11
Yaubada yana falofita adiselu.
1 Ada giveleku ebaetowava vaita aiwala anafaiweya ada givoneku, givona, “Una mididi unana Yaubada yana manuwa tabu kadu ebavebolavoi una etowavadi, ada kadu una veyawadi gavega wadedeku ioduodu. 2 Aku fafali-nai manuwa tabu anamanuwa-moena wamelaleya ani keke una etowava. Unasege ginamiya, faina Yaubada fafali-nai giatuegena badi keke meIsileli wagaidiya. Ada melala-nai tabutabuna Yelusalema ina veiveimeyena vaikoi foti tu (42) aditova wagaidiya**Vaikoi foti tu (42) ani vaita yadayada wani tausani tu analedi sikisiti (1,260) anafaiweya. ke gaitoma moyaina ina kivekoyodi.†Luk 21:24, Ive 13:5 3 Aku tayuwe tova-nai wagaine, yaku toawatalatalaina adiselu veimeya gana veledi, ke Yaubada yana vona ina falofisaiyena yadayada wani tausani tu analedi ada sikisiti (1,260) wagaidiya. Adinuya ani kabolo adibaiki, adiita keke iwakadi.” **Tayuwe adinuya-dina ani badi meIsileli yadi iyaiyaya nuwavita faina. Givewala vaita toawatalatalaina-dina adiselu yadi valeya ani ebamatauta kivekoyo lakai-moena, e ada kaliva ina alamanena vaita idamadu nuwavilana. Taide anafaiweya anelose givona.
4 Aku badi kaliva-dina adiselu ani anafaiweya ai-dina olive iluwei, kadu mayale adiebaibo-dina iluwei**Ai-nai olive taide maita-nai wagaine ani giveiyaiyaya banae kaliva-nai KAUVEYA gikivemwamwalina. Ebaita ani Kini Deivida Same 52:8 wagaine, tauna giawaluvaluvayena vaita ‘ai olive matamatagina Yaubada yana manuwa wagaine’. Maita taide wagaine, Iyoni anavewala ani KAUVEYA anatoitavedama adiselu iawaluvaluvayedi vaita badi ai olive ada kadu mayale anaebaibo. Ai olive wagaidiya fiuli ivaivaina ke mayale ivevemagadi yadi malina faine, ada kadu anafaiweya toitavedama adiselu-dina ani Aluwaluwa Tabuna givevemagadi. E ada mayale yuyuvana ituituimalina anafaiweya, adiselu babi taide anayuyuvana ituituimalina. (Sam 52:8, Sek 4:3,11,14) imidimididi Yaubada wadebaine, Banae babi matatabuna anaToveimeya. 5 Ada kai tamo gaito gina galuvaluva gina kivekoyodi, aga awadi wagaine aiyabeyabela gina yegemona ada nibaidiyavo gina alaidi ina alika. Kai tamo gaito nuwanuwana gina kivekoyodi, aga gilubodana taide anafaiweya ina luvealikana. 6 Kaduwe badi kaliva-dina adiselu, ani wa yadi veimeya toyogina ke adifaiweya inavona ada mwatugu gina abodana, e ada wei keke ginaobu yadayada-dina anamatatabuna wagaidiya ifalofalofisai. Kadu tova bademowa gavaiyei nuwanuwadi anafaiweya, badi wa yadi veimeya ke gufa gavafafali wagaine ina sevadavedamana ke gina vedayaga, ada adifata babi ina mununa vita koyo-moena tulina tulina wagaidiya.**Taidei ‘vita koyo-moena tulina tulina’, ani anafaiweya tova-nai Mosese Itipita wagaine ginau Felo wagaine giveola meIsileli gida awaegedi Itipita idasege idanau. Aku Felo ani keke gida awaege, e ada Yaubada vita koyo-moedi giimilidi meItipita wagaidiya. (Iyeg 7:14 - 12:30)
7 Ada yadi awatalatalaina gina avaina, kevakeva-nai koyo-moena manimaninina†Ive 13:5-7 ginalaka olu-nai keke wa anaebalauyabu wagaine-deya, ani gina lugaviyadi ke gina toyogisegedi, ada gina luvealikadi. 8 Vovodi inase-kavovodi melala-nai lakaina wa anayegana anawai lakaina wagaine ina miyamiya. Melala-nai ivonaluvefosau wagaine ivewagana Sodoma kadu Itipita. Melala-nai wagaine tuwaina yadi Kauveya ikivebolagalagana. 9 Yadayada toiye ke afuna wagaidiya, kaliva moyaidi nuwadi givaina ani inaela toawatalatalaina-dina adiselu vovodi ina itavutuvutudi, ada keke ina awaege gaito seyana vovodi ginasedi didikula luwa negenine. Badi kaliva-dina ielaelai ani meya tulina tulina, unumidi tulina tulina, yadi fafali tulina tulina, ee wagaidiya-deya ina tauya inaelai vovodi ina itaitadi. 10 Ee, babi anatomiyayavo moyaidi ina gakaikai ada ina vemwamwala lakaina, ada yadi nuwakabubu ina kidewedewedi ke ina avetavetaledi tubuiyadiyavo wagaidiya. Faina taide falofita-dina adiselu yadi tova wayawaidi wagaine, tova moyaina uloulolo ke vita lakaidi iveleveledi babi anatomiyayavo.
