1 E ada waitana, tuwaina meIsileli wagaidiya badi Yaubada yana falofita velemoedi imiyamiya, aku kaduwe falofita fwayafwaya badi wagaidiya imididi ada kaliva ifwayadi Yaubada yana vona faine. Ada kaduwe anafaiweya imi amimwatuguya gina yegemona. Tovewala fwayafwaya ina mididi amimwatuguya aku keke wana inanadi, ada yadi vewala baladi ikikivekoyo ani ina sewavuyena vona iwakana wagaine e ada taidei wagaine kaliva ina fwayadi.†2Vei 13:1-5, Mad 24:24, Iyud 4 Au yada Kauveya yana alika wagaine yadi koyona fatana gisena ke badi yana yoo,†1Kol 6:19-20, Gal 3:13, 4:4-5, Ive 5:9, 1Pi 1:18-19 e aku ivedomobubusena. E ada taudiyavo yadi dewa-dina ina gugugaiyedi aku keke tova manamanawena ada agolaufofola ina nuwagana. 2 Badi tovewala-dina ani vovo ananuwanuwa faina keke maita taudiyavo ida awatadi, aku dewa bwanebwanenena galuweta ke bawe yadi dewa anafaiweya idewadewayena. Ada taidei yadi dewa-dina ani kaliva tufona moyaidi ina mulimuliyedi, e ada mali kaliva ina itadi ke nuwanuwa velemoena anawai ina awavekoyoyena. 3 Ada badi tovewala-dina aseasediya iamoumoula e ada ina veseba wagaimiya ke yami mani wana veledi.†Lom 16:18, Tai 1:11 Aku tuwaina-deya Yaubada giveimeya adimatavuloga faina, ada aimo veimeya-nai gimiyamiya. Adiagolaufofola faina Yaubada bade gikidewedewena ke gibodaboda faidiya.

4 Wana nuwaududuna. Tuwai-bulubuluna Yaubada yana aneloseyavo tufodi ikoyona†Iyud 6 ani gavaiyamu? Vaita badi wa yadi koyona-nai au Yaubada giita-moedi ada givonedi, givona, “Iwakana, wananau?” Aiyo? Keke, keke-mowa. Au gibatugedi eli wagaine, wadedeku yuyuvana bakibaki anaseini giyogodi. Ada yuyuvana wagaine imiyamiya analaba aimo vonayavuga anayadayada-nai wagaine. 5 Tainei anafaiweya tuwai-bulubuluna Nowa yana toveya. Kaliva moyaidi Yaubada keke ida matawalewaleye aku tova moyaina dewa koyona ifaifaisewadi. E ada badi tokoyona-dina ani Yaubada keke gidaita-moedi ke gida awaveiwakanedi, aku au giluyavuledi tuwa wagaine. Aku Nowa ke yana gabu adiseveni nodi ani Yaubada gikibababaledi.†Ibel 11:7, Eba 6:13,18, 7:23 Bana Nowa ani tova moyaina kaliva giifuifufuyedi dewa-dina yegayegadi Yaubada giawaveiwakanedi faidiya. 6 Kaduwe anafaiweya aimo melala lakaidi iluwei Sodoma ke Gomola, taidei melala-dina adikalivayavo tokoyona-mowa. Yaubada giitadi ada yana veimeya gisena faidiya ani aiyabeyabela wagaine badi yadi melala-dina nodi gikabu-yavuledi, e ada matatabudi iveavu.†Eba 19:12-13,24 Ada meSodoma ke meGomola wagaidiya ani Yaubada ebaita gifaisewana e ada kai kaliva nuwanuwadi Yaubada ina vedomobubusena, aga nuwadi gina malina vaita yadi dewa koyona analaufata ina nuwagana. 7-8 E, Sodoma ke Gomola adikalivayavo, ani tova moyaina veimeya moyaina iawaegegedi aku vovo ananuwanuwa bwanebwanenena wagaine iawaege-vagaidi. Aku badi adimwatuguya ani Lota anakaibe yana dewa yegayegana, ada tova ke tova yadi dewa koyo-moena giitaitana kadu yadi vona koyodi ginoganogalidi wagaine, nuwavita anauloulolo ani lakai-moena bana wagaine. Taidei faina Yaubada Lota gimadu kibababalena muliya-yo melala iluwei giluyavuledi.†Eba 19:15-17 9 Ee, anelose koyodiyavo ada Nowa ke Lota ifuifufudi wagaidiya ani kana nuwaveyalaina vaita yada Kauveya ani kaliva-dina yana wai imulimuliyena aku adigaluvaluva inuwanuwagadi ani gialamanena gavaiyamu Bana gina kibababaledi.