15
Yeisu givonayavuga Pailato wagaine.
Mad 27:1-2,11-14; Luk 23:1-5; Iyo 18:28-38
1 Mala gilavuna malabutuya-mwaeya, maduga-mowa badi veyavo anatovegugai lakaidiyavo ada kaliva lakaidiyavo ke veimeya anatovewalayavo ada kaduwe meIsileli yadi Kanisela, moyaidi ivagauta ke nodi iveimeya gavana inagai. Ada Yeisu nimana iyogodi ke inauwe iatuegena Pailato wagaine.**Pailato ani banae kwana Loma, ada meLoma ivenuwadadanena banae meIsileli aditoveimeya lakaina. Ada Loma anakabemali yadi veimeya seyana ani taudiyavo adifaiweya kaliva yana koyona anamatavuloga faina ina luvealikana, aku meIsileli iawatadi e ada keke adiawaega ke kaliva yana koyona anamatavuloga faina ina luvealika. Taidei faina meIsileli Yeisu ialiyena Pailato wagaine. (Iyo 18:31) 2 Ada Pailato gitolidadanena, givonaga, “Gavaiyamu, Oyeni meIsileli yadi Kini?”
Ada Yeisu gilufata ke givona, “Au uvona anafaiweya.”
3 Ada veyavo anatovegugai lakaidiyavo Yeisu iawavekoyoyena gaitoma moyaidi wagaidiya. 4 Ada kaduwe Pailato Yeisu gitolidadane-vagilena, “Gavaiyamu, keke maita ya laufata? Uitana, yadi awavekoyo wagainiya ani moyai-moena.” 5 Aku kaduwe Yeisu keke tamo laufata gida vonaye.†Ais 53:7 E ada Pailato meyana gisidobona.
6 Aku Nugulina Abutuna anatova seyana seyana wagaidiya, Pailato yana dewa ani kaliva yogoyogona seyana deli wagaine gina etoyavuna, banae-nai faine yoo ina veolena. 7 Ada tayuwe tova-nai wagaine kaliva seyana yogoyogona gimiyamiya anayegana Balabasi, ani kabemali nibaidiyavo nodi deli wagaine imiyamiya, faina badiyavo veimeya iawaegegena ada nodi ilugaviya ke kaliva tufodi iluvealikadi. 8 Ada tova-nai yoo lakaina ivagauta ada iveola Pailato wagaine anafaiweya yana gugai malamala seyana seyana. 9 Ada Pailato gitolidadanedi, givona, “Gavaiyamu, nuwanuwami Banae meIsileli yami Kini gana etoyavuna faimiya?” 10 Faina gialamanena velemoena veyavo anatovegugai lakaidiyavo nuwanuwadi lakaina kaliva badi ina vemoimoinedi, aku iitanuwagana moyaidi ani Yeisu ivemoimoinena ke imulimuliyena, e ada agodi giuga Banae wagaine. Ada taide vuvuna-nai faine Yeisu ikiveyabi inauwena ada iatuegena Pailato wagaine.†Iyo 11:47-48, 12:19 11 Aku veyavo anatovegugai lakaidiyavo yoo-dina iivenuwanuwadi toyogina ke Pailato ina veolena vaita Yeisu ginamiya aku Balabasi gina etoyavuna. E ada taidei anafaiweya Pailato ivonena. 12 Ada Pailato kaduwe yoo gitolidadane-vagiledi, givona, “Gavana ganagai kaliva-nai wagaine banae wavewagana ‘MeIsileli yadi Kini’?”
13 Aku yoo ivedou, ivonaga, “Una kivebolagalagana!”
14 Ada Pailato givona, “Gavana faina? Gavakoyona gigai?”
Aku badi bonadi kaduwe gilaka-mowa, ivedoudou ivona, “Una kivebolagalagana!” †Gug 3:14 15 Ada Pailato nuwanuwana yoo gina kivemwamwalidi faina, Balabasi gietoyavuna faidiya. Ada Pailato giveimeya ke tolugaviya Yeisu ilubibiwalina, ada nimadiya gisena ke ina kivebolagalagana.†Mad 27:26, Luk 23:16, Iyo 19:1
Tolugaviya Yeisu iawaveleigena.
