1 Yã pì kɛ̀ Yunusanɛ zaa ai, ben à pↄ fɛ̃̀. 2 À wɛ́ɛ kɛ̀ Diia à bè: N yã nna Dii! Mɛ́ɛ yã beee o zaa ma bùsunloo? Beee yãnzin ma bàa sì mɛ́ɛ taa Tasisizi! Zaakɛ má dↄ̃ kɛ ń sùu kↄ̃n wɛ̃ndaao vĩ. N pↄↄ è fɛ̃ kpakpaaro, ń gbɛ̃kɛ bíta vĩ, nɛɛ̀ yã da n nↄ̀sɛnlo. 3 Tia sa Dii, ǹ ma sɛ́, zaakɛ ma ga wɛ́ɛ sì dɛ ma kuunala. 4 Dii bènɛ: À maa n pↄ fɛ̃̀ↄ́?

5 Yunusa bↄ̀ wɛ́tɛdaa pì guu à gàa à vɛ̃̀ɛ ↄfãntɛ̃bↄɛ kpa. À kutaa dↄ̀ gwe à kú à guu, èe yã kɛ̀ eé wɛ́tɛdaa pì lee dãa. 6 Ben Dii tò zãgã fɛ̀ɛ à ↄra kpà Yunusala lɛ à nawɛ̃a e à lago. Zãgã pì yã tò Yunusa pↄↄ kɛ̀ nna maamaa. 7 Kɛ̀ guu dↄ̀, ben Ludaa tò kↄ̀kↄ mↄ̀ à zãgã pì zↄ̃̀, ben à kori kũ̀ à gà. 8 Kɛ̀ ↄfãntɛ̃ fɛ̀ɛ à gbãa kũ̀, Luda bↄ̀ kↄ̃n ĩa wãaao ↄfãntɛ̃bↄɛ kpa, ben ↄfãntɛ̃ e à lɛɛ a mìa. Kɛ̀ à yɛ̃̀ɛ vĩ dↄro, ben à ga ni dɛ̀ à bè: Ma ga wɛ́ɛ sì dɛ ma kuunala. 9 Ben Luda bènɛ: À maa n pↄ fɛ̃̀ zãgã beee yã musuↄ́? Ben à bè: À maa, à kà mà pↄ fɛ̃ ai mà ga. 10 Ben Dii bènɛ: Zãgã kɛ̀ nɛ́ɛ à zĩi kɛro, ḿbe ń tò à gbã̀ro, ben à kɛ̀nnɛ wɛ̃nda. À fɛ̀ɛ gwãavĩ dooa, ben à gà gwãavĩ do. 11 Mapi sↄ̃, à maa wɛ́tɛda bíta Ninɛva kɛmɛ wɛ̃ndaroo? Aↄ̃ nɛ́ kɛ̀ aↄ̃ↄ ↄplaa dↄ̃kↄ̃zi kↄ̃n ↄzɛɛoroonↄↄ parii dɛ bↄrↄ baswɛɛdoola bensↄ̃ aↄ̃ pↄ́kãdeenↄ kpɛ̀ɛsɛ.