11 Aku yadayada-dina toiye ke afuna giavaidi, Yaubada ani yawaina giveyawaivedamana badi adiselu wagaidiya, ada imididi wayawaidi. E ada badi gavega iitadi ani imatauta lakaina. 12 Aku bonabona lakaina wagabameya-deya giobuelai, ani falofita-dina adiselu inogalina givonedi, givonaga, “Wana lakaelai idedeku!” Ada nibaidiyavo iitaitadi aku buibui wagaine ilaka gabameya. 13 Ada kauwana anabai-nadi wagaine mabibi lakaina babi giiliuna toyogi-moena, ada manuwa tufona moyaidi melala-nai wagaine ibeu kadu kaliva tufona moyaidi ialika. Adinaba ani vaita melala ida vutugena anafafali teni wagaidiya, ada fafali seyana anamanuwa matatabudi ibeu ke anatomiyayavo matatabudi ialika, adiyoo seveni tausani (7,000). Aku fafali adinaeni adimanuwa ke anatomiyayavo ani iwakadi. Aku badi aimo wayawaidiyavo imiyamiya, ani imatauta velemoena aku Yaubada gabameya yana toyogina iinanana ke anayegana ikikilakaina.
14 Ee, ebakiveuloulolo vita-moena anavelu ani bademowa, aku ebakiveuloulolo vita-moena anaveto tova kabisona gina lakayegemona.
Anelose anaveseveni yana kaula giyuvena.
15 Aku anelose anaveseveni ginau yana kaula giyuvena, ani ganogalina bonabona moiyalidi gabameya ivonavona, “Malinai ebaveimeya-nai babi taide wagaine ani Yaubada anatoinavuvuna, Yaubada ke yana Keliso nodi, ada gina veiveimeya-vagata ke vagata.” 16 Ada tomiya gabama aditonagona tuweniti-fowa ivetovetoga Yaubada debaine yadi veimeya anaebavetoga kaikaiwabudi wagaidiya, ani isegedi aku iiboula-mowa magigidi babiya ke ioduodu Yaubada wagaine. 17 Ivona,
“Oye Yaubada Totoyogi-vagai,
muliya-yo tova nagona givevuvu aku bademowa-deya umiyamiya,
ada kaduwe malinai umiyamiya.
Avesiule O wagainiya faina O ya toyogina lakaina uvaina ke uvebutu uveiveimeya.
18 Yoo moyaidi babi anafafali tulina tulina wagaidiya inuwakoyo wagainiya,
aku ya nuwakoyo lakaina anatova ani bade giyegemona.
Tova taidei toalika una vevonayavugidi, kadu malinai ya togugaiyavo moyaidi adilaufata iwakana una veledi.
Ee, badi falofitayavo kadu ya kaliva tabutabudiyavo,
ada badi wa yadi matauta ivemoimoineni, kai adiyegana lakaina o kai kabisona, ani
moyaidi adilaufata iwakana anatova bade giyegemona.
Aku kaduwe tova taidei badi babi ikivekoyona ani una luyavuledi.”
19 Ada tomiya gabama aditonagona yadi veifuifufu giavaina, Yaubada yana manuwa tabu gabama wagaine giayavuna, ada yana veyavo anawai anabokesi gaitana manuwa tabu-nai negenine. Ada matakuya atunama iatunama, atala giluwatala ke butuna gilunununuga, mabibi babi giliuna, ada wei matadi lakaidi iveaisi ani moyai-moedi kadu vitadi iobu.
**11:2 Vaikoi foti tu (42) ani vaita yadayada wani tausani tu analedi sikisiti (1,260) anafaiweya.
**11:3 Tayuwe adinuya-dina ani badi meIsileli yadi iyaiyaya nuwavita faina. Givewala vaita toawatalatalaina-dina adiselu yadi valeya ani ebamatauta kivekoyo lakai-moena, e ada kaliva ina alamanena vaita idamadu nuwavilana.
**11:4 Ai-nai olive taide maita-nai wagaine ani giveiyaiyaya banae kaliva-nai KAUVEYA gikivemwamwalina. Ebaita ani Kini Deivida Same 52:8 wagaine, tauna giawaluvaluvayena vaita ‘ai olive matamatagina Yaubada yana manuwa wagaine’. Maita taide wagaine, Iyoni anavewala ani KAUVEYA anatoitavedama adiselu iawaluvaluvayedi vaita badi ai olive ada kadu mayale anaebaibo. Ai olive wagaidiya fiuli ivaivaina ke mayale ivevemagadi yadi malina faine, ada kadu anafaiweya toitavedama adiselu-dina ani Aluwaluwa Tabuna givevemagadi. E ada mayale yuyuvana ituituimalina anafaiweya, adiselu babi taide anayuyuvana ituituimalina. (Sam 52:8, Sek 4:3,11,14)
**11:6 Taidei ‘vita koyo-moena tulina tulina’, ani anafaiweya tova-nai Mosese Itipita wagaine ginau Felo wagaine giveola meIsileli gida awaegedi Itipita idasege idanau. Aku Felo ani keke gida awaege, e ada Yaubada vita koyo-moedi giimilidi meItipita wagaidiya. (Iyeg 7:14 - 12:30)