Tovetumagana Yadi Leta Anavelu Pita Givetokilumina
Kivemala
Taidei Pita yana leta anavelu giimili ginau Yaubada yana yoo imiyamiya Loma yana ebaveimeya anafafali wagaidiya. Taidei fafali-dina yadi ebaveimeya wagaidiya ani tuwaina Paulo anatokwayabu nodi inau ada ivewala Keliso faine. Ada kaliva-dina moyaidi imadu vetumagana ani malinai vita ilulutovonidi Keliso anamuliya wagaine.
Pita yana leta nagona wagaine ani tovetumagana givewaledi gavaiyamu idadewa tova-nai badi keke totafalolo ikiveuloulolonidi Keliso anayegana iwaiwaina faina. Ada leta taide anavelu wagaine givewaledi gavaiyamu tovewala fwayafwaya ida dewedi ekalesiya negenine. Faina adimwatuguya ani kaliva tufodi bade ivevuvu nuwanuwa balana ivevewaledi. Ivevewala vaita dewa yuyuvana ani velemoena iwakana, e ada igaluvaluva ina nagoyedi ke dewa bwanene tulina tulina ina gugaiyedi. Taidei faina Pita giluwageyedi gavaiyamu ida dewadewa Yaubada yana vewala tunutunugina faina.
Kaduwe, tovetumagana moyaidi inuwanuwa vaita Yeisu gina maduyewa. Aku aimoina-mowa keke gida yegemo faina, kaliva tufodi ivonavona vaita afositoloyavo yadi ifufu ani au fwaya, ada Yeisu ani velemoena keke ginayewa. E ada Pita giifufuyedi Yeisu yana yewa-vagila faine ada givona asevatudi. Kaduwe giluwageyedi ke inamiya yegayegadiyavo ada keke tamo gavana ina awaege gina siveyewadi yadi veseyana Yaubada nodi wagaine. E ada tova-nai Yeisu ginayewa babiya ani bademowa taudiyavo kikidewedewedi Banae faine.
Vona vesiule. (1:1-2)
Ide tovetumagana adaawaega Yaubada wagaine kana kidonau. (1:3-11)
Pita yana nunu yana vetokiluma wagaine ada yana ebamididi yana veimeya faine. (1:12-21)
Vona matawa tovewala fwayafwaya faidiya. (2:1-22)
Yeisu yana yewa-vagila faina. (3:1-13)
Pita yana vonavagadona ke vona anaebalauyabu. (3:14-18)
1
1 Iya Saimoni-Pita, Yeisu Keliso yana togugai ada yana afositolo seyana. Imiyavo vetumagana wavaina Yeisu Keliso wagaine au anafaiweya ime yama vetumagana, ani yaku vesiule wagaimiya. Banae yada Yaubada kadu adaTokibababala ani yana veuluva yegayegana ke yana dewa tunutunugina, e ada yada vetumagana-nai giveleda. 2 Imi waawaawaegemi ke Yaubada ada yada Kauveya Yeisu Keliso wana alamanedi velemoena. E ada taidei adialamana-nai wagaimiya faina, wa yadi nuwadoga ina lemelememi velemoena ada kaduwe aseniwalova ina velevelemi.
Ide tovetumagana adaawaega Yaubada wagaine kana kidonau.
3 Yaubada Tauna yana toyogineya gaitoma moyaina iwakadi bade giveleda. Ada taidei gaitoma-dina ina lemelemeda e ada yana nuwanuwa anafaiweya kana dewadewa ada yawai-vagata kana miyamiyanena. Taidei analauboda faideya faina Banae kaalamanena. Banae yana veuluva iwaka-vagaina ke wa yana iwakana mamalina gimiyamiya, e ada gidouweda ke ide natunavo. 4 Ada Banae wa yana iwakana mamalina gimiyamiya ada yana veuluva iwaka-vagaina faina, bademowa yana vonadabadaba giveleda. Yana vonadabadaba-dina ani iwaka-vagaidi ke lakai-moedi, ada giveleda e ada ina veguwa aseasedeya ke wagaidiya adafaiweya kana veanafaiweya Banae. Taidei miyamiya-nai ani meyameyaganina faideya faina babi anadewa koyodi ani bademowa kaosedi, dewa-dina koyodi kaliva babi matatabuna wagaine ikikiveyegemonidi yadi nuwanuwa itaitaluvadigadi wagaidiya-deya. 5 Taide vuvuna-nai faina, imi bademowa wa yami vetumagana wamiyamiya aku wana vedivediwe ke dewa yegayegadi ani yami vetumagana nodi wana vetuvetutamwaina. Ada kaduwe Yaubada anaalamana ani dewa yegayegadi nodi wana vetuvetutamwaina. 6 Ada taudeyavo adaawata ani Yaubada anaalamana nodi wana vetuvetutamwaina. Ada kadu atuvefaila ani taudeyavo adaawata nodi wana vetuvetutamwaina. E ada Yaubada anavemoimoina ani atuvefaila nodi wana vetuvetutamwaina. 7 Kaduwe badi Yaubada yana yoo, taine tubuiyamiyavo, ani wana nuwakabubuyedi, ada taide adinuwakabubu-nai ani Yaubada anavemoimoina nodi wana vetuvetutamwaina. Kaduwe kaliva moyaidi wana nuwakabubuyedi, ada taide adinuwakabubu-nai ani tubuiyamiyavo adinuwakabubu nodi wana vetuvetutamwaina.†Gal 5:22-23 8 Faina kai dewa-dina bademowa wana mulimuliyedi ke ina vegaitoma lakaina wagaimiya, aga yada Kauveya Yeisu Keliso anaalamana wagaimiya ani keke ginamiya-kavokavovo, keke. Aiyada gina veguwa e ada Banae yana gugai wana gugaiye-dewedewena. 9 Aku gavakaliva taine dewa-dina keke ida miyami wagaine, ani bana yana nuwanuwa giyuyuvana, e ada vaita matana koyo-moena. Faina yana dewa-dina koyodi tuwaina gifaisewadi ani Yeisu bademowa adibwanene-nai gikiveyegayeganena banae wagaine, aku au nuwana givulu.†1Iyo 2:11 10 Aku tubuiyakuweyavo, Yaubada bademowa givenuwadadanemi ada gidouwemi ke Tauna yana yoo wana miyamiya. Taidei faina taine dewa-dina ani wana vedivediwe ke wana gugugaiyedi e ada amivenuwadadana ke amivedo wana kidonedi. Kai taidei anafaiweya wana miyamiya aga keke-mowa Yeisu yana wai wana miyasege ke wanabe koyona wagaine. 11 E ada Yaubada wa yana vemwamwala lakaina gina vagaulemi wanaluku Yeisu Keliso yana ebaveimeya miyamiyani-vagaina wagaine. Banae yada Kauveya kadu adaTokibababala.
Pita yana nunu yana vetokiluma wagaine ada yana ebamididi yana veimeya faine.
12 Aku nuwanuwa-dina gaifufuyedi**Pita yana nuwanuwa-dina giifufuyedi ani adinuwanuwa giyewa ginau 1:3-11. ani bademowa waalamanedi, ada Yaubada yana nuwanuwa velemoena wagaimiya bade waabidonau wagaine. Aku au nuwanuwaku tova moyaina nuwami gana talatalamutudi. 13 E ada yaku tova aimo gamiyamiya taide vovokuya vaita vada anafaiweya,**Keke tova manamanawena kaliva ina miyamiya vada wagaine, ada kaduwe anafaiweya ideyavo keke taide babi anavovo wagaidiya kanamiya-vagata. Taidei faina Pita vovoda givonaveluveyedi vada wagaidiya. (2Kol 5:1,4) aimo nuwami gana talamutudi ke gana ivenuwanuwami gaitoma-dina gaifufuyedi faidiya. Taidei iwakana faimiya. 14 Taidei anafaiweya gavona faina gaalamanena keke tova manamanawena ada vovoku gana miyasegena, anafaiweya yada Kauveya Yeisu Keliso gikivemalina wagaikuya. 15 Tainei faina ganuwanuwa lakaina yami wai gana kidewedewena muliya-yo yaku miyasega, e ada aimo gaitoma-dina matatabuna gaifufuyedi ani wana nuwaveyalaidi.
16 Faina tova-nai ime afositolo nuwami akivemalina yada Kauveya Yeisu Keliso yana toyogina lakaina ke yana yewa-vagila faina, ani keke adavona-kavokavovo. Keke ada vevewalemi ifufu keke wa vuvudi iyegeyegemona kaliva taudiyavo yadi nuwenuweya, keke. Aku ime toitavedama, faina matameya-mwaeya Yeisu wa yana toyogina ke wa yana iwakana mamalina au velemoena aitana. 17-18 Tuwaina ime Yeisu nodi oya-nai tabutabuna wagaine amiyamiya aku Yaubada Tamada ani Yeisu anayegana gikilakaina ke gikivekaikaiwabuna. Yaubada wa yana iwakana mamalina ada wa yana veimeya givona Yeisu faine, givona, “Taidei ani Iya Natu aseaseku. Banae gikivemwamwaliku lakaina.” Taine yana vona-nai gabameya giyegemona ani taumeyavo anogalina.**Pita giifuifufuyena tova-nai Yeisu anaita gisevedavedama ke gilunamanamalena. (Mad 17:1-8, Mak 9:2-8, Luk 9:28-36)
19 Taide gaitoma-nai giyegemona wagaimeya ani yama vetumagana gikivetoyogina, e ada Yaubada yana falofitayavo yadi vona tuwai-moena ivonaye-vagaidi ani avetumaganena velemoena. E ada gilubodami yadi vona-dina wana vevenogaledi. Kai yadi vona-dina wana kidonedi aga wada iwakana, faina yadi vona ani vaita malina yuyuvana gituituimalina.†Iyo 5:35 Taide anafaiweya wana nogala-dewadewa, e ada yadi vona anamalina gina tuituimala aseasemiya ginanau ginanau-deeya, Yeisu yana yewa-vagila anatova gina yegemona. Ee, yana yewa-vagila anatova-nai ani anafaiweya mala gilavulavuna ada Ilauwala gilakalaka.**‘Ilauwala’ ananuwanuwa taidei maita-nai wagaine ani givonaluvefosau Keliso ada yana tova yewa. (Ive 22:16, Naba 24:17) 20 Aku gaitoma lakaina seyana wada alamanena, taine falofisai matatabuna Buki Tabu wagaine ani keke seyana gaito anafata tauna yana alamana gagana wagaine ananuwamamala gina alamane, keke. 21 Faina keke tamo tova kaliva yadi nuwenuweya falofisai gida yegemo, aku Aluwaluwa Tabuna gialaveleveledi mamauwe Yaubada yana vona iawatalatalainedi.†2Tim 3:16
**1:12 Pita yana nuwanuwa-dina giifufuyedi ani adinuwanuwa giyewa ginau 1:3-11.
**1:13 Keke tova manamanawena kaliva ina miyamiya vada wagaine, ada kaduwe anafaiweya ideyavo keke taide babi anavovo wagaidiya kanamiya-vagata. Taidei faina Pita vovoda givonaveluveyedi vada wagaidiya. (2Kol 5:1,4)
**1:17-18 Pita giifuifufuyena tova-nai Yeisu anaita gisevedavedama ke gilunamanamalena. (Mad 17:1-8, Mak 9:2-8, Luk 9:28-36)
**1:19 ‘Ilauwala’ ananuwanuwa taidei maita-nai wagaine ani givonaluvefosau Keliso ada yana tova yewa. (Ive 22:16, Naba 24:17)