1 E aku imi biyabiyama, imiyavo bademowa taumiyavo waawaegemi Kauveya wagaine faina, inamiyavo ke tamamiyavo wana matawalewaleyedi. Taidei dewa-nai gilubodami.†Kol 3:20 2-3 Ada “inamiyavo ke tamamiyavo wana vemoimoinedi, e ada wanamiya iwakana ke wayawaimiyavo wana miyamiya tova manamanawena babi wagaine.” †Iyeg 20:12, 2Vei 5:16 Yaubada yana veimeya teni wagaidiya, taidei veimeya-nai nagona wa anavonadabadaba nodi.

4 Imi tamadiyavo, keke natumiyavo wana kikivenuwakoyodi aenanai wana iveagougadi.†Kol 3:21 Aku aiyada wana itaveyabidi ke wana vonavona asevatudi, ada wa yami nuwakabubu wana kivetuvetunudi Kauveya Yeisu yana nuwanuwa anafaiweya.†Vona 22:6

5 Aku imi togugai yogoyogomiyavo, amitoveimeyamomo babi taidei wagaine ani wa yami matauta ke wa yami vetatava nodi wana matawalewaleyedi aseasemi matatabuna wagaine. Badi wana idibumwaigedi aku wana nuwaududuna, velemoena Keliso faine wafaifaisewa ada Banae Tauna wadibumwaigena. 6 Keke wanavona, “Akutoveimeya giitaitaku faina, gana idibudibumwaiga e ada banae gina awaveiwakaneku.” Aku velemoena tova-nai amitoveimeya keke ida itaitami, ani wa yami nuwaawaega wana faifaisewa. Faina imi bademowa wavetogugai yogoyogona Keliso faine, ada keke anafaiweya badi nuwanuwadi kaliva ina itadi ke ina awadavadavadi, aku wa yami aseawaega nodi wana gugai gavana Yaubada yana nuwanuwa anafaiweya.†Kol 3:22-25, Tai 2:9-10 7 Wa yami vemwamwala wana gugugai vaita anafaiweya Keliso faine aku keke kaliva faidiya. 8 Taidei anafaiweya wana gugai, faina waalamanena velemoena vaita Kauveya Yeisu aimo kaliva seyana seyana gina fatana gugai iwakana gigugaiyena faina.†Mad 16:27 Kai bana togugai yogoyogona o kai keke togugai yogoyogona, aku au gina fatadi.

9 E aku imi toveimeyayavo, ani kaduwe anafaiweya wanadewa iwakana yami togugaiyavo wagaidiya. Keke wana awavematausidi, faina badiyavo ke imiyavo nodi amiToveimeya anakaibe-mowa gabameya waalamanena, ada Banae keke kaliva gida vevenuwadadanedi adiyegana wagaine ke gida luluvisi.†Kol 4:1

10 Tubuiyakuweyavo, kadu yaku vona seya-moena. Imiyavo Kauveya wana miyalabilabinena velemoena ke wana awaegemi Banae wagaine, e ada yana toyogina lakai-vagaina wagaine gina kivetoyogimi. 11 Yaubada yana lokoloko gaviya matatabuna wana osedi, e ada amifaiweya wana mididi toyogina tova-nai Seitani wa yana nuwauya gifwayafwayami ke gigaluvaluva gina daimi gina vebeumi. E ada keke anafata gina nuvuyoyemi.†Iyem 4:7, 1Pi 5:8-9 12 Gilubodami gaviya analokoloko wana osedi, faina keke kaliva-mowa nodi kada lulugaviya, keke. Aku aiyada ide kalulugaviya badi aluwaluwa bwanebwanenedi yadi kaiwabu koyodiyavo nodi, badi yadi totoyogina wa yadi veimeya koyodiyavo nodi, badiyavo ani babi taidei anayuyuvana anatoveimeya, ada kaduwe aditoveimeya koyodiyavo iveiveimeya mwatugu nefanine. 13 Tainei faina, Yaubada yana lokoloko gaviya givelemi†2Kol 10:4 ani matatabuna wana osedi. E ada tova koyona gina yegemona wagaine, imi amifaiweya wana midimididi toyogina. Ada wana lugaviya ginaunau analaba gaviya wana luyabuna, aku aimo wa yami toyogina nodi wana midimididi. 14 E ada wana mididi toyogina. Yaubada yana lokoloko-dina gaviya ani taidei anafaiweya. Vona velemoena vaita beleta anafaiweya dobomiya wana yogodonena, ada dewa yegayegana vaita manawa anasebabala anafaiweya manawamiya wana osena. 15 Kaduwe taumiyavo wana kidewedewemi Yeisu yana kukuya anavaleya iwakana wagaine,†Ais 52:7, Lom 10:15 vaita ageyafayafa wana osedi ke agemi gina babalina. 16 Ada tova moyaina yami vetumagana anaveve wana abidonena e ada amifaiweya kaliva-nai koyona, banae Seitani, yana giyo alaalaidi ani matatabuna wana vetomunumunudi. 17 Ada amikibababala Keliso givelemi ani wana vaina ke vaita gaviya anakedukedu anafaiweya kuluwamiya wanasena ke kuluwami gina babalina. Kaduwe anafaiweya Aluwaluwa Tabuna anabenisi manimaninina wana abina, taidei Yaubada yana vona wagaideya.†Ibel 4:12 18 Taidei gaitoma-dina wana vaidi, ada kaduwe tova moyaina veola tulina tulina wana inainanadi Yaubada wagaine Aluwaluwa Tabuna givewavewalemi mamauwe.†Luk 18:1 Yami veoveola-dina wagaidiya wana itaita ke wana kidewadewa, ada keke wana kabekabebe aku tova moyaina wa yami atuvefaila nodi wana veoveola Yaubada wagaine yana kalivayavo matatabudi faidiya. 19 Ada kaduwe wana veoveola Iya faikuya e ada kai gana ifuifufu, aga Yaubada vona gina veleku ke wa yaku asevatu kibababala anavaleya iwakana tuwaina-deya sewasewavuyena ani gana awamogatalena.†Kol 4:3-4 20 Yaubada giimiliku Iya yana toawatalatalaina taidei valeya-nai gana lulumamalena faina, ada taidei faina Iya malinai yogoyogoku deliya gamiyamiya. E ada wana veoveola faikuya ke wa yaku asevatu gana ifuifufu akulauboda anafaiweya.

21 Tubuiyakuweyavo, nuwanuwaku akuvaleya wana alamanena, ada taidei faina tubuiya aseasema banae Tikiko†Gug 20:4, Kol 4:7-8, 2Tim 4:12 gaimiimilina wagaimiya. Banae togugai iwakana ke vevevilagina Kauveya Yeisu yana gugai wagaine. Ada gaitoma matatabuna gina awatalatalaina wagaimiya ke Iya faikuya wana alamanena, akulutovona ke gavadi gafaifaisewa. 22 Taidei vuvuna-nai faine banae gaimilina wagaimiya e ada wana alamanena gavaiyamu yama miya, ada kaduwe aseasemi gina kiveasevatudi.

23 Yaubada Tamada ke yada Kauveya Yeisu Keliso imi tubuiyameyavo nuwaniwalova ina velemi, ada kaduwe ina lememi wana venuwanuwakabubu seyana seyana ke yami vetumagana ina kivetoyogidi. 24 Ada kaduwe imiyavo ke badi gavega nodi yami nuwakabubu wasevelavelalaina yada Kauveya Yeisu Keliso wagaine,†1Pi 1:8 ani Yaubada yana nuwadogeya gina lemelememi. Ika anafaiweya.