1 Mun-guna jurra ngaypa ng-guna ngu-wukurrjinga ana-gorrburrwa, ng-gunaga ngu-murnangana.

Bambay, a-jay, gun-guna janguny ana-gorrburrwa, minypa nginyipa rrapa aburr-nginyipa gu-ngarda yerrcha nyiburr-garda minypa ngaypa gun-burral jal ngu-nirra ana-gorrburrwa. Minypa ngaypa ngardapa ngika, wurra aburr-werranga aburr-jaranga minypa gun-burral janguny gubi-rrimanga birripa burr-guta jal aburr-nirra ana-gorrburrwa. 2 Ngardawa gu-ngardapa arrburrwa, minypa gun-burral janguny ngubi-rrimanga rrapa ngubi-rrimapa barra nguburr-workiya nguburr-gurdiya warrpam.

3 Wangarr an-gata Nyanyapa arrku, rrapa Jesus Christ an-gata Nyanyapa arrku an-nika An-walkurpa, bitipa abirri-gunggaja barra arrburrwa minypa bitipa burr-guya abirri-mola arrburrwa. Rrapa ngayburrpa gala barra minypa gun-nga ngubu-borrwa nguburr-ni, wurra nguburr-molamola nguburr-ni barra minypa ngubi-rrimanga gun-burral janguny rrapa gurrurta ngubi-rrimanga arrburrwa gu-gapa gu-guta.

4 A-jay, ngaypa ngu-worlworlchinga nguburr-nacha aburr-werranga aburr-nginyipa gu-ngarda yerrcha gu-burral aburr-bamburda aburr-workiya minypa Nyanyapa arrku a-wena barra nguburr-yirda. 5 Rrapa lika gun-guna ngu-wengga barra nggula, a-jay, Bambay: Gurrurta ngubi-rrima barra arrburrwa gu-gapa gu-guta. Gun-narda ngu-wukurrjinga gun-geka ngika joborr, wurra gipa mu-ngoyurra ngubi-rrimarra; gun-maywa, ngaja.✡Jon 13:34; 15:12,17 6 Gurrurta gun-gurrima nipa minypa gun-gunaga: Minypa Nyanyapa arrku ngubu-borrwa barra nula nguburr-workiya gun-nigipa joborr gun-guyinda. Minypa gun-nigipa joborr ana-goyburrpa gipa mu-ngoyurra nyiburr-galiyana minypa gun-gunaga: Ana-goyburrpa barra gurrurta nyibi-rrima barra ana-gorrburrwa nyiburr-workiya gu-gapa gu-guta.

7 A-jay, gun-nardiya rrawa gu-jirra gu-boya gipa gugu an-guyolka an-guyinda an-jaranga a-boya a-workiya a-jirrawa, an-nardiya wupa minypa gala gu-yagurrma nula Wangarr gun-nigipa janguny, minypa gala a-borrwa Jesus Christ nipa ana-bupiyanapa an-gugaliya a-ni Wangarr nyanma. Wurra ana-gata ngacha ana-gugaliya gelama werra burr-nenga a-workiya wurra gama gorlk, minypa an-bachirra a-negiyana nula Christ. 8 Wurra ana-goyburrpa buburr-jarlapiya. Gala yapa borijipa gu-boga gun-gata minypa ana-goyburrpa mu-ngoyurra jama nyiburr-ji. Wurra jarra minypa burraya nyibu-ma burr-gurla gun-goyburrpa gun-molamola gun-gata minypa ana-goyburrpa jama nyiburr-ji. 9 Ana-nga minypa gala Christ gun-nika jarlakarr a-ninya, wurra minypa gu-beybarda a-yurtchinga, an-gata an-gugaliya ngardawa gala Wangarr a-rrima, wurra gun-nyagara. Wurra ana-nga minypa gu-jarlakarr a-ninyarra, an-gata an-gugaliya nipa jarra bijirri-dimanga An-walkurpa rrapa nipa Nyanyapa arrku burr-guta. 10 Ganapiya, lika minyja ana-werranga ana-boga rrapa janguny guna-ganyjin gun-nerranga gun-gata, ngika minypa ngayburrpa ngubi-rrimanga, wurra an-gata an-gugaliya ana-goyburrpa gala barra nyiburr-gonyja nula, nyibi-yarlangga nula rrapa minypa nyibu-burrmaymba. Ngika. 11 Jarra ana-nga minyja a-gonyja nula, nipa burr-guta wugupa gun-nerra jama abirri-jirra ana-gata gun-nika.

12 Ana-goyburrpa ngaypa mola gun-jaranga janguny ngu-rrimanga ana-gorrburrwa, wurra gala jal ngu-ni barra mu-jurra ngu-barnja. Wurra jarra jal ngu-nirra burraya ngu-bengga ana-gorrburrwa, nguburr-nachichiya barra rrapa nguburr-wengga barra nguburr-ni, gu-gurda ngacha. Barra minypa warrpam nguburr-marrkapcha arrburrwa.

13 A-jay, aburr-guna aburr-ninyarra mu-lopa nggu yerrcha jin-guna lamurrpa nggu burr-menga, birripa jal aburr-nirra ngaypa barra nguburr-ngurrja nggula minypa birripa jal aburr-nirra nggula.