Luda yã takada kↄ̃n Bokobaru yão 1 TIMƆTI 2

Dↄnzikɛna

1 Káaku gĩa ma lɛ́ dàmma, à adua kɛ baade pínginɛ, à zɛ́ gbekańnɛ, à kúɛ kɛ Ludanɛ ń yãnzi kↄ̃n sáabukpanao. 2 À adua kɛ kínanↄnɛ kↄ̃n gbãadeenↄ ń píngi, lɛ wà e wàgↄ̃ kuu aafia yãkete sai ludayãdarinↄ ũ, wa kuuna gↄ̃ bɛ̀ɛ vĩ. 3 Beee bé à maa, è ká Luda wa Mìsirinɛ 4 kɛ̀ à yezi baade píngi mìsina e, aↄ̃gↄ̃ yãpuraa dↄ̃.

5 Zaakɛ Luda mɛ̀n domɛ,

bensↄ̃ yãkɛkɛri kuu mɛ̀n do

Luda kↄ̃n gbɛ̃nteenↄ dagura,

àmbe gbɛ̃ntee Kirisi Yesu ũ.

6 À a zĩnda kpà à baade píngi bò,

ben wà à sèeda kɛ̀ a gurↄↄa.

7 Beee yãnzin Luda ma diɛ à kpàakpakɛri kↄ̃n à zĩ̀rio ũzi, lɛ mà à dↄnzi zɛ́ yãpuradee da bori pãndenↄnɛ. Yãpuraan mɛ́ɛ oo, èe kɛ ɛgɛɛnlo.

8 Má yezi gↄ̃gbɛ̃nↄ adua kɛ gu sãnda píngi, aↄ̃ ↄ sɛ́ musu gbãsĩ sai, pↄfɛ̃ kↄ̃n lɛokpakↄ̃aoo sai. 9 Má yezi dↄ nↄgbɛ̃nↄ ń zĩnda kɛkɛ a zɛ́a yↄ̃̀kↄ̃kɛna sai, zĩndamↄnnɛna baasi. Èe kɛ kↄ̃n mì yↄ̃̀kↄ̃de tãnao ke vura kↄ̃n òso nↄmaablebↄnↄ ke bisa ↄↄdeenↄonlo. 10 Aↄ̃ ń zĩnda kɛkɛ kↄ̃n maakɛnao, lán à kↄ̃ sìo nↄgbɛ̃ dↄnzirinↄ kɛ nà. 11 Nↄgbɛ̃nↄ yã dada wàgↄ̃ yĩtɛna, aↄ̃ mì siɛ yã píngi guu. 12 Mɛɛ̀ wezi nↄgbɛ̃nↄ yã dada gↄ̃gbɛ̃nↄnɛ ke aↄ̃gↄ̃ iko vĩḿmaro, séde aↄ̃gↄ̃ yĩtɛna kítikiti. 13 Zaakɛ Adamun Ludaa kɛ̀ káaku, à gbɛra Awau. 14 Èe kɛ Adamun wà sã̀sãro, nↄgbɛ̃n wà sã̀sã à gↄ̃̀ taaride ũ. 15 Mↄde tó à mɛna fↄ̃̀ kↄ̃n ludanaanɛkɛnao kↄ̃n yenzio kↄ̃n kúadonao zĩndamↄnnɛna baasi, eé nɛ́ i aafia.