Filipai Tovetumagana Yadi Leta Paulo Givetokilumina
Kivemala
Filipai ani melala kuyakuya Kini Filipi anavelu givewagana tauna anayeganeya, ada gimiyamiya Masedoniya anafafali wagaine. Tuwaina Paulo yana balawalilivuga anavelu wagaine ginau Filipai, ada wadedeku valeya iwakana gimadu lumamalena, e ada yadi ekalesiya givevuvuna. (Gugai 16:12-40) Ada badi Filipai tovetumagana ani keke kaikaiwabudiyavo velemoena, aku bademowa tova gavaiyei yadi velekavovo isedi Paulo faine kaduwe tovetumagana moyamoyakadiyavo faidiya, badi Yelusalema wagaine imiyamiya.
Paulo deliya gimiyamiya nonogana givemwamwala, kaduwe nuwanuwana meFilipai adivita wagaidiya ina vemwamwala. Taidei faina Paulo giluwageyedi ke wa yadi atuvefaila ina miyamiya. Kaduwe, tovewala fwayafwaya faidiya givonamatawedi.
Vona vesiule. (1:1-11)
Paulo deli wagaine gimiyamiya aku aimo valeya iwakana giakwalelega kaliva moyaidi wagaidiya. (1:12-26)
Gavadewa tovetumagana gilubodadi. (1:27 - 2:18)
Paulo anatoleme Timoti ke Epafolodaito faidiya. (2:19-30)
Yada vetumagana wagaine kana yegayegana Yaubada matane. (3:1-21)
Wa yada atuvefaila kana mididi toyogina. (4:1-9)
MeFilipai yadi leme faina Paulo givona vesiule. (4:10-20)
Paulo yana vetalakafoi. (4:21-23)
1
1 Iya Paulo ke Timoti nodi, Yeisu Keliso yana togugaiyavo.†Gug 16:1 Yama vesiule moyaimi Yaubada yana yoo tabutabumiyavo wagaimiya Filipai†Gug 16:12 wagaine, imi Yeisu Keliso nodi waveseyana. Imiyavo ada kaduwe yami tonagona lakaidiyavo ke dikoniyavo ani leta taidei avetokilumina wagaimiya. 2 Yaubada Tamada ke yada Kauveya Yeisu Keliso yadi nuwadogeya ina lemelememi ada kaduwe aseasemi ina kikiveniwalovidi.
Paulo givona vesiule meFilipai yadi vetubuiyana banae wagaine faina.
3 Keke gavana faina aku tova tova ganuwenuwemi wagaine, gavesivesiule Yaubada wagaine faimiya. 4-5 Imiyavo Yeisu anavaleya iwakana wamadu vetumaganena aku gielai tova malinai ani Iya imi nodi kagugai valeya-nai faine. Taidei faina tova moyaina yaku veoveola seyana seyana wagaidiya ani wa yaku vemwamwala gaveoveola moyaimi faimiya. 6 Ada gaalamanena velemoena vaita Yaubada Banae yana gugai iwakana wagaimiya bade givevuvuna ani keke gina ilova,†Fip 2:13 aku gina nauwena-deya yadayada-nai Yeisu Keliso ginayewa-vagilena, e ayo gugai-nai gina luyabuna. 7 Tova moyaina gatalatalanuwaiyemi, e ada gilubodana taidei anafaiweya gana nuwanuwa imi faimiya. Faina imi moyaimi Iya nodi Yaubada yana nuwadoga wagaine kamiyamiya ke yaku gugai giveleku ani nodi kafaifaisewa wagaine. Malinai gamiyamiya deli wagaine aku imi walemelemeku, ada kaduwe muliya-yo galuku ada kaliva gakikivemalidi valeya iwakana anavelemoena faina ani wadedeku kaduwe imi walemeku. 8 Yaubada gialamaneku ada Banae yaku vona gina awavelemoenayena. Yeisu Keliso ginuwakabubuyemi anafaiweya, Iya kaduwe ganuwakabubuyemi. Taine faina gatalatalanuwaiyemi.
