1 Yeisu givetoga manuwa tabu wagaine ada giitanau giitadi kaliva kaikaiwabudiyavo yadi velekavovo isesedi velekavovo anaebavedodoga wagaine. 2 Kaduwe sikwa seyadi fanifanidi giitadi, ielai ke yadi velekavovo mani kabisodi iluwei idododi. Mani-nai vaita toya seyana anafaiweya. 3 Ada Yeisu givona, “Vona velemoena, sikwa taidei yadi velekavovo ani kaliva moyaidi yadi velekavovo gitubusegedi.†2Kol 8:12 4 Faina kaliva matatabudi ivele-kavovo ani yadi kaikaiwabu lakaina gimiyamiya ada anatufo kabisona isena, aku badi fanifanidi keke tamo gavana gida miyami aimo gina lemedi, aku yadi mani-nai kabisona vaita gida lemedi ani matatabuna ise-yabuna.”

5 Aku Yeisu yana tonogalayavo tufodi manuwa tabu ikaiyena ke idavadavana ivona, “Una itana, kabala lakaidi ada lunamanamalidi, adiita iwakadi! Kaliva yadi nuwakabubu iawaegedi Yaubada faine ani wagaidiya manuwa iveigavuna.”

Aku Yeisu givona, 6 “Taidei gavana matatabuna waitaitana, ani tova gielaelai wagaine kabala-dina keke seyana ginatufo ke inamiya getane, aku seyana seyana ina vetutuyaweyawelidi inaobu.”†Luk 19:43-44

7 Ada badi itolidadana, ivona, “Tovewala, gaitoma-dina taidei uvonayedi ani gavatova wagaine ina yegemona? Ada gavana gina veiyaiyaya tova-nai taidei gaitoma-dina tova kabisona ina yegemona?”

8 Banae gilufata, givona, “Wana itaveyabimi ada keke seyana gaito yana vefwayafwaya wagaine gina sibalemi. Faina aimo kaliva moyaidi akuyeganeya inaelai ina vonaga, ‘Iya game-nai tauku Keliso!’ ada kaduwe inavona, ‘Tova-nai ani bademowa givelilivana-mowa!’ Badi ivonavona anafaiweya ani keke wana muliyedi. 9 Ada tova-nai gaviya lakaidi valeyadi wana nogalina o kai wana kaiyanogala, vaita fafali tulina tulina anakaliva tufodi imididi ilulugaviya yadi kabemali anatonagonayavo wagaidiya, aga keke wana aseuloulolo. Faina gilubodana gaitoma-dina taidei nagona ina yegemona, aku ebalauyabu anatova ani aimo keke gina maduela.”

10 Kaduwe givona wagaidiya, givona, “Yoo seyana ina mididi ke mali yoo nodi ina lugaviya, ada kadu anafaiweya ebaveimeya seyana gina alakaidi ke mali ebaveimeya nodi ina lugaviya. 11 Ada mabibi lakaidi inamadu ada fafali tulina tulina wagaidiya loka ke veoga koyodi kaliva ina kivekoyodi. Ada gugai ebamatauta ke iyaiyaya toyogi-moedi wagabameya ina yegemona. 12 Aku muliya-yo taidei gaitoma-dina moyaina ina yegemona, nagona kaliva ina kiveyabimi ke ina kiveuloulolonimi. Ada ina vaimi ina nauwemi manuwa ebavewala wagaidiya ina vemididimi ke tafalolo anatoveimeya lakaidiyavo ina vevonayavugimi, ada deliya inasemi. Kaduwe imi yaku tonogalayavo faina, ina nauwemi kiniyavo ke kabemali toveimeya lakaidiyavo matadiya ina vevonayavugimi. 13 E aku taidei tova-dina wagaidiya ani yami tova iwakana ke Iya faikuya wana awatalatalaina badi wagaidiya. 14-15 Aku Iya gana alavelevelemi ke gana nuwauyavelemi, e ada nibaimiyavo wagaidiya keke tamo gaito anafata yami vona ina vonatago o kai ina veweye ke ina amalakiboye. Taidei faina aseasemiya wana nuwaveyalaina ada keke wana nuwanuwa vaita gavaiyamu taumiyavo aimo wana awabababalimi.†Luk 12:11-12 16 Ada taumiyavo inamiyavo o tamamiyavo o amitubulugayavo, o amiunumayavo o tubuiyamiyavo nonogana ina atuegemi toveimeyayavo nimadiya, ada tufomi ina luvealikami. 17 Ada kaliva moyaidi ina agougemi faina imi yaku tonogalayavo. 18 Aku keke wana matauta. Keke kuluwa anavutuvutu seyana wanasege. 19 Atuvefaileya wana mididi toyogina, ada taidei wagaine taumiyavo yawaimi wana yavana.

