18
Yudasa Isakaliyota Yeisu giatuegena nibainavo nimadiya.
Mad 26:47-56; Mak 14:43-50; Luk 22:47-53
1 Yeisu giveoveola giavaina, yana tonogalayavo nodi itauya inau ada iobu bwagala-nai anayegana Kidiloni idamanina. Ada wadedeku fafaline ani ai olive ibakulidi anafafali, ada Bana yana tonogalayavo nodi iluku wagaine. 2 Aku Yudasa, bana Yeisu gina atuegena nibainavo nimadiya ani ebaga-nai kadu gialamanena, faina tova ke tova wadedeku-deya Yeisu yana tonogalayavo nodi inauna ivagavagauta. 3 E au bana Yudasa fafali-nai waina yoo ginagoyedi. Yoo-nai ani Loma anatolugaviya adiyoo seyana ke kaduwe, manuwa tabu anafilisimani tufodi badi Falisiyavo, ke veyavo anatovegugai lakaidiyavo iimilidi. Ada odama ke mayale ada lokoloko gaviya iwaidi inauwedi, e ada nodi iyegemona ebaga-nai wagaine.
4 Yeisu bademowa gialamanena gavana moyaina ina yegemona Bana wagaine, e ada givaga-yegemona gitolidadana, givona, “Gaito walelele?”
5 Badi ilufata, ivonaga, “Yeisu, kwana Nasaledi.”
Ada Bana Yeisu givonaga, “Iya kaliva-moeku Tauku.” Ada Yudasa bana nuwanuwana Yeisu gina atuegena badi nimadiya ani wadedeku nodi imidimididi. 6 Tova-nai Yeisu givonedi, “Iya kaliva-moeku Tauku,” ani badi au ivaga-yewayewa ada ibeu babiya. 7 Taidei faina kaduwe gitolidadanedi, givona, “Gaito walelele?”
Ada badi kadu ilufata, ivona, “Yeisu, kwana Nasaledi.”
8 Yeisu givonaga, “Bade gavonemi, ‘Iya kaliva-moeku Tauku’. E ada kai Iya kaliva-kuna waleleleku aga kaliva-dina taidei wana imilidi inanau.” 9 Taidei anafaiweya givona faina yana veola-nai gimadu vonayena Tamana wagaine ani gina luveyegemonina velemoena, givonaga, “Kaliva-dina uveleku ani keke tamo gada nusege.” †Iyo 6:39, 17:12
10 Aku Saimoni-Pita, banae yana benisi giwaina ani gisiwakana ada kaliva seyana tagana aiyatagina gitalayoe gibeu. Bana kaliva-nai ani veyavo anatovegugai aditonagona yana togugai seyana, anayegana Malekasi. 11 Yeisu Pita givonena, “Ya benisi una seyewena anafoseya! Vei-nai Kamaku gisena faikuya**Taidei vona-nai ‘vei-nai’ ananuwanuwa ani uloulolo-nai Yeisu gina nuwagana. E ada yana vona ananuwanuwa ani taidei anafaiweya. “Uloulolo-nai Kamaku giveleku ani gavaiyamu, kai keke uda nuwanuwa vaita gilubodaku ke gana ulouloloyena?” (Mad 26:39, Mak 14:36, Luk 22:42) ani gavaiyamu, nuwanuwa keke ganayuge?”
Yeisu ikiveyabi inauwena Anasi wagaine ivevonayavugina.
12 Ada tolugaviya adiyoo-nai wa aditonagona nodi ada kaduwe manuwa tabu anafilisimani-dina, ani biyavo-dina au Yeisu ikiveyabi nimana iyogodi, 13 ada imadunauwena Anasi wagaine ke Yeisu yana vona gina nogalina. Anasi-nai ani Kaiyafasi vavinena tamadi. Aku Kaiyafasi tauna ani malamala-nai wagaine banae veyavo anatovegugai aditonagona. 14 Bana Kaiyafasi ani banae-nai boi meIsileli tonagonayavo giluwageyedi, givona, “Kai kaliva seya-moena gida alika moyaida faideya aga iwakana.” **Kaiyafasi yana vona ani una nuwagana Iyoni 11:49-51 wagaine.
Pita Yeisu gialamanena aku giveweyena.
Mad 26:69-70; Mak 14:66-68; Luk 22:54-57
15 Aku Saimoni-Pita ada kadu tonogala seyana adiselu atuwadeya Yeisu imulimuliyena, ani inau ada iyegemona veyavo anatovegugai aditonagona yana manuweya. Aku tonagona-nai ani tonogala-nai anavelu gialamanena, e ada banae Yeisu nodi iluku kali anawana wagaine, ada moyaidi imiyamiya Bana nodi, 16 aku Pita banae wamelaleya kali anawana wagaine gimidimididi. Ada tonogala anavelu banae veyavo anatovegugai aditonagona gialamanena, ani giyewa togugai vavine wana giitaitaveyabina ke givonena wana gida yavuna, e ada Pita givagaule kadu giluku. 17 Aku bana vavine-nai gitolidadanena Pita, givona, “Kai anaita oye ani kadu kaliva taidei yana tonogala seyana, aiyo?”
