17
Yeisu anaita gisevedavedama.
Mak 9:2-13; Luk 9:28-36
1 Ada yadayada sikisi giavaidi, Yeisu yana tonogalayavo aditoto, Pita ada Iyemesa ke anatubuluga Iyoni ani givagauledi nodi ilaka oya lakaina wagaine. 2 Ada wadedeku-deya adiloi matadiya aku Yeisu anaita gisevedavedama.†2Pi 1:16-18 Ada magigina gilunamanamalena vaita kauwana anafaiweya, ada ananuya gikwayafofolina vaita malina anafaiweya. 3 Ada aditoto matadiya aku Yaubada yana kalivayavo adiselu tova tuwaina wagaine imiyamiya, tainei Mosese kadu Ilaitiya, ani iyegemona ada Yeisu nodi iifuifufu.
4 Ada au Pita Yeisu givonena, “Kauveya, ida iwaka-moena faina ime nodi idedeku kamiyamiya. Ada kai ya nuwanuwa anafaiweya, aga vada toiye idedeku gana yogodi. Seyana O fainiya, seyana Mosese faine, kaduwe seyana Ilaitiya faine.”
5 Ada aimo giifuifufu aku buibui mamali-moena giyegemona ke gibwatavudi, ada bonabona buibui wagaine-deya givonaga, “Taidei ani Iya Natu aseaseku, Banae gikivemwamwaliku lakaina. Bonana wana nogalina.” †Mad 3:17, 12:18, Mak 1:11, Luk 3:22, 2Pi 1:17-18 6 Aku tonogalayavo inogalina wagaine, imatauta lakaina ada babi wagaine ivetalatala.
7 Ada Yeisu gielai nimana gisena wagaidiya aku givona, “Wana mididi. Keke wana matauta.” 8 Ada iitalaka ani keke tamo gaito idaita aku Yeisu anakaibe-mowa. 9 E ada itauya oyeya-deya iobuobuelai aku Yeisu giveimeyedi, givona, “Gavana waitanuwagana vewala-nai**Taide maita-nai wagaine, vona-nai ‘vewala-nai’ ani ananuwanuwa anafaiweya ‘enoita’, aku gaito gina nuwagana ani giitaita aku vewala giyegeyegemona wagaine. wagaine ani keke seyana gaito wana vonevone analaba Banae Kaliva Natuna alikeya Yaubada gina siveyawana. Aku muliya ani iwakana, wana awamogatalena.”
10 Ada yana tonogalayavo itolidadanena, ivona, “E aku gavana faina veimeya anatovewalayavo ivona vaita gilubodana Ilaitiya gina maduelai, aku muliya Mesaiya?”†Mal 4:5
11 Yeisu gilufata, givona, “Ina vona velemoena, Ilaitiya ginaelai ke gaitoma matatabuna gina sedewedewe-vagiledi. 12 Aku Iya gana vonemi, bana Ilaitiya bademowa gielai aku kaliva keke ida inana, ada gavana anafaiweya yadi nuwanuwa koyona ani igugaiyena wagaine.†Mad 11:14 Tainei anafaiweya Banae Kaliva Natuna kaduwe vita moyaina gina nuwagana badi nimadiya.” 13 Ada tonogalayavo au nuwadi gimalina tova-nai Ilaitiya faine givona ani velemoena Iyoni Tobabitaiso faine givonavona.†Luk 1:17
Kwamana seyana aluwaluwa koyona nafone gimiyamiya ani Yeisu gikiveiwakanena.
Mak 9:14-29; Luk 9:37-45
14 Ada Yeisu yana tonogalayavo aditoto nodi oyeya-deya iobuelai yoo wagaidiya, ani kaliva seyana gielai Yeisu wagaine ada tugana givetodonena, givona, 15 “Kauveya, natuku kaliva uda nuwakalikaliyena. Banae tova maufona wagaine vovona matatabuna ina yaviyavivila ke gina itaita-vagata. Yana veoga koyo-moena. Tova ke tova aiya o kai gufeya gibeubeu. 16 Ada gaaliyena ya tonogalayavo wagaidiya aku keke adifata ina kiveiwakane.”
17 Yeisu givonaga, “Imi tova malinai anayooyavo ani yami vetumagana keke, ada nuwanuwa moyaina tunutunugidi ani wakikivebaladi. Gavaiyei tova Iya nodi kana miyamiya? Gavaiyei tova gana atuvefailemi? Kwamana wana aliyena wagaikuya.” 18 Ada kwamana tamana gialiyena, ada Yeisu aluwaluwa koyona giawatana ke kwamana wagaine giyegemona ayo maduga-mowa giveiwaka.
19 Aku muliya tonogalayavo ielai Yeisu wagaine ada adiloi gaga aku itolidadanena, ivona, “Gavana faina ime keke amafata aluwaluwa koyona ana veyegemoni?”
