1 Tova-nai gamadubodami ani yami dewa faidiya gavona wagaimiya, ada ida vitana wagaimiya. E ada taidei tauku gavenuwadadanena, vaita Iya keke kaduwe wa yaku nuwavita gana madubodami ada aseasemi gana kiveuloulolodi. 2 Imiyavo-mina ani wakivemwamwaliku. E ada kai Iya tauku gana kivenuwavitami yaku kivetunu wagaidiya, aga gavega imiyamiya ayo ina kivemwamwaliku? 3 E ada Iya keke gadaela gada madubodami, aku tainei tova-nai wagaine leta gaimilina wagaimiya. Iya gavetokilumina ke wana alamanena gavana wadagai yami dewa tufodi faidiya, e ada tova-nai ganaela gana madubodami, keke wana kivenuwavitaku aku yami dewa bademowa wakivetununa faina, gana vemwamwala. Ganuwaveyalaina vaita matatabumi yaku kivetunu wana muliyena, e ada yaku vemwamwala wagaine imi kaduwe wana vemwamwala. 4 Tova-nai yami leta gavetokilumina, wa yaku nuwavita ada wa yaku aseuloulolo lakaina gamiyamiya e ada wa matailuku gavetokiluma. Yaku vetokiluma vuvuna ani keke vaita gana kivenuwavitami, keke, aku aiyada ani yaku nuwakabubu anatubuga wagaimiya wana alamanena.†2Kol 7:8-9

5 Aku bana kaliva-nai moyaida gikivenuwavitada ani kada nuwanuwayena. Banae yana dewa koyona wagaine aseuloulolo gikiveyegemonina,†1Kol 5:1 ada banae imi yami yoo anakaliva faina, anaita imi kadu matatabumi gikiveaseuloulolonimi, keke Iyayeku gagana. Aku keke nuwanuwaku ganavona toyogi-vagaina wagaimiya. 6 Tufona moyaimi waawaegau analauboda anafaiweya ada anamatavuloga wavelena, aku malinai bademowa yana dewa-nai koyona gisegena. E ada auwe, matavuloga-nai anafata. 7 E ada vematavuloga wanasena aku aiyada yana koyona wada venuwaegena ada nuwana wana kiveiwakanena, e ada nuwavita keke bana gina toyogisege. 8 Tayuwe vuvu-dina faidiya gavonavagadonemi ke yami nuwakabubu velemoena kaduwe wana seyegemonena banae wagaine. 9 Yami leta ani bana anakivetunu faina gavetokilumina e ada gana galuvaluvami. Nuwanuwaku gana itana kai bonaku wana nogalina gaitoma moyaina wagaine o kai keke. Ada imi wagugai tunutunugina. 10 Kai gaito seyana yana koyona wavenuwaegena, Iya kaduwe tauku gavenuwaegena. Gavadewa koyona analauboda kada venuwaegena, ani bademowa gavenuwaegena. Iya gadewa anafaiweya Keliso matane imi amilema faina. 11 Seitani nuwanuwana tova moyaina koyona gina kiveyegemonidi, ani kaalamanena. Ada taidei faina gilubodana tokoyona bademowa yadi dewa koyona ivedomobubusedi, ani yadi koyona kana venuwaegedi. Taidei yada venuwaege wagaine, Seitani**Seitani ani dimoniyavo aditonagona. Nagona banae gimiyamiya iwakana gabameya Yaubada ada anelose nodi, aku aimo Yaubada yana veimeya adimuliya gidibusoyogedi e ada Yaubada giveyegemonina gabameya. Ada malinai tova moyaina kaliva babiya gialadibidibiyedi ke gikikivekoyodi. Banae anayegana ani kaduwe Biyelisibubi, toveloi-kavokavovo, tovenibaina, ada toetoluvaluva. keke wa yana nuwauya gina vetowainagona wagaideya ke yada miya-tamwai gina kivekoyo.

12 E aku nagona yaku naudadana wagaine, ganau melala lakaina Tolowasi gana lumamala valeya iwakana Yeisu Keliso faine, ada ganuwagana vaita Kauveya Yeisu wana giyavuna faikuya yana gugai faine, ada kaliva moyaidi bonaku inogalina. 13 Taidei anafaiweya gaitanuwagana, aku tubuiyada Taito aimo keke gidaela ada gavenuwana bana faine. E ada tovetumagana gavetalakafoiyedi aku gana gayegemona Masedoniya anafafali wagaine.**Una itana 7:5-6, wadedeku Taito yana ela Paulo giifufuyena.

14 E aku kana vesiule Yaubada wagaine.**Paulo ginuwagana Taito Masedoniya-deya ada yana awatalatalaina iwakana ginogalina meKolinita tovetumagana faidiya, e ada taidei maita-nai wagaine banae Yaubada giawadavadavana. Tuwaina tova-nai Loma tonagona givetoyogina gaviya lakaina wagaine, ani yana tolugaviya ada gavega ivaidi yogoyogodi ani gina nagoyedi yana yoo matadiya ke yana vetoyogina gina vewalena. Ada taidei anafaiweya ime amiyaluveyabina Keliso wagaine. Yaubada ginagonagoyema, ke tova moyaina Banae yana toyogina wagaine Seitani atoyogisegena. Ada kaduwe Yaubada giseyegemonena Keliso anaalamana ime wagaimeya fafali seyana seyana wagaidiya, alamana-nai anafaiweya magamaga iwakana. 15 Yeisu Keliso yana vebolavoi kelose wagaine, ani Yaubada matane vaita magamaga iwakana anafaiweya, kaduwe Yaubada matane yama gugai Keliso faine ani vaita magamaga iwakana anafaiweya. Taidei magana-nai iwakana giakwalelