10
Keliso yana vebolavoi seya-moena givebolavoiyena ani vebolavoi velugadiyavo matatabudi giveiwakasegedi.
1 Aku malinai gaitoma moyaina iwakadi kanuwanuwagadi Yeisu wagaine-deya, ada kaduwe aimo kana nuwanuwagadi. Aku wada veimeya-dina tuwai-moena Yaubada giveleda Mosese wagaine, ani gaitoma-dina iwakadi adianunu, keke gaitoma-moedi velemoena.†Kol 2:17 Veimeya-dina ani anunu gaga faina, vebolavoi-nai seyana aku iluvavagilena tova moyaina malamala seyana seyana, ani keke-bamowa anafata gina kiveiwakane-yabudi badiyavo iyegeyegemo ina oduodu faina. 2 Kai tooduodu-dina bademowa ida yegayegana-vagata Yaubada matane, aga keke aimo yadi koyona anavita ida lutovoni nuwafoudiya, e ada vebolavoi bademowa-deya ida ilovena. 3 Aku malamala seyana seyana taidei vebolavoi-dina wagaidiya inuwaudududi kaliva yadi koyona, 4 faina keke maita anafata bulumakau ke goti dayagidi ani kaliva yadi koyona gina vaiyavule, keke-mowa. 5-6 Tainei faina, tova kabisona Keliso gida obuelai babiya, givona Yaubada Tamana wagaine,
“Tova moyaina kaliva kevakeva ialaalai-yabudi ebavebolavoi wagaine,
ada aa tulina tulina yadi velekavovo ani ialialiyedi wagainiya yadi koyona adivaiyavula faina,
aku Oye keke nuwanuwa.
Ada kaduwe tova moyaina kevakeva ialalai-yabudi
ebavebolavoi wagaine, ani ivele-kavovo wagainiya
vaita yadi koyona ina vaiyavuledi,
aku Oye keke uda vemwamwala faidiya.
Aku vovo seyana ukidewedewena faikuya
anafaiweya tomiyababi vovodi,
Iya ya nuwanuwa gana gugaiyena faina.
7 Ada Iya gavonaga, ‘O Yaubada,
Iya idauwe ke ya nuwanuwa gana gugaiyena,
anafaiweya tuwaina ivetokilumina
Iya faikuya ya buki uwalugena wagaine.’ ” †Sam 40:6-8
Taidei anafaiweya Keliso givona. 8 Nagona givona, “Tova moyaina kaliva kevakeva ivevebolavoiyedi wagainiya ke aa tulina tulina yadi velekavovo ani ialialiyedi wagainiya. Ada kaduwe kevakeva ialaalai-yabudi ebavebolavoi wagaine ani ivelekavovo wagainiya yadi koyona adivaiyavula faina. E aku Oye keke nuwanuwa, ada keke uda vemwamwala faidiya. E aku gaitoma-dina ani Mosese yana veimeya ananuwanuwa anafaiweya.” 9 Ada kaduwe Keliso givona, “Uitana, Iya idauwe ke ya nuwanuwa gana gugaiyena.” Taidei wagaine kaalamanena ani, veyavo anawai tuwaina bademowa Yaubada givaiyavulena e ada veyavo anawai evaguna ginasena. 10 Ada taidei Yaubada yana nuwanuwa-nai wagaine, ide gikivetabuda Yeisu Keliso vovona anavelekavovo wagaine. E ada ide bademowa koyona wagaine kayegayegana velemoena, ada tabutabudeyavo Yaubada matane. Yeisu vovona givelekavovoyena tova seya-moena wagaine, ani tova anamatatabuna faine.†Ibel 7:27, 9:12
11 Yadayada seyana seyana wagaine veyavo anatovegugai seyana seyana gimidimididi aku oduodu anagugai gigugugaiyena. Tova ke tova vebolavoi ivebolavoiyena ada kaduwe iluvavagilena, aku keke vebolavoi-dina adifata koyona ina vaiyavuledi, keke-bamowa. 12 Aku Banae veyavo anatovegugai aditonagona-moena, ani vebolavoi seya-moena givebolavoiyena koyona faidiya, tova anamatatabuna faina. Ada vebolavoi gifaisewana giavaina, givetogana Yaubada aiyatagine,†Mak 16:19, Ibel 1:3 13 ada tova tayuwe wagaine-deya giveitabodaboda analaba nibainavo ageyafayafane Yaubada ginasedi.†Ibel 1:13 14 Ada au yana vebolavoi seya-moena wagaine, bademowa kaliva gise-vagaidi yegayegadiyavo Yaubada matane ada keke tamo koyona wagaidiya, badi kaliva-dina nuwainagediya gifaifaisewa e ada yadi dewa yegayegadi ina seseyegemonedi. 15 Kaduwe Aluwaluwa Tabuna giawavelemoenayena wagaideya, givona,
16 “KAUVEYA givona, Tova tuwaina gina avaina ayo taidei veyavo anawai-nai gana bubuna
yaku kalivayavo wagaidiya, ani taidei anafaiweya.
Yaku veimeya ganasedi aseasediya,
ada kaduwe gana vetokilumidi yadi nuwanuwa wagaidiya.ӠIyel 31:33
17 Ada kaduwe givona,
“Yadi koyona ada yaku veimeya adiawaegega ani keke aimo gana nuwaududu.” †Iyel 31:34
18 Ada Yaubada kaliva yadi koyona bademowa givenuwaegedi faina, keke gida luboda kaduwe kevakeva ina vebolavoiyedi ke koyona gina vaiyavule. Vebolavoi koyona faidiya ani bademowa giavaina.
Yeisu wana giyavuna faideya e ada kana yegemona Yaubada matane.
19 E ada tubuiyakuweyavo, Yeisu dayagina wagaine ide wa yada asevatu adafaiweya nodi kanaluku Tutulagolota Tabutabu-moena wagaine,†Ibel 4:16 tainei Yaubada matane. 20 Tuwaina Tutulagolota Tabutabu-moena isebabalina nuya wagaine, ada kaliva adiawata keke inaluku. Aku malinai, ani yada ebaluku evaguna ke miyamiyani-vagaina Yaubada bademowa giyavuna faideya sebabala-nai wagaine, tainei Yeisu vovona wagaine. E ada ide adaawaega kanaluku Yaubada matane.**Tova-nai Yeisu vovona giawaegena ke gialika, tainei keteni-nai Tutulagolota Tabutabu-moena anawana gisebabalina ani giakelili-lugena, e ada taidei yada ebaita vaita ide adafaiweya kanaluku Yeisu wagaine-deya ke kananau Yaubada matane. (Mad 27:51) 21 Ada kaduwe veyavo anatovegugai aditonagona lakaina ani bade wagaideya, Banae Yeisu, ada ideyavo Yaubada yana yoo ani giitaitaveyabida. 22 E ada kana naunau Yaubada lilivane-mwane. Yeisu bademowa aseaseda gilufuifuidi dayagina wagaine†1Iyo 1:7 ke yada koyona anavita kaayaunena nuwafoudeya ani givaiyavulena, ada vovoda gikoladi gufa yegayegana wagaine ke kayegayegana.†Isik 36:25, 1Kol 6:11 E ada wa yada nuwaawaega velemoena ke wa yada vetumagana toyogina kanaluku Yaubada matane. 23 Banae givonadabadaba adakibababala faina, ani wa anavetumagana.†1Kol 1:9 Taidei faina, kanuwavetumaganena gavana givonadabadabayena ani gina veleda, ada yada nuwavetumagana-nai kaawamogatalena. E ada yada awamogatala-nai wagaine keke kana nuwakila aku kana kidonena.†Ibel 4:14 24 Ada kaduwe kana nuwanuwayedi gavaiyamu nodi kana vonavona vagadoneda e ada wa yada nuwakabubu nodi kana velemalema ke gugai iwakadi kana gugugaiyedi. 25 Tovetumagana tufodi nagona ielaelai tafalolo wagaine ani iilovau. Aku ide keke kana ilova aku tova moyaina kana vagavagauta oduodu faina, ada seyana seyana kana vonavona vagadoneda toyogina Keliso anavetumagana faina. Yada Kauveya yana yewa-vagila anatova givelilivana faina, giluboda-moeda kana vonavagadoneda.
Yaubada Natuna keke kana vedomobubuse.
26 Kai bademowa nuwanuwa velemoena anaalamana Keliso faine ani kanuwagana ke kavetumaganena, aku muliya-yo tova moyaina dewa koyona wagaine kaawaawaege-vagaida,†2Pi 2:20 aga keke tamo vebolavoi kaduwe gida tufo ayo yada koyona gina vaiyavuledi. 27 Kai taidei anafaiweya, aga au wa yada matauta lakaina nodi kana veitabodaboda Yaubada yada koyona analaufata gina veleda. Ada yana agouga lakaina vaita aiyabeyabela anafaiweya kana nuwagana, tainei ide gavega Yaubada nibainavo ani faideya, e ada ginaalai-yabuda. 28 Tuwaina kai tamo gaito Mosese yana veimeya givegaitoma-kavokavovoyena, ada kai anatoitanuwaga adiselu o kai aditoto ina iawatalatalainena, aga kaliva-dina ina nogalina ani keke wa yadi nuwakalikali aku au kaliva-nai ina luvealikana.†2Vei 17:6 29 Tainei kaliva-nai Mosese yana veimeya giyawelina ani analaufata koyo-moena. Aku gavaiyamu unuwanuwa? Badi gavega kibababala anawai ivedomobubusena ke Yaubada Natuna ivatuvebavebabina, gavaiyamu badi adimatavuloga? Yeisu dayagina Yaubada yana veyavo anawai evaguna wagaine†Mad 26:27-28 ani gikiveyegayeganeda Yaubada matane, e aku kai tovetumagana tufodi ivegaitoma-kavokavovoyena, aga gavaiyamu? Kaduwe, tova moyaina Aluwaluwa Tabuna wa yana nuwadoga ani ide gilemelemeda, e aku kai tovetumagana tufodi au iawadamanena, aga gavaiyamu? Wana nuwenuwena. Velemoena adilauboda ani adimatavuloga lakai-moena ina nuwagana. 30 Faina Yaubada kaalamanena, Banae givona,
“Laufata ani Iya akuveimeya.
Iya Tauku kaliva yadi dewa koyona gana lufata.Ӡ2Vei 32:35, Lom 12:19
Kaduwe givona,
“Iya KAUVEYA yaku kaliva gana vevonayavugidi
ke yadi koyona adilaufata anafaiweya adimatavuloga ina nuwagana.” †2Vei 32:36
31 Ada kai Yaubada Banae miyamiyani-vagaina nimane adamatavuloga kana nuwagana, aga tainei ebamatauta-mowa!
32 Aku wana nuwaududuna tayuwe tova nagona wagaine gavadi gavadi iyegemona wagaimiya. Yeisu anaalamana faina nuwami gimalina e ayo uloulolo tulina tulina wanuwanuwagadi, aku anavediwe wagaine waatuvefaila ke wavetoyogina. 33 Tamo tova yoo matadiya iawavekoyoyemi ada ikiveuloulolonimi, kaduwe tamo tova badi vita-dina inuwagadi ani wakwayabudi. 34 Tufodi Yeisu ivetumaganena faina deliya isedi, ani wanuwavitavaisedi.†Mad 25:36, 2Tim 1:16, Ibel 13:3 Ada tova-nai tokivekoyo iela yami lokoloko matatabuna ivaidi inauwedi, ani keke wada nuwakoyo aku wa yami vemwamwala wavona, “Ide yada gaitoma idedeku-deya ani iavavaina, aku gavana Yaubada givonadabadabayedi ani bademowa giveleda, ada taidei iwaka-vagaidi ke imiyamiyani-vagaidi.” †Mad 6:20
35 Taidei faina yami asevatu keke wana segesege aku au wana asevatu-mowa. Yami asevatu ani gaitoma lakaina Yaubada matane, ada analaufata lakai-moena wagaine gina fatami. 36 Gilubodami wana atuvefaila-mowa e ada Yaubada yana nuwanuwa wana idibumwaigena,†Mad 10:22, Luk 21:19, Lom 12:12, Ibel 6:11-12 ke gavana givonadabadabayena ani wana nuwagana. 37 Wa yami atuvefaila wana miyamiya, faina Yaubada yana Buki wagaine givonaga,
“Tova kabiso-moena Banae gielaelai ani ginaelai.
Keke gina iwagewagege.
38 Aku yaku kaliva yegayegadiyavo matakuya
ani yadi vetumagana wagaine ina miyamiya.†Abak 2:3-4, Lom 1:17
Aku kai kaliva wa yana matauta
yana vetumagana gina sewavuyena ke gina nuwayewa,
aga keke gana vemwamwala banae faine.”
Taidei anafaiweya Yaubada givona. 39 Aku ideyavo ani keke kadadewa anafaiweya badi gavega yadi vetumagana wagaine ivemulitugutugu ke inuwayewa e ada agolaufofola ina nuwagana. Velemoena ide yada vetumagana kasevelavelalaina ke adakibababala kanuwanuwagana.
†10:7 Sam 40:6-8
†10:16 Iyel 31:33
†10:17 Iyel 31:34
**10:20 Tova-nai Yeisu vovona giawaegena ke gialika, tainei keteni-nai Tutulagolota Tabutabu-moena anawana gisebabalina ani giakelili-lugena, e ada taidei yada ebaita vaita ide adafaiweya kanaluku Yeisu wagaine-deya ke kananau Yaubada matane. (Mad 27:51)
†10:28 2Vei 17:6
†10:30 2Vei 32:36
†10:34 Mad 25:36, 2Tim 1:16, Ibel 13:3
†10:36 Mad 10:22, Luk 21:19, Lom 12:12, Ibel 6:11-12