1 Gurↄ beeea Mikaɛli, malaika ìsi kɛ̀ è zɛ kↄ̃n n gbɛ̃nↄo é fɛɛ. Gurↄ beee nawɛ̃a égↄ̃ bíta. Zaa boriinↄ naana gurↄ ai gurↄ beeea à taka e kɛ zikiro. Gurↄ beeea n gbɛ̃ kɛ̀ aↄ̃ tↄ́ kú Luda takada guunↄ é bↄ. 2 Gbɛ̃ parii kɛ̀ aↄ̃ↄe ii oo tↄↄtɛ guunↄ é vu. Aↄ̃ gbɛ̃kenↄ égↄ̃ wɛ̃̀ndi kũ eé yãaroo vĩ, aↄ̃ gbɛ̃kenↄ sↄ̃ lalandi kↄ̃n wí yãanasaio. 3 Gbɛ̃ kɛ̀ aↄ̃ ↄ̃ndↄ̃ↄ vĩinↄ égↄ̃ tɛ́ kɛɛ lán musu pↄ́nↄ bà. Gbɛ̃ kɛ̀ aↄ̃è tó parii bↄ maaa pìnↄ égↄ̃ tɛ́ kɛɛ lán sↄsↄnɛnↄ bà. 4 Mpi sↄ̃ Daniɛli, ǹ yã pìnↄ ká takadan ǹ koko ǹ à lɛ́ nakↄ̃a ai gurↄↄ pì lɛ́ gá ká. Gbɛ̃ parideenↄ égↄ̃ gaa weégↄ̃ suu lɛ wà dↄ̃na kaara.

5 Mamↄma Daniɛli ma guu gwà, ben ma gↄ̃ↄn plaaanↄ è, gbɛ̃ doo zɛna swaa baa kɛ̀ kpa, gbɛ̃ doo baa kãa kpa. 6 Aↄ̃ gbɛ̃ mɛ̀n doo bè gbɛ̃ kɛ̀ táaru bisa dana à zɛna swa'ilaanɛ: Yãbↄnsaɛ pìnↄ é mì dɛ bↄrɛmɛ? 7 Gbɛ̃ kɛ̀ táaru bisa dana à zɛna swa'ilaa pì a ↄplaa kↄ̃n a ↄzɛɛo sɛ̀ musu, ben má mà à bè kↄ̃n Gurↄpingide tↄ́o: Wɛ̃̀ aagↄ̃ kↄ̃n a kusuomɛ. Tó wà Luda gbɛ̃nↄ gbãaa fↄ̃̀ wà yã̀a, yã pìnↄ gbasa wà mì dɛ píngi. 8 Má mà, mↄde mɛ́ɛ à bↄkↄ̃tɛna dↄ̃ro, ben ma à là ma bè: Dii, yã pì gbɛ̀ é bↄ diamɛ? 9 À wèmala à bè: Daniɛli, ǹ gá! Yã pìnↄ mì égↄ̃ utɛnamɛ, weégↄ̃ pↄ́ kúɛa ai gurↄ lɛ́ gá ká. 10 Zĩ beeea gbɛ̃nↄ gbãsĩ é kɛ̃ḿma pari, aↄ̃ nↄ̀sɛ é pura kũ lán wà ń baasa bà, mↄde gbɛ̃ zaaanↄ é kɛkɛ wàgↄ̃ zaa. Gbɛ̃ zaa ke é yã pì dↄ̀rↄ dↄ̃ro, mↄde gbɛ̃ kɛ̀ aↄ̃ ↄ̃ndↄ̃ↄ vĩinↄ bé wé ma. 11 Tó wà saa kɛ̀ wè o lán guu e dↄↄ nà mì dɛ̀ wà tɛ̃̀pↄ guyakari pɛ̀ɛn, gurↄ wàa swɛɛdo kpɛ́ basiigↄ̃ akuri bé eégↄ̃ kuu. 12 Aubarikadeen gbɛ̃ kɛ̀ eé gurↄ wàa swɛɛdo kpɛ́ baswɛɛplaa sↄↄrosai dã à ká ũ. 13 Mpi sↄ̃, ǹ gá ai n gurↄ lɛ́a. Nɛ́ anduna tó gbasa ǹ fɛɛ ǹ n baka le gurↄ zãa zĩ.