Kolose Tovetumagana Yadi Leta Paulo Givetokilumina
Kivemala
Paulo deliya gimiyamiya aku taidei meKolose yadi leta kadu Filimoni banae kwana Kolose ani yana leta givetokilumidi, ada badi Tikiko ke Onesimo inauwena.
Keke Paulo tauna yana laumamala wagaine Kolose ekalesiya gida yegemona aku Paulo Efeso gimiyamiya anatoveya, tubuiyana Efafilasi Kolose wagaine giimilina ke ekalesiya-nai givetubuyegemonina. (Kolose 1:7) E aku aimo bana Efafilasi Paulo gimatawena tovewala fwayafwaya faidiya, faina badiyavo iyegemona Kolose wagaine ada igaluvaluva tovetumagana ina nuvuyoyedi. Yadi fwaya taidei anafaiweya, evo vaita tovetumagana gilubodadi ke tokaikaiwabu kadu totoyogina aneloseyavo gabama nefanine imiyamiya ani ina awadavadavadi. Kaduwe yadi vewala vaita Yeisu keke Yaubada anaitaita anafaiweya aku au vaita tamo anelose anafaiweya. Kaduwe vaita Mosese yana veimeya ida itaveyabina. Ada au taidei anafaiweya yadi vewala aku Paulo taide yadi leta-nai wagaine gikivetunudi vaita Keliso anaitaita ani au Yaubada anaita anafaiweya, yadi kaikaiwabu aigaigabudi, ada Banae yoo tovetumagana debaidi. Keliso anakaibe-mowa kibababala vuvuna.
Vona vesiule. (1:1-2)
Paulo meKolose faidiya givesiule Yaubada wagaine. (1:3-14)
Keliso yana kaiwabu kaduwe yana faisewa faina. (1:15-23)
Paulo yana gugai ekalesiya faidiya. (1:24 - 2:5)
Keliso anakaibe-mowa Banae vona velemoena vuvuna, e ada wana tunuvala-vagata wagaine. (2:6 - 3:4)
Gavadewa tovetumagana wa yawaidi evaguna ani adilauboda faina. (3:5 - 4:1)
Paulo givona asevatudi. (4:2-6)
Paulo yana vonavetalakafoi. (4:7-18)
1
1-2 Iya Paulo, Yeisu Keliso yana afositolo Yaubada yana nuwanuwa wagaine. Imi Yaubada yana yoo tabutabumiyavo wamiyamiya yana ekalesiya Kolose wagaine ani Iyayeku ada tubuiyada Timoti nodi yama vesiule wagaimiya. Imiyavo Keliso nodi waveseyana ada yami awaega ani toyogi-vagaina, keke gida kabekabebe. Tamada Yaubada yana nuwadogeya gina lemelememi ada kaduwe aseasemi gina kikiveniwalovina.
Paulo meKolose faidiya givesiule Yaubada wagaine.
3 Ime tova moyaina aveoveola faimiya†Efes 6:18 ada avesivesiule Yaubada wagaine, Banae yada Kauveya Yeisu Keliso Tamana. 4 Faina anogalina vaita yami vetumagana wasevelavelalaina yada Kauveya Yeisu wagaine, ada kaduwe Yaubada yana kaliva tabutabudiyavo moyaidi wanuwanuwakabubuyedi. 5 Nagona valeya iwakana wanogalina Yeisu faine, valeya-nai tainei Yaubada yana vona velemoena, ada wanuwaveyalaina vaita gavana Yaubada gikidewedewena faimiya gabameya ani wana nuwagana. E ada taidei yami nuwaveyalaina-nai faine, imiyavo Yeisu Keliso wavetuvetumaganena ada yana kaliva wanuwanuwakabubuyedi. 6 Taidei valeya-nai giela giakwalelega babi matatabuna wagaine ani gitabotabo ke giguwaguwa, e ada kaliva gavega ivetumaganena ani anaiwakana inuwanuwagana yawaidi wagaidiya. Ada kadu anafaiweya tova-nai gielai wagaimiya, wanogalina ke anaiwakana wanuwagana yawaimi wagaidiya. Ada yadayada-nai wagaine wanogalina, e au wagaine-deya Yaubada yana nuwadoga vewaga anavona velemoena walutovonina.†Efes 1:13,15, 1Pi 1:3-4 7 Valeya taidei anaalamana wavaina ani Efafilasi†Kol 4:12, Fim 23 wagaine. Banae Keliso yana togugai anafaiweya imeyavo, ada anuwakabubuyena. Banae toidibumwaiga Keliso yana gugai wagaine ada amatoivaivaita imi faimiya, 8 ada kaduwe givonema vaita Aluwaluwa Tabuna guwana giseyegemonena wagaimiya e ada kaliva wanuwakabubuyedi velemoena.
