1 Nuwanuwaku una alamane-dewedewena vaita Yeisu yana yewa-vagila anatova gina velilivana wagaine, tova vita-moedi ina yegemona.†1Tim 4:1 2 Faina kaliva ina nuwanuwa taudiyavo gagana faidiya, mani ina itaitaluvadigena, ada taudiyavo adiyegana ina kikilakaidi, kaduwe ina nuwalaka ke inavona awadamana mali kaliva wagaidiya. Inadiyavo ke tamadiyavo keke ina vemoimoinedi, keke inavona vesiule adinuwakabubu faidiya, kaduwe badi keke tabutabudi Yaubada matane aku dewa yuyuvana idewadewayedi ada wa yadi koyona imiyamiya. 3 Kaduwe tova-dina wagaidiya kaliva keke nuwakalikali ina seseyegemone, keke ina venuwaega, kaliva ina veloidi e ada adiyegana ina kikivekoyona, keke maita taudiyavo ina awatadi, ina manimanini kaliva wagaidiya ke ina ivegilagidi. Ada dewa iwakana keke maita nuwadi gidavai.†Lom 1:29-31 4 Kaduwe kaliva-dina tovewaibubuna, ada keke wa yadi nuwanuwa aku ina madumaduvona o kai ina madumadugugai, ada nuwalaka taudiyavo. Keke maita Yaubada wagaine yadi nuwanuwa ida sesei aku aiyada taudiyavo yadi vemwamwala gagana faina ina nuwanuwa lakaina. 5 Yoo-dina adiita ani anafaiweya vaita badi totafalolo anafaiweya ideyavo, aku kebuladiya itafatafalolo, keke aseasedi wagaidiya-deya.†Mad 7:15,21, Tai 1:16 E ada yadi dewa wagaidiya Yaubada yana toyogina iveweyena. Badi kaliva-dina anafaiweya ani keke una vevetubuiyanedi aku analauboda unamiya tabae. 6-7 Faina kaliva tufodi badi adimwatuguya ani ilukulukunau mali kaliva yadi manuweya, ada vevine aseyakayakadiyavo ani biyavo-dina yadi nuwanuwa isigadagadadi. Badi vevine-dina yadi koyona moyaina vaita veinuwana anafaiweya ilulutovonina, ada tova ke tova nuwanuwa koyona wagaidiya iawaegedi. Kaduwe tova moyaina vewala tulina tulina ivenovenogalena, aku Yaubada yana nuwanuwa velemoena ani keke-mowa adifaiweya ina inana. 8 Anafaiweya tuwai-moena kaliva adiselu adiyegana Yanesi ke Yamibelesi **Taidei kaliva-dina adiselu Yanesi ke Yamibelesi, badi tovebalabalauma Itipita wagaine ani Mosese iawavekoyoyena tova-nai gimidimididi Felo matane. (Iyeg 7:11-22, 8:7-19) Mosese ivenibainena, kaduwe biyavo-dina Yaubada yana nuwanuwa velemoena ivenibainena. Ada nuwainagediya fwaya ke nuwanuwa koyodi givemagadi, ada Yaubada anavetumagana wagaine keke ida awaegedi velemoena. 9 Aku badi aimo kaliva keke ina fwayadi tova manamanawena, faina yadi nuwanuwa kwavakwava ani kaliva moyaidi ina itanuwagana, anafaiweya tuwaina giyegemona Yanesi ke Yamibelesi wagaidiya.

10 Aku Iya keke badi anafaiweya o ualamanena. Faina o Iya nodi malamala moyaina e ada yaku vewala, yaku dewa, yaku nuwanuwa vuvuna, yaku vetumagana, yaku atuvefaila, yaku nuwakabubu, yaku asevatu, ani bademowa uitana. 11 Ualamanena kaliva vita moyaina iveleku ada uloulolo ganuwagana aku gaatuvefailedi. Una nuwaududuna gavaiyamu idewa wagaikuya melala toiye Anitiyoki, Aikoniyamu ada Lisita wagaidiya. Velemoena vita lakaina ganuwagadi kaliva nimadiya, aku Kauveya gikibababaleku vita-dina matatabuna wagaidiya-deya.†Gug 13:14-52, 14:1-20 12 Vona velemoena, gavega moyaidi Yeisu Keliso nodi iveseyana e ada nuwanuwadi Yaubada yana nuwanuwa anafaiweya ina dewadewa, aga vita ina nuwagadi kaliva nimadiya.†Iyo 15:20 13 Aku badi kaliva koyodiyavo kaduwe tovefwayafwaya ani yadi koyona gina tubuga ada au ginakoyo-mowa. Badiyavo mali kaliva ina fwayanegenegedi kaduwe mali kaliva badi ina fwayanegenegedi. 14 Aku oyeni ani gava nuwanuwa tunutunugina wagaine usikulu ke uvetumagana velemoena, vewala-nai una kikiabidonena.†2Tim 2:2 Faina ime wagaimeya usikulu ani ualamanema wa amavetumagana. 15 Ada kaduwe, aimo kabisoniya uvebutu Yaubada yana vetokiluma tabutabuna anaalamana uvaivaina ke unauwena-deya tova malinai. Vetokiluma-nai ani anafata kaliva gina nuwauyaveledi e ada wa yadi vetumagana taudiyavo ina awaegedi Yeisu Keliso wagaine ke kibababala ina nuwagana. 16 Yaubada yana vona Buki Tabu wagaine, ani matatabuna Banae Aluwaluwana tovetokiluma gialaveleveledi mamauwe ivetokilumina.†2Pi 1:21 Tayuwe vona-dina yadi gugai taidei anafaiweya. Nuwanuwa velemoena ivevewaleda, iluluwageyeda yada koyona faidiya, ada kaduwe ikikivetunuda ke ivevewaleda gavaiyamu kanadewa yegayegana ayo Yaubada kana kivemwamwali. 17 E ada taidei anafaiweya Yaubada yana kalivayavo gikidewedeweda, ke adafaiweya-mowa yana gugai iwakadi moyaina kana gugaiyedi.