1 E ada gavana vetumagana? Vetumagana anaalamana taidei anafaiweya. Gaitoma-dina faidiya kanuwavetumagana kana nuwagadi, ani adivelemoena bademowa imiyamiya. Ada kaduwe gavana gavana imiyamiya aku keke adafaiweya kana itadi, ani yada vetumagana wagaine adafaiweya kana alamanena velemoena imiyamiya.†2Kol 4:18, 5:7, 1Pi 1:8 Tainei kavewagana ‘vetumagana’. 2 Tova tuwaina anayoo ani yadi vetumagana Yaubada wagaine isevelavelalaina faina, giawaveiwakanedi. 3 Yada vetumagana wagaine nuwada gimalina vaita Yaubada yana vona gaga aku babi ada gabama iyegemo, e ada gavana keke kada itaita ani wagaidiya gibubudi gavana malinai kaitaitadi.†Eba 1:1, Lom 4:17

4 Tova tuwai-moena Ebeli Yaubada givetumaganena, e ada yana vetumagana wagaine yana vebolavoi Yaubada wagaine iwaka-vagaina ayo Keni yana vebolavoi. Yaubada givemwamwala Ebeli yana vebolavoi givelena wagaine, e ada givewagana banae kaliva yegayegana. Ada Ebeli bademowa gialika, aku yana vetumagana ifuifufuna ani vaita aimo gida ifuifufu wagaideya.†Eba 4:3-8, 1Iyo 3:12

5 Kaduwe seyana ani Inoki, banae tova moyaina Yaubada nodi ivevetubuiyana ada Yaubada giawaveiwakanena givona, “Iya gavemwamwala Inoki faine.” Ada yana vetumagana wagaine Inoki wayawaina ani Yaubada givai ginauwena gabameya Tauna wagaine, e ada alika keke gida lutovoni. Ada kaliva ilele-wayogena, keke ida nuwaga.†Eba 5:22-24 6 Ada kai keke wa yada vetumagana, aga keke anafata Yaubada gina vemwamwala faideya. Aku kai gaito seyana nuwanuwana veoveola wagaine gina nuyegemona Yaubada matane, aga gilubodana gina vetumagana vaita Yaubada gimiyamiya,†1Awa 28:9, Iyel 29:12-14, Iyo 4:24 ada kaduwe gina vetumagana vaita badi gavega ilelelena velemoena ina alamanena faina, ani Banae gina fatadi iwakana ke gina lemedi e ada ina alamanena.

7 Kaduwe kaliva seyana anayegana Nowa, banae yana vetumagana wagaine aki giyogona.†Eba 6:13-22, Luk 17:26 Tova-nai Yaubada givonamatawena gavana aimo gina yegemona faina, yana vona givemoimoinena ada aki-nai giyogona ke yana gabu nodi adikibababala ina nuwagana.**Tayuwe tova-nai wagaine aimo keke wei o kai tuwa ida yegemo babi matatabuna wagaine. Ada Nowa keke gida itadi aku auwe Yaubada givetumaganena ke aki-nai giyogona. (Eba 6:13-22) E ada Nowa yana vetumagana wagaine, babi matatabuna anakalivayavo yadi nuwanuwa koyona giseyegemonena, e ada mamalina vaita adilauboda-mowa Yaubada gina vematavulogidi. Aku Nowa yana vetumagana-nai faina, Yaubada givona, “Nowa bana gasena yegayegana matakuya.” †Lom 4:13

8 Kaduwe anafaiweya Ebelaamo. Yana vetumagana wagaine, Yaubada givenogalena tova-nai gidouwena ke yana fafali ebatubugina gina segena aku ginanau fafali-nai wagaine Yaubada givonadabadabayena aimo gina velena. E ada Ebelaamo wa yana vemoimoina gimatawalewale ke gitauya, aku gadedeku ginaunau ani keke gida alamane aku au ginau.†Eba 12:1-7, Gug 7:2-4 9 Wa yana vetumagana babi-nai Yaubada givonadabadabayena, ani wagaine giveawawala anafaiweya malifafali wagaine. Keke manuwa velemoena gidayogo aku manuwa sinininila wagaine ginumiyamiyanau. Kaduwe anafaiweya, natuna Aisake ke tubuna Iyakobo manuwa sinininila wagaidiya imiya, ada aimo-yo Yaubada yana vonadabadaba babi-nai faine giluvagilena adiselu wagaidiya, babi tayuwe aimo gina veledi. 10 Ebelaamo ginumiyamiyanau ke manuwa sinininila wagaidiya gimiyamiya, faina giitaitabodana melala-nai wa anaavutuwa velemoena,†Ive 21:14 melala-nai ani gabameya Yaubada bademowa giyogona Tauna yana nuwanuwa anafaiweya.†Ive 21:2,10

11 Kaduwe vetumaganeya, Ebelaamo vavinena Sela auwe kakalina ada givevavine nonogana Yaubada yana toyogina ginuwagana ke gina veifuga. Ebelaamo givetama, faina banae wa vavinena nodi Yaubada yana vonadabadaba vaita yana gabu ina vemoyai ani ivetumaganena. Faina Yaubada ani vona velemoena, gavana ginavona, anafaiweya gina gugaiyena. 12 E ada au Sela giveifuga. Moganedi Ebelaamo givekaliva ada keke anafata tamo kwamana gina vetubu.†Lom 4:16-22 Givekaliva e aku bana wagaine yana tubudelideli moyai-vagaidi iyegemona. Adiyoo keke adafaiweya kana veyawadi, vaita ailabama gabameya o kai taliya anamakama anafaiweya.†Eba 15:5, 22:17, 32:12

13 Taidei kaliva-dina gaifufuyedi, ani matatabudi aimo yadi vetumagana wagaine imiyamiya aku ialika. Aimo wayawaidi anatoveya, gaitoma-dina Yaubada givonadabadabayedi gina veledi ani keke ida nuwagadi, aku vaita iitaitaidi e ada ivetumagananena aimo ina yegemona, e ada ivesiule Yaubada wagaine faidiya. Ada ivonavona vaita badi iveawawala ke inumiyamiyanau babi taidei wagaine. 14 Badi gavega taidei anafaiweya ivonavona, ani taudiyavo iawayegeyegemonedi vaita biyavo-dina yadi fafali velemoena iveitabodebodena. 15 Aku kai ida nuwayewa yadi fafali imadusegena faine, aga adifaiweya meyameyagani-moena idayewa fafali-nai wagaine. 16 Aku velemoena yadi nuwanuwa isevelavelalaina fafali iwaka-moena faine, tainei fafali-nai ani gabameya. Taidei faina Yaubada badi faidiya ani keke gida vovomumu, aku au givona, “Iya yadi Yaubada.” Ee, ide kaalamanena keke gida vovomumu faidiya, faina bademowa melala lakaina gabameya gikidewedewena faidiya.†Mad 25:34

17-18 Bana Ebelaamo yana vetumagana wagaine, natuna tubueyana Aisake keke gida nuwalolone aku giawaegena Yaubada wagaine. Nagona Ebelaamo wagaine Yaubada givonadabadaba, givona, “Natu Aisake anakaibe gagana wagaine ya tubudelideli ayegana ina waiwaina.” †Eba 21:12 E aku muliya-yo Yaubada Ebelaamo gigaluvaluvana ke gina alamanena velemoena kai bonana gina venogalena o kai keke, ada givona, “Natu Aisake una vebolavoiyena wagaikuya.” †Eba 22:1-19 Taidei anafaiweya Yaubada givonena, ada Ebelaamo wa yana vetumagana natuna Aisake keke gida nuwalolone, aku giawaegena Yaubada wagaine ke gikidewadewa natuna gida vebolavoiyena. Ebelaamo Yaubada yana vonadabadaba bademowa ginuwagana nonogana natuna tubueyana gida vebolavoiyena. 19 Faina nuwainagene givona, “Kai natuku bademowa alialikana, aga Yaubada anafata gina siveyawana.” Ada natuna gida luvealikana aku Yaubada giawatana, e ada kai kadavona vaita Ebelaamo Aisake ginuwaga-vagilena alika wagaine-deya.

20 Kaduwe Aisake yana vetumagana wagaine, natunavo Iyakobo ke Iso giawanuwakabubuyedi yadi miya tova matadiya faine.†Eba 27:27-29,39,40 Aisake Yaubada givetumaganena vaita yana awanuwakabubu-dina aimo gina kiveyegemonidi.

21 Vetumaganeya, Iyakobo yana alika lilivane Iyosefa natunavo seyana seyana giawanuwakabubuyedi,†Eba 48:16,20 giluveyabina yana aiwala tabona wagaine aku gioduodu Yaubada wagaine.

22 Ada Iyosefa yana vetumaganeya, yana alika anatova givelilivana wagaine au yana yoo meIsileli givonedi aimoina Yaubada gina yegemonedi fafali Itipita wagaine-deya, givona, “Aimo tova-nai wana tauya wananau babi-nai Yaubada givonadabadabayena wagaideya, aga luluku wanavai wana nauwedi Kenani wadedeku wana tavudi.” †Eba 50:24-25, Iyeg 13:19

23 Kaduwe Mosese inana ke tamana wa yadi vetumagana. Yadi tova wagaine, Itipita anakini giveimeya ke bebeta kaliva matatabudi ina luvealikadi.†Iyeg 1:15-16,22 Aku tova-nai natudi Mosese gitubuga, ialamanena kwamana-nai Yaubada giveledi ani keke kwamana kavovona, e ada kini yana veimeya keke ida matause. Ivetumagana vaita Yaubada gina kibababalena, e ada yadi manuweya isewavuyena vaikoi toiye wagaidiya.†Iyeg 2:2-3, Gug 7:20

24-25 Muliya-yo Itipita anakini natuna vavine ani Mosese ginuwagana, ada givai ginauwena yana manuweya ke gifayayena. E ada Mosese gitubulakata wa yana veimeya ada kaikaiwabuna, faina banae vaita kini tubuna anafaiweya. Aku bana Mosese Yaubada givetumaganena. Gialamanena kai tauna kwana Itipita anafaiweya gina miyamiya, aga biyavo-dina yadi dewa koyodi ani tauna nuwana ginavai-vagaina, wada miya-nai ani anavemwamwala keke tova manamanawena aku ginamadu avaina. Aiyada givenuwadadana ke tauna giawaegena ke gina uloulolo-tamwata tubuiyanavo anafaiweya, badi Yaubada yana kalivayavo ifaifaisewa keke wa fatadi meItipita faidiya. 26 Mosese ginuwanuwa vaita kai kaliva ina awavekoyoyena o kai ina awaveleigena faina Mesaiya givetumaganena,†Ibel 13:13 aga wai-nai ani iwaka-moena ayo kai Itipita anakaikaiwabu wagaine gida miyamiya. Taidei anafaiweya ginuwanuwa faina, giitaitaboda tova gielaelai aimo gina nuwagana fata miyamiyani-vagaina Yaubada wagaine. 27 Vetumagana wagaine Mosese keke kini yana nuwakoyo gida matause aku Itipita gimadusegena.†Iyeg 12:37,51, 13:17 Yana vetumagana-nai wagaine, matana gise-vagaina Yaubada wagaine ke vaita giitaitana, Banae-nai keke adafaiweya kanaita.†1Tim 1:17 E ada wa yana atuvefaila gimididi toyogina. 28 Wa yana vetumagana, Yaubada yana veimeya Nugulina faina gidibumwaigena, ada meIsileli givonedi ke sifi kabisodi iluvealikadi ke dayagidi wagaine yadi edawana iluababadi. Taidei anafaiweya gidewena e ada tova-nai anelose-nai alika gialiyena, ani ginaelai ke iyaiyaya-dina gina itadi, ani keke manuwa-dina wagaidiya ginaluku yadi tomoinagona gina luvealikadi anafaiweya meItipita yadi tomoinagona gina luvealikadi.†Iyeg 12:21-32

29 Kaduwe meIsileli ivetumaganena Yaubada faina, Leyaga Yabeyabelina idamanina babi ayayana wagaine. Tova-nai Itipita isegena aku inaunau aku meItipita imaduvenegadi. Ada meIsileli yadi ota wagaine Leyaga Yabeyabelina wagaine iyegemona, ada Yaubada yana vona wagaine leyaga giawaina, fafaline fafaline gimididi aku meIsileli idamana babi ayayana wagaine. Aku meItipita igaluvaluva ina damana, ani leyaga giiwatavudi, ada matatabu-moedi ikamomola ke ialika.†Iyeg 14:21-31

30 Kaduwe meIsileli yadi vetumagana wagaine, melala Yeliko anakali lakai-moena ibalabalawalilivugina yadayada seveni wagaidiya. Ada yadayada-nai anaveseveni wagaine ibalabalawalilivugina, ani kali giayaweyaweli gibeu.†Iyos 6:12-21

31 Kaduwe vine Yeliko badi tosedada adiyegana Leyabi ani yadi vetumagana faina, keke ida luvealikadi. Faina badi meIsileli toitavagivagiya wa mwamwalidi isivaivaidi inauwedi yadi manuweya. Badi vavine-dina Yaubada ivetumaganena faina, melala-nai analuyaweyawela wagaine keke ida luvealikadi, aku badi gavega Yaubada yana veimeya idibusoyogena ani iluvealika-yabudi.†Iyos 2:1-21, 6:25