9 Ada taidei anafaiweya gaveoveola Yaubada wagaine faimiya, vaita Banae gina kivemeyameyaganina faimiya ke wana itanuwagana gavaiyamu Tauna ada kaliva wana nuwakabubuyedi, e ada yami nuwakabubu gina tubutubuga ada gina maga gina aiwaiwana. E ada imi wana alamanena Yaubada yana vona velemoena ke amifaiweya wana venuwadadana gavana tunutunugina.†Kol 1:9-10 10-11 Taidei anafaiweya gaveoveola e ada imiyavo amifaiweya wana itainanana gavana velemoena iwakana ada nuwanuwa velemoena, e ada wana awaveiwakanena ke wana kiabina. Kaduwe imi yegayegamiyavo wana miyamiya Yaubada matane e ada keke tamo gavakoyona ayo Bana gina awavekoyoyemi. Faina Yeisu Keliso Bana gikiveyegayeganemi e ada yami dewa wagaine guwa iwakadi moyai-vagaina iyegeyegemona. E ada wana miyamiya anafaiweya ada aimo gina naunau analaba Keliso yana yadayada-nai gina yegemona. Ada kaliva ina itami wagaine, Yaubada anayegana ina kilakaina ke ina awadavadavana.
Paulo deli wagaine gimiyamiya aku aimo valeya iwakana giakwalelega kaliva moyaidi wagaidiya.
12 Aku tubuiyakuweyavo, nuwanuwaku nuwami gina malina vaita uloulolo-dina iyegemona wagaikuya ani keke valeya iwakana yana mutula ida awata, aku aiyada akuvita-dina faidiya kaliva ikaiyanogala ada taidei wagaine Yeisu Keliso anavaleya iwakana inogalina. E ada valeya iwakana velemoena gimutumutula. 13 Valeya iwakana yana mutula ani taidei anafaiweya. Iya Keliso yana tonogala faina, seini wagaine iyogoku ke iseku deli wagaine. Ada badi tolugaviya Loma anatoveimeya lakaina yana manuwa lakaina iitaitaveyabina ke mali kaliva moyaidi ani ialamanena Iya gamiyamiya anafaiweya. 14 Ada kaduwe tovetumagana moyaidi idedeku ani ialamanena Iya yogoyogoku, ada taidei wagaine yadi vetumagana Kauveya gikikivetoyogidi. E ada wa yadi asevatu Yaubada yana vona iifuifufuyena aku keke ida matamatauta kiveuloulolona wagaidiya.
15-17 Biyavo-dina ilulumamala Keliso faine ani tufodi iitaitadi kaliva moyaidi ivanevanenegeku ada Iya akuvemoimoina ani taudiyavo faidiya nuwanuwadi, e ada agodi giugauga wagaikuya ke igavekwavekwageya faikuya. Badi yadi nuwanuwa sidamana wagaine, inuwanuwa vaita kaliva-dina nagona Iya ivanevanenegeku ani ina vaidi wagaikuya-deya, e ada akumuliya ina segena aku badi ina muliyedi. E au Iya gana itanuwagana ke gana nuwavita lakaina idedeku yogoyogoku gamiyamiya. Aku tufodi tolaumamala ani yadi nuwanuwa isena iwakadi. Badi tonuwakabubu, ada ialamanena vaita Yaubada yaku gugai giveleku ke kaliva gana kikivemalidi Yeisu anavaleya iwakana faina. 18 Aku wada keke tamo gavana. Kai badi ilulumamala Keliso faine nuwanuwa koyona wagaine o kai nuwanuwa tunutunugina wagaine, yadi nuwanuwa-nai vuvuna ani keke gaitoma lakaina. Aku gavana gaitoma lakaina ani Keliso iawamogatalena, ada taidei faina Iya gavemwamwala. Ada aimo kaduwe gana vemwamwala-mowa, 19 faina gaalamanena yami veoveola wagaidiya ada kaduwe Aluwaluwa Tabuna Yeisu Keliso giveleda ani yana lemeya akuetoyavuga gana nuwagana.