1 Togugai yogoyogodiyavo faidiya ganavona. Badi gavega tovetumagana aku ivetogugai yogoyogona, ani taudiyavo aditoveimeyayavo**Maita kivemala taidei anafaiweya. Yoo-dina yadi dewa anafaiweya, gavega adiyegana lakaidi ani wa yadi togugai yogoyogodi, ada badi togugai-dina aditoveimeyayavo faidiya ifaifaisewa aku keke ida fatafatadi aku iitaitaveyabidi. (Efes 6:5, Kol 3:22 - 4:1) ina itanuwenuwedi vaita adilauboda ina vemoimoinedi velemoena, e ada Yaubada anayegana ke yada vewala ani keke tamo gaito anafata ginavona awadamane.†Tai 2:9-10 2 Aku badi togugai-dina yogoyogodi gavega aditoveimeyayavo ivetumagana Keliso wagaine ani tufodi ivonavona, “Kaliva-nai akutoveimeya ani banae tubuiyaku Keliso yana yoo wagaine faina, amaiselu seyana. E ada keke akulauboda yana veimeya dibune gana miyamiya.” Aku vona taide anafaiweya ani keke iwakana. Aiyada ida nuwanuwa ida vonaga, “Bana akutoveimeya yaku faisewa wagaine leme ginuwanuwagana, ani banae kaduwe tovetumagana Yaubada ginuwakabubuyena.†Fim 16 Taidei faina wa yaku idibumwaiga gana faifaisewa bana faine.”

Taidei gaitoma-dina ani kaliva una vevewaledi ada una kiveasevatudi ke ina mulimuliyedi. 3 Yada Kauveya Yeisu Keliso yana vona ani iwakadi, ada yana vewala gilemelemeda e ada wa yada vemoimoina Yaubada yana veimeya kana matawalewaleyedi. Aku kai tamo gaito yana nuwanuwa keke gida veaigaigabu Keliso yana vewala-nai nodi ada kai vewala tulina givevewala,†Gal 1:6-9, 2Tim 4:3-4 4 aga banae wa yana nuwalaka ginuwanuwa, givona, “Yaku alamana lakaina,” aku velemoena banae keke nuwana gidamali tamo gavana faine. Biyavo-dina yadi nuwanuwa anafaiweya, ani tova moyaina nuwanuwadi vona tulina tulina faidiya ina gavekwavekwageya, ada taidei wagaine ina kivemeyameyaganina ke kaliva ina vevonavona, ada ina ifufu koyona kaliva faidiya e ada adiyegana ina kikivekoyona. Ada inamadu nuwanuwa vaita kaliva yadi dewa kai yadi vona vuvudi ani koyona. Ada kaduwe kaliva ina italuveyedi ke gaito anayegana lakaina, banae ina agougena. 5 Badi tova moyaina igavekwavekwageya faina yadi nuwanuwa bwanebwanenedi, ada Yaubada yana nuwanuwa tunutunugidi nagona nuwadi gimalina, aku malinai ani nuwadi gitufa. Ada inuwanuwa sidamana vaita Yaubada anavemoimoina ke yana veimeya anamatawalewale wagaidiya babi anakaikaiwabu ina nuwagana.

6 Aku kaikaiwabu velemoena ani taidei anafaiweya. Wa yada vemoimoina Yaubada yana veimeya kana matawalewaleyedi, ada kaduwe gavagiba bademowa wagaideya ani wa yada vemwamwala aku kana miyamiyanena.†Fip 4:11-12, Ibel 13:5 Taidei kaikaiwabu velemoena. 7 Faina ide makagekagedeyavo katubuga, ada aimo kaduwe makagekagedeyavo kana alika. Keke tamo gavana adafata kana nauwe.†Iyob 1:21, Sam 49:16-20, Tol 5:15 8 E ada kai wa adaga ke wa adanuya, aga kanavona, “Bademowa adafaiweya.” †Eba 28:20, Vona 30:8 9 Aku badi nuwanuwadi lakaina ina vekaikaiwabu,†Vona 15:27, 28:20, Mad 13:22 ani yadi italuvadiga gina aladibidibiyedi ke gina taitaidi, ada koyona moyaina ina gugugaiyedi. Anaalamana vaita badi seyana kevakeva anafaiweya iona dai wagaine. Inabeu ada gaitoma tulina tulina ina itaitaluvadigedi aku gaitoma-dina ina ivekwavadi, ada koyona-dina faidiya uloulolo lakai-vagaina ina nuwagana. Ada agolaufofola anawai wagaine ina naunau. 10 Faina babi anakaikaiwabu anaitaluvadiga ani koyona moyaina vuvudi. Ada kaliva tufodi kaikaiwabu iitaitaluvadigena†Iyeg 23:8, 2Vei 16:19, Efes 5:5 aku Yeisu anavetumagana anawai inuvuyoyena, e ada aseuloulolo moyaina wagaine taudiyavo ibiveonadi.

