Kolinita Tovetumagana Yadi Leta Anavelu Paulo Givetokilumina
Kivemala
Paulo yana balawalilivuga anaveto wagaine ginau Efeso gimiyamiya ada meKolinita yadi leta nagona givetokilumina. Badi yadi ekalesiya wagaine vita tufodi iyegemona, ada kaliva tufodi wa yadi nuwalaka taudiyavo ikaikaiyedi. Ada yadi leta-nai bademowa inuwagana aku aimo wa yadi nuwalaka taudiyavo ikaikaiyedi. Taidei faine Paulo gina gimadubodadi ada kadu giyewa Efeso. Ada yana maduboda-nai wagaine Paulo ada meKolinita taudiyavo ivenuwanuwakoyo.
E ada aimo kadu leta seyana givetokilumi giimili ginau ada givona toyogina wagaidiya gina kivetuvetunudi faine. Taine leta-nai anavelu meKolinita wagaidiya ani bademowa tova tuwaina wagaine gibwavi, aku Paulo leta-nai giinanana 2:3, 4, 9, ada 7:8-12 wagaine. Ada aimo Paulo gikaiyanogala vaita tovetumagana moyaidi Kolinita wagaine ivemwamwala Paulo faine, aku tufodi ani iawalavena. Kaduwe tovewalamomo tufodi ielai Kolinita ada ivonavona vaita Paulo banae keke afositolo aku badiyavo ani afositolo velemoena. E ada Paulo leta taidei giimilina Kolinita. Tauna yana dewa ke yana faisewa faidiya giifufu ada kaduwe yana nuwakabubu meKolinita faidiya. Ada givona vaita muliya-yo ginana gina madubodadi, nagona ida nuwaviladi yadi dewa koyodi wagaidiya.
Paulo gikivemala yana dewa ke yana veafositolo anavegugai faidiya. (1:1 – 7:16)
Luvekeli tovetumagana Yelusalema wagaine faidiya. (8:1 – 9:15)
Paulo yana veafositolo anaveimeya giawabababalina. (10:1 - 12:10)
Paulo ginuwanuwa toyogina tovetumaganayavo faidiya. (12:11-21)
Paulo giluwageyedi yadi dewa ina vuvugidi ke ina itavenuwadadanedi. (13:1-10)
Lauwage tulina tulina ke vetalakafoi. (13:11-14)
1
1 Iya Paulo. Yaubada yana nuwanuwa wagaine gidouweku ke giseku ada gaveafositolo Yeisu Keliso faine. Iyayeku ada tubuiyada Timoti nodi yama vesiule wagaimiya. Imi Yaubada yana yoo tabutabumiyavo Kolinita yana ekalesiya wagaine ada kaduwe Akaiya anafafali matatabuna wagaine, ani leta taidei moyaimi nodi faimiya. 2 Yaubada Tamada ke yada Kauveya Yeisu Keliso yadi nuwadogeya ina lemelememi, ada kaduwe aseasemi ina kikiveniwalovidi.
Yaubada yana yoo ani wa adiuloulolo faina, nuwanuwana nuwadi gina kiveiwakanedi.
3 Keke tamo gavana aku Yaubada kana davadavana, Banae ani yada Kauveya Yeisu Keliso Tamana. Banae nuwakalikali vuvuna ada tova moyaina nuwada gikiveiwakanedi. 4 Banae Yaubada giitaitada adauloulolo moyaina wagaidiya ada nuwada gikiveiwakanedi, e ada ide adafaiweya nuwada iwakana-nai wagaine badi gavega vita tulina tulina inuwanuwagadi, ani kana lemedi ke nuwadi kana kiveiwakanedi. 5 Faina Keliso uloulolo lakaina ginuwagana, e ada ide anauloulolo-nai kanuwanuwagana. Aku kaduwe anafaiweya Yaubada Keliso nuwana gikiveiwakanena, ada ide Keliso nodi kaveseyana ani Yaubada nuwada gikiveiwakanedi. 6 Ada gavatoveya ime uloulolo ana lutovonidi, alamana avaivaina gavaiyamu nuwami ana kiveiwakanedi tova-nai uloulolo-dina imi wana lutovonidi. E ada wana vevekaliva, kaliva-dina Yaubada yana nuwanuwa anafaiweya. Ada gavatoveya Yaubada ime gina kivetoyogima amauloulolo wagaidiya, e ani imi kaduwe gikivetoyogimi, e ada wana mididi toyogina ke vita wana waina ime anafaiweya. 7 Ime auloulolo anafaiweya, kadu imiyavo wauloulolo. Ada kaduwe ime Yaubada nuwama gikiveiwakanedi anafaiweya, imi kadu nuwami gina kiveiwakanedi. Taidei faina anuwaveyalaina wa yami atuvefaila yami vetumagana gina naunau.
8 Tubuiyameyavo, nuwanuwama wana alamanena vita gavatubuga auloloyedi Eisiya anafafali wagaine.†Gug 19:23, 1Kol 15:30-32 Vita-dina ani lakai-moedi ke vita-moedi, ayo ime taumeyavo yama toyogina anafaiweya. E ada velemoena anuwanuwa vaita kabisona yawaima ana nusegena. 9 Ime alutovonina velemoena ani anafaiweya kaliva gilutovonina tova-nai banae ginogalina tovevonayavuga givona, “Iya gavona una alika.” E aku Yaubada giawaegema ana nuwanuwa vaita ana alika, faina keke nuwanuwana ana tunutunuvala taumeyavo yama toyogina wagaine, aku Bana Tauna wagaine ana tunutunuvala, Banae toalika gisisiveyawadi. 10-11 Ada auwe ime ebagilagi koyo-moena lilivane amiyamiya ada kabiso-moena ada alika, aku Yaubada gikibababalema. Ada tova ke tova aimo gina kibababalema.†2Tim 4:18 Faina Banae wagaine anuwavetumagana e ani aimo kai imi moyaimi wana lemelemema yami veoveola wagaidiya, aga kaduwe yana kibababala gina naunauwena ime faimeya. E ada kaliva moyaidi ina itana ada ina vesiule-mowa Yaubada wagaine faimeya. Faina taine yadi veola-nai wagaine ada Banae yana nuwadogeya gina lemema.
Paulo meKolinita gimatawedi gavana yana vuvu-yo keke gidana gida madubodadi.
12 Aku ime agakaikai seyana gaitoma faine ani taide anafaiweya. Ime nuwafoumeya alutovonina vaita yama dewa adewadewayena babi taidei wagaine, ani keke kaliva-mowa yadi nuwauya anafaiweya adadewa, keke. Aku Yaubada yana nuwadoga wagaine aluveyabina ada yana nuwanuwa amulumuliyena. E ada keke ada vefwayafwaya aku wa yama nuwanuwa yegayegana nodi aifuifufuyena vona velemoena.†2Kol 2:17 Aku imi matamiya ani velemoena anafaiweya. 13-14 Waitana, yama leta moyaina wagaidiya ime keke adialamana sewasewavuyena ada vetokilumi, aku tova moyaina avetokilumidi mamalina e ada wana alamane matatabuyena. Tova taidei ani yama dewa vuvuna keke wada alamane-dewedewe, aku anuwavetumagana aimo moyaimi wana alamane-yabuna. E ada tova-nai Kauveya Yeisu yana yewa wagaine, ime ana gakaikai imi faimiya anafaiweya, kadu imi wana gakaikai ime faimeya.
15-16 E ada wa yaku nuwaveyalaina anafaiweya, gaveimeya vaita nagona gana madubodami yakuna Masedoniya anafafali wagaine, e ada yaku yewa-vagila wagaine kaduwe gada yewaelai wagaimiya. Taidei wagaine Iya akufata gada lememi maita-moena ada yakuna Yudiya anafafali faine gavana tamo akulema nodi wada imiliku. 17 Taidei anafaiweya ganuwanuwa evona gana gugai faina, gavona, “Iya nagona gananau meKolinita wagaidiya,” aku keke gadaela. E ada gavaiyamu wanuwanuwa? Vaita gada veyatayata? Badi gavega taudiyavo gaga faidiya inuwanuwa ani yadi veimeya faidiya kai inavona, “Ika, velemoena gana faisewana,” aku velemoena inuwanuwa, ani “Keke, Iya keke gana faisewa.” Aku Iyayeku ani keke anafaiweya gada dewadewa. 18 Ida velemoena, Yaubada keke gida nuwanuwa iluwei aku tova moyaina gavana ginavona aga gina gugaiyena. Ada anafaiweya, Iya keke-mowa gadavona, “Ika, Iya tainei gana faisewana,” aku gada nuwanuwa, “Keke.” 19 Faina Yaubada Natuna Yeisu Keliso keke-mowa gidavona, “Ika” aku nuwane gida nuwanuwa, “Keke”, aku yana nuwanuwa yana vona nodi seyana “Ika”. Banae-nai amimwatuguya alumamalena, Iyayeku ada Sailasi ke Timoti nodi.†Gug 18:5 20 Ime aalamanena vaita ida vona velemoena, faina Yaubada yana vonadabadaba matatabudi adiawavelemoena iyegemona velemoena Yeisu Keliso wagaine. Taidei vuvuna Yaubada kadavadavana kavonavona, “Ika, anafaiweya!” ada Banae wa yana iwakana mamalina kakilakaina. 21 Ada Banae Yaubada-nai ani imiyavo ke imeyavo gikidoneda yada veseyana Keliso nodi, ada givenuwadadaneda yana faisewa kana gugaiyena ke gitoyogiveleda faisewa-nai faine. 22 Ada Tauna Banae yana talakili gisena ide wagaideya ke gina vewala vaita ideyavo ani Tauna yana kaliva velemoena. Taidei talakili-nai ani Aluwaluwana giveleda, Bana yana nuwakabubu nago-moena wagaideya, yana vonadabadaba anaiyaiyaya, vaita gava nuwakabubu moyaidi givonadabadabayedi ani badi aimo kaduwe gina veleda.†Efes 1:13-14
23 E aku Yaubada Tauna ani akutoitavedama vaita gavonavona velemoena wagaimiya ada keke gada vefwayafwaya. Yaku yewa wagaine ganuwanuwa yami dewa koyona faidiya e ada keke nuwanuwaku yaku kivetuvetunu wagaine kadu uloulolo gana velemi, ada taidei vuvuna-nai faine keke gadayewa gada madubodami Kolinita wagaine. 24 Keke vaita ime amitoveimeyayavo ke ana veimeya-tagotagomi anavona, “Taidei anafaiweya wana vetumagana.” Keke. Iya gaalamanena yami vetumagana wagaine bademowa wamidimididi toyogina. Aku imeyavo imi nodi kafaifaisewa seyana yami vemwamwala faine.