†2Kol 1:10-11 20 Tova tuwaina wagaine gamididi toyogina ani kadu anafaiweya malinai, ada ganuwavetumagana vaita aimo gana mididi toyogina Keliso anavetumagana wagaine. E ada taide vita-dina iyegeyegemona wagaikuya ani keke ida toyogisegeku e ada gadadewa koyona tamo wai wagaine ada gada vovomumu,†1Pi 4:16 keke. Aku aiyada wa yaku asevatu Keliso anayegana gana kikilakaina yaku dewa moyaina wagaidiya, e, kai wayawaiku wagaine o kai yaku alika wagaine.†Lom 14:8 21 Faina Iya wagaikuya ani idedeku babiya yawaiku yana ebamididi ani Keliso, ada tauku gaawaege-yabuku Banae wagaine. Ada kai gana alika aga wada iwaka-vagaina wagaikuya, faina Iya Banae nodi gabameya anamiya. 22 Aku kai aimo taidei vovoku-nai wagaine gana miyamiya, aga yaku gugai Keliso faine ani wa guwana. Kai wayawaiku gana miyamiya tainei gilubodana, aku kai gana alika aga kaduwe gilubodana. E ada gavana analauboda gada venuwadadane ani keke gada alamane. 23 Taidei nuwanuwa-dina iluwei nuwaku isigadagadana. Nuwanuwaku lakaina babi taidei gana miyasegena aku ganana Keliso nodi anamiya, wada iwaka-vagaina wagaikuya. 24 Aku kaduwe, imiyavo amilauboda-mowa gada lemelememi. E ada kai aimo babi wagaine gana miyamiya, aga akufaiweya gana gugaiyena.†2Kol 5:8 25 Ada taidei ganuwaveyalaina faina, gaalamanena wa vovoku gana miyamiya. E, idedeku babiya Iya aimo imi nodi kana miyamiya ke yaku lemeya yami vetumagana gina kumaga ke gina tabotabo, e ada wana vemwamwala. 26 Ada aimo ganaelai wagaimiya anatoveya, wana gakaikai-mowa ada Yeisu Keliso anayegana wana kilakaina.
Gavadewa tovetumagana gilubodadi.
27 Aku gavana wagaikuya gina yegemona, wada gaitoma kabisona. Aku gaitoma lakaina ani yami dewa wana itaveyabina ke gina veaigaigabu Keliso anavaleya iwakana analauboda.†Efes 4:1 E ada kai ganaela gana madubodami o kai atuwadeya valeyami gagana gana nogalina, aga gana alamanena vaita wamidimididi toyogina ada yami nuwanuwa seyana wagaine wavedivediwe toyogina valeya iwakana anavetumagana faina. 28 Ada keke maita wana matamatauta badi gavega ivenibainemi Keliso wavetumaganena faina. Kai taidei anafaiweya keke-mowa wana matausedi, au taide yadi iyaiyaya givevewaledi vaita imi watoyogisegedi aku badi bade ikabekabebena. E ada badi agolaufofola ina nuwagana aku imiyavo ani watoyogisegedi ke amikibababala wana nuwagana. Banae Yaubada ani tainei gina seyegemonena. 29 Faina Yaubada Keliso faine ani yana nuwadogeya giawaegemi ke imi Banae wagaine wana vetumagana. Aku keke vaita giawaegemi ke wana vetumagane gaga, aku kaduwe uloulolo wana waiwaina Banae faine.†Gug 5:41 30 Tuwaina yaku vediwe ke akuloulolo waitana galutovonina,†Gug 16:19-40, 1Tes 2:2 ada malinai wakaiyanogala vaita Iya aimo galulutovonina mamauwe, ani imi anafaiweya kaduwe walutovonina. E, yada vediwe ke yada uloulolo Keliso faine au seyana.