1 Ada gabama evaguna ada babi evaguna gaitadi,†2Pi 3:13 faina gabama nagona ke babi nagona ibwavi ada giavai matatabuyedi. Ada leyaga kadu keke-bamowa. 2 Ada melala tabutabuna taine Yelusalema evaguna†Ive 3:12 ani gaitana, giobuobuelai Yaubada wagaine gabameya-deya. Anaita iwaka-moena vaita vavine yana nagi faina ikidewedewena anafaiweya, ada nagi anaveigavu wagaine iveigavuna moganena faine. 3 Ada bonabona lakaina ganogalina giyegeyegemona Yaubada yana veimeya anaebavetoga kaikaiwabuna wagaine, givona, “Wana itana, malinai Yaubada yana ebamiya ani kaliva nodi, ada Banae badi nodi ina miyamiya.†Vei 26:11-12 Badiyavo yana kalivamomo, ada Bana Tauna badi nodi ina miyamiya ke Banae yadi Yaubada gina miyamiya. 4 Matailudi seyana seyana gina luegegena matadi wagaine.†Ive 7:17 Ada keke aimo kaliva ina alialika†Ive 20:14, 1Kol 15:26 o kai ina nuwanuwavita, keke ina tagiya o kai ina uloulolo,†Ais 35:10, 51:11 faina babi anagaitoma-dina tuwai-bulubuluna-deya imiyamiya ani bade inuvagata.”

5 Aku Bana givetogana veimeya anaebavetoga wagaine givona, “Una itana, malinai gaitoma matatabuna Iya gakikive evagudi.” Ada kaduwe givoneku, givona, “Una vetokilumidi gaitoma-dina malinai gavonayedi, faina taidei ifufu-nai ani velemoena ada wa anavetumagana.”

6 Kaduwe givoneku, givonaga, “Au bademowa! Yaku nuwanuwa matatabuna bade galuyabudi. Iyayeku ani Alefa ada Omega, ebavevuvu ada ebalauyabu.†Ive 1:8 ke anaailabama ebakivemala Gaito meyana gikwakwa, gana veyuna yawai anagufa anatovoga wagaine, gufa-nai keke wa fatana.†Iyo 4:10, 7:37 7 Badiyavo Iya faikuya ina vetoyogina ani taide gaitoma-dina gana veledi. Ada Iyayeku ani badi yadi Yaubada, ada badi Iya natukuweyavo. 8 Aku badi gavega imatauta akuyegana ina waiwaina, kadu badi gavega keke ida vetumaganeku, ada badi gavega yadi dewa bwanebwanenedi, ada badi gavega kaliva iluluvealikadi, ke badi gavega vovodi iawaawaege-kavokavovodi, ada badi gavega kweli tulina tulina iabiabina kadu badi gavega ibogabogavu,**Taide dewa-dina anafaiweya bogavu, welavi, kiyogoyogo, ani keke ida miyami Yaubada yana ebaveimeya wagaine, ada badiyavo taide dewa-dina idewadewayedi ani faidiya Yaubada givona taide maita-nai wagaine. ke badi gavega aseasediya ioduodu mali yaubadayavo wagaidiya, ada badi gavega ivefwayafwaya, ani matatabudi inana ina miyamiya-vagata lavu-nai ai ke salufa ialalata wagaine. Tainei ani alika anavelu.” Taide anafaiweya Yaubada yana vona.

9 Aku anelose-dina adiseveni wagaidiya ani seyana gielai wagaikuya. Badi anelose-dina nimadiya nauwa-dina imaga uloulolo vita-moedi wagaidiya. Taine uloulolo-dina ani uloulolo vita-moedi adiseveni wai imulina. Ee, anelose-nai giela givoneku, givonaga, “Unaela gana vewaleni vavine tonagi, Bana Lami vavinena.” 10 Ada Aluwaluwa Tabuna wa yana toyogina gielai wagaikuya aku anelose-nai givaiku gilakaveku oya tulatulana lakaina wagaine, ada melala tabutabuna Yelusalema givewaleku, giobuobuelai gabameya Yaubada wagaine gabameya-deya. 11 Melala-nai wagaine ani Yaubada yana iwakana mamalina gimiyamiya, ada yana malina ani lunamanamalina vaita kabala fatana lakaina ivewagana yesipa anafaiweya, ada mamali-moena vaita kelasi anafaiweya. 12 Aku anakali ani tulatulana ke toyogina, ada melala gibalawalilivugina. Ada kali-nai wagaine anawana tuwelo, ada wana seyana seyana wagaine anelose seyana gimiyamiya, adiyoo tuwelo. Aku wana-dina wagaidiya yegana ivetokilumidi imiyamiya, taine Isileli natunavo adituwelo unumidi adiyegana. Yegana seyana gimiyamiya wana seyana seyana wagaidiya.†Isik 48:31-35 13 Kali-nai ani kauwana ebalakavine anafafali wagaine wana toiye imiyamiya, wayavalaseya anafafali wana toiye, wabolimaneya anafafali wana toiye, ada kauwana ebaolune anafafali wana toiye. 14 Ada melala-nai anakali anaavutuwa ani kabala adiyoo tuwelo,†Ibel 11:10 ada kabala-dina wagaidiya ani Bana Lami yana afositoloyavo adituwelo adiyegana imiyamiya.

15 Ada banae anelose-nai giifufu wagaikuya ani aiwala ebaetowava gola gikiveyabina ke melala lakaina gina etowavana, kadu anawanayavo ke anakali. 16 Ada melala anavemanawe ada anavelalafa ani au seya-moena, ada anatulatula kaduwe seyana, sitediya tuwelo tausani anafaiweya.**Etowava-nai ‘sitediya tuwelo tausani (12,000)’ ani vaita kilomita 2,200 anafaiweya. 17 Kaduwe anakali gietowavana, ada anatulatula ani kiubiti wani analedi foti fowa (144).**Etowava-nai ‘kiubiti wani analedi foti fowa (144)’ ani mita sikisiti faifi (65) anafaiweya. Anelose gietowavana ide kaliva adaetowava anafaiweya. 18 Kali ani kabala fatana lakaina ivewagana yesipa wagaine ibubuna, aku melala lakaina ani ibubuna gola yegayega-vagaina wagaine, vaita kelasi mamali-moena anafaiweya. 19 Aku melala anakali anaavutuwa ani iveiveigavuna kabala fatadi lakaidi moyaidi tulina tulina wagaidiya, anaita iwaka-vagaina. Avutuwa anakabala nagona wagaine iveigavuna ani yesipa, bana anakala yabeyabelina ke yagoyagona aku vaita kelasi mamali-moena anafaiweya. Kabala anavelu ani safaiya, bana anakala matamatagina vaita gabama anamatamataga anafaiweya. Kabala anaveto ani agate, bana anakala tulina tulina. Anavelaufuli ani emeladi, bana anakala matamatagi-moena. 20 Anavefaifi ani onikisi, bana yabeyabelina ke kwayakwayana nodi seyana. Anavesikisi ani keneliani, bana yabeyabelina. Anaveseveni ani kilisolaiti, bana yagoyagona. Anaveeita ani beleli, bana matamatagina vaita gawana anaita anafaiweya. Anavenaeni ani tofasi, bana yana yagoyago gilunamanamalena. Anaveteni ani kulisofelesi, bana yana matamataga gilunamanamalena. Anaveileveni ani yiyasito, bana anakala vaita gawana bowabowa-moena anafaiweya. Ada anavetuwelo ani ametisi, bana pepolo. 21 Ada wana tuwelo-dina seyana seyana ani au bidi seyana lakai-moena wagaine ibubuna, ivewagana ‘pelo’,**Taidei gaitoma-nai ivewagana ‘pelo’ ani giyegeyegemona tova-nai makama mukumukuna kabiso-moena ginaluku kwame wagaine. Ada ginamiya ginamiya-deeya, au anaita iwaka-vagaina gina yegemona. Ada bana wagaine ododo ke tagasafi ibububudi. ada vewaga velemoena. Ada melala anawai ani gola yegayega-vagaina wagaine ibubuna, vaita kelasi mamali-vagaina anafaiweya.

22 Aku melala-nai tabutabuna Yelusalema wagaine ani keke tamo manuwa tabu gadaita, faina Yaubada anakaibe Totoyogi-vagaina ada Banae-nai Lami ani melala-nai yadi ebamiya. Taidei faina badi taudiyavo ani anamanuwa tabu. 23 Ada melala-nai anamalina ani keke kauwana o kai vaikoi wagaidiya-deya, aku Yaubada yana iwakana mamalina gituituimalina, ada Banae Lami ani vaita yana mayale anafaiweya.†Ais 60:19,20 24 Yoo tulina tulina moyaidi babi matatabuna wagaine yana malineya ina miyamiya, ada babi anatoveimeya lakaidi yadi kaikaiwabu ina alialiyena wagaine. 25 Ada yadayada anamatatabuna wagaine anawana yavuyavudi ina miyamiya. Keke ina falifalidi, faina melala-nai wagaine ani keke tamo bogi. 26 Ada babi anakaliva adiyoo moyaidi ina elaelai melala-nai wagaine, yadi kaikaiwabu ina alialiyedi ke wagaidiya Yaubada ina vemoimoinena. 27 Aku gavagaitoma o kai gavakaliva o vavine keke tabutabuna aku Yaubada matane keke yegayegana, ani keke-bamowa ginaluku wadedeku. Ada kaduwe badi gavega gugai ebavovomumu koyodi igugugaiyedi o badi gavega yadi dewa vefwayafwaya, keke inaluku melala-nai wagaine, keke-mowa.†Ais 35:8, Iyol 3:17, 1Kol 6:9-10, 2Pi 3:13 Aku badi yawai-vagata bade inuwagana ke adiyegana vetovetokilumina Lami yana buki†Ive 3:5 wagaine, ani badiyavo gagana adiawaega inaluku. Buki-nai ani Yawai anaBuki.