8
Vavine udoudodi ialiyedi Yeisu wagaine.
1 Ada moyaidi inau aku Yeisu ginau Oya Olive wagaine gilaka. 2 Aku malalavuga gienoobu ada giyegemona-vagila manuwa tabu wagaine. Ada wadedeku kaliva moyaidi ivagauta Yeisu imiyafifina, ada givetogana ke givewaledi. 3 Ada givewavewaledi aku badi Mosese yana veimeya anatovewalayavo ke Falisiyavo ani vavine udoudodi ikiveyabidi ialiyedi Banae wagaine, badi kaliva seyana nodi idaudau aku inuwagadi. Ada iveimeyedi imididi yoo matadiya 4 aku ivona Yeisu wagaine, ivonaga, “Tovewala, vavine taidei anuwagana mali kaliva nodi iudoudo. 5 Aku Mosese yana veimeya wagaine giveimeya vevine toudo taidei anafaiweya ani kana tutuvealikadi kabala wagaine.†Vei 20:10, 2Vei 22:22-24 E aku Oyeni ani gavaiyamu udavona?” 6 Tolidadana taidei ifaisewana e ada yana laufata wagaine meyameyaganina vuvu inavai ina awavekoyoyena tovevonayavuga wagaine.
Aku Yeisu giiboula ada babi wagaine givetovetokiluma nimadidina wagaine. 7 Ada givetovetokiluma aku badi ikwageye-moe itolimamailena, ada bana gialakaina ke givonedi, givonaga, “Kai wagaimiya kaliva seyana keke tamo gida koyona, aga banae nagona kabala wagaine vavine-dina gina madufiyadi.” 8 Ada kadu giodu-vagila babi wagaine givetokiluma. 9 Ada au yana vona inogalina ada anakaibe anakaibe itauya inau, lakaidiyavo imadutauya aku kabisodiyavo wai imulina. Ada moyaidi inu-yabu aku au Yeisu anakaibe gitufo, ada vavine adikaibe-mowa ani Yeisu wadebaine imidimididi. 10 Ada Yeisu gialakaina ada gitolidadanedi, givona, “Vavine, aku gadedeku badiyavo? Gavaiyamu, keke seyana gaito gida awavekoyoyemi?”
11 Badi vavine ivona, “Kauveya, keke tamo.”
Ada Yeisu givona, “Iya kadu keke gana awavekoyoyemi. Auwe wananau, aku tova taidei ke gina naunau ani yami dewa koyona wanasege-vagaina.”]
Bana Yeisu ani malina-nai babi anakalivayavo gituituimalidi.
12 Ada kaduwe Yeisu givona kaliva-dina manuwa tabu wagaine, givona, “Iyayeku tomiyababi yadi malina. Gavakaliva gina muliyeku ani keke aimo yuyuvana wagaine gina nunudadana aku gina miyamiya malina-nai yawai givelevelau wagaine.” †Iyo 1:4-9, 9:5, 12:46
13 Falisiyavo ivona wagaine, ivona, “Oyeni Tauni fainiya uawatalatalaina e ada ya awatalatalaina keke vona velemoena.” **Yaubada yana veimeya seyana toawatalatalaina faidiya ani taidei anafaiweya. Kai kaliva seya-moena gina awatalatalaina tamo kaliva yana dewa koyona faine ani wada keke anafata, faina toawatalatalaina seya-moena. Aku kai toawatalatalaina iluwei o kai toiye, taide anafata e ada kaliva ina vetumaganedi. (2Vei 19:15, Mad 18:16, Iyo 8:16)
14 Aku Yeisu gilufata, givona, “Iya Tauku faikuya gaawatalatalaina nonogana yaku awatalatalaina ani vona velemoena, faina gaalamanena gadedeku wagaine gaela ke kaduwe gadedeku ganauna. Aku imiyavo ani keke tamo yami alamana gadedeku wagaine Iya gaela o kai gadedeku ganauna. 15 Imi keke kaliva wada itavenuwadadane-dewedewedi, faina kaliva-mowa yana venuwadadana wamulimuliyena. Aku Iya keke anafaiweya gada gugai. 16 Aku kai Iya kaliva ganavona venuvenuwadadanedi aga yaku venuwadadana tunutunugina, faina Iya keke akukaibe-mowa gadavona venuvenuwadadana aku Kamaku nodi agugaiyena, Banae giimiliku.†Iyo 5:30 17 Kaduwe yami Veimeya anabuki wagaine ivetokilumina, givona, ‘Kai tamo gavana giyegemona e ada kaliva adiselu ina awatalatalainena seyana, aga badi yadi ifufu ani vona velemoena.’ †Naba 35:30, 2Vei 17:6, 19:15 18 Iya idogamekuna gaawatalatalaina Tauku faikuya, ada kaduwe Kamaku giimiliku giawatalatalaina faikuya. E ada ina amaiselu yama awatalatalaina ani vona velemoena.”
19 Aku badi itolidadanena, ivona, “Gadedeku Tama?”
Yeisu gilufata, givona, “Iya keke wada alamaneku, kaduwe Kamaku keke wada alamane. Kai wada alamaneku aga kaduwe Kamaku wada alamanena.” 20 Taidei anafaiweya givewavewala aku gimidimididi ebavelekavovo anafafaliya, tainei manuwa tabu wagaine. E aku keke seyana gaito gida kiveyabi, faina yana tova aimo keke gida yegemo.
21 Kaduwe Yeisu givona wagaidiya, givona, “Iya gana segemi gananau, ada imi wana leleku aku wana lele-wayoga, ada wa yami koyona wana miyamiya**Vona-nai ‘Wa yami koyona aku wana alika’ ani ananuwanuwa vaita wa yadi koyona ina alika, aku keke wa yadi koyona gaga aku kadu yadi koyona-nai anamatavuloga ina nuwaga-vagaina. aku wana alika. Ada fafali-nai wagaine ganaunau ani imi keke amifata wanaela.”
22 Taidei wagaine meIsileli taudiyavo gaga wagaidiya ivetolitoli, ivona, “Gavaiyamu-yo givona, ‘Fafali-nai wagaine ganaunau ani imi keke amifata wanaela wagaine’? †Iyo 7:34-35 Kai ananuwanuwa ani Tauna gina luvealikana?”
23 Aku Bana Yeisu givonedi, givonaga, “Imiyavo ani babi taidei wagaine wayegemona aku Iyayeku gabameya gamiyamiya ani gaobuelai. 24 Bademowa gavonemi ani yami koyona nodi wana miyamiya aku wana alika. Faina kai keke wana vetumagana vaita IYA TAUKU GAMIYAMIYA,**MeIsileli meyadiya anayegana ‘Ibeliu’ ani Yaubada anayegana ‘YHWH’, ada anakivila ani ‘Iya Tauku Gamiyamiya’. (Iyeg 3:13-14) aga velemoena wa yami koyona wana alika.”
25 Badi itolidadana, ivona, “O gaito velemoena?”
Yeisu gilufata, givona, “Tuwaina-deya au gaifuifufuyena Iya gaito. 26 Gaitoma moyaina faidiya akufaiweya ganavona venuvenuwadadana yami koyona faine ke gana veimeya amimatavuloga faine. Aku Banae giimiliku ani velemoena, ada gavana ganogalina Bana wagaine, taide gaga gana awatalatalainena babi anakalivayavo wagaidiya.”
27 Taidei anafaiweya Yeisu givona aku badi yana nuwanuwa ibavuyena. Keke ida alamane Tamana Yaubada faine givonevonedi. 28 E ada Yeisu givonedi, givona, “Aimo Banae Kaliva Natuna wana silakaina,**Yeisu yana vona-nai ‘Aimo Banae Kaliva Natuna wana silakaina’ ananuwanuwa ani aimo kelose wagaine ina kilakaina faina. ada tova-nai wagaine wana alamanena vaita ‘IYA TAUKU GAMIYAMIYA’. Ada kaduwe wana alamanena vaita keke tamo gavana gada gugai Tauku yaku nuwenuweya aku gavana Kamaku givewaleku ani anafaiweya gaifuifufuyena.†Iyo 5:19 29 Ada Banae giimiliku ani Tauna Banae Iya nodi amiyamiya.†Iyo 16:32 Keke gida segeku akukaibe-mowa gada miyami, faina tova moyaina gavana gikivemwamwalina ani anafaiweya gagugai.” 30 Ada taidei yana vewala giifuifufu yoo wagaidiya aku tufona moyaidi ivebutu ivetumaganena.
Ebelaamo natunavo.
31 Badi meIsileli gavega ivetumagana Yeisu wagaine ani givona wagaidiya, givona, “Kai tova moyaina yaku vewala wana mulimuliyena ke wana miyamiya wagaine aga imiyavo velemoena yaku tonogalayavo. 32 Ada Yaubada yana vona velemoena ani wana alamanena ada vona velemoena gina etoyavumi e ada yavuyavumiyavo wana miyamiya.”
33 Aku badi ilufata, ivona, “Ime Ebelaamo yana tubudelideliyavo†Mad 3:9, Luk 3:8 ada keke tamo gaito wagaine ada vetogugai yogoyogona. E ada gavaiyamu-yo uvona evona ime gina etoyavuma ke yavuyavumeyavo ana miyamiya?”
34 Yeisu gilufata, givona, “Vona velemoena, gavona wagaimiya, gavega ikoyokoyona ani badiyavo koyona wagaine ivetogugai yogoyogona.†Lom 6:16, 2Pi 2:19 Faina koyona-nai gikikiveyabidi e ada keke adifata inana. 35 Ada kaalamanena togugai yogoyogona keke gida miyamiya-vagata yana kauveya yana manuweya,**Taidei vona-nai ‘manuweya’ ani ananuwanuwa iluvefosena ‘anaunuma’ wagaine. aku kauveya-nai tauna natuna velemoena ani tamana yana manuweya ginamiya-vagata.**Maita 33 wagaine tonagonayavo ivona, “Ime Ebelaamo yana tubudelideliyavo.” Taidei giyewa Ebavevuvu 21:10. (Gal 4:30) Aisake gimiya manuwa anayoo wagaine e aku Isimeli, bana gitubuga togugai yogoyogona vavine wagaidiya ani iwavina. E ada meIsileli tonagonayavo ivona vaita badiyavo Ebelaamo natunavo velemoena, aku velemoena ani badiyavo keke aimo Ebelaamo natunavo ida miyami aku au idamana koyona natunavo, faina taudiyavo iawaegedi dewa koyona wagaine. Taidei faina vonaluvefosa taide wagaine meIsileli faidiya Keliso giinanadi badi togugai yogoyogodi anafaiweya, e aku Keliso Tauna faine givonayena ani Banae Natuna-nai. E ada badi meIsileli-dina Yaubada Natuna Yeisu idibusoyogena faina, taudiyavo adiivi Yaubada yana manuwa anayoo wagaine ani isegena. Aku Yeisu, Yaubada Natuna ani yoo-nai wagaine ginamiya-vagata. 36 E ada kai Iya Kaliva Natuna gana etoyavumi aga keke aimo koyona yana veimeya dibune wana miyami aku velemoena yavuyavumiyavo.†Gal 5:1 37 Gaalamanena imi Ebelaamo yana tubudelideliyavo, e aku wai walelele ke wana luvealikaku, faina aseasemi wagaidiya keke tamo mwatugu gida miyami yaku vona faine. 38 Gaitoma-dina Kamaku bade givewaleku ani gaifuifufuyedi, aku imi kadu anafaiweya, gaitoma-dina tamami†Iyo 8:44 wagaine wanogalina, tainei wagugugaiyedi.”
39 Badi ilufata, ivona, “Ime tamama ani Ebelaamo.”
Yeisu givonaga, “Kai velemoena imi Ebelaamo natunavo aga wada vaina Ebelaamo nimana, aku keke wadavai. 40 Iya Yaubada matane yana vona velemoena ganogalina ani bade gaifufuyena wagaimiya, e aku wabalabalalava wana luvealikaku. Aku Ebelaamo keke tamo gidadewa anafaiweya. 41 Imi tama-moemi yana dewa anafaiweya wadewadewa.”
