1 Kai gana ifuifufu meya tulina tulina wagaidiya kadu anelose meyadiya aku keke wa yaku nuwakabubu, aga Iya anafaiweya vaita kaula ida yuve-kavokavovo o kai tini kakawana ida luvekevekebo. 2 Kai gana falofisai, ada kai Yaubada yana nuwanuwa sewasewavuyena moyaidi faidiya nuwaku gina malina, ada kai alamana lakai-vagaina gana nuwagana, ada kai yaku vetumagana toyogi-moena faina oya gana veimeyena ke ginanau malifafaliya ee, kai taidei gaitoma-dina moyaina gana gugaiyedi aku keke wa yaku nuwakabubu, aga Iyayeku au gaitoma-kavokavovo. 3 Kai yaku giba matatabuna gana vutugedi tofanifani wagaidiya, ada kai vovoku gana awaegena alika wagaine ke ai alalata wagaine inaleva gina alaina, aku kai nuwakabubu keke aseasekuya gida miyami, aga keke maita ina lemeku, keke-mowa.

4 Kai ide wa yada nuwakabubu, aga kaliva kana atuvefailedi†Vona 10:12, 1Pi 4:8 ada wa yada nuwakabubu kana dewedi iwakana.†Gal 5:22, Efes 4:32, Kol 3:12 Kadu keke kaliva yadi giba o kai adiivi kana itaitadi ke kana agouga faidiya.†Gug 7:9 Keke wa yada nuwalaka kana gakaikai. Keke wa yada nuwalaka taudeyavo kana itaitada vaita ide iwaka-moeda ayo mali kaliva,†2Tim 3:2, Tai 1:7 5 kadu keke kaliva kana awadamanedi. Kai ide wa yada nuwakabubu, aga keke taudeyavo yada nuwanuwa kana imanimaniniye, ada keke kanamadu nuwakoyo gaitoma-kavokavovo faidiya. Kaduwe kai kana nuwakoyo, aga keke yada nuwakoyo-nai kana kitaitai. 6 Kai ide wa yada nuwakabubu, aga tubuiyadeyavo yadi dewa koyona faine keke kana vemwamwala, aku tubuiyadeyavo idewadewa iwakana ke ivonavona velemoena wagaine, kana vemwamwala faine.†2Iyo 4, 3Iyo 1:3-4 7 Kai ide wa yada nuwakabubu, aga kai tubuiyadeyavo inadewa koyona wagaideya, au kana atuatuvefailedi. Ide wa yada vetumagana kaliva faidiya, wa yada nuwavetumagana kaliva faidiya, ada kaduwe gavavita ina yegeyegemona wagaideya, au kana atuvefailedi.

8 Nuwakabubu keke gina avovoli, au miyamiyani-vagaina. Aku Yaubada yana nuwanuwa kaliva ifalofisaiyedi, ani vutuvutuga-nai gina avovolina. Ada Yaubada yana nuwanuwa kaliva ivonavonayedi meya tulina tulina wagaidiya, ani gina ilovau. Ada kaduwe Yaubada yana alamana giveleveledi kaliva ke iawamogatalena, ani gina ilovau. 9 Faina tova malinai alamana-nai Yaubada giveleveleda ani wada tufona gaga, ada yada falofisai ani wada tufona gaga. 10 Aku aimo Yaubada gaitoma moyaina luluyabu-moedi gina seyegemonedi, e ada tova tayuwe wagaine vutuvutuga-dina wada tufona gaga imiyamiya malinai,**Taidei vutuvutuga-dina wada tufona gaga ani falofisai, meya tulina tulina, ada alamana-nai Yaubada givelevelena kaliva. ani ina avovolidi. 11 Waitana, tova-nai Iya kabisoku, gaifuifufu, ganuwanuwa, ada gaitoma tulina tulina ganuwanuwayedi kwamana anafaiweya. Aku tova malinai bademowa gaveinala ke gaveasekumaga, e ada kwamana anadewa gasegena. 12 Vona tainei givona ide tovetumagana faideya. Faina tova malinai keke nuwada gidamali velemoena gaitoma moyaina faidiya, aku anafaiweya vaita gavana seyana kelasi wagaine kada itaowaowa.**Tova tayuwe wagaine Paulo taide leta-nai givetokilumina ani kelasi-dina ibubudi badi keke mamali-moedi. Taidei faina givona ani “kelasi wagaine kada itaowaowa”. Aku tova-nai kanalaka gabameya, aga nuwada ginamali-dewedewena gaitoma moyaina faidiya, anafaiweya vaita seyana gaito nodi kada vemagigiitaita.†1Iyo 3:2 Tova malinai tufonaga kaalamanena, e aku tova tayuwe wagaine gaitoma moyaina kana alamane-yabudi anafaiweya ide Yaubada gialamane-yabuda. 13 E ada malinai gaitoma toiye lakaidi imiyamiya, vetumagana, nuwavetumagana, ada nuwakabubu. Aku gaitoma-nai wai ginagona ani nuwakabubu.