Bana Pita gilufata, givona, “Iya, keke.”†Iyo 13:38
18 Aku tayuwe tova-nai tulutulu anatova, e ada manuwa-nai anatogugaiyavo ke filisimaniyavo nodi ai ikulina ada imidififi ivevevala, ada Pita kadu nodi imidimididi aku ai givalavalana.
Veyavo anatovegugai aditonagona Yeisu gitoliluvaluvayena.
Mad 26:57-68; Mak 14:53-65; Luk 22:66-71
19 Ada Pita ani givevevala ai wagaine aku tayu manuwa-nai negenine-deya, bana veyavo anatovegugai aditonagona Anasi**Anasi ani tuwaina banae veyavo anatovegugai aditonagona, e ada idedeku maita-nai wagaine Iyoni givewagana veyavo anatovegugai aditonagona, aku veyavo anatovegugai aditonagona velemoena tova tayuwe anamalamala-nai wagaine ani Kaiyafasi. Yeisu gitoliluvaluvayena yana tonogalayavo faidiya ke kaduwe gavana kaliva givevewaledi faina. 20 Bana Yeisu gilufata, givona, “Tova moyaina gavana gavevewala ani mogamogatalina kaliva moyaidi matadiya ada kaduwe manuwa ebavewala wagaidiya ke manuwa tabu wagaine, wadedeku-deya meIsileli moyaidi ivagavagauta.†Mad 26:55, Iyo 7:26 Keke tamo yaku vona gada vonaye ikavuya-deya. 21 E aku gavaiyamu-yo Iya utoliluvaluvayeku? Badi gavega ivanevanenegeku una toliluvaluvayedi. Badiyavo ialamanena gavana gavonavonaye.”
22 Taidei anafaiweya Yeisu givona, ada au manuwa tabu anafilisimani seyana gimidimididi lilivane ani gitafina magigina wagaine ada givonena, givonaga, “Gavaiyamu ada taide anafaiweya Yaubada yana veyavo anatovegugai lakaina wagaine ulufata? Keke uda vemoimoine, aiyo?”
23 Aku Yeisu gilufata, givona, “Kai yaku vona-nai koyona aga una awatalatalaina koyona-nai Iya gafaisewana. Aku kai gavona tunutunugina aga gavana faina utafiku?”
24 Ada au Anasi Bana Yeisu nimana aimo yogoyogona giimili ginau Kaiyafasi wagaine, banae veyavo anatovegugai aditonagona.
Pita Yeisu givewaye-vagilena.
Mad 26:71-75; Mak 14:69-72; Luk 22:58-62
25 E aku Saimoni-Pita aimo gimidimididi aku givevevala ani tufodi nodi ivevevala ivonena, ivona, “Gavaiyamu, kai oyeni ani kadu yana tonogala seyana, aiyo?”
Aku Pita giveweyena ada givona, “Iya keke.”
26 Aku veyavo anatovegugai lakaina yana togugai seyana, banae yana gabu seyana tagana Pita gilugoloina ani kaliva-nai gimididi Pita givonena, givonaga, “Aiyo, o vaita gada itani boi bana kaliva-nai nodi ai olive anafafali wagaine?”
27 Kadu Pita givewa-vagila ani kamukamu gikwage.†Iyo 13:38
Yeisu givonayavuga Pailato wagaine.
Mad 27:11-26; Mak 15:1-15; Luk 23:1-25
28 Malabutuya-mwaeya Yeisu anavevonayavuga Kaiyafasi matane giavaina, ada Yeisu ivaina Kaiyafasi yana manuweya-deya ada inauwena aditoveimeya lakaina yana manuwa wagaine, anayegana Pailato.**Banae Pailato ani toveimeya-nai Loma kabemali isena Isileli anafafali seyana anayegana Yudiya wagaine. Banae toveimeya-nai keke kwana Isileli, ada taidei faina meIsileli-dina ikwayabudi nodi inau ani ivonaga, “Kai kanaluku kwana Loma yana manuweya aga adaawata kana yawelina, ke taudeyavo kana kivebwaneneda Yaubada matane e ada keke adafaiweya Nugulina Abutuna ana aa kanakani.” Taidei faina biyavo-dina imiya wamelaleya. 29 Ada badi keke idaluku faina, Pailato giyegemona gielai wagaidiya gitolidadanedi, givona, “Gavana tamo koyona giveinubaye kaliva taidei wagaine, e ada faina waaliye?”
