Luda yã takada kↄ̃n Bokobaru yão EBERUNƆ 13

Lɛ́dammana

1 À wɛ́ɛ tã àgↄ̃ gbɛ̃kɛɛ vĩ kↄ̃o. 2 À làakari dↄ nibↄyaarikɛnaa, zaakɛ lɛn gbɛ̃kenↄ malaikanↄ yàari kɛ̀ dↄ̃na sai lɛ. 3 À tó gbɛ̃ kɛ̀ wà ń ká kpɛ́siaa guunↄ yã dↄagu lán á kúńyo kpɛ́siaan bà, kↄ̃n gbɛ̃ kɛ̀ wèe wɛ́ɛ tãaḿmanↄ, lán ámbe wèe wɛ́ɛ tãaawa bà. 4 Baade gae nↄsɛna da yã bɛ̀ɛdee ũ. Aↄ̃ton ń daɛkii gbãsĩ kpáro, zaakɛ Luda é yãkpaɛ kɛ kↄ̃n zinakɛrinↄ kↄ̃n pãpãkɛrinↄo. 5 Yena ↄↄzi tón dↄare aɛro. À zɛ kↄ̃n pↄ́ kɛ̀ á vĩio, zaakɛ Luda bè:

Mɛ́ n tónlo,

mɛ́ pã kpanzi zikiro.

6 Beee yãnzi weè kùgbãaa kɛ wà be:

Diin ma dↄnlɛri ũ,

vĩa é ma kũro.

Bↄ́n gbɛ̃ntee é fↄ̃ à kɛmɛɛ?

Sa yãpura ona

7 À tó a dↄn'aɛdee kɛ̀ aↄ̃ Luda yã òareenↄ yã dↄagu. À ń kuuna tàasi kɛ ai à lɛ́a à Luda náanɛ kɛ lán ń bà. 8 Yesu Kirisi dↄ̃nkↄ̃ gĩa kↄ̃n gbã̀ao ai gurↄ píngi. 9 Àton tó wà a sãsã kↄ̃n yã nibↄ pari dannɛnanↄoro. À maa wa swɛ̃̀gbãaa e Luda gbɛ̃kɛɛ guu, èe kɛ sa'opↄble yã kɛ̀ è àre ke kɛ gbɛ̃ kɛ̀ aↄ̃ zɛ̀onↄnɛronlo. 10 Bisakuta sa'orinↄ zɛ́ vĩ wà sa'okii kɛ̀ wá vĩ pↄ́blee blero. 11 Sa'oriki è gɛ̃ Ludakukiin kↄ̃n tubↄ aruo durunnↄ kɛ̃nnɛna yãnzi, ben wè à gɛ̀ kpata bùra kpɛɛ. 12 Beee yãnzi Yesu gà wɛ́tɛ kpɛɛ se, à gbãsĩ bↄ̀ gbɛ̃nↄn kↄ̃n a zĩnda aruo. 13 Wà bↄ wà gá à kiia bùra kpɛɛ, wí wa kũo se. 14 Zaakɛ wá wɛ́tɛ kɛ̀ eégↄ̃ kuu vĩ kɛ̀ro, wɛ́tɛ kɛ̀ èe mↄↄn wa wɛ́ɛ dↄzi. 15 Beee yãnzi wàgↄ̃ Luda sáabu kpá yãana sai Yesu gãzĩ wa sa'ona ũ. Gbaa kɛ̀ à sìsirinↄ è mↄ́on gwe. 16 À làakari dↄ maakɛna kↄ̃n kↄ̃gbɛ̃kɛnaoa. Sa beee taka ona bé è ká Ludanɛ. 17 À a dↄn'aɛdeenↄ yã ma à mì siɛńnɛ, lɛ aↄ̃ e wà zĩi kɛ kↄ̃n pↄnnaao, zaakɛ aↄ̃ↄ dɛ gbɛ̃ kɛ̀ aↄ̃é ń zĩ yã tↄ̃kɛ̃ Ludanɛnↄ ũ. Tó aↄ̃ↄe zĩi kɛɛ kↄ̃n lɛ́suuo, eé àre kɛarero.

Lɛ́zammana

18 À adua kɛwe. Yãkee e wa swɛ̃̀ vĩro, weègↄ̃ yezi wàgↄ̃ kú wa dↄ̀rↄa yã píngi guu. 19 Má wɛ́ɛ kɛawa à adua kɛmɛ, atɛ̃nsa mà e mà mↄ́ a kiia kpakpaa.

20 Luda Aafiade kɛ̀ wa Dii Yesu fɛ̀ɛ bↄna gaan sãdãriki ũ a bà kuunawao gurↄ píngi aru gãzĩ, 21 à a kɛkɛ kↄ̃n maa píngio, lɛ à à pↄyezi kɛ à yã kɛ̀ kànɛ kɛ wa guu Yesu Kirisi gãzĩ. Àmbe à gakui vĩ gurↄ píngi, aami.

22 Ma gbɛ̃nↄ, ma wɛ́ɛ kɛ̀awa àgↄ̃ lɛ́damma yã pì kũna kↄ̃n mɛnao, zaakɛ takada kɛ̀ má kɛ̃̀aree bítaro. 23 Àgↄ̃ dↄ̃ kɛ̀ wà wa gbɛ̃ndo Timↄti gbàrɛ. Tó à kà kɛ̀ tia, wé mↄ́ a gwa lɛdo. 24 À ì kpá a dↄn'aɛdeenↄa ń píngi kↄ̃n Luda gbɛ̃nↄ píngi. Itali bùsudeenↄ ì kpàawa. 25 Luda gbɛ̃kɛɛ kɛare a píngi.