1 Gu-gurda nula, jela, worla, mu-nguy buburr-jinyjapa minypa ana-goyburrpa rrapa an-ngayburrpa Bunggawa gu-ngardapa nyiburr-negiyana. Japurra ngapa nyiburr-jirra. Ngaypa jal ngu-nirra ana-gorrburrwa burr-bama burr-rrepara burr-burral. Ngaypa ngu-marrkapchinga ana-gorrburrwa. Ngaypa ng-guna ngu-molamola ngu-nirra ngardawa ana-goyburrpa nyanma, minypa ngaypa marn․gi marn․gi arr-negarra, lika ana-goyburrpa gugu marr nyiburr-balcharra nula Christ.

2 Wurra nyirriny-junarda mu-gama yerrcha Yiwórriya (Euodia) rrapa Jintiki (Syntyche), japurra ngapa nyirriny-jirra, ganapa ngarndarrk ngarndarrk birrinyu-negachichiya. Wurra gu-ngardapa birrinyu-negiya minypa ana-gorrinyjipa rrapa an-ngayburrpa Bunggawa Christ Jesus gu-ngardapa nyiburr-negiyana. 3 Ngaw, ngarla. Rrapa nginyipa, a-lay, ny-junarda gun-burral nginyipa wugupa apula ngarripa arr-mujama nula Christ, nginyipa barra ny-junggaja burrinyjula abirriny-junarda abirriny-jirrapa mu-gama yerrcha, ngardawa mu-ngoyurra birrinyjipa wugupa apula ngayburrpa jama nyiburr-ji gun-guna gun-molamola janguny marrban gun-gata gu-yinmiyana gun-nerra gu-ni arrburrwa gu-workiyana. Minypa abirriny-junarda rrapa an-gata Gulément (Clement) rrapa aburr-werranga aburr-gata burr-guta, ngayburrpa wugupa jama nyiburr-ji, aburr-gurdiya ngardawa minypa aburr-welangga aburr-yurra mu-jurra Wangarr mun-nika mun-gata minypa ngarripa arr-welangga arr-yurra arr-gurdiya wupa minypa wanngu arr-nipa barra arr-workiya.

4 Ana-goyburrpa nyiburr-garda buburr-marrkapcha buburr-ni minypa ana-goyburrpa rrapa an-ngayburrpa Bunggawa Christ gu-ngardapa nyiburr-negiyana. Rrapa barrwa gun-maywapa ngaypa ngu-wengga barra ana-gorrburrwa: Buburr-marrkapcha buburr-ni. 5 Nyiburr-molamola buburr-ni burrwa aburr-werranga warlaman wurra gama gorlk. Yi-gurrepa gu-jirra gu-boya an-ngayburrpa Bunggawa a-bengga barra. 6 Gala barra wargugu nyiburr-ni marrban gu-yinmiya gun-nerra gu-nirra ana-gorrburrwa. Wurra bubu-wenggana Wangarr minypa gun-nga ana-goyburrpa jal nyiburr-nirra, rrapa buburr-japurramaya nula. 7 Rrapa gu-gata wenga Wangarr nyiburr-molamola nyirr-nega barra mu-goyburrpa mu-molma rrapa bama nyiburr-jirra gu-gata ngacha minypa ngarripa gala marn․gi, wurra minypa nipa jama a-jirra rrapa gala gun-nga nyibu-borrwa. Minypa ana-goyburrpa rrapa nipa Christ Jesus gu-ngardapa nyiburr-negiyana, gu-gurda ngacha.

8 Ganapiya, jela, worla, wurra gun-guna ngu-wengga barra gun-gumungba. Minyja gun-nga gun-gata warrpam gun-molamola gun-gumarrkapcha, gurda wupa barra nyibu-borrwa nyiburr-ni nyiburr-workiya: Minypa gun-nga gun-gata gun-burral janguny gun-molamola gun-guyinda marr gun-gubalcha, rrapa gun-nga gun-gata gun-jechinuwa minypa gala gun-nga gun-nerra gu-yu, rrapa gun-nga gun-gata gun-molamola arrburrwa gun-gunyilja, gu-gurdiya ngacha. 9 Janguny nyiburr-bama ngaypa ngu-barnjinga bubu-borrwa buburr-bamba. Minypa janguny ana-goyburrpa nyiburr-galiyana ngaypa ngu-wena ana-gorrburrwa rrapa minypa nyiburr-gurdiya ngunabi-nana ngaypa ngu-yinmiyana ngu-bamuna ngu-workiyana, ana-goyburrpa barra nyiburr-yirdiya nyiburr-bamba; rrapa Wangarr nipa barra wugupa ana-gorrburrwa, an-gatiya arr-wucha a-workiya gun-gata magaya gun-guni.

