1 Keke kaliva lakaina una agodadage aku aiyada vona bikana wagaine una luwageyena, anafaiweya tama wagaine uifuifufu.†Vei 19:32 Ada wa ya nuwaobu ke vona bikana wagaine tubulakata una luwageyedi vaita badi taimomo anafaiweya. 2 Kaduwe, vevine lakaidiyavo wagaidiya wa ya vemoimoina nodi vona bikana wagaine una luwageyedi anafaiweya ina, ada vevine akeakedu vona bikana wagaine una luwageyedi anafaiweya au novu-moe, aku wa ya vemoimoina unadewa yegayegana.

3 Aku sikwasikwa adiitaveyabina faina gana ifufu. Sikwasikwayavo badi gavega keke tamo gaito aditoitaveyabina, ani una vemoimoinedi velemoena ada una itaveyabidi. 4 Kai sikwasikwa-dina wa natudiyavo o kai wa tubudiyavo, gilubodana biyabiyama-dina yadi vemoimoina Yaubada wagaine nagona ina seyegemonena mamauwe yadi gabu wagaidiya, ada inadi o kai tubudi ina itaitaveyabidi ke adiitaveyabina yadi tova kabisodiya ani ina lulufata. Taidei dewa-nai iwakana ada ebavemwamwala Yaubada wagaine.

5 Aku kai sikwasikwa-dina keke natudiyavo ke tubudiyavo e ada keke wa aditoleme, ani badiyavo inuwaveyalaina vaita Yaubada gina lemelemedi, ada yadayada ke bogi iveoveola Banae wagaine. 6 Aku kai sikwa seyadi taudi iawaawaegedi dewa koyona moyaina wagaidiya, ani badi wayawaidi imiyamiya aku aluwaluwadi alialikana Yaubada matane. 7 Kaduwe taidei sikwasikwa adiitaveyabina anaveimeya-dina tovetumagana una veledi ke ina muliyedi, e ada keke seyana gaito anafata gina awavekoyoyedi. 8 Kai gaito seyana tovetumagana aku keke gida avetavetala yana gabu wagaidiya aku lakai-moena ani badi yana manuwa anatomiyayavo keke gida itaveyabi-dewedewedi, aga kaliva-nai awakebulane givonavona evona banae Keliso anatovetumagana, aku yana dewa wagaidiya tauna giawamogatalena vaita yana vetumagana-nai giveweye-moena. Tainei yana dewa-nai koyona, ada badi keke Yaubada ida vetumagane ani yadi dewa koyona gitubusegena.**Badi keke Yaubada ida vetumagane ani au taudiyavo yadi gabu iitaitaveyabidi. Taidei faina banae kaliva-nai givonavona vaita Yaubada givetumaganena aku yana gabu keke gida itaitaveyabi, ani banae yana dewa-nai koyo-moena ayo badi keke tovetumagana.

9 Sikwasikwayavo adiyegana anavetokiluma faina ganavona. Badi vevine-dina adilauboda adiyegana unasena sikwasikwa adiyoo wagaine, ani taidei anafaiweya.

11 Aku badi aimo akeakedu aku isikwa ani adiyegana keke ginaluku sikwasikwa adiyoo-nai wagaine, faina vevine-dina ina vonadabadaba Keliso wagaine vaita ina gugai ekalesiya faine, aku aimo yadi nuwanuwa gina ludigadigagina ke nuwanuwadi inanagi-vagila. 12 Ada yadi vonadabadaba-nai ina yawelina wagaine kaliva ina vonaga, “Waitana, yadi vonadabadaba vaita ida gugai ekalesiya wagaine ani taudiyavo bademowa iyawelina.” E ada adiawavekoyo ina nuwagana. 13 Kaduwe gaitoma tufona ganuwenuwedi ani vevine aimo akeakedu aku isikwa e ani vovodi kwamemedi, ada keke nuwanuwadi miya-kavokavovo gagana aku ilakalakanau mali manuwa ke mali manuwa wagaidiya iveyaveyaina, ke mali kaliva yadi dewa iifuifufuye-dadanedi.†2Tes 3:11 Ada nuwanuwa tulina tulina keke analauboda ina awamogatale ani iifuifufuyedi. 14 Tainei faina nuwanuwaku badi aimo akeakedu aku isikwa ani inanagi-vagila,†1Kol 7:9 biyabiyama ina venatunedi, ada yadi manuwa anatomiya ina itaveyabidi.†Tai 2:5 Tayuwe wai-nai wagaine ide tovetumagana nibaideyavo keke tamo gavana faina adifaiweya ina awavekoyoyeda sikwasikwa-dina faidiya, e ada adayegana ina kikivekoyona. 15 Taidei anafaiweya gavona, faina sikwasikwa tufodi bademowa wai tunutunugina inuvuyoyena ke Seitani yana wai imulimuliyena.