Badi ivona, “Ime keke eda natunavo. Ime Tamama anakaibe-mowa Tauna Yaubada.”
Seitani natunavo.
42 Yeisu givona wagaidiya, givona, “Kai velemoena Banae Yaubada imi Tamami, aga Iya wada nuwakabubuyeku, faina Iya gamiyamiya Yaubada nodi aku gaelai ada imi nodi idedeku kamiyamiya.†Iyo 16:28 Iya keke gadaela Tauku yaku nuwenuweya aku Banae giimiliku. 43 Gavaiyamu-yo yaku vona keke gida mamali wagaimiya? Faina imi keke amifata wana nogali gavana gavonevone. 44 Imiyavo ani tamami au Seitani, ada nuwanuwami tamami yana nuwanuwa wana dewadewayena.†1Iyo 3:8 Ebavevuvu wagaine-deya banae toluvealika. Banae yana nuwanuwa matatabuna ani vefwayafwaya e ada keke maita tauna gida awaege vona velemoena wagaine. Banae tofwaya,†Eba 3:4 ada au fwaya matatabuna ani banae anatomaduvevuvu. E ada tova-nai gifwayafwaya, au tauna yana veuluva velemoena wagaine yana dewa-nai giyegeyegemona. 45 Aku Iyayeku ani yaku vona velemoena faina, keke wada vetumaganeku. 46 Keke tamo gaito wagaimiya gida itaku gadewadewa koyona e ada gina seyegemone vaita Iya gakoyona, keke.†1Pi 2:22 Iya gavonavona velemoena, e aku gavaiyamu-yo keke wada vetumagane? 47 Badi gavega Yaubada natunavo ani Bana bonana ivenovenogalena. Aku imiyavo ani keke Yaubada natunavo, e ada bonana keke wada venovenogale.”
Muliya-yo Ebelaamo gitubuga, Yeisu ani Bana bademowa gimiyamiya.
48 MeIsileli ilufata, ivonenaga, “Velemoena avona tunutunugina, Oyeni ani kwana Sameliya,**MeIsileli ani meSameliya idibusoyogedi velemoena ada keke nodi ida luluveya. E ada badi meIsileli-dina yadi vona-nai wagaine ani keke velemoena ida nuwanuwa vaita Yeisu kwana Sameliya, aku taidei yadi vona-nai wagaine ivona koyona Bana wagaine. ada kaduwe Oyeni ani aluwaluwa bwanebwanenena nafoniya gimiyamiya.”
49 Yeisu givonaga, “Iya keke aluwaluwa bwanebwanenena wagaikuya aku aiyada Iya Kamaku anayegana gakikilakaina. E aku imiyavo ani Iya akuyegana wakiobuyena. 50 Iya keke Tauku gada kilakaiku kaliva matadiya ke ina davadavaku, keke. Aku seyana gimiyamiya ani Banae nuwanuwana gina kilakaiku e ada kaliva ina davadavaku. Ada Banae-menai Tovevonayavuga. 51 Gavonemi velemoena, gaito kai yaku vona gina itaveyabidi aga keke tamo tova alika gina lutovoni, au keke-mowa.”†Iyo 5:24
52 Ada meIsileli inogalina ada itataweyana, imaduvona-mowa, ivonaga, “Au, aalamane-moena aluwaluwa bwanebwanenena nafoniya gimiyamiya! Ebelaamo gialika ada kaduwe Yaubada yana falofitayavo ialika, e aku Oyeni uvona vaita gaito kai ya vona gina itaveyabidi aga keke tamo tova alika gina lutovoni. 53 Gavaiyamu, o matalakai ayo muliya tamama Ebelaamo? Banae gialika ada falofitayavo kaduwe. Aiyo! Aku O vaita gaito?”