9 Taidei faina, yadayada-nai anogalina wagaine avebutu imi faimiya aveoveola ada keke ada ilova. Yaubada aveoveolena ke nuwami gina malina velemoena ada nuwauya gina velemi, e ada wana alamanena matatabuna gavana Yaubada yana nuwanuwa faimiya. 10 Taidei anafaiweya aveola e ada yawaimi wagaidiya wana dewadewa iwakana Kauveya Yeisu yana kaliva analauboda anafaiweya, e ada wana kivemwamwalina.†Fip 1:27 Anafaiweya ai giguwaguwa iwakana, ani imi wana gugugai iwakana wai tulina tulina wagaidiya,†Efes 2:10 e ada Yaubada anaalamana guwana wagaimiya gina tabotabo-faila. 11 Aveola faimiya vaita Yaubada gina kiveasevatumi Tauna yana toyogina lakai-vagaina wagaine, toyogina-nai giyegemona yana kaikaiwabu wagaine-deya. E ada wa yami atuvefaila wana mididi toyogina, ada gavavita gina yegemona ani wa yami mwala nodi wana vetoefaefa. 12 Kaduwe aveoveola faimiya ke wana vesivesiule Tamada Yaubada wagaine, Banae gikivelaubodami e ada yana vutuvutuga iwakana wana nuwagana. Taidei vutuvutuga-nai yana kaliva tabutabudeyavo faideya gikidewedewena yana fafali-nai wagaine yana malina gimiyamiya. Taidei anafaiweya aveoveola imi faimiya.†Efes 1:18-19 13 Faina Tamada gietoyavuda Seitani yana ebaveimeya yuyuvanina wagaine-deya aku gidamaneda Natu aseasena yana ebaveimeya wagaine. 14 Ada ide Natuna-nai nodi kaveseyana wagaine, adaetoyavuga kanuwagana. Yada dewa koyodi faidiya yogoyogodeyavo kamiyamiya aku Keliso dayagine gitutuveobuda, tainei yada koyona analaufata Banae gisena e ada yada koyona-dina givenuwaegedi.†Efes 1:7-8
Keliso yana kaiwabu kaduwe yana faisewa faina.
15 Yeisu ani Banae Yaubada anaita ke yana veuluva anafaiweya. Ide tomiyababi keke adafaiweya Yaubada kanaita,†Iyo 1:18 aku Yeisu wagaine Yaubada anaita ke yana veuluva ani mamalina wagaideya. Muliya-yo gavagaitoma giyegemona babi anamatatabuna wagaine aku Yaubada Natuna gimiyamiya, ada Banae ani lakai-moena ayo ibuibubuna matatabuna. 16 Faina Banae-menai ani ibuibubuna matatabuna adiwai e ada iyegemona.†Iyo 1:3 Gaitoma-dina gabama wagaine ada babi wagaine, gaitoma-dina kaitaitadi ada gaitoma-dina keke adafata kana itaitadi, kaduwe gabama anakaliva kaikaiwabudiyavo, kai tokaikaiwabu, o kai totoyogina, o kai toveimeyayavo, o kai kauveyayavo tulina tulina, au matatabudi Natuna Keliso Banae-menai givewai faidiya ada iyegemona, ada Banae faine imiyamiya. 17 Ada Banae bademowa-deya gimiyamiya aku ibuibubuna matatabuna iyegemona,†Iyo 1:1 ada Banae-menai gaitoma matatabuna gikikiveyabidi seyana. 18 Ada kaliva kuluwana ani vovona giveiveimeyena anafaiweya, mamauwe Keliso Banae ani yana ekalesiya debaina. Banae ani nago-moena toyawa-vagila alika wagaine, e ada ide vovona ani Banae yawaida vuvuna. Taidei anafaiweya Banae wai ginago-moena ke gaitoma moyaidi gina kaiwabusegedi.†Efes 1:22-23 19 Faina Yaubada ginuwamwala lakaina vaita yana iwakana mamalina, yana toyogina, yana nuwanuwa-dina ada yana veuluva ani matatabuna Natuna wagaine ina miyamiya.**Taidei anafaiweya Yaubada yana nuwanuwa e ada Natuna wagaine-deya Tauna gina ivemogatalina kaliva wagaidiya. (Kol 2:9) 20 Ada kaduwe Yaubada ginuwamwala vaita Natuna wagaine ani yana ibuibubuna matatabuna gina veseyana-vagileda Tauna nodi,†2Kol 5:18, Efes 2:16 kai gaitoma-dina babiya o gaitoma-dina gabameya. E ada tova-nai Natuna gialika kelose wagaine ada dayagina gimadu, taidei wagaine kukuya gikiveyegemonina.
21 Aku imiyavo tova nagona wagaine Yaubada wavenibainena yami nuwanuwa ke yami gugai koyodi wagaidiya,†Kol 2:1-3,12 22 ani malinai au Banae Natuna vovona yana alika wagaine imiyavo giveseyana-vagilemi Tauna nodi.†Efes 2:14-16 Taidei wagaine Banae anafaiweya gina seyegemonemi tabutabumi Tauna matane. Keke tamo koyona wagaimiya e ada tamo gaito gida awavekoyoyemi aku yami dewa matatabuna yegayegana Banae matane. 23 E aku gilubodami tova moyaina taidei vona velemoena wana vetumaganena ada wana mididi toyogina wagaine.†Ibel 6:11 Tova-nai wanogalina valeya iwakana amikibababala faine, aga wavevuvu wanuwanuwavetumagana vaita wana nuwagana gavana Yaubada givonadabadabayena. E ada kai tova moyaina yami nuwavetumagana-nai wana kidonena e ada keke gina aliuliu ke wanasege, aga Keliso gina seyegemonemi tabutabumi Tauna matane. Taidei valeya iwakana bademowa ilumamalena tomiyababi fafali moyaina wagaidiya, ada Iya Paulo analaumamala-nai faine gavetogugai.
Paulo yana gugai ekalesiya faidiya.
24 Velemoena, tova malinai uloulolo moyaina gawaiwaidi. Aku imi faimiya gawaiwaidi e ada gikivemwamwaliku. Faina gavana Keliso giuloloyena ani keke gidaavai, aku Iya vovokuya ulolo-dina ganuwanuwagadi wagaidiya ani Bana yana uloulolo galuluyabuna. Tainei yana uloulolo-dina ide yana yoo faideya, Banae vovona, tainei yana yoo. 25 Ada Yaubada givenuwadadaneku ke gavetogugai Keliso yana yoo adilema faina. Ee, yaku gugai-nai ani Yaubada yana vona matatabuna gana kikivemalidi imi wagaimiya. 26 Tutuya tuwai-moena gavaiyei bademowa giavaidi ada kaliva adiyoo bademowa gavaiyei giavaidi ada wagaine gielai, ani Yaubada yana nuwanuwa keke gida ivemogatali kaliva wagaidiya e ada keke ida alamane, aku tova manamanawena sewasewavuyena gimiyamiya wagaidiya. Aku malinai tova-nai wagaine nuwanuwa-nai giivemogatalina ide yana kaliva tabutabudeyavo wagaideya.†Efes 3:9, Lom 16:25-26 27 Ide wagaideya giivemogatalina faina nuwanuwana kana alamanena yana nuwanuwa sewasewavuyedi iwaka-vagaidi ke nuwavaivaidi. Taidei Yaubada yana nuwanuwa-dina sewasewavuyedi ani badi keke meIsileli faidiya, ada taide anafaiweya. Keliso wagaimiya gimiyamiya. Ada imi kadu wagaimiya Banae gimiyamiya faina, wanuwavetumagana vaita aimo Banae nodi yana iwakana mamalina wagaine wana miyamiya.
28 Banae alulumamalena kaliva moyaidi wagaidiya, ada alamana-nai Yaubada givelema wagaine kaliva seyana seyana avonavonamatawedi ke avevewaledi. Faina nuwanuwama kaliva moyaidi nuwadi ginamali-yabuna Keliso yana wai faine ke yadi vetumagana wagaine ina asekumaga,†Efes 4:13 e ada taide anafaiweya seyana seyana ana seyegemonedi Yaubada matane. 29 Taidei yaku nunu-nai anafaiweya faine gafaifaisewa toyogina. Keliso yana toyogina wagaine gavetoefaefa, toyogina-nai gifaifaisewa wagaikuya.†Efes 1:19

†1:3 Efes 6:18

†1:6 Efes 1:13,15, 1Pi 1:3-4

†1:7 Kol 4:12, Fim 23

†1:10 Fip 1:27

†1:10 Efes 2:10

†1:12 Efes 1:18-19

†1:14 Efes 1:7-8

†1:15 Iyo 1:18

†1:16 Iyo 1:3

†1:17 Iyo 1:1

†1:18 Efes 1:22-23

**1:19 Taidei anafaiweya Yaubada yana nuwanuwa e ada Natuna wagaine-deya Tauna gina ivemogatalina kaliva wagaidiya. (Kol 2:9)

†1:20 2Kol 5:18, Efes 2:16

†1:21 Kol 2:1-3,12

†1:22 Efes 2:14-16

†1:23 Ibel 6:11

†1:26 Efes 3:9, Lom 16:25-26

†1:28 Efes 4:13

†1:29 Efes 1:19

© 2024 Wycliffe Bible Translators, Inc.