, ben à ń sɛ́ɛ Gata à sùńyo. 41 Ben wà ò Sulemanunɛ, Simɛi bↄ̀ Yerusalɛmu à gàa Gata à ɛ̀ara à sù. 42 Ben kína gbɛ̃nↄ zĩ̀ aↄ̃ Simɛi sìsiare, ben à bènɛ: Má tò ń sì kↄ̃n Diio, ben ma lɛ́ dàmma ma bè, zĩ kɛ̀ n bↄ kɛ̀ n gaa gukea, ǹgↄ̃ dↄ̃ kɛ̀ n gamɛ. Ben ń bèmɛ, yã maaamɛ, ń mà. 43 Bↄ́yãnzin n bↄ ladana kɛ̀ ń kɛ̀ kↄ̃n Dii tↄ́o kpɛɛzi kↄ̃n yã kɛ̀ má dànnɛɛo? 44 Ben kína ɛ̀ara à bènɛ dↄ: Yã zaaa kɛ̀ ń kɛ̀ ma de Daudanɛ dↄngu píngi. Dii bé eé tó à zaaa pì wí n musu sa, 45 mↄde eé aubarika damagu à tó Dauda kpata kãsãa gↄ̃ pɛɛna ai gurↄ sãnda píngia. 46 Kína Yoyada nɛ́ Bɛnaya dà, ben à gàa à Simɛi lɛ̀ à dɛ̀. Lɛn Sulemanu kpata kãsãa pɛ̀ɛ lɛ.