16 Kai gavavavine Keliso anatovetumagana aku yana gabu wagaine sikwasikwa imiyamiya, aga gilubodana gina itaveyabidi e ada toekalesiya keke vita ina veledi. Aku aiyada badi sikwa adikaibe-mowa imiyamiya ani toekalesiya ina itaitaveyabidi.

17 Aku tovetumagana aditonagonayavo faidiya ganavona. Tonagona gavega tovetumagana adiitaveyabina wagaine igugugai iwakana, ani adilauboda tovetumagana ina moinedi lakaina ke yadi nuwakabubu inavele-vefovefofodi, aku lakai-moena badi gavega igugai toyogina laumamala ada vewala wagaidiya. 18 Faina Buki Tabu wagaine givona, “Bulumakau witi givagakolukoluna ani keke gida luboda muduna wana yogoboda bulava wagaine. Au wana awaege gina kanikani. Tainei fatana.” †2Vei 25:4 Kaduwe givona, “Togugai adilauboda fatana ina nuwagana badi biyavo-dina ilemelemedi wagaidiya.” †Mad 10:10, Luk 10:7, 1Kol 9:9-11 19 Kai kaliva anakaibe-mowa toekalesiya aditonagona gina awavekoyoyena vaita gikoyona, aga keke bonana una nogali. Aku kai toitavedama adiselu o kai aditoto inavona aigaigabu vaita tonagona-nai gikoyona, aga yadi vona una venogaledi. 20 Kai gavega tonagona ikoyona-vavagila, aga toekalesiya matatabudi matadiya aku una kivetuvetunudi.†Efes 5:11, Tai 1:13, 2:15 E ada mali tonagona kaduwe ina matauta.†2Vei 13:11

21 Yaku veimeya gasesena wagainiya ani Yaubada matane ke Yeisu Keliso matane ada kadu yana aneloseyavo venuvenuwadadanidi matadiya. Taidei veimeya-dina gaifufuyedi ani una itaveyabidi. Keke badi tonagona ya vevewaga gagana una nuwakalikaliyedi aku mali tonagona wagaidiya una veimeya toyogina. Au moyaidi una itadi aigaigabuya.

22 Kai nuwanuwa gaito tamo gina vetonagona Yeisu yana yoo wagaidiya, aga keke unamadu venuwadadane. Nagona yana dewa unaita-dewedewena e ada kai yana dewa iwakana, aga aimo nima unasena kuluwane ke una veoveola faine ada gina vetonagona. Aku kai una vevilaga ke bana gina vetonagona ani muliya koyona gina faifaisewadi, aga vaita oye bana yana koyona uawaveiwakanena, ani ina o ya koyona. E aku o tauni ya dewa una itaveyabi-dewedewena ada yegayega-moe.

23 Kaduwe gaitoma seyana, tova moyaina au gufa gagana uyuyuga ada tainei faina uveoga sifwayafwayaga, aku nuwanuwaku una galuvaluva maita waini unayuga e ada ya kamo ulolo maita gina tuluna.

24 Kaliva tufodi yadi koyona mogamogatalidi ada valeyana wai ginagona ke tovevonayavuga gialamane-vagaina, aku kaliva tufodi ikavuya-deya ikoyokoyona ada muliya yadi koyona-dina ina yegemona. Tainei vuvuna-nai tonagona keke unamadu venuwadadanedi. 25 Kaduwe anafaiweya, kaliva tufodi yadi dewa iwakana ani wa ebaitana, aku kai kaliva tufodi yadi dewa iwakana keke yoo matadiya ida seseyegemonedi, yadi dewa-dina iwakadi sewasewavuyedi aku aimo kana itanuwagadi.