Mad 27:27-31; Iyo 19:1-3
16 Ada Pailato yana tolugaviyayavo Yeisu ikiveyabina ada inauwena veimeya anamanuwa lakaina anaebageya, ada tolugaviya adiyooyavo idouwevagauwidi. 17 Ada nuya yabeyabelina luveyalilina wagaine Yeisu iveosena, ke bulava akakaluluna imetana ani kedukedu kaikaiwabuna anafaiweya ada kuluwane isena.**Tova tuwaina nuya yabeyabelina ani kini adiveigavu. E ada nuya seyana anafaiweya ani tolugaviya iveosena Yeisu wagaine, faina ina awaveleigena. 18 Ada ivevuvu ke awaveleigeya iludakedakeyena, ivona, “Siule! Oyeni meIsileli yadi Kini!” 19 Ada aiwala ivai kuluwana ilavulavuna, ada ikiwalitagotagona aku awaveleigeya tugadi ivetodonedi ke ioduodu wagaine.†Luk 23:11 20 Iawaveleigena giavaina, nuya yabeyabelina iveyalilina aku tauna ananuya iveosena ada iyegemone inauwena ke ina kivebolagalagana.
Yeisu ikivebolagalagana.
Mad 27:32-44; Luk 23:26-43; Iyo 19:17-24
21 Ada itauya Yeisu inaunauwena aku kaliva seyana kwana Sailini inudebaina, anayegana Saimoni. Yana fafaliya gitauya ke Yelusalema wagaine gielaelai. Banae Alekisanida ke Lufuso tamadi. Ada tolugaviya iluyayalina ke Yeisu anakelose gina avalana. 22 Ada Yeisu inauwena fafali-nai ivewagana Goligota wagaine. Tainei ‘Goligota’ anakivila ani ‘Kuluwa Sewakelu Anafafali’. 23 Ada waini ke mulamula nodi ivila ivelena, aku keke gidayui. 24 Ada ikivebolagalagana. Aku ananuya ivai ivutugedi taudiyavo gaga wagaidiya, taine kabala anaselakalakata anavenuwadadana wagaine.†Sam 22:18, Iyo 19:24 ke anaailabama adiebakivemala
25 Wada malabutuya kauwana naeni kiloki wagaine Yeisu ikivebolagalagana. 26 Aku anaawavekoyo ivetokilumina anakelose wagaine ani givona,
“MeISILELI YADI KINI.”
27-28 Ada kaduwe tobaninivula adiselu Yeisu nodi ikivebolagalagadi adikelose wagaine, seyana aiyatagine, kadu seyana aimauline.†Ais 53:12 29 Ada kaliva wai wagaine inaunau ani Yeisu ivona awadamanena, ivona, “O uvona evona manuwa tabu uda yawelina aku yadayada toiye wagaine kadu udayogo-vagilena. Nikayo! 30 Tauni una kibababaleni ada una etoyavuni kelose wagaine unaobu!” †Sam 22:7, Mak 14:58, Iyo 2:19
31 Ada kadu anafaiweya veyavo anatovegugai lakaidiyavo ke veimeya anatovewalayavo ani Yeisu iawaveleigena, ivona, “Mali kaliva gikibababaledi, aku keke anafata Tauna gina kibababale! 32 Evona, Banae Mesaiya kadu Isileli anakini, malinai-mowa kelose wagaine gidaobu, e ada kanaita kana vetumagana!” Ada adiselu nodi ikivebolagalagadi ani badi kaduwe iawavekoyoyena.
Yeisu yana alika faina.
Mad 27:45-56; Luk 23:44-49; Iyo 19:28-30
33 Ada bademowa kauwana gielai anafaiweya givugivudeya ani yuyuvana babi matatabuna giyuyuvanibodena, ada gimiya analaba kauwana au gienovilana teli kiloki wagaine. 34 Ada tova-nai wagaine Yeisu givedou bonana lakaina, givona, “Eloi, Eloi, lama sabakitani?” Vona taidei anakivila, “O yaku Yaubada, yaku Yaubada, gavana faina unuyabuyabuku?” †Sam 22:1
35 Ada kaliva tufodi wadedeku-deya imidimididi ani bonana inogalina ke ivona, “Wana nogalina! Wada Ilaitiya gidoudouwena, bana Yaubada yana falofita.”
