1 Aku tayuwe tova-nai Iyoni Tobabitaiso giyegemona ke gilulumamala Yudiya anafafali kavovona wagaine, 2 givonavonaga, “Yami dewa koyodi wana dibusoyogedi ada wagaidiya wana nuwavilana, faina Yaubada yana ebaveimeya bademowa givelilivana.” †Mad 4:17, Mak 1:4,15, Luk 3:3 3 Banae Iyoni-nai faine falofita Aiseya givonaye-vagaina, givona,

4 Aku banae Iyoni ananuya ani kevakeva kameli vutuvutuna wagaine ibubuna, aku anabeleta labene giyogona ani kevakeva kwafilina wagaine. Aku anaga ani bilolo ke mawa vutona.**Iyoni Tobabitaiso ananuya ani keke bikabikadi, ada anaga ani keke iwakadi. Keke tokaikaiwabu adiga ke adinuya anafaiweya. Taidei anafaiweya gidewa ada banae falofita Ilaitiya anafaiweya. (Mak 1:6) 5 Ada kaliva moyaidi ielaelai bana wagaine, meYelusalema ke Yudiya anafafali wagaine kaduwe gufa Yolidani anafafali anakaliva moyaidi ielai. 6 Ada yadi dewa koyodi iawaawamogataledi, ada Iyoni gikivebabitaisodi gufa Yolidani wagaine.

7 Aku Falisiyavo**Falisiyavo badi seyana yoo lakaina meIsileli yadi tafalolo wagaine, ada Yaubada yana veimeya tuwai-moena givelena Mosese ani badi ivevilaga toyogina anamuliya wagaine. ke Sadusiyavo**Sadusiyavo badi kaduwe seyana yoo lakaina meIsileli yadi tafalolo wagaine. Ada yoo-dina taidei badi kaikaiwabudiyavo aku kaduwe badi meIsileli moyaidi yadi tafalolo anatoveimeya. Biyavo-dina yadi vetumagana evona kaliva keke wa aluwaluwadi ada keke alikeya idayawa-vagila, ada yadi vetumagana ani evona anelose keke ida miyami. moyaidi kaduwe ielai Iyoni gikikivebabitaiso fafali-nai wagaine. Ada Iyoni giitadi ke givonediga, “Imi vaita mota natunavo anafaiweya, mota-nai koyo-moena giluluvealika!†Mad 12:34, 23:33 Gaito givonemi evona vaita amifaiweya wanaota Yaubada yana nuwakoyo lakaina gielaelai wagaine? 8 Gilubodami wanadewa tunutunugina e ada yami nuwavilana anaita gina mogatala velemoena. 9 Ada keke wana nuwanuwa taumiyavo wagaimiya ke wanavona, ‘Imeyavo ani Ebelaamo unumina faina, kadu ide Yaubada natunavo. E ada Yaubada keke gina vematavulogima.’ †Iyo 8:33Faina gana vonemi, Yaubada anafata kabala taidei wagaidiya Ebelaamo natunavo gina bubudi. 10 Kaduwe tova malinai-mowa Yaubada yana matavuloga anailama bademowa igui gimanini, ada ai ina luinubadi. Ada ai seyana seyana guwadi keke iwakana ani inatala ginaobu ke ina batugena ai alalata wagaine.†Mad 7:19 11 Iyayeku ani gakivebabitaisomi gufa wagaine, faina yami dewa koyona wagaine wanuwavilana anaiyaiyaya. Aku kaliva seyana mulikuya gielaelai ani Banae lakai-moena aku Iyayeku kwamana kabisoku. E ada keke akulauboda Bana wagaine gana vetogugai ke anaageyafayafa ganawai. Banae gina kivebabitaisomi Aluwaluwa Tabuna wagaine ada kadu ai alalata. 12 Ada witi anadiu lakaina ani bademowa nimana wagaine ke witi anaebavagakolukolu wagaine gina lubutuna. Ada witi-moena gina vagauwina yana kweda wagaine gina dodona, aku witi yogona ai alalata wagaine ginaleva gina alaina, ai-nai keke maita gida weuwe.” Taidei anafaiweya Iyoni gilumamala.

13 Aku Yeisu Galili anafafali gitauya ginau gufa Yolidani wagaine giyegemo ada Iyoni gina kivebabitaisona faina. 14 Aku Iyoni nuwanuwana gina awatana ada givonaga, “Gavaiyamu-yo Iya wagaikuya uela una babitaiso? Iya au kwamana kabisoku e ada akulauboda Oye wagainiya gadaela uda kivebabitaisoku.”

15 Aku Yeisu givonena, givona, “Auwe keke una nuwanuwa. Tova malinai una kivebabitaisoku, faina taidei adalauboda gavaiyamu Yaubada kaliva giveimeyeda ani matatabuna kana gugaiyena.” E ada anafaiweya givona faina, Iyoni giawaegau ada gikivebabitaisona.

16 Ada Yeisu gibabitaiso giavaina, au gifumatana gufa wagaine ani maduga-mowa gabama giawaina aku giitana Yaubada Aluwaluwana giobuobuelai vaita manuga bunebune anafaiweya, ada givetogana Banae wagaine. 17 Ada gabameya-deya Yaubada bonana giyegemo, givonaga, “Taidei ani Natu aseaseku, Banae nuwaku gikivemwamwalina lakaina.” †Mad 12:18, 17:5, Luk 9:35