11 Aku oyeni Yaubada yana kaliva, ani taidei dewa-dina koyodi wagaidiya unaota. Tauni ya nuwanuwa una sevelavelalaina ke ya dewa matatabuna gina tunutunugina. Wa ya vemoimoina velemoena Yaubada yana veimeya una matawalewaleyedi, Yeisu anavetumagana una vegugaiyena, una vetonuwakabubu, kai tova iwakana o kai vitana ani Yaubada anavemoimoina keke maita una ilova, ada kaduwe unavona bikabika moyaidi wagaidiya. 12 Yaubada givenuwadadaneni ke yawai-vagata una nuwagana, ada tuwaina toitavedama moyaidi matadiya aku ya vetumagana Keliso wagaine uawamogatalena. E ada oyeni vaita tolugaviya iwakana anafaiweya, Keliso anavetumagana anagaviya wagaine una vedivediwe toyogina ke tainei yawai-vagata-nai una kiveyabina.†1Kol 9:24-25, 2Tim 4:7 13 Yaubada matane, Banae gaitoma moyaina yawaidi giveleveledi, kaduwe Yeisu Keliso matane, Banae Tauna giawamogatalena Ponitiyo Pailato matane,†Mad 27:11, Mak 15:2, Luk 23:3, Iyo 18:33-37 ani o gavonavagadone-moeni. 14 Veimeya-dina yada Kauveya giveleda ani una gugaiyedi. Kai veimeya vitana o kai veimeya keke vitana aku keke una dibusoyoge, e ada keke tamo gaito anafaiweya ya dewa ginaita-yo gina duweyeni. Gilubodani veimeya-dina una itaveyabidi analaba yada Kauveya Yeisu Keliso ginayewa-vagila. 15 Tainei tova-nai ani Yaubada gina seyegemonena gavatova gilubodana wagaine, Yaubada Banae vemwamwala velemoena vuvuna ada anakaibe-mowa Toveimeya, Banae kiniyavo yadi Kini ke kauveyayavo yadi Kauveya.†Ive 17:14 16 Banae anakaibe-mowa keke gida alialika, ada malina lunamanamalina wagaine gimiyamiya, analunamanamala ani keke seyana gaito anafata maita gina nuyegemona wagaine.†Iyeg 33:17-23 Ide babi anakalivayavo wagaideya ani keke tamo gaito Banae gidaita, kaduwe keke gaito anafaiweya ginaita. Banae anayegana kana kikilakaina! Ada yana toyogina gimiya-vagata tova matatabuna wagaidiya keke anaebalauyabu. Ika anafaiweya.

17 Badi gavega babi analokoloko wagaine ivekaikaiwabu ani una vonedi, keke gida luboda ina nuwalaka vaita badi iwakadiyavo ayo mali kaliva,†Lom 12:3,16 kaduwe keke yadi nuwavetumagana ina sesei yadi kaikaiwabu wagaidiya ke inavona, “Iya tokaikaiwabu faina, keke tamo koyona gina yegemona wagaikuya.” Faina kaikaiwabu-dina ani keke kada alamane velemoena kai ina miyamiya o kai keke.†Vona 23:4-5, Luk 12:15-21 Aku aiyada Yaubada wagaine yadi nuwavetumagana inasedi, Banae Toavetavetala wa yana nuwadoga gaitoma moyaidi giveleveleda yada ebavemwamwala faidiya. 18 Kaduwe una vonedi ada ina gugai iwakana kaliva wagaidiya ke yadi gugai iwakana moyaidi wagaidiya ina kaikaiwabu, kaduwe wa yadi nuwadoga ina avetavetala. 19 Kai badi inadewa anafaiweya, e ani wada yadi kaikaiwabu keke avaavaina ani iluluvelaka yadi miya tova gielaelai faine, tainei vaita avutuwa iwakana iyogoyogona.†Mad 6:19-20 E ada yawai-nai ina kiveyabina ani yawai velemoena.**Kai tamo gaito Yeisu gina vetumaganena ke Yaubada yana kibababala gina nuwagana, aga gina seyegemonena tauna yawaina ke yana gugai iwakana wagaidiya. (Mad 7:21, 25:34-40,46)

20 Timoti, oyeni wa avetumagana Yaubada matane e ada aveimeya giveleni ani una itaveyabina.†2Tim 1:14 Keke una noganogala badi gavega nuwanuwadi gaitoma kwavakwava faidiya ina ifufu, wada keke gida luboda vewala velemoena Yaubada wagaine-deya. Badi ivona vaita gavana ivevewala ani wada vewala tunutunugina Yaubada faina, ada vaita ‘alamana velemoena’. Aku velemoena ani keke. E ada yadi ifufu-kavokavovo kana velovelovogena. Keke nodi kana vevonavona. 21 Tayuwe vewala-dina ivewaga-kavovona ‘nuwauya’, ani kaliva tufodi imulimuliyena e ada Yeisu anavetumagana anawai inuvuyoyena.†2Tim 2:18

Gaveola Yaubada yana nuwadogeya gina lemelemeni.