†1Kol 10:13, Ive 3:10 Ada kaduwe gialamanena gavaiyamu kaliva koyodiyavo gina kiabidi gina naunauwedi-deya vonayavuga anatova wagaine adimatavuloga ina nuwagana. 10 Taidei anafaiweya kaliva koyodiyavo moyaidi ina nuwagana, aku velemoena ani badi tovewala fwayafwaya-dina vovo ananuwanuwa wagaidiya iawaawaege-moedi e ada galuweta ke bawe yadi dewa anafaiweya idewadewa.†Iyud 16,18 Ada keke maita nuwanuwadi Yaubada gina veimeyedi. Badi keke wa yadi vemoimoina ada keke ida nuwanuwa yadi gugai vilena faidiya, aku taudiyavo yadi nuwanuwa gaga ikikilakaidi kadu kaliva iitaitatagodi. Ee, aneloseyavo badi totoyogidi gabameya wa adiveimeya lakaina, ani biyavo-dina keke maita wa yadi matauta aku imadumaduvona awadamana wagaidiya.†Iyud 8 11 Aku aneloseyavo ani tovewala fwayafwaya-dina itoyogisegedi kaduwe ikaiwabusegedi, nonogana keke-mowa maita wa yadi awadamana Yaubada matane ida awavekoyoyedi. 12 Aku taide tovewala fwayafwaya-dina, ani gaitoma tulina tulina adinuwanuwa keke ida alamanedi aku au gaitoma-dina ivona awadamanedi. Waitadi, badi vaita kevakeva walawala keke wa yadi nuwanuwa anafaiweya.†Fip 3:19 E ada kevakeva itubuga e ani kaliva ina kiveyabidi ke ina luvealikadi, tayuwe anafaiweya tovewala-dina adiagolaufofola ina nuwagana. 13 Badi yadi dewa koyodi ikwagekwageyedi e ani fatadi kadu koyona ina nuwagana. Tova ke tova gufa toyogina iyuyuga ada dewa koyodi moyaina igugugaiyedi aku keke maita ida vovomumu faine. Au ivemwamwala yadi dewa-dina faidiya ke iawaawege-moedi wagaidiya, ada taidei ani keke bogi wagaine aku taumada yadeyadeya. Taudiyavo ialamanedi ikikivekoyo aku vaita yegayegadiyavo ielaelai ada nodi wakanikani kanibutu wagaidiya, aku badi yadi kivekoyo faina ivemwamwala velemoena. 14 Tova moyaina vevine wagaidiya matadi gidigagi-vagaina, ada keke maita yadi nuwanuwa ida luyabu dewa koyona adivegugai faidiya. Ada badi gavega Yeisu anavetumagana keke toyogina aseasediya, ani biyavo-dina wa yadi vefwayafwaya vaita mwau anafaiweya kaliva-dina nuwadi ivaivaidi e ada inabeu koyona wagaine. Badi aseasedi ivesikuluye-yabudi lugafugafu wagaine. Au Yaubada yana alatabutabu dibune imiyamiya. 15 Biyavo-dina wai tunutunugina ivedomobubusena ke ivuyo, ada Beoli natuna Belami ani tavagina imuliyena.**Banae fafali-nai Mowabi anatoveimeya ani meIsileli gimatamatausedi, e ada matawa giimilina falofita-nai Belami wagaine ke ginaela meIsileli gina alatabutabuyedi. Ada Belami yana doniki giyagena ada ginaunau aku wai wagaine Yaubada yana anelose giyegemona, ada doniki-nai giitana e ada giilovau. Aku Belami keke anelose-nai gidaita e ada yana doniki gimununa, ada doniki giifufu Belami wagaine. Muline, Yaubada Belami matana gikibwadi e ada anelose giitana, ada anelose giduweyena. (Naba 22:1‑25) Bana Belami ani Yaubada yana falofita seyana aku nuwanuwana lakaina mani gina vaina faina, tauna giawaegena ke gidewa koyona.†Naba 22, 2Vei 23:4-5, Niy 13:2, Ive 2:14 16 Aku yana gugai koyona faina, Yaubada giduweyena. Kaalamanena doniki ani keke adifata ina ifufu, aku tova-nai wagaine Yaubada doniki-nai gigai ke kaliva bonana wagaine giifufu falofita-nai wagaine e ada yana dewa kwavakwava keke gina gugaiye. Ee, ada vona velemoena wada tovewala koyodiyavo yadi dewa ani Belami yana dewa anafaiweya.

