1 E ada tubuiya aseasekuweyavo, wa yami vetumagana toyogina wana tunutunuvala yada Kauveya Yeisu wagaine. Iya ganuwakabubuyemi lakaina ada tova moyaina faimiya gatalatalanuwai. Imiyavo ani Iya yaku gugai guwana, vaita akukedukedu kaikaiwabuna,†1Tes 2:19-20 ada wakivemwamwaliku.

2 Aku Yuodiya ke Sinitiki, gaveolemi toyogina. Imi yada Kauveya Yeisu nodi waveseyana faina, gilubodami wa yami vemoimoina wana vedivediwe ke nodi wanamiya aigaigabuya. 3 Ada kaduwe oye tova moyaina wa ya idibumwaiga Iya nodi kagugai Yeisu faine, ani gaveoleni taidei vevine-dina adiselu una lemedi e ada ina vetubuiyana velemoena. Faina badi adiselu nodi avediwe toyogina Yeisu anavaleya iwakana gina mutula faina. Taidei vevine-dina ada Kelementi ke badiyavo Iya nodi agugai Yeisu faine, biyavo-dina adiyegana vetovetokilumina Yawai anaBuki wagaine.

4 Tova moyaina wana vemwamwala, faina Kauveya nodi waveseyana. Kaduwe ganavona-vagila, wana vemwamwala. 5 Ada yami dewa bikana wana seyegemonena kaliva moyaidi wagaidiya. Wana atuvefailedi ke bonami bikana wagaine wana ifufuyedi. Tova kabisona yada Kauveya Yeisu gina yewaelai.†Ibel 10:37, Iyem 5:8-9 6 Keke tamo gavana faina wana venuwanauna,†Mad 6:25, 1Pi 5:7 aku aiyada gaitoma moyaina faidiya Yaubada wagaine wana ifufuyedi. Gavana yami nuwanuwa ani wa yami nuwaobu ke wa yami vesiule Banae wana veolena faidiya.†Efes 6:18 7 Ada aseniwalova givevuvu Yaubada wagaine ani wana lutovonina, aseniwalova-nai ide kaliva-mowa keke adafata ana nuwamamala faine.†Iyo 14:27 Imi Keliso nodi waveseyana faina, yana aseniwalova-nai aseasemi ke yami nuwanuwa gina yavadi, e ada keke wa yami matauta wana venuwanauna.

8 Tubuiyakuweyavo, kadu yaku vona seya-moena. Taidei gaitoma-dina ani yami nuwanuwa wagaidiya ina miyamiya, taidei anafaiweya. Gavana vona velemoena, dewa wa adivemoimoina, dewa tunutunugina, dewa yegayegana Yaubada matane, gavana adilauboda ke kaliva ina nuwakabubuyedi, gaitoma-dina adiinana iwakadi, gavana iwaka-moedi, ada gavana adilauboda kana awadavadavadi. Taidei gaitoma-dina gilubodami wana nuwanuwayedi. 9 Kaduwe dewa-dina gavewalemi ke adialamana wavaina, gavana wanogala, ada gavana waitanuwagana yawaiku wagaine, tainei anafaiweya wanadewa. E ada Yaubada Banae aseniwalova giveleveleda ani wagaimiya gina miyamiya.

10 Aku tubuiyakuweyavo, tuwaina yami velekavovo waimilina faikuya, e aku tova nefanine ani keke anafaiweya. Keke vaita wada venuwavuluyeku aku yami nuwakabubu anaimila faina ani anawai keke. Aku malinai e ani yami nuwakabubu kaduwe ganuwagana faina, wa yaku vemwamwala yada Kauveya gavesiuleyena ke gagakaikai-mowa. 11 Keke gadavona vaita gavana wagaine gada vemaufo, keke. Faina bademowa alamana gavaina ani gavaiyamu yaku miya, au gavemwamwala wagaine. Keke maita giba adinuwanuwa nuwaku gidavai. 12 Miya vitana ani galutovonina, kaduwe miya iwakana galutovonina. Kai kamofata o kai keke, kai wagaikuya gava iwakana yaku miyamiya faine o kai keke, e aku gavana gina yegemona wagaikuya ani au wa yaku vemwamwala gamiyamiya. 13 Au gavana gina yegemona ani akufaiweya, faina Keliso gitoyoginaveleku.†2Kol 12:9-10

14 E aku imi meFilipai akuvita moyaina wagaidiya wawaiwaivaiseku. 15 Ada kaduwe waalamanena vaita tova-nai gamaduelai wagaimiya ke Yeisu anavaleya iwakana galumamalena, ani walemeku. Yami fafali Masedoniya gasegena anatoveya, keke tamo mali ekalesiya anayoo ida lemeku aku imiyavo gagana. 16 Faina tova-nai gamadusegemi ada keke tova manamanawena aku Tesalonaika wagaine gayegemona, wada au lilivamiya-mwaeya aku wavebutu yami nuwakabubu waimiimila. Ada keke tova seyana gagana aku tova gavaiyei nuwakabubu-dina ganuwanuwagadi ke badi ina lemeku yaku tova vemaufo wagaidiya. 17 Yaku nuwanuwa lakaina ani keke vaita kadu yami nuwakabubu wada veleku, aku imi faimiya ganuwanuwa. Nuwanuwaku yami velekavovo guwana gina tubuga e ada Yaubada gina itana ada keke nuwana ginavulu, e ada aimo amilaufata lakaina wana nuwagana. 18 E aku yami nuwakabubu waimilina banae Epafolodaito gialiyena ani bademowa ganuwagana. Aku gatataweyana faina akunuwakabubu-nai lakai-vagaina ada yaku nuwanuwa-dina gitubusegedi. E ada keke tamo gavana wagaine gada vemaufo. Yami nuwakabubu-dina wagaikuya ani anafaiweya vebolavoi magana magamagalina Yaubada wagaine,†Eba 8:21 ada giawaveiwakanena ke gikivemwamwalina.†Efes 5:2, Ibel 13:15-16 19 Ada yaku Yaubada kaikaiwabu-vagaina, e ada imi Yeisu Keliso nodi waveseyana ani gavana gavana wagaine wavemaufo ani matatabuna gina velemi.†Sam 23:1, 2Kol 9:8 20 Yaubada Tamada anayegana kana kikilakaina tova matatabuna keke anaebalauyabu. Ika anafaiweya.

21 Badi Yaubada yana kaliva ke vevine tabutabudiyavo ani seyana seyana wana vesiuleyedi faikuya, badiyavo Yeisu Keliso nodi iveseyana ani wagaidiya. Ada kaduwe tubuiyadeyavo Iya nodi amiyamiya ani yadi nuwakabubu wagaimiya. 22 Ada Yaubada yana yoo moyaidi idedeku kadu tovetumagana ifaifaisewa Sisa yana manuweya, ani yadi vesiule wagaimiya. 23 Gaveola yada Kauveya Yeisu Keliso yana nuwadogeya gina lemelememi ke aluwaluwamiya wana lulutovonina.