54 Bana Yeisu gilufata, givona, “Kai Iya Tauku gana kilakaiku aga yaku gakaikai keke tamo wa anaiwakana, e aku Banae-nai gikikilakaiku ani Kamaku. Banae faine wavona, ‘Bana yama Yaubada,’ 55 aku Banae ani keke maita wada alamane. Aku Iya gaalamanena velemoena. Kai gadavona, ‘Iya keke gada alamane,’ aga Iya gada vetovefwayafwaya anafaiweya imiyavo. Aku Banae gaalamanena, ada yana vona gaitaveyabina. 56 Tamami nagona Ebelaamo ani tuwai-moena gimadu alamanena Iya yaku obuela babiya faina, e ada wa yana vemwamwala ginuwanuwa tova-nai wagaine. Ada giitana ke givemwamwala lakaina.”
57 MeIsileli ivona wagaine, ivona, “Oyeni keke kaliva lakai ayo amalamala gidalaka fifiti (50) aku uvona vaita Ebelaamo uitana!”
58 Yeisu gilufata, givona, “Vona velemoena, gavona wagaimiya, bana Ebelaamo aimo keke gida tubuga aku bademowa IYA TAUKU GAMIYAMIYA.”†Iyo 1:1
59 Ada badi yana vona inogalina ada inuwakoyo lakaina, e ada kabala iyaudi ina ifiyafiyana aku Yeisu Tauna gisewavuyena ada adimwatuguya-deya giamwakuna ada ginau ke manuwa tabu anafafali gisegena.
†8:5 Vei 20:10, 2Vei 22:22-24
**8:13 Yaubada yana veimeya seyana toawatalatalaina faidiya ani taidei anafaiweya. Kai kaliva seya-moena gina awatalatalaina tamo kaliva yana dewa koyona faine ani wada keke anafata, faina toawatalatalaina seya-moena. Aku kai toawatalatalaina iluwei o kai toiye, taide anafata e ada kaliva ina vetumaganedi. (2Vei 19:15, Mad 18:16, Iyo 8:16)
†8:17 Naba 35:30, 2Vei 17:6, 19:15
**8:21 Vona-nai ‘Wa yami koyona aku wana alika’ ani ananuwanuwa vaita wa yadi koyona ina alika, aku keke wa yadi koyona gaga aku kadu yadi koyona-nai anamatavuloga ina nuwaga-vagaina.
**8:24 MeIsileli meyadiya anayegana ‘Ibeliu’ ani Yaubada anayegana ‘YHWH’, ada anakivila ani ‘Iya Tauku Gamiyamiya’. (Iyeg 3:13-14)
**8:28 Yeisu yana vona-nai ‘Aimo Banae Kaliva Natuna wana silakaina’ ananuwanuwa ani aimo kelose wagaine ina kilakaina faina.
**8:35 Taidei vona-nai ‘manuweya’ ani ananuwanuwa iluvefosena ‘anaunuma’ wagaine.
**8:35 Maita 33 wagaine tonagonayavo ivona, “Ime Ebelaamo yana tubudelideliyavo.” Taidei giyewa Ebavevuvu 21:10. (Gal 4:30) Aisake gimiya manuwa anayoo wagaine e aku Isimeli, bana gitubuga togugai yogoyogona vavine wagaidiya ani iwavina. E ada meIsileli tonagonayavo ivona vaita badiyavo Ebelaamo natunavo velemoena, aku velemoena ani badiyavo keke aimo Ebelaamo natunavo ida miyami aku au idamana koyona natunavo, faina taudiyavo iawaegedi dewa koyona wagaine. Taidei faina vonaluvefosa taide wagaine meIsileli faidiya Keliso giinanadi badi togugai yogoyogodi anafaiweya, e aku Keliso Tauna faine givonayena ani Banae Natuna-nai. E ada badi meIsileli-dina Yaubada Natuna Yeisu idibusoyogena faina, taudiyavo adiivi Yaubada yana manuwa anayoo wagaine ani isegena. Aku Yeisu, Yaubada Natuna ani yoo-nai wagaine ginamiya-vagata.
†8:44 Eba 3:4
**8:48 MeIsileli ani meSameliya idibusoyogedi velemoena ada keke nodi ida luluveya. E ada badi meIsileli-dina yadi vona-nai wagaine ani keke velemoena ida nuwanuwa vaita Yeisu kwana Sameliya, aku taidei yadi vona-nai wagaine ivona koyona Bana wagaine.