12
Vavine ada umala lakai-moena wa ofana.
1 Gaitoma-dina mulidiya kaduwe taide akuvewala-nai gaitana ani iyaiyaya lakaina ke ebanuwanuwa giyegemona gabameya. Taine vavine kauwana anamalina giveiveigavuna ada gimidimididi vaikoi tabone. Ada kedukedu kaikaiwabuna kuluwane ani ibubuna ailabama adituwelo wagaidiya. 2 Ada vavine-nai waifugana ke tova kabisona gina venatuna, e ada wa yana uloulolo lakaina gitagitagiya toyogina. 3 Au kadu gaitoma ebameyasidobodobo wa ananuwanuwa lakaina giyegemona gabama wagaine, ani umala yabeyabelina lakai-moena wa ofana aku koyo-vagaina.**Taidei umala-nai koyo-vagaina ani ivonaluvefosau Seitani faine. Bana kuluwana adiseveni ada ebafwaiki teni, ada kuluwa seyana seyana wagaine kini anakedukedu kaikaiwabuna gimiyamiya. 4 Ada giguna wagaine ailabama gabameya tufona moyaidi gilukakidi ada gisegeobuyedi babi wagaine. Vaita ailabama ida vutugedi adiyoo toiye wagaidiya ani adiyoo iluwei auwe iwakadi aku adiyoo seyana ani matatabudi gibatugedi iobu babiya. Bana umala-nai tunutunugina ginau vavine-dina kabiso-moena ina venatuna ke gimididi wadebaine, e ada tova-nai bebeta gina tubuga ani au maduga-mowa ginakani-yabuna. 5 Au vavine kwamana kaliva ivenatunena. Banae aimo yoo tulina tulina imiyamiya babi anafafali moyaidi wagaidiya gina veiveimeya wa yana toyogina vaita gida kiabina kini yana aiwala ibubuna ayani wagaine. Aku umala-nai ani kabiso-moena vavine-dina natudi gida kanina ani au anelose isilemana ada gilakavena gabameya Yaubada wagaine, kadu yana veimeya anaebavetoga kaikaiwabuna wagaine. 6 Aku badi vavine ani iota inau fafali-nai tuwai-moena Yaubada givenuwadadanena wagaine, tainei fafali kavovona wagaine. Wadedeku-deya tova manamanawena ina itaitaveyabidi anafaiweya yadayada wani tausani tu analedi ada sikisiti (1,260).
7 Vavine iota inau, e au gaviya givebutu gabameya-deya. Anelose lakaina Maikolo**‘Maikolo’ ani Yaubada yana anelose lakaina seyana meIsileli giitaitaveyabidi. (Dan 10:13-21, Iyud 9) wa yana aneloseyavo nodi ilulugaviyadi umala, kadu umala-nai yana aneloseyavo nodi ilugaviyadi Maikolo yana yoo nodi. 8 Aku umala lakai-moena yana toyogina keke anafata, e ada Maikolo wa yana aneloseyavo nodi itoyogisegena. Tainei faina umala lakai-moena wa yana aneloseyavo koyodiyavo nodi ani keke tamo yadi ebamiya gabameya ke aimo adifata ina miyamiya gabama wagaine. E ani au, isege-vagaina. 9 Ada umala-nai lakai-moena†Ive 20:2-3, Luk 10:18 ani Maikolo yana aneloseyavo nodi isegeobuyedi babi wagaine. Bana umala-nai kaduwe ani mota-nai tova anaebavevuvu wagaine-deya gimiyamiya, banae ivewagana ‘toveloi-kavokavovo’, bana Seitani. Banae-nai yana vefwayafwaya wagaine babi anakalivayavo moyaidi gifwayanegenegedi. Ee, umala wa yana aneloseyavo nodi isegeobuyedi babi wagaine imiyamiya. 10 Ada bonabona moiyalina gabama wagaine ganogalina, givona,
“Malinai Yaubada yana kibababala ke yana toyogina bademowa ilakayegemona!
Yana ebaveimeya giseyegemonena, ada yana Keliso ani yana veimeya giivemogatalina.
