1 E aku natuku, tauni una awaegeni Keliso Yeisu wagaine ke yana nuwadogeya gina kivetoyogini. 2 Yaku laumamala kaliva moyaidi matadiya o unogalina. Nuwanuwaku kaliva idibudibumwaigadiyavo una venuwadadanedi ada bonaku una vewaledi, e ada badi kaduwe adifaiweya inana mali kaliva ina vewaledi. 3 Una itana, ide tovetumagana ani Yeisu Keliso yana tolugaviya, ada vita tulina tulina kana nuwanuwagadi. Gavavita una nuwagadi Yeisu Keliso faina aga gilubodani keke unaota wagaidiya-deya, aku una fasima ke una atuvefailedi anafaiweya yana tolugaviya iwakana. 4 Keke tamo tolugaviya tauna gina awaege mali nuwanuwa wagaidiya, aku gaviya gagana faina gina nuwanuwa e ada tolugaviya-nai anatonagona nuwana gina kivemwamwalina. 5 Anafaiweya vemadu. Tomadu ani kai keke madu anaveimeya gina muliye, aga keke meyameyaganina vewainagona anafata ginavai.†2Tim 4:8 6 Kaduwe anafaiweya tobakula, banae yana idibudibumwaiga faina, gilubodana bakula guwana gida maduvaina. 7 Tainei vona ebaluvefota toiye gaifufuyedi ani yada Kauveya yana gugai faina. Una nuwanuwayedi, faina Kauveya nuwa gina kivemalina gaitoma moyaina wagaidiya.

8 Aku Yeisu Keliso una nuwaududuna. Banae Kini Deivida anaunuma wagaine gitubuga, ada gialika aku Yaubada gisiveyawana alika wagaine-deya. Taidei valeya-nai iwakana gavevewalayena kaliva wagaidiya,†Lom 1:3-4 9 ada tainei wagaine vita ganuwagadi vaita Iya seyana tokoyona lakaina anafaiweya, e ada iyogoku seini wagaidiya. Aku Yaubada yana vona ani keke yogoyogona!†Fip 1:12-14 10 Tainei faina vita moyaidi wagaidiya gaatuvefaileku, ke Yaubada yana kalivayavo venuvenuwadadanidiyavo kaduwe adikibababala ina nuwagana. Tainei kibababala-nai Keliso Yeisu wagaine-deya, Banae wa yana iwakana mamalina miyamiyani-vagaina.†Kol 1:24 11 Vona taidei ani vona velemoena:

14 Taidei gaitoma-dina gaifufuyedi ani ya kalivayavo una kivenuwaudududi, kaduwe Yaubada matane una veimeyedi toyogina ada vona adikivila faidiya ivevonavona ani ina ilovau. Faina vona kavokavovo keke maita tovanenega gina lemedi, aku aiyada yadi vetumagana gina ivekoyo-moedi.†Tai 3:9 15 Oye Yaubada yana gugai wagaidiya una idibudibumwaiga velemoena, ada wa ya alamana yana vona velemoena una vevewala tunutunugina. E ada keke maita wa ya vovomumu tauni una yegemoneni Banae matane ke gina awaveiwakaneni, ginavona, “Oye togugai iwaka.” †Tai 2:7-8 16 Aku vona kavokavovo tainei Yaubada anavemoimoina keke gida luboda ani una velovogedi. Badi gavega keke nuwanuwa velemoena aku vona kavokavovo wagaine iawaegedi, ani inau atuwadeya-mowa Yaubada wagaine-deya e ada yadi koyona iluvefovefofodi. 17 Taidei kaliva-dina koyodiyavo yadi vewala-nai gina tubuga-mowa vaita koliya gialabwakebwakeina, ada wagaine alika gina yegemo. Biyavo-dina wagaidiya-deya kaliva adiselu ivevewala sidamana, adiyegana Aimeniyo ke Fileto. 18 Badi kaliva-dina adiselu ani Yaubada yana nuwanuwa velemoena anawai inuvuyoyena, ivonavona, “Toalika yadi yawa-vagila anatova bademowa giyegemona.” E ada tovetumagana tufodi yadi vetumagana Yeisu wagaine ani ikivekoyona ke nuwadi ikivevoganidi.

19 Badiyavo ani iifuifufu taidei anafaiweya, aku Yaubada yana nuwanuwa velemoena ani anafaiweya avutuwa gisedonena**Wadedeku Isileli anafafali wagaine manuwa lakaidi iyogoyogodi ada adiavutuwa ani kabala lakaidi. Ada adigiduwa seyana ani toni manuwa gina vetokilumina avutuwa anakabala tabodiya gavaiyamu yana nuwanuwa anafaiweya, ada taidei wagaine mali kaliva ina alamanena vaita manuwa-nai ani kaliva-nai tauna yana manuwa. E ada taidei maita-nai wagaine tovetokiluma givonaluvefosau vaita Yaubada yana nuwanuwa anaavutuwa anafaiweya yana ekalesiya gikivemididina anafaiweya yana manuwa. ke gimidimididi toyogina, ada wa anamatawa vetovetokilumina ani Yaubada wagaine-deya, givona,

20 Seyana ebaita gana ifufuyena. Tokaikaiwabu yana manuwa wagaine nauwa tulina tulina imiyamiya. Nauwa tufodi ibubudi gola ke siliva wagaidiya ani fatadi lakaidi, tufodi ibubudi ai ke babi fotafotana wagaidiya. Nauwa kaikaiwabudi iseliyedi gavega wakawaka adiyegana lakaidi faidiya, aku nauwa ibubudi ai o kai babi wagaidiya ani adivegugai keke gaitoma lakaina. 21 Tainei nauwa-dina ani ide kaliva anafaiweya. E ada kai gaito seyana nuwanuwa koyona gina vedomobubusena aku gina awaegena nuwanuwa yegayegana wagaidiya, aga banae anafaiweya nauwa kaikaiwabuna iseliyena gavega wakawaka adiyegana lakaidi faidiya. Banae kaliva-nai seseliyena Kauveya yana gugai faine e ada tabutabuna Bana matane. Ada gugai iwakana tulina tulina faidiya banae kikidewadewana, e ada Kauveya yana gugai faine gina vegugaiyena.

22 Taidei faina tubulakata yadi dewa tova moyaina inuwanuwa kavu vovo faina ani dewa-nai una osena, aku tauni una awaegeni wai iwakana wagaine, anafaiweya unadewa yegayegana, Yaubada una vetumaganena, una vetonuwakabubu, ada wa ya nuwaniwalova una miyamiya kukuyeya. Kai tayuwe wai-dina wagaidiya una naunau, aga badi gavega wa aseasedi yegayegana yadi nuwanuwa isena Kauveya wagaine ada iveoveola wagaine, ani oyeni badi nodi wana naunau. 23 Kaliva tufodi tova tova ivevonavona gaitoma-kavokavovo ke dewa kwavakwava faidiya. Yadi vevonavona-dina ani una velovelovogena, faina ualamanena kaliva ina vevonavona tayuwe anafaiweya ani tova kabisona ina vebutu nodi ina gavekwavekwageya. 24 Ada ide Kauveya yana togugaiyavo keke gida lubodada kana gavekwavekwageya, aku aiyada wa yada nuwakabubu kaliva moyaidi kana dewedi iwakana, kana vevewaledi iwakana, ada kana atuvefailedi.†1Tim 3:3 25-26 Ada kaduwe badi gavega Yaubada yana vewala ivenibainena ani nuwabikeya kana kivetuvetunugidi. Badi kaliva-dina ani Seitani yana dai wagaine givebeudi, e ada yana ebaveimeya dibune imiyamiya ke yana nuwanuwa iidibumwaigena. Kai nuwabikeya kana kivetuvetunugidi, aga kai Yaubada gina awaegedi ke ina nuwavilana, ada taudiyavo ina awaegedi yana nuwanuwa velemoena wagaine. E ada nuwadi gina malina ke yadi nuwanuwa baladi gina avaidi, ada inaota Seitani yana dai wagaine-deya.