36 Ada wagaidiya-deya kaliva seyana gimadu ginau balou giutuvina waini gikoyo wagaine, ada aiwala bwatane give etoonana ke gitune lakavena Yeisu awane gisena vaita ginayuna, ada givona, “Kanaboda aku kana itana. Kai Ilaitiya ginaela gina kakili gina seobuyena o kai keke.”
37 Ada Yeisu givedou moiyalina ke yawaina giavaina.
38 Ada manuwa tabu anaTutulagolota Tabutabu-moena ani anawana anaebaseboda kaleko†Iyeg 26:31-33 giagigi-lugena, tabone ada giobu dibune.†Ibel 10:19-20 39 Aku tolugaviya aditonagona gimidimididi Yeisu wamagigine, ani giitana yana alika anaita anafaiweya ada givona, “Vona velemoena, taidei Banae Yaubada Natuna!”
40 Aku kadu vevine tufodi badi Yeisu yana tonogalayavo, ani imididi maita tabae kelose wagaine aku imatawabuwabu. Badi wagaidiya-deya Meli vine Magidala, ada Meli Iyosefa taina Iyemesa nodi inadi, ke Salome.†Luk 8:2-3 41 Biyavo-dina tuwaina Galili wagaine Yeisu imuliyena ke tova moyaina ilemelemena. Ada kadu vevine tufodi Yeisu nodi ielai Yelusalema ani iitaita.
Yeisu vovona isena didikula luwa wagaine.
Mad 27:57-61; Luk 23:50-56; Iyo 19:38-42
42 Yadayada-nai ani Tova Kidewadewa, faina malabutu Sabate. Ada bademowa mala givelavilavi ani 43 Iyosefa kwana Alimatiya giyegemona. Banae meIsileli yadi Kanisela anayoo seyana, ada kaliva moyaidi matadiya banae ani wa anavemoimoina ada wa anavetumagana. Aku kaduwe, gibodaboda gavatova Yaubada yana ebaveimeya gina lakayegemona. Banae kaliva-nai wa yana asevatu ginau Pailato wagaine Yeisu vovona faina giveolena ke gina kiwafina. 44 Ada Pailato gitataweyana faina ginogalina vaita Yeisu bademowa gialika, e ada tolugaviya aditonagona gidouwe gielai ada gitolidadanena, “Velemoena Yeisu bademowa gialika?” 45 Ada tova-nai Pailato yana alamana givaina tolugaviya aditonagona wagaine, Yeisu vovona giawaegena Iyosefa wagaine.
46 Ada Iyosefa gina toalika analifi kwayakwaya-moena gikimone ginauwena, ada Yeisu vovona gikakilina kelose wagaine ke nuya-nai wagaine gifaina. Ada vovona ginauwena ke gilukuwena didikula wagaine. Didikula-nai ani luwa lakaina italafolena yavola maufona anakabala wagaine. Ada kabala lakaina givekaliwawana ke didikula awana gisebodana. 47 Ada Meli vine Magidala ke Meli Iyosefa inana iitana gadedeku Yeisu vovona gisena.
**15:1 Pailato ani banae kwana Loma, ada meLoma ivenuwadadanena banae meIsileli aditoveimeya lakaina. Ada Loma anakabemali yadi veimeya seyana ani taudiyavo adifaiweya kaliva yana koyona anamatavuloga faina ina luvealikana, aku meIsileli iawatadi e ada keke adiawaega ke kaliva yana koyona anamatavuloga faina ina luvealika. Taidei faina meIsileli Yeisu ialiyena Pailato wagaine. (Iyo 18:31)
†15:5 Ais 53:7
†15:15 Mad 27:26, Luk 23:16, Iyo 19:1
**15:17 Tova tuwaina nuya yabeyabelina ani kini adiveigavu. E ada nuya seyana anafaiweya ani tolugaviya iveosena Yeisu wagaine, faina ina awaveleigena.
†15:24 Sam 22:18, Iyo 19:24 ke anaailabama adiebakivemala
†15:27-28 Ais 53:12
†15:30 Sam 22:7, Mak 14:58, Iyo 2:19
†15:34 Sam 22:1
†15:38 Iyeg 26:31-33