20 “Aku tova-nai wana itana tolugaviya yoo moyaina Yelusalema ina miyafifina, tayuwe wana alamanena ani melala-nai analuyaweyawela givelilivana.†Luk 19:41-44 21 Tayuwe tova-nai badi Yudiya anafafali ina miyamiya ani gilubodadi inaota inalaka oya wagaidiya. Ada kaduwe gavega ina miyamiya Yelusalema wagaine ani inaota ina yegemona, ada badi gavega wamelaleya fafali lakaina wagaidiya ani keke inaela inaluku Yelusalema. 22 Faina tayuwe tova-dina kaliva adimatavuloga ina nuwagana yadi koyona igugaiyena faina, e ada gaitoma-dina ivetokilumina Buki Tabu wagaine ani matatabuna gina luveyegemonina velemoena.†Dan 9:25-26 23 Ada kaduwe ota anatova wagaine ani vevine waifugadiyavo ke vevine tovesusu ina venuwakalikali velemoena, faina keke adifaiweya ina maduota. Faina yadayada-dina wagaidiya mulolova lakaina gina yegemona fafali-nai wagaine, ada Yaubada yana nuwakoyo lakaina anamanini vita-moena kaliva-dina taidei ina nuwagana. 24 Gaviya lakaina gina yegemona ke moyaidi ina alika benisi wagaine aku tufodi ina kiveyabidi ina nauwedi babi anakaliva adiyoo tulina tulina wagaidiya. Ada badi keke meIsileli ani Yelusalema anatomiyayavo ina lugaviya wagaidiya ada ina toyogisegedi ke yadi melala lakaina inavai ina veimeyena. Ada keke kaliva ina vemoimoinedi aku ina veimeya toyogina wagaidiya analaba yadi tova veimeya Yaubada givenuwadadanena anafaiweya ina luyabuna.†Ais 63:18-19, Dan 8:13, Lom 11:25

25 “Ada aimo iyaiyaya ebanuwavogana ina yegemona kauwana, vaikoi, ke ailabama wagaidiya.†Ais 13:6-13, Iyol 1:1-2, Ive 6:12-17 Ada babi taidei wagaine ebaveimeya tulina tulina wagaidiya kaliva ina asekolukolu, faina leyaga yana velalaga analunununuga ke buli anafaiweya oya, ada keke ida alamane gavana inagai. 26 Ada gabama wagaine gaitoma toyogidi ani Yaubada gina liudi, e ada wagaine kaliva ina venuwavogana gavana iyegeyegemona babi matatabuna wagaine. Ada ina matauta lakaina ke inaala. 27 Ada tayuwe tova-nai wagaine Banae Kaliva Natuna ina itana gina elaelai buibui wagaine wa yana toyogina ke wa yana iwakana mamalina lakaina nodi.†Mad 16:27, Ive 1:7 28 Ada tova-nai gaitoma-dina taidei ina vebutu ina yegemona, aga wa yami asevatu wana mididi ke wana italaka, faina tova-nai Yaubada gina tutuveobumi ani givelilivana.”

29 Ada vona matalivulivuna seyana giifufuyena, givonedi, “Wana itadi ai alaa ke ai moyaidi. 30 Tova-nai lukudi evagudi ina lukabukabu, aga bademowa taumiyavo waitaitana ada waalamanena vaita bademowa ginagina lakaina yana tova givelilivana ke kauwana toyogina gina vebutu.†Mad 24:32-35, Mak 13:28-31 31 E ada kaduwe anafaiweya, tova-nai wana itadi iyaiyaya-dina ina yegeyegemona, aga wana alamanena vaita Yaubada yana ebaveimeya anatova givelilivana. 32 Gavonemi velemoena, tova malinai anayooyavo ani keke ina alika-yabu aku taidei gaitoma-dina matatabuna inamadu yegemona. 33 Gabama ke babi gina avaidi aku yaku vona keke maita gina avaidi, au ginamiya-vagata.

34 “Taumiyavo wana itaveyabimi aenanai nuwami gina dolana dewa kwavakwava wagaine, kai gufa lavulavugidi wanayuga kwavakwava, kaduwe babi anamiyami faine wana venuwana lakaina. Faina kai taidei anafaiweya wanadewa, aga yaku yewa-vagila anayadayada gina yegemona wagaimiya anafaiweya dai. 35 Faina gina yegemona tomiyababi moyaidi wagaidiya babi matatabuna wagaine. 36 Aku tova moyaina wana veitabodaboda ada wana veoveola ke gaitoma-dina moyaidi ina yegemona ani amifaiweya wana osedi, e ada aimo amilauboda wa yami asevatu nodi wana mididi Bana Kaliva Natuna matane.”†Lom 13:10-14, 1Tes 5:6-7, 1Pi 4:7

37 Yadayada seyana seyana Yeisu givevewala manuwa tabu wagaine,†Luk 19:47, 22:53 ada bogi wagaidiya giyegeyegemona ginaunau oya anayegana Olive wagaine ada gimiyamiya malalavu. 38 Ada kaliva moyaidi malabutuya-mwaeya ielaelai manuwa tabu wagaine ke Yeisu bonana ina nogala.