Faina banae tubuiyadeyavo aditoveloi ani Yaubada yana aneloseyavo bademowa ibatuge giobu, banae-nai yadayada ke bogi tubuiyadeyavo giawavekoyoyedi Yaubada matane.†Iyob 1:9-11, Sek 3:1
11 Ada tubuiyadeyavo itoyogisegena. Faina Bana Lami dayagina ivetumaganena,
ada Keliso yana kibababala faina iawatalatalaiyena kaliva wagaidiya.
Kadu taudiyavo yawaidi keke ida nuwakabubuye-moedi ke ida nuwalolonedi aku au isefaga ina alika.†Luk 14:26, Ive 2:10
Gaitoma-dina faidiya badi aditoveloi bana Seitani itoyogisegena.
12 Tainei faina imi gabama anatomiyayavo ani wana vemwamwala lakaina!
Aku imi babi anatomiyayavo ke leyaga anatomiyayavo ani tova vita-moena wana nuwagana!
Faina banae toveloi-kavokavovo ani wa yana nuwakoyo giobuelai wagaimiya.
Ginuwakoyo lakai-moena faina gialamanena yana tova givemaufo.” **Bana nibaida ivewagana ‘toveloi-kavokavovo’ ani Seitani, ada yana tova givemaufo ananuwanuwa ani gialamanena yana tova bademowa givelilivana ke Yaubada gina luyavulena.
Taide anafaiweya bonabona gabameya givona.
13 Ee, aku bana umala-nai isegeobuyena babi wagaine ani tauna giitanuwagana wagaine, gina gimaduvenegadi vavine-dina badi kwamana kaliva ivenatunena. 14 Aku vavine-dina ani Yaubada giveledi ofadi iluwei vaita manubutu lakaina ofana anafaiweya, e ada adifaiweya ina yavega ina maduota inanau fafali kavovona wagaine. Wadedeku-deya Yaubada yana anelose ina itaitaveyabidi tova manamanawena, anafaiweya malamala toiye ke vaikoi sikisi, e ada bana umala-nai keke anafaiweya gina munudi. 15 Ada umala gimididi ke awana gilana aku gufa madumadu-mowa giyegemona ani gimadu ginau vavine wagaidiya ke wayagata-nai gina alugedi ina nu-vagata. 16 Aku babi vavine gilemedi ani giayavalina ada gufa matatabuna umala awane-deya gimadumadu ani babi giyuna. 17 Taidei faina umala-nai matana gifata vavine-dina wagaidiya, e ada gitauya ginau natudiyavo velugadiyavo wagaidiya kadu yadi tubudelideliyavo moyaidi wagaidiya ke gina lugaviyadi.†Eba 3:15, 1Pi 5:8 Biyavo-dina ani Yaubada yana veimeya imulimuliyedi, kadu iabidonau Yeisu yana vona velemoena wagaine.**Iyoni yana vona-nai “iabidonau Yeisu yana vona velemoena” ani Buki Tabu tufodi ikiviladi yada vetokiluma taidei maita-nai wagaine anafaiweya, aku tufodi ikiviladi taidei anafaiweya. “Biyavo-dina Yeisu anavaleya iwakana iawaawamogatalena kaliva wagaidiya.” 18 Ada umala gina gimidimididi avala anamakama wagaine.
**12:3 Taidei umala-nai koyo-vagaina ani ivonaluvefosau Seitani faine.
**12:7 ‘Maikolo’ ani Yaubada yana anelose lakaina seyana meIsileli giitaitaveyabidi. (Dan 10:13-21, Iyud 9)
†12:10 Iyob 1:9-11, Sek 3:1
**12:12 Bana nibaida ivewagana ‘toveloi-kavokavovo’ ani Seitani, ada yana tova givemaufo ananuwanuwa ani gialamanena yana tova bademowa givelilivana ke Yaubada gina luyavulena.
**12:17 Iyoni yana vona-nai “iabidonau Yeisu yana vona velemoena” ani Buki Tabu tufodi ikiviladi yada vetokiluma taidei maita-nai wagaine anafaiweya, aku tufodi ikiviladi taidei anafaiweya. “Biyavo-dina Yeisu anavaleya iwakana iawaawamogatalena kaliva wagaidiya.”