30 Badi ilufata, ivonaga, “Kai Banae velemoena keke koyona gida faifaisewa aga keke ada aliye ada atuege wagainiya.”
31 Ada Pailato givonedi, givona, “Au imi taumiyavo wanavai wana nauwena ke taumiyavo yami veimeya wagaidiya wana vevonayavugina.” **MeIsileli aditonagonayavo yadi awavekoyo Yeisu faine ani keke tamo wa vuvuna Loma kabemali yana veimeya wagaidiya. E ada Pailato keke nuwanuwana Yeisu gina vevonayavugi. Taidei faina givona, “Imi taumiyavo wana vevonayavugina.”
Aku badi meIsileli ilufata, ivonaga, “Aku imi meLoma yami veimeya wasena ime meIsileli faimeya e ada keke wa amaawaega taumeyavo ana veimeya ke kaliva ana luvealika.” 32 Taidei yadi vona-nai ani Yeisu yana vona giluveyegemonina velemoena, tova-nai gimadu vonayena gavaiyamu yana alika-nai gina alikaye.†Mad 20:19, Iyo 3:14, 12:32
33 Ada Pailato giluku-vagila manuwa wagaine ada gidouwedi Yeisu ialiyena wagaine ada gitoliyena, givona, “Gavaiyamu, velemoena Oyeni meIsileli yadi Kini?”
34 Yeisu gilufata, givona, “Gavaiyamu, tainei tauni ya nuwenuweya ada anafaiweya uvona, o kai mali kaliva ivoneni Iya faikuya?”
35 Pailato givonena, givona, “Iya keke kwana Isileli! E ada gavaiyamu gana alamane taide nuwanuwa-dina? O Tauni ya kalivamomo ke kadu veyavo anatovegugai lakaidiyavo, e biyavo-dina ialiyeni ada iatuegeni Iya wagaikuya. Gavana tamo koyona ugai?”
36 Ada Yeisu gilufata, givona, “Yaku ebaveimeya ani vuvuna keke babi taide wagaine-deya. Kai vuvuna gida miyamiya babi taidei wagaine aga yaku togugaiyavo ida mididi ida lugaviya ke ida babaliku, e ada meIsileli aditonagonayavo keke adifaiweya ina kiveyabiku. Aku keke. Yaku ebaveimeya vuvuna ani keke babi taidei wagaine-deya.”
37 Ada Pailato givona, “E ada gavaiyamu, velemoena Oye seyana kini?”
Yeisu givona, “O tauni uvona Iya kini. Aku velemoena vuvuna-nai faine gaelai babi taidei wagaine ada kadu vuvuna-nai faine gatubuga ani nuwanuwa velemoena gana awamogatalena kaliva wagaidiya. Ada badi gavega nuwanuwadi nuwanuwa velemoena ani bonaku ina noganogalina.”
38 Pailato gitolidadana, givona, “Aku nuwanuwa velemoena ani gavana?” Taidei anafaiweya givona ada giyegemona wamelaleya meIsileli-dina wagaidiya ada givonedi, givona, “Iya keke tamo koyona gada nuwaga Banae wagaine. 39 Waitana, tova malinai ani Nugulina Abutuna, ada yami dewa malamala seyana seyana ani taidei Abutu-nai anatoveya kaliva yogoyogona seyana deli wagaine gana etoyavuna ginaobu wagaimiya. E ada gavaiyamu, nuwanuwami Banae meIsileli yami kini gana etoyavuna?”
40 Aku badi iagofaifaina-vagila, ivona, “Keke! Keke Banae kaliva-nai! Una velema Balabasi!” Aku Balabasi bana tubuiyanavo nodi gaviya isisilakaina Loma anakabemali wagaidiya.†Mad 27:20-21, Mak 15:11, Luk 23:18
**18:11 Taidei vona-nai ‘vei-nai’ ananuwanuwa ani uloulolo-nai Yeisu gina nuwagana. E ada yana vona ananuwanuwa ani taidei anafaiweya. “Uloulolo-nai Kamaku giveleku ani gavaiyamu, kai keke uda nuwanuwa vaita gilubodaku ke gana ulouloloyena?” (Mad 26:39, Mak 14:36, Luk 22:42)
**18:14 Kaiyafasi yana vona ani una nuwagana Iyoni 11:49-51 wagaine.
**18:19 Anasi ani tuwaina banae veyavo anatovegugai aditonagona, e ada idedeku maita-nai wagaine Iyoni givewagana veyavo anatovegugai aditonagona, aku veyavo anatovegugai aditonagona velemoena tova tayuwe anamalamala-nai wagaine ani Kaiyafasi.
**18:28 Banae Pailato ani toveimeya-nai Loma kabemali isena Isileli anafafali seyana anayegana Yudiya wagaine.
**18:31 MeIsileli aditonagonayavo yadi awavekoyo Yeisu faine ani keke tamo wa vuvuna Loma kabemali yana veimeya wagaidiya. E ada Pailato keke nuwanuwana Yeisu gina vevonayavugi. Taidei faina givona, “Imi taumiyavo wana vevonayavugina.”
†18:32 Mad 20:19, Iyo 3:14, 12:32
†18:40 Mad 27:20-21, Mak 15:11, Luk 23:18