20 Yeisu givona, “Faina yami vetumagana kabiso-moena. Aku gavonemi velemoena, kai yami vetumagana anatubuga vaita musita waifeina kabiso-moena anafaiweya, aga amifata oya taidei wagaine wanavona, ‘Una mididi unanau tayuwe.’ Ada ginanau. Kai yami vetumagana tainei anafaiweya aga wagaimiya gaitoma matatabuna meyameyaganidi.†Mad 21:21, Mak 9:23, 11:23, 1Kol 13:2 [ 21 Aku aluwaluwa koyodi taidei anafaiweya ani keke amifaiweya wana veyegemonidi, tainei-mowa wana veoveola Yaubada wagaine aku kani wana ilovau.”] **Kaliva tufodi Buki Tabu tuwai-moena ivetokilumi-vedamana ani maita tuweniti wani keke ida vetokilumi.
Yeisu yana alika ke yana yawa-vagila faina kaduwe giifufu.
Mak 9:30-32; Luk 9:44-45
22 Ada tova seyana wagaine Yeisu yana tonogalayavo nodi ivagauta Galili wagaine aku givonedi, “Tova kabisona Banae Kaliva Natuna ina atuegena kaliva nimadiya, 23 ada ina luvealikana. Aku yadayada anaveto wagaine Yaubada gina siveyawana alikeya.” Taidei anafaiweya Yeisu givona, ada tonogalayavo inuwavita lakaina.†Mad 16:21
Manuwa tabu anatakesi faina.
24 Ada Yeisu yana tonogalayavo nodi ina iyegemona Kafaneumi wagaine, ada takesi anatoyaudi manuwa tabu faina ani ielai Pita wagaine itolidadana, ivona, “Gavaiyamu, bana yami tovewala, manuwa tabu anatakesi gisesena o keke?” **MeIsileli kaliva-gaga adimalamala tuweniti ada gilaka ginau ani badi adiveimeya malamala seyana seyana takesi ina sesena manuwa tabu faina. Mani taidei anaetowava ani kai kaliva seyana gina faisewa yadayada iluwei aga fatana anaetowava anafaiweya, e ada taidei wagaine manuwa tabu analema faina tova moyaina ifaifaisewana.
25 Pita givonaga, “Ika, gisesena.”
Ada Pita gina giluku manuwa wagaine ada takesi faina aimo keke gidavona aku Yeisu gimaduvona, givonaga, “Saimoni, gavaiyamu ya nuwanuwa? Babi matatabuna anakiniyavo ani gavega wagaidiya takesi ivaivai? Taudiyavo natudiyavo wagaidiya o kai mali kaliva wagaidiya?”
26 Pita givona, “Mali kaliva wagaidiya ivaivaina.”
Yeisu givona, “Uvona velemoena. Taidei faina kiniyavo natudiyavo keke takesi ida sesei.**Manuwa tabu ani Yaubada yana manuwa, ada Yeisu Yaubada Natuna. Ada Yaubada Banae anafaiweya kini faina, Yeisu yana tonogalayavo nodi keke adilauboda ke takesi inasei. E aku badi keke ida vetumagana Yeisu wagaine ani badi adilauboda ke takesi inasena. 27 E aku ide keke nuwanuwada takesi anatoyaudi nuwadi kana kivekoyo. Tainei faina unanau lavu wagaine maina una batugena, ada igana gina madukani una taina ani awana una kilana ada siliva mani una nuwagana. Mani-nai una nauwena ada takesi unasena oye ke Iyayeku faideya.”
†17:5 Mad 3:17, 12:18, Mak 1:11, Luk 3:22, 2Pi 1:17-18
**17:9 Taide maita-nai wagaine, vona-nai ‘vewala-nai’ ani ananuwanuwa anafaiweya ‘enoita’, aku gaito gina nuwagana ani giitaita aku vewala giyegeyegemona wagaine.
†17:10 Mal 4:5
†17:20 Mad 21:21, Mak 9:23, 11:23, 1Kol 13:2
**17:21 Kaliva tufodi Buki Tabu tuwai-moena ivetokilumi-vedamana ani maita tuweniti wani keke ida vetokilumi.
**17:24 MeIsileli kaliva-gaga adimalamala tuweniti ada gilaka ginau ani badi adiveimeya malamala seyana seyana takesi ina sesena manuwa tabu faina. Mani taidei anaetowava ani kai kaliva seyana gina faisewa yadayada iluwei aga fatana anaetowava anafaiweya, e ada taidei wagaine manuwa tabu analema faina tova moyaina ifaifaisewana.
**17:26 Manuwa tabu ani Yaubada yana manuwa, ada Yeisu Yaubada Natuna. Ada Yaubada Banae anafaiweya kini faina, Yeisu yana tonogalayavo nodi keke adilauboda ke takesi inasei. E aku badi keke ida vetumagana Yeisu wagaine ani badi adilauboda ke takesi inasena.