32 Tovetumagana moyaidi aku auwe idogame-dina. Tova keke anafata tovetumagana kaduwe gana ifuifufuyedi, anafaiweya Gidiyoni,†Tovei 6:1 - 8:35 Balaki,†Tovei 4:6 - 5:31 Samusoni,†Tovei 13:24 - 16:31 Iyefeta,†Tovei 11:1 - 12:7 ada kaduwe Deivida,†1Sam 16:1,13 Samuwela,†1Sam 1:20 ke falofitayavo. 33 Badi yadi vetumagana faina, ebaveimeya aditoveimeyayavo ilugaviyadi ke itoyogisegedi, nuwanuwa tunutunugina wagaine yadi yoo iveimeyedi, ke kaliva adivita ikivetunu-dewedewedi e ada yadi veiwaka inuwagana. Ada gavana Yaubada givonadabadabayena gina veledi ani inuwagana. Ada kevakeva laiyoni iela vaita ida kanidi, aku Yaubada awadi gikibodana.†Tovei 14:6, Dan 6:16-22 34 Tufodi yadi vetumagana faina, aiyabeyabela toyogi-vagaina wagaine ibatugedi aku Yaubada aiyabeyabela-nai anatoyogina gikivetuluna,†Dan 3:23-27 tufodi nibaidiyavo ielai ke yadi benisi wagaine ida luyavuledi aku Yaubada giyavadi, tufodi kabekabebediyavo aku toyogina Yaubada giveledi, tufodi gaviya wagaine ivetoyogi-moena ke mali yoo yadi tolugaviyayavo itoyogisegedi. 35 Vevine tufodi yadi vetumagana faina, yadi toalika iyawa-vagila.†1Kin 17:17-24, 2Kin 4:18-37 Aku kaliva tufodi yadi vetumagana faina, nibaidiyavo iagouga ke vovodi ikiveuloulolonidi lakaina ada ivonediga, “Kai Yaubada wana vedomobubusena aga ana etoyavumi.”

Aku badi ivonaga, “Keke-mowa Yaubada ana vedomobubuse. Kai wana luvealikama aga aimo anayawa-vagila ke Yaubada nodi anamiya iwakana.” Ada au nibaidiyavo ikiveuloulolonidi-deeya, ialika. 36 Ada tufodi Yaubada wagaine ivetumagana faina, nibaidiyavo iawaveleigedi ke bulava wagaine ilubibiwalidi, kaduwe tufodi ani isedi deliya ke waseinidi imiyamiya.†Eba 39:20, Iyel 20:2, 37:15-16 37 Tufodi yadi vetumagana faina kabala wagaine itutuvealikadi,†1Kin 21:13, 2Awa 24:21 tufodi vovodi soweli wagaine isowalugedi, kaduwe tufodi benisi wagaine iluvealikadi,†1Kin 19:10, Iyel 26:23 tufodi adinuya keke faina sifi ke goti bubudi iosedi ke imiyamiyadadana, adiga keke, lokoloko keke, ebamiya keke, keke tamo yadi veiwaka. Ada au tova moyaina nibaidiyavo ikiveuloulolonidi ke idewadewa koyona wagaidiya. 38 Biyavo-dina wa adiuloulolo aku au yadi vetumagana toyogina faina, iwaka-vagaidi Yaubada matane. Yadi iwakana lakai-vagaina ayo tomiyababi moyaidi. Nibaidiyavo iwavidi e ada imiyadadana fafali kavovona ke oya wagaidiya, ada luwa ke vatu wagaidiya ivemanuwa.†1Sam 22:1, 1Kin 18:4, 19:9

39 Ada biyavo-dina matatabudi yadi vetumagana faina ani Yaubada giawaveiwakanedi, aku keke ida nuwaga gavana givonadabadabayena. 40 Gavaiyamu-yo keke ida nuwaga? Tuwai-vagaina Yaubada ginuwanuwa kaduwe ide faideya ke yana nuwanuwa iwaka-moena gimadu venuwadadanena, tainei badi adikiveiwakana-vagata keke ina madunuwaga aku ina bodaboda, e ada badiyavo ke ideyavo moyaida tova seyana wagaine gina lumatatabuyeda adakiveiwakana-vagata faina.