10 Ngaypa ng-guna Christ ngatipa gu-ngardapa nyirri-negiyana, ngaypa burr-guya ngu-marrkapchinga ngardawa gun-guniya jurdach ana-goyburrpa barrwa ngunabu-borrwuja rrapa nyiburr-gunggajinga apula minypa mu-ngoyurra nyiburr-gunggajinga apula nyiburr-workiyana. Jarra gun-narda ngu-wena, gala ngaypa ngu-borrwujarna jimarna ana-goyburrpa ngunabu-bawuna; wurra ngika. Wurra ngaypa marn․gi ana-gorrburrwa gun-gata gala gu-yinmiyarna rraka ana-goyburrpa nyiburr-gunggajingarna apula. 11 Wurra ngaypa gala ngu-weyarna jimarna ngaypa ngu-nyagara ngu-ni; wurra jarra ngaypa marn․gi ngu-yinmiya barra minypa ngu-molamola ngu-ni ngu-workiya marrban gun-gata gu-yinmiya gu-nirra apula. 12 Ngaypa marn․gi ngu-yinmiya barra ngu-molamola ngu-delipa ngu-ni rrapa ngu-yinmiya barra ngu-molamola wana ngu-ni. Minypa wuriya gu-yinmiya gu-nirra apula, wurra ngaypa gipa marn․gi ngu-ni ngu-bamuna rrapa ngaypa ganyjarr ngu-rrimanga ngu-molamola ngu-nirra ngu-workiya. Minypa gun-nerranga ngaypa balaja mun-jaranga mu-yurra apula, rrapa gun-nerranga balaja ngu-nyagara; rrapa minypa gun-nerranga ngaypa gorlk wana ngu-rrimanga, rrapa gun-nerranga gorlk ngu-nyagara. 13 Wurra wuriya. Wurra ngaypa ngu-molamola ngu-nirra ngardawa ngaypa rrapa Christ gu-ngardapa nyirri-negiyana. Minypa nipa derta nguna-nenga a-workiya rrapa gala gun-nga gun-derta gun-gorla ngu-barripa. 14 Wurpa lika ana-goyburrpa nyiburr-molamola nyiburr-gunggajinga apula gun-gata ngaypa gun-derta ngu-barripuna.

15 Ana-goyburrpa nyiburr-gurdiya Bilipay (Philippi) nyiburr-nirra, ana-goyburrpa marn․gi gun-gatiya mu-ngoyurra ngaypa ng-garlmuna, Mechadóniya (Macedonia) wenga ngu-bona, gun-molamola janguny ng-ganyja ngu-bona, wurra ana-goyburrpa wupa ngardapa nyiburr-gunggajinga apula nyiburr-ni; Wangarr burr-yika aburr-werranga aburr-gata gun-nyagara. Minypa ana-goyburrpa ngunabu-wuna ngaypa mun-nga jal ngu-ni. 16 Rrapa barrwa ngaypa gaba ngu-ni Jechalónika (Thessalonica), ana-goyburrpa mu-nguy nyiburr-gunggajinga apula minypa nyibi-jerrmarra apula nyiburr-workiyana mun-nga ngaypa jal ngu-ni.✡2 Gorint 11:9; Jama Aburr-ji 17:1 17 Ana-goyburrpa ngunabu-wucha nyiburr-workiya ngaypa ngu-marrkapchinga ngu-workiya, wurpa lika ngika minypa ngaypa ngu-menga ngaypa jal ngu-ni, wurra jarra minypa gun-gata Wangarr gu-borrwurra ana-gorrburrwa minypa ana-goyburrpa nyiburr-molamola, gu-gurdiya ngacha. 18 Rrapa ngaypa ganapiya, gala barrwa gun-nga ngaypa jal ngu-ni. Wurra jarra mun-jaranga ngu-rrimanga minypa Yipepradáytach (Epaphroditus) muna-ganyja apula rrapa nguna-wuna ana-goyburrpa nyibu-barnjinga apula. Japurra ngapa nyiburr-jirra, mun-narda minypa gun-maywapa ranginy Wangarr mbi-yalpurda nula aburr-workiya mun-gata mun-molamola mun-gungolkuja, wurra gun-burral minypa ana-goyburrpa nyiburr-garda Wangarr nyiburr-yika gu-galiya yerrcha nyiburr-molamola nyiburr-nirra nula, rrapa minypa nipa a-japurramayana ana-gorrburrwa.✡Exodus 29:18 19 Wangarr an-gatiya nipa jaga a-ganaja apula ngaypa nipa rrapa nyirr-wu barra ana-goyburrpa gun-nga minypa ana-goyburrpa jal nyiburr-nirra, ngardawa minypa ana-goyburrpa rrapa Christ Jesus gu-ngardapa nyiburr-negiyana. Ngardawa nipa Wangarr gu-rrimanga warrpam gun-jaranga gun-molamola gun-guyinda yi-gatiya gu-gujayanaya nipa a-nirra a-workiya. 20 Ganapiya. An-ngayburrpa Wangarr an-gatiya Nyanyapa arrku nipa an-nelangga ngayburrpa barra an-molamola ngubi-negapa barra nguburr-workiya. Gun-nardiya gugu, gun-nardiya gugu, ganapiya.

21 Wangarr burr-yika aburr-garda marr aburr-balcharra nula ana-goyburrpa nyiburr-gurda mu-ngoyurra nyiburr-jirra burrwa ngunabu-ngurrja burrwa, japurra ngapa nyiburr-jirra, minypa ngaypa ng-guna jal ngu-nirra burrwa. Rrapa aburr-ngaypa jawina aburr-guna Wangarr burr-yika, birripa rrapa jal aburr-nirra ana-gorrburrwa. 22 Aburr-guna aburr-jaranga Wangarr burr-yika marr aburr-balcharra nula, birripa jal aburr-nirra ana-gorrburrwa, aburr-guna Jija (Caesar) gun-nika rrawa aburr-nirra burr-guta, wurpa lika birripa burr-guya jal aburr-nirra ana-gorrburrwa.

23 Jesus Christ an-ngayburrpa Bunggawa nipa wugupa ana-gorrburrwa ana-goyburrpa nyiburr-ngurrnga.