Iyoni Yana Leta Nagona Givetokilumina
Kivemala
Yeisu gilaka gabameya muline, malamala sikisiti (60) giavaidi ada Iyoni, banae Yeisu yana tonogala seyana ani Efeso wagaine gimiyamiya aku yana leta nagona taidei givetokilumi ginau tovetumagana badi imiyamiya Eisiya anafafaliya. Kaduwe, Iyoni buki-dina givetokilumidi adiyegana Valeya Iwakana Iyoni Givetokilumina, ada kaduwe Yeisu Keliso Yana Ivemogatala.
Leta taidei wagaine Iyoni yana nuwanuwa iluwei giseyegemonedi. Seyana ani tovetumagana giluwageyedi toyogina e ada ina mididi Yaubada ke Natuna Yeisu Keliso gagana faidiya. Bademowa taudiyavo iawaegedi Yaubada wagaine ke inuwakabubuyena, e ada adilauboda-mowa ke ina venuwanuwakabubu seyana seyana. Yana nuwanuwa anavelu ani tovetumagana givonamatawedi tovewala fwayafwaya faidiya. Taidei tovewala-dina ani ivevewala sidamana, ivonavona, “Vovoda ani keke tamo wa adiiwakana, ada wagaidiya-deya koyona gagana giyegeyegemona wagaideya. Tainei faina Keliso anaita ani velemoena kaliva, aku keke velemoena. E ada Banae keke velemoena Yaubada Natuna.” Kaduwe tovewala-dina ivetumagana vaita alamana gaitoma lakaina aku nuwakabubu ani keke. Taide tovewala-dina ani Keliso nibainavo, e ada Iyoni yadi fwaya-dina giivemogatalidi Yaubada yana vewala velemoena wagaine.
Vona wayawaina. (1:1-4)
Yaubada Tauna malina, ada kana miyamiya wagaine. (1:5 - 2:17)
Matawa gimaduyegemona Keliso nibainavo faidiya. (2:18-29)
Ideyavo ani Yaubada natunavo, e ada kanamiya anafaiweya. (3:1 - 4:6)
Yaubada ide ginuwakabubuyeda e ada gilubodada ide kaduwe kaliva kana nuwakabubuyedi. (4:7-21)
Vetumagana Yaubada Natuna wagaine. (5:1-12)
Vona anaebalauyabu. (5:13-21)
1
Vona wayawaina.
1 Vona Banae Wayawaina†Iyo 1:1,4 gimiyamiya ebavevuvu velemoena wagaine ani bademowa taumeyavo anogalina, matameya aitana ke amatawabuwabuyena, ada nimama asena wagaine.**Muliya-yo Iyoni leta-nai givetokilumina, banae afositoloyavo nodi Yeisu iitana velemoena. 2 Yawai-nai Tauna giivemogatalina ke ime aitana,†Iyo 1:14 ada Banae faine aifufuyena ke aawatalatalainena wagaimiya, Tauna Banae Yawai-vagata. Yaubada Tamada nodi imiyamiya ani Tauna giivemogatalina wagaimeya. 3 Ada gavana aitana ke anogalina ani aawamogatalena wagaimiya, e ada kadu imi nodi kana vetubuiyana. Ada velemoena yada vetubuiyana ani Tamada ke Natuna Yeisu Keliso nodi. 4 Taidei avetokiluma wagaimiya e ada yama vemwamwala gina tubuga velemoena.
Yaubada Tauna malina, ada kana miyamiya wagaine.
5 Ifufu taidei anogalina Yeisu wagaine ada aawatalatalaina wagaimiya, ani Yaubada Tauna malina,†Iyem 1:17, 1Tim 6:16 ada yuyuvana ani au keke-mowa Banae wagaine. 6 Kai ide kavona evona Yaubada nodi kavetubuiyana aku yada dewa ani yuyuvana wagaine kanunudadana,†Iyo 12:35-36, 1Iyo 2:4 ina ideyavo ani tovefwayafwaya, ada yada vona ke yada gugai wagaidiya nuwanuwa velemoena keke kada mulimuliye. 7 Aku Yaubada malina wagaine gimiyamiya. E ada kai ide kadu Banae anafaiweya malina wagaine kanunudadana,†Ais 2:5 aga kavetubuiyana taudeyavo wagaideya, ada Natuna Yeisu dayagine gikiveyegayegada koyona matatabuna wagaidiya-deya.†Ibel 9:14, 1Pi 1:18-19, Ive 5:9, 7:14, 12:10-11 8 Kai ide kanavona, “Keke tamo koyona wagaideya,” wada tauda kafwayanegenegeda ada vona anavelemoena ani keke wagaideya. 9 Aku kai yada dewa koyodi kana awatalatalaina Yaubada wagaine, aga yada koyona gina venuwaegedi ke gina kiveyegayegada yada dewa bwanene matatabuna wagaine. Faina anafaiweya Banae givona, gina gugai, ada anafaiweya yana nuwanuwa tunutunugina, ginadewa tunutunugina. 10 Kai ide kanavona, “Keke tamo kada koyona,” aga Yaubada kasesena vaita Banae tofwaya, ada yana vona velemoena keke gida miyami aseaseda wagaidiya.
**1:1 Muliya-yo Iyoni leta-nai givetokilumina, banae afositoloyavo nodi Yeisu iitana velemoena.
†1:7 Ais 2:5
†1:7 Ibel 9:14, 1Pi 1:18-19, Ive 5:9, 7:14, 12:10-11