17 Waitadi, badi tovewala fwayafwaya ani vaita tovoga wagaine kaliva tova moyaina gufa ikoikoi, aku gufa-moena ani bade giyada. Kaduwe badi anafaiweya vaita buibui kaitaitadi ke kanuwanuwa vaita wei ginaobu, aku keke. Au mala gitafi alualugedi inau. Badi faidiya bademowa fafali iwakana Yaubada gikidewedewe-vagaina, ada wadedeku inamiya-vagata. Wada-nai eli anayuyuvana bakibaki.†Iyud 1:9-13 18 Wada adilauboda faina taudiyavo ikikilakaidi vaita evona gaitoma lakaidi iifuifufuyedi, aku velemoena iveseveseba ke kaliva ina ivenuwanuwadi vovo ananuwanuwa koyo-moedi moyaina faidiya. E ada tovetumagana evagudiyavo ivevuvu-mowa iotaota dewa koyodi wagaidiya, dewa-dina badi kaliva-dina inaunau sidamana anawaiya ada idewadewayedi, ani badi tovewala fwayafwaya-dina ielaelai ke badi tovetumagana-dina ina sebodadi, e ada inayewa koyona anawaiya. 19 Tovewalayavo ivonediga, “Kai yama vewala wana muliyena, aga gavana yami nuwanuwa wanagana ani imi yavuyavumiyavo wana gugaiyena. Keke tamo gava veimeya gina kivevitami.” Taidei anafaiweya ivonavona aku velemoena ani ivefwayafwaya, faina badi taudiyavo ani keke yavuyavudiyavo ke gavana yadi nuwanuwa inagai, keke. Badi taudiyavo yadi nuwanuwa koyodi ke dewa koyo-moedi ani iyogoyogodi aseasediya, e ada togugai yogoyogodi imiyamiya. Faina kai gavana seyana giveiveimeya kaliva aseasena wagaine, ani ina kaliva-nai givetogugai-yogoyogona gaitoma-nai wagaine.†Iyo 8:34, Lom 6:16-17 20 Faina kai badi bade ialamanena Yeisu Keliso yada Kauveya, Banae gikibababaleda, e ada kai babi anadewa ikikivebwaneneda ani bademowa wagaidiya-deya iota-yabuyabudi, taine iwaka-moena. E aku kai badi imiyamiya anafaiweya aku aimo inayewa-vagiledi ada koyona gina kiabidonedi ke gina toyogitagodi, kai taidei anafaiweya inadewa, aga muline koyona-nai ina miyamiyanena ani koyo-moena ayo koyona nagona imiyanena. 21 Kai dewa yegayegana anawai keke tamo tova ida alamane, aga wada koyona. Aku bademowa ialamanena Yaubada yana veimeya tabutabuna kaliva ivesesevedamadi wagaidiya, aku veimeya-dina adimuliya wagaine imiyaviladi. Wada koyo-moena! 22 Yada vona matalivulivuna iluwei adivona velemoena giyegemona velemoena wagaidiya. Seyana givona, “Kai galuweta gina ovala, aga au ginanau-mowa tauna yana ovala wagaine ada gina kanina.” Ada kaduwe seyana givona, “Bawe ginatowa gufeya ke gina yegayegana aku kadu gina yewana fwayafwaya wagaine gina afiafitowa.” †Vona 26:11