Luda yã takada kↄ̃n Bokobaru yão EBERUNƆ 2

Mìsina bíta

1 Beee yãnzi wà yãpuraa kɛ̀ wá mà kũ ↄplaplaa gínginzi, lɛ wàton kɛ̃ zɛ́aro yãnzi. 2 Zaakɛ yã kɛ̀ Ludaa dìɛ malaikanↄ gãzĩ nɛ́ tiasimɛ, ben wà fĩa bò gbɛ̃ kɛ̀ aↄ̃ gì mazi aↄ̃ mìkpɛɛ zùnɛnↄnɛ a zɛ́a, 3 tó wée mìsina bíta pì yã da sↄ̃ro, wé bↄↄ́? Mìsina yã pì bↄ̀ Dii kiiamɛ, ben gbɛ̃ kɛ̀ aↄ̃ↄ mànↄ yãpuraa kpàa. 4 Luda ɛ̀ara à yãpuraa kpà yã pìa kↄ̃n sèedanↄ kↄ̃n yãbↄnsaɛnↄ kↄ̃n dabuyã pari kɛnanↄ kↄ̃n a Ninii gbaa kɛ̀ à kpàatɛtɛńnɛnↄ a pↄyezia.

Yesu gↄ̃na gbɛ̃ntee ũ lán wa bà

5 Èe kɛ malaikanↄn Luda anduna ziaa kɛ̀ wée à yã oo nàńnɛ ń ↄzĩro. 6 À kú Luda yãn gukea wà bè:

Bↄ́n gbɛ̃ntee ũ kɛ̀ à yã ègↄ̃ dↄnguu?

Bↄ́n à ũ kɛ̀ nɛɛ̀ làakari dↄa?

7 N à kɛ̀ kɛ̃sãna malaikanↄzi féte,

n à kpà kín kↄ̃n gakuio kↄ̃n bɛ̀ɛo,

8 ń tò pↄ́ sãnda píngi mì sìɛnɛ.

Kɛ̀ Ludaa tò pↄ́ sãnda píngi mì sìɛnɛ, èe à ke tó mìsiɛnanɛ sairo. Tia la, wée e kɛ̀ pↄ́ sãnda píngi mì sìɛnɛ gĩaro, 9 mↄde wá è kɛ̀ Yesun wà tɛ́a. Luda à kɛ̃̀sã malaikanↄzi ai gurↄ plaa, lɛ Luda gbɛ̃kɛɛ guu à ga gbɛ̃ píngi gɛ̃ɛ ũ, ben à à kpà kpatan kↄ̃n gakuio kↄ̃n bɛ̀ɛo ga nawɛ̃a kɛ̀ à kɛ̀ yãnzi.

10 Lán pↄ́ sãnda píngi bↄ̀ Luda kiia nà, bensↄ̃ pↄ́ sãnda píngi dɛ à pↄ́ ũ, kɛ̀ à yezi à gɛ̃ kↄ̃n gbɛ̃nↄ pari a gakui guu a nɛ́nↄ ũ, à kↄ̃ sìo à gbɛ̃ kɛ̀ mìsina zɛ́ bↄ̀ńnɛ kɛ papana nawɛ̃akɛna guu. 11 Gbɛ̃ kɛ̀ aↄ̃ gↄ̃̀ Luda gbɛ̃nↄ ũ kↄ̃n gbɛ̃ kɛ̀ è ń kɛ Luda gbɛ̃nↄ ũuo, ń píngi de dↄ̃nkↄ̃mɛ. Beee yãnzi ń sisina a gbɛ̃nↄ ũu è à wí kũro. 12 À bè:

Mɛ́ n tↄ́ bↄ ma gbɛ̃nↄ tɛ́,

mɛ́ n sáabu kpá kakↄ̃ana guu.

13 À bè dↄ:

Mɛ́ à náanɛ kɛ.

À bè dↄ:

Máɛ kɛ̀ kↄ̃n nɛ́ kɛ̀ Ludaa kpàmaanↄ.

14 Zaakɛ nɛ́ pìnↄ nɛ́ gbɛ̃nteenↄmɛ, àpi se gↄ̃̀ gbɛ̃ntee ũ lán ń bà, lɛ à ga à Ibilisi kɛ̀ è mↄ́ gaao kaatɛ, 15 à gbɛ̃ kɛ̀ aↄ̃ↄe vĩa kɛɛ gaanɛ wèe zↄ̀ blee ai ń wɛ̃̀ndi lɛ́nnↄ bo. 16 Yãpuraa guu malaikanↄn èe ↄ daaḿmaro, Ibraĩ boriinↄmɛ. 17 À kↄ̃ sìo à gↄ̃ lán a dãaronↄ bà yã sãnda píngi guu, lɛ à gↄ̃ Sa'oriki sùude náanɛdee ũ Luda zĩi guu, gbɛ̃nↄ durun agbaakpabↄ ũ dↄ. 18 Zaakɛ à nawɛ̃a kɛ̀ à yↄ̃agwana fↄ̃̀, eé fↄ̃ à gbɛ̃ kɛ̀ wèe ń lɛɛ wà ń gwaanↄ faaba kɛ.