1 Ada Yeisu manuwa tabu wagaine giyegemona ginaunau, aku yana tonogalayavo ielai wagaine ke manuwa tabu anaiyogona iwaka-moena faina ina vewalena. 2 Aku Banae givonediga, “Taidei gaitoma-dina matatabuna waitaitadi, aku gavonemi velemoena, kabala-dina taidei aimo keke seyana ginatufo tabodiya inamiya, aku moyaina ina vetutuyaweyawelidi inaobu.” †Luk 19:44

3 Ada Yeisu ginau Oya Olive gilaka givetogana ada yana tonogalayavo ielai wagaine, ada adiloi gaga aku itolidadanena, ivonaga, “Uda vonema, gaitoma-dina taidei uvonayedi ani gavatova wagaine ina yegemona? Ada ya yewa-vagila faina ke tova anaebalauyabu faina, ani gavana gina veiyaiyaya tova-nai taidei gaitoma-dina ina yegemona?”

4 Yeisu gilufata, givona, “Wana itaveyabimi ada keke seyana gaito yana vefwayafwaya wagaine gina sibalemi. 5 Faina aimo kaliva moyaidi akuyeganeya inaelai ina vonaga, ‘Iya game-nai tauku Mesaiya!’ Ada yadi fwaya-nai wagaine kaliva moyaidi ina vuyoyedi. 6 Kaduwe gaviya lakaidi valeyadi wana nogalina lilivamiya ke atuwadeya. Aku keke wana aseuloulolo, faina gilubodana gaitoma-dina taidei ina yegemona. Aku ebalauyabu anatova ani aimoina. 7 Faina yoo seyana ina mididi ke mali yoo nodi ina lugaviya, ada kadu anafaiweya ebaveimeya seyana gina alakaidi ke mali ebaveimeya nodi ina lugaviya. Ada fafali tulina tulina wagaidiya loka ina yegemona kadu mabibi inamadu. 8 Aku gaitoma-dina taidei ani tova vitana anaebavevuvu-mowa, vaita vavine waifugana gina vefaena yana venatuna anauloulolo anafaiweya. Au aimo tova vitana kadu ielaelai. 9 E ada kaliva ina kiveyabimi ke ina kiveuloulolonimi ke ina luvealikami, ada babi anakaliva adiyoo moyaidi ina agougemi faina imi yaku tonogalayavo.†Mad 10:22, Iyo 16:2 10 Tayuwe tova-dina kaliva moyaidi yadi vetumagana ina segena, ada seyana seyana taudiyavo tubuiyadiyavo ina agougedi ada ina atuegedi toveimeya wagaidiya adimatavuloga faina. 11 Ada kaduwe kaliva moyaidi inaelai ada inavona evona badi falofita velemoena, aku badiyavo falofita fwayafwaya. Ada kaliva moyaidi ina vuyoyedi yadi fwaya wagaine.†1Iyo 4:1 12 Ada tova moyaina veimeya moyaina kaliva ina awaegegedi ke koyona gina veinala-mowa faina, moyaidi yadi nuwakabubu gina avaina. 13 Aku badi gavega ina atuvefaila-vagata yadi vetumagana wagaine ke Yaubada ina labina analaba yawaidi anaebalauyabu wagaine, Banae gina kibababaledi. 14 Aku nagona ani babi matatabuna wagaine Yaubada yana ebaveimeya anavaleya iwakana taidei ina lumamalena e ada babi anakaliva adiyoo moyaidi ina nogalina,†Mad 28:19 ada muliya ebalauyabu gina yegemona.”

15 Kaduwe givonaga, “Aimoina gaitoma koyo-moena bwanebwanenena Yaubada matane, ani wana itana gina midimididi Tutulagolota-nai Tabutabuna Yaubada yana manuwa tabu negenine. Tuwai-moena falofita Daniela gimaduvonayena anafaiweya ani gina yegemona. E, imi gavega vona taidei wana veyawana ani nuwami gida malina.**Kaliva tufodi inuwanuwa vaita taidei gaitoma-nai koyo-moena bwanebwanenena Yaubada matane ani bademowa giyegemona tova-nai meLoma Yelusalema iyawelina malamala A.D. 70 wagaine. Aku kadu tufodi inuwanuwa vaita aimo gina yegemona tova anaebalauyabu wagaine. (Dan 11:31) 16 Gaitoma koyo-moena kaliva ina itana wagaine, badi gavega Yudiya anafafali wagaine ina miyamiya ani gilubodadi inaota inalaka oya wagaidiya. 17 Aku badi gavega yadi manuwa getane**MeIsileli yadi manuwa anaiyogona wagaine ani manuwa getane matatabuna beyabeyana, wada kaduwe yadi ebamiya. ani idaobu aku keke idaluku yadi manuweya yadi lokoloko idavai. 18 Ada kai badi gavega yadi bakuleya ina miyamiya aga keke idayewa melaleya adinuya badobadona idavai. Au ida maduota.†Luk 17:31 19 Ada kaduwe ota anatova wagaine, ani vevine waifugadiyavo ke vevine tovesusu ina venuwakalikali velemoena, faina keke adifaiweya ina maduota. 20 E ada wana veoveola ke tova iwakana Yaubada gina velemi yami tova ota wagaine, aku keke tulutulu anatoveya, kai Sabate wagaine.**Kai yadi tova ota gida yegemona Sabate wagaine ke ida otaota ani adiveimeya Sabate faine ida yawelina. Faina Sabate anaveimeya ani meIsileli matatabudi giawatadi keke Sabate wagaine maita inana kilomita seyana anafaiweya. 21 Faina tayuwe tova-nai vita lakai-moena gina yegemona. Tainei vita-nai ani keke seyana anafaiweya gida miyami tova-nai Yaubada givebutu gaitoma matatabuna gibubudi ada gielai malinai.†Dan 12:1, Ive 7:14 Kaduwe, keke aimo gina yegemona-vagila anafaiweya. 22 Vita tainei ani kai Yaubada keke anatova gida kivemaufo, aga kaliva matatabuna idakwa. Aku Banae yana kaliva venuvenuwadadanidiyavo ani badi faidiya tayuwe tova-nai gina kivemaufona. 23 Tayuwe tova-nai wagaine kai tamo gaito gina vonemi, ‘Wanaela wana itana, Mesaiya Tauna idauwe!’ o kai ginavona, ‘Wana itana, Banae tayuwe!’ aga keke yana vona-nai wana vetumagane. 24 Faina mesaiya fwayafwaya ke falofita fwayafwaya aimo ina yegeyegemona ada iyaiyaya lakaidi ke gugai ebameyasidobodobo ina faifaisewadi, ke vaita Yaubada yana kaliva venuvenuwadadanidi ina vuyoyedi, kai anafata. 25 Wana nogalina, gaitoma taidei faidiya gavonamatawe-vagaimi. 26 Taidei faina kai tamo gaito gina vonemi, ginavona, ‘Wana itana, tayuwe walaiya Mesaiya Tauna gimiyamiya,’ keke wanana walaiya. O kai ginavona, ‘Banae taidei vetawaneya gimiyamiya,’ aga keke wana vetumagane.†Luk 17:23 27 Atunama gina atunama wayavalaseya-deya ada mwatugu matatabuna ginamali-yabuna ada ginanau wabolimaneya, e ada kaliva moyaidi ina itana. Ada kadu anafaiweya Banae Kaliva Natuna yana yewa-vagila, ani moyaidi ina itana. 28 Gadedeku kevakeva alialikana wagaine, wadedeku bwayobwayo ina vagauta.

29 “Aku tova vitana muline au kauwana gina yuyuvana ke kaduwe vaikoi yana malina ginaweu. Ailabama mwatuguya inabeu,†2Pi 3:10, Ive 6:12-13 kaduwe gabameya gaitoma toyogidi ina aliuliudi. 30 E ada Banae Kaliva Natuna yana ela anaiyaiyaya gina yegemona mwatugu wagaine, ada tomiyababi adiyoo tulina tulina matatabudi ina itana e ada inatagi-nuwanuwai.†Ive 1:7, Mad 26:64 Ada Banae gabama anabuibui tabodiya ina itana, gina elaelai wa yana toyogina ke wa yana iwakana mamalina lakaina nodi. 31 Ada tova-nai wagaine, kaula ina yuvena bonana lakaina, ada yana aneloseyavo gina imilidi inanau babi matatabuna wagaine, ke yana yoo venuvenuwadadanidiyavo ina vagauwidi. Fafali tulina tulina wabolimaneya, wayavalaseya, walaubeuya, waoyeya, ina vagauwidi.†1Kol 15:52, 1Tes 4:16

32 “Wana itana ai alaa ada wana nuwenuwena. Kai alaa lukuna bademowa gina mavuna ada kabuna evaguna gina kabukabu, tainei wagaine wana alamanena vaita bademowa ginaginana lakaina yana tova givelilivana ke kauwana toyogina gina vebutu. 33 E ada kaduwe anafaiweya, tova-nai wana itadi iyaiyaya-dina moyaidi ina yegeyegemona, aga wana alamanena vaita Banae Kaliva Natuna yana yewa-vagila anatova bademowa gilugavogavona. 34 Gavonemi velemoena, tova malinai anayooyavo ani keke ina alika-yabu aku taidei gaitoma-dina matatabuna inamadu yegemona. 35 Gabama ke babi gina avaidi aku yaku vona keke maita ginaavai, au ginamiya-vagata.

36 “Aku yadayada-nai kai kauwana anabai ani keke seyana gaito gida alamane. Badi aneloseyavo gabameya keke ida alamane, kaduwe Banae Kaliva Natuna Tauna keke gida alamane, aku Tamana anakaibe-mowa gialamanena.†Gug 1:7, 1Tes 5:1-2 37 Tuwaina Nowa yana toveya kaliva ke vevine idewadewa anafaiweya,†Eba 6:5-8 ada kaduwe Banae Kaliva Natuna yana yewa anatova anafaiweya. 38 Faina yadayada-dina wagaidiya muliya-yo mala gituwa aku kaliva imiyabavubavu-mowa. Aa ikanikani, iyugayuga, ada inaginagi ke ivevenagi analaba yadayada-nai Nowa giyage aki wagaine. 39 Ada au wa yadi yavuyoga imiyamiya ani wayagata lakaina gielai, ada matatabuna gituwaafufudi.†Eba 7:6-23 E ada kadu anafaiweya Banae Kaliva Natuna yana yewa wagaine gina yegemona. Badi keke tovetumagana ani yadi nuwanuwa evona vaita keke seyana gavana gina yegemona. 40 Tova-nai wagaine kaliva adiselu bakula wagaine ina faifaisewa aku seyana ina nauwena, seyana ginamiya.**Vona-nai ‘seyana ina nauwena’ ani banae Yeisu yana tonogala, ada Yaubada ginavai gina nauwena gabameya ke Banae nodi ina miyamiya-vagata. 41 Kaduwe vevine adiselu aa ina auaulana ani anafaiweya, seyana ina nauwena aku seyana ginamiya. 42 Tainei faina wana itaita, faina keke wada alamane gavayadayada wagaine yami Kauveya ginayewa-vagila.†Mad 25:13 43 Aku taidei wana alamanena. Kai toni manuwa gida alamanena gavakauwana bogi wagaine tokiyafu gidaelai, aga gida itaitaboda ke tokiyafu keke gida iyawela gidaluku yana manuweya.†Luk 12:39-40, Ive 3:3 44 E ada imi kaduwe anafaiweya, tova moyaina wana itaveyabimi ke wana veitabodaboda, faina gavakauwana keke wada veitabodaboda wagaine ani Banae Kaliva Natuna ginayewa-vagilena.”

45 “Gava togugai ani banae wa anavetumagana ada kadu tonuwanuwa velemoena? Banae togugai-nai ani yana kauveya gina venuwadadanena ke yana togugaiyavo ani gina itaitaveyabidi, ada adiga gina veleveledi aditova velemoena wagaidiya. 46 Kai yana kauveya ginayewa-vagila ada gina itanuwagana gigugugai ani giveimeyena anafaiweya, aga banae togugai-nai gina vemwamwala. 47 Gavonemi velemoena, togugai-nai ani yana kauveya ginasena ke yana giba matatabuna gina itaveyabidi.†Mad 25:21,23 48 Aku kai banae togugai ani kaliva koyona, aga nuwainagene ginavona, ‘Ida yaku kauveya givekwalu lakaina. Kai keke gina maduela.’ 49 E ada gina vebutu tubuiyanavo togugaiyavo gina lavulavudi, ada badi iyuga kwavakwava ani nodi ina kanikani ke ina yugayuga. 50 E aku yadayada-nai togugai keke gida itaitaboda wagaine, ani yana kauveya gina yewana ada togugai gina veyaulovogina, faina keke gida alamane yadayada-nai o kai gavakauwana anabai wagaine ginayewa. 51 Ada yana kauveya gina nuwagana ke gina lumalimaliwavuna, ada ginasena badi meyalagalaga**Badi meyalagalaga ani badi igaveuveuwa vaita taudiyavo iawaegedi Yaubada wagaine, aku nuwainagediya ani keke velemoena. adimatavuloga anafafali wagaine. Wadedeku-deya nodi ina tagitagiya lakaina ke nigodi ina vekudaligoligota uloulolo lakaina faina.”