7
Yaubada yana aneloseyavo yana talakili isena meIsileli 144,000 wagaidiya.
1 Taidei gaitoma-dina mulidiya mataku ginau, ani gaitana anelose adilaufuli babi imidi balawalilivugina mala matadi laufuli wagaidiya. Babi anamala laufuli-dina ikikiabidi e ada mala keke ginamadu babi wagaine, o leyaga wagaine, o kai gava ai seyana wagaine. 2 Aku kadu anelose seyana gaitana gilakalaka kauwana ebalakavine, ada gaitoma seyana gikikiveyabina. Gaitoma-nai ani Yaubada miyamiyani-vagaina yana talakili gimiyamiya wagaine, wada ivevegugaiyena e ani Yaubada yana talakili inasedi kaliva wagaidiya. Ada givedou bonana lakaina wagaine anelose-dina adilaufuli wagaidiya, badi Yaubada toyogina giveledi ada babi ke leyaga ina kivekoyodi. 3 Givedou wagaidiya, givona, “Keke babi o kai leyaga o ai wanamadu kivekoyodi. Wanaboda analaba Yaubada yana talakili anasena yana togugaiyavo debafoudiya.” †Isik 9:4, Ive 9:4 4 Ada ganogalina gavaiyei kaliva aditalakili isedi. Taine kaliva wani analedi foti fowa tausani (144,000) ani Isileli natunavo adiunuma seyana seyana wagaidiya-deya, taidei anafaiweya.
5 Iyuda anayoo wagaidiya-deya, 12,000,
Lubeni anayoo wagaidiya-deya, 12,000,
Gada anayoo wagaidiya-deya, 12,000,
6 Asa anayoo wagaidiya-deya, 12,000,
Nafitalai anayoo wagaidiya-deya, 12,000,
Manasa anayoo wagaidiya-deya, 12,000,
7 Simiyoni anayoo wagaidiya-deya, 12,000,
Livai anayoo wagaidiya-deya, 12,000,
Isaka anayoo wagaidiya-deya, 12,000,
8 Sebuloni anayoo wagaidiya-deya, 12,000,
Iyosefa anayoo wagaidiya-deya, 12,000,
ada Beniyamina anayoo wagaidiya-deya, 12,000.
Taidei Isileli natunavo adiunuma-dina tuwelo anakaliva wagaidiya Yaubada yana talakili isena, adiyoo anamatatabuna ani 144,000.
Yaubada yana yoo lakai-vagaina iawadavadavana gabameya.
9 Taidei gaitoma-dina muline mataku ginau kaduwe, gaitadi yoo lakaina, keke tamo gaito anafata gina veyawadi. Badiyavo ani unuma seyana seyana wagaidiya, meya seyana seyana wagaidiya, ada ielai fafali seyana seyana babi matatabuna wagaine-deya, ada moyaidi imidimididi veimeya anaebavetoga debaine ada Banae Lami-nai debaine. Iveigavu nuya kwayakwayana wagaine ada bodaboda lukuna†Vei 23:40, Iyo 12:13 nimadiya. 10 Ada ikovakova ivona,
“Yada Yaubada givetogana veimeya anaebavetoga kaikaiwabuna
wagaine ada kadu Banae Lami ani kakaikaiyedi,
faina wagaidiya-deya adakibababala givevuvu.”
11 Ada tomiya gabama aditonagona kadu gaitoma-dina wayawaidi adilaufuli†Ive 4:6 veimeya anaebavetoga imidififina, ani badiyavo ke ebavetoga-nai ani anelose moyai-vagaidi imidififidi. Ada iiboula-mowa magigidi babiya veimeya anaebavetoga debaine ke Yaubada ioduoduna, 12 ivona,
“Ika anafaiweya! Yada Yaubada kadavadavana!†1Awa 29:10-11
Tova moyaina kavesivesiule wagaine.
Kavemoimoinena ada kavewagana Tonuwauya-mowa kadu Totoyogi-vagaina.
Anayegana kana kikilakaina-vagata ke vagata! Ika anafaiweya.”
13 Ada tomiya gabama aditonagona wagaidiya seyana gielai ada gitolidadaneku givona, “Badi adinuya kwayakwayana ani ualamanedi? Ada gadedeku-deya iela?”
14 Galufata gavona, “Matalakaina, o ualamanena.”
Ada kaduwe givona, “Ida badiyavo ani mali kaliva uloulolo lakaina†Mad 24:21-22, Mak 13:19-20 ikiveyegemonina wagaidiya yadi vetumagana faina, aku au imididi toyogina. Adinuya ikoladi Lami dayagina wagaine ke gikwayadi ada yegayega-moedi.**Vona-nai ‘adinuya ikoladi’ ananuwanuwa ani givonaluvefosau badi gavega ivetumagana Yeisu wagaine, ada Bana dayagina gimadu wagaine yadi koyona gikolayavuledi. E ada nuwainagedi yegayega-moedi, keke tamo koyona wagaine. (1Iyo 1:7)
15 Taidei faina badiyavo ani Yaubada yana veimeya anaebavetoga debaine imiyamiya,
ada yadayada ke bogi yana gugai igugugaiyedi Banae faine yana manuwa tabu gabama wagaine.†Ive 22:3
Ada Banae-nai givetovetoga yana veimeya anaebavetoga kaikaiwabuna wagaine, ani yana miyami wagaine
gina lifitagodi†Ais 4:5-6 anafaiweya kamukamu natudiyavo kabikabisodi gilifilifitagodi ofadi wagaidiya.
16 Ada badi keke kadu mafa gina lavudi, keke kadu meyadi gina kwakwa, ada keke kauwana o kai gavana wa anaginaginana lakaina gina kufuwafuwadi.†Sam 121:6, Ais 49:10
17 Faina Banae Lami veimeya anaebavetoga kaikaiwabuna nefanine ani gina itaitaveyabidi vaita toitaveyabina
yana sifi giitaitaveyabidi anafaiweya,†Sam 23:1-2, Mad 2:6, Iyo 10:11 ada gina nagoyedi inanau
yawai anagufa anatovoga wagaidiya ina yuyuga.
Ada Yaubada matailudi seyana seyana gina luegege-yavulena matadi wagaine.” †Ais 25:8, Ive 21:4
†7:12 1Awa 29:10-11
†7:14 Mad 24:21-22, Mak 13:19-20
**7:14 Vona-nai ‘adinuya ikoladi’ ananuwanuwa ani givonaluvefosau badi gavega ivetumagana Yeisu wagaine, ada Bana dayagina gimadu wagaine yadi koyona gikolayavuledi. E ada nuwainagedi yegayega-moedi, keke tamo koyona wagaine. (1Iyo 1:7)
†7:15 Ais 4:5-6
†7:16 Sam 121:6, Ais 49:10
†7:17 Sam 23:1-2, Mad 2:6, Iyo 10:11