Timoti Yana Leta Nagona Paulo Givetokilumina
Kivemala
Timoti banae Lisita anakaliva Galetiya anafafali wagaine. Malinai ani fafali-nai ivewagana Teki, tainei Eisiya anafafali lakaina wagaine. Paulo yana laumamala balawalilivuga anavelu wagaine, Timoti givagaulena ada gikwayabu nodi inudadana. (Gugai 16:1-3.) Kaduwe tova-nai Paulo iyogo-vaguvaguyena wagaine, bana Timoti nodi. (Filipai 1:1, Kolose 1:1, ada Filimoni maita 1)
Tova-nai Paulo anaetoyavuga muline, Timoti nodi ibalawalilivuga aku muliya Paulo Timoti anaveimeya givelena ke tovetumagana adiyoo Efeso wagaine gina itaveyabidi. Taidei leta-nai wagaine Paulo Timoti gimatawena tovewala fwayafwaya faidiya e ada meEfeso yadi vetumagana keke ina kivekoyo. Kaduwe toekalesiya yadi tafalolo faina gikivetuvetunu, ada ekalesiya aditonagonayavo tulina tulina ke vavinediyavo gavaiyamu yadi dewa adilauboda ani giifufuyena. Kaduwe Timoti bana Keliso yana togugai badi tovetumagana adimwatuguya faina, Paulo giluwageyena gavaiyamu yana dewa adilauboda faina.
Timoti anavesiule. (1:1-2)
Vewala tunutunugina faina. (1:3-11)
Paulo yana vesiule KAUVEYA yana nuwadoga faina. (1:12-20)
Oduodu anaveimeya. (2:1-15)
Ekalesiya anatonagonayavo yadi dewa faina. (3:1-13)
Yada tafalolo vuvuna Yaubada givemogatalina ani nuwanuwa lakaina. (3:14-16)
Tovewala fwayafwaya faidiya. (4:1-5)
Vetogugai iwakana Keliso faine. (4:6-16)
Toekalesiya adiitaveyabina faina. (5:1 - 6:21)
1
1 Iya Paulo, Yeisu Keliso yana afositolo seyana. Yaubada adaTokibababala ke Yeisu Keliso Banae yada ebanuwavetumagana, ani akuveimeya iveleku veafositolo faina.
2 Siule natuku Timoti.†Gug 16:1-3 Oyeni ani vaita natuku velemoena anafaiweya,†Tai 1:4 faina galemeni ke ya alamana gitubuga-mowa Yeisu anavetumagana wagaine. Yaubada Tamada ke Yeisu Keliso yada Kauveya ani yadi nuwadogeya ina lemelemeni, ke ina nuwakalikaliyeni ada kaduwe asease ina kikiveniwalovina.
Vewala tunutunugina faina.
3 Keke gavana faina aku nuwa ginanau tova-nai ganaunau Masedoniya anafafaliya aku gaelai wagainiya ke gavonavagadoneni. E ada vona-dina gainanadi wagainiya ani gana luvagiledi. Nuwanuwaku Efeso unamiya ada ineneku tovewala fwayafwaya una awatadi ada keke kaduwe mali vewala ina vevewalayedi aku auwe ina ilovau.†1Tim 6:3 4 Taidei tovewala-dina yadi nuwanuwa iawaegedi nainaiya bwanenediyavo wagaidiya-deya, ke yadi sese adiyegana moyai-vagaidi ani inuwaveyalai-vagaidi†Tai 1:14, 2Pi 1:16 ke ivonaga, “Kai ime matatabu-moena ana alamanedi aga ana yegayegana Yaubada matane.” Gilubodana biyavo-dina una awatadi ke ina ilovau, faina badi yadi tonogala ani vewala-dina tulina ivenogaledi-yo ivebutu ivetolitolidadana ke ivona-kavokavovo gaitoma-dina faidiya. Aku aiyada badi ivevewala Yeisu faine ani adilauboda wa yadi nuwakabubu nodi tovetumagana ina vevewaledi tunutunugina, e ada ina lemelemedi ke yadi vetumagana gina toyogina Yaubada yana nuwanuwa anafaiweya. Banae yana nuwanuwa anagugai ani vetumagana wagaine, keke vevonavona-kavokavovo wagaine. 5 Nuwanuwaku una vewaledi e ada kaliva ina nuwakabubuyedi velemoena. Kai ya vewala ina vaina, tova moyaina wa aseasedi yegayegana ina venuwadadana iwakana ke nuwafoudiya ina alamanena yadi dewa Yaubada giawaveiwakanena, ada Yeisu valeyana ina vetumaganena velemoena. Taidei dewa-dina wagaidiya yadi nuwakabubu kaliva ke Yaubada faidiya aseasediya gina tubuga. 6 Aku tovewala-dina tufodi wai-nai inuvuyoyena ada vona-kavovo anawai wagaine idamana ke inaunau. 7 Badi nuwanuwadi ina vetovewala Yaubada yana veimeya faina, aku keke nuwadi gidamali veimeya-dina adinuwanuwa. Wa yadi toyogina ivevewala aku yadi vewala-nai vuvudi ani taudiyavo yadi nuwanuwa wagaidiya, keke Yaubada yana veimeya tunutunugina.
8-9 Aku ide kaalamanena Yaubada yana veimeya keke gidasei badi yadi dewa tunutunugina faidiya, aku tokoyona faidiya. Taidei faina kai kaliva veimeya-dina ina gugaiyedi anafaiweya yana nuwanuwa e ada yadi koyona ina segena, ina iwakana, faina veimeya-dina ilemelemedi. Tokoyona faidiya yana veimeya gisedi, ani anafaiweya badi veimeya anatoawaegega ke togadibudibusoyoga faidiya, badi keke Yaubada ida vemoimoine kaduwe dewa koyona ifaifaisewadi ani faidiya, badi yadi nuwanuwa keke yegayegadi, badi Yaubada ivegaitoma-kavokavovoyena faidiya, badi inadiyavo o tamadiyavo iluvealikadi faidiya, badi kaliva aditoluvealika faidiya, 10 badi toudo ke badi togadawedawelo faidiya, ke badi kaliva ikikiyafudi ke ina nauwedi ina vekimoneyedi mali kaliva yadi togugai yogoyogona faina. Ada badi tofwaya ke badi vonayavuga wagaine yadi seba isesedi vaita vona velemoena aku wada ivefwayafwaya, ada kaduwe gavadewa koyona yada Kauveya yana vewala tunutunugina keke gida luboda ani kaliva ifaifaisewadi. Tainei anamatatabuna badi kaliva koyodiyavo faidiya Yaubada veimeya gisedi. 11 Taidei vewala-nai tunutunugina ani Yaubada yana valeya iwakana ananuwanuwa anafaiweya, valeya-nai yana iwakana mamalina giivemogatalina. Ada analaumamala ani Banae wa yana vetumagana nimakuya gisena ke gana lumamalena kaliva wagaidiya.
Paulo yana vesiule KAUVEYA yana nuwadoga faina.
12-14 Tuwaina Iya tova moyaina gavona awadamana Yeisu faine, ada yana kalivayavo gakiveuloulolonidi ke wa yaku nuwalaka gaawadamana lakaina wagaidiya. Yana kalivayavo gakiveuloulolonidi ke gakikivekoyodi nonogana Yaubada ginuwakalikaliyeku,†Gug 9:4-5 faina gialamaneku keke gada vetumagana wagaine e ada gavana gafaifaisewana ani keke wa yaku nuwamamala. Keke kanavona! Yada KAUVEYA yana nuwadoga wagaikuya.†1Kol 15:9-10 Gaitoma iwakadi gifaisewadi wagaikuya ada toyogina giveleveleku ani ebakova-wayoga. Iya gavesiule velemoena Keliso Yeisu yada Kauveya wagaine, ada malinai au gavetumagane-moena ke ganuwakabubuyena. Ada malinai Banae ginuwenuweku vaita Iya wa akuvetumagana, e ada gugai taidei giveleku ke gavetogugai faine.†Gug 9:15
15 Vona seyana ani taidei anafaiweya. “Yeisu Keliso gielai babi taidei wagaine ke tokoyona gina kibababaleda koyona wagaine-deya.” †Mad 9:13, Luk 19:10, Iyo 3:17, Lom 4:25 Taidei vona velemoena, e ada gilubodana kana vetumaganena. Ada tokoyona moyaidi adimwatuguya ani Iya au tokoyona-mowa. 16 Ee, Iya au tokoyona-mowa aku taidei faina Yeisu Keliso ginuwakalikaliyeku, e ada Iya wagaikuya Banae yana atuvefaila lakaina gina seyegemonena ke gana veebaita kaliva moyaidi wagaidiya. E ada Iya ina itaku ke ina alamanena vaita Yeisu ani badi keke ginamadu dibusoyogedi aku gina lemedi, e ada adifaiweya ina vetumaganena ke yawai-vagata ina nuwagana. 17 Yaubada yada Kini miyamiyani-vagaina ani giveiveimeya-vagata. Banae keke-mowa gida alialika, ada kaduwe ide keke adafaiweya kada itaita. Banae Yaubada-nai anakaibe-mowa ada anayegana lakai-moena. E ada kana awadavadavana ke kana moimoinena tova matatabuna keke anaebalauyabu. Ika anafaiweya.
18 Natuku Timoti, tuwaina Aluwaluwa Tabuna falofitayavo giawaveleveledi ke ifalofisai fainiya,†1Tim 4:14 e ada tova malinai yadi vona anafaiweya aveimeya gaveleni. Nuwanuwaku vona-dina una nuwanuwayedi e ada wagaidiya una toyogina ke una vetolugaviya iwakana Yaubada faine. 19 Ada una lulugaviya aku ya vetumagana una sevelavelalaina, e ada nuwafou yegayegana wagaine una venuwadadana dewadewa, ada una alamanena velemoena gavana iwakana ke una gugaiyena. Kaliva tufodi nuwanuwa iwakana idibusoyogedi, e ada kai kadavona vaita yadi vetumagana Keliso wagaine anafaiweya waka gitula. 20 Badi tobeu-dina wagaidiya kaliva adiselu, seyana anayegana Aiminio ke anavelu Alekisanida. E ani adiselu bademowa gaatuegedi Seitani wagaine ke aimo ina itanuwagana vaita koyona ifaisewana ani wa anavita,†1Kol 5:5 e ada yadi vona awadamana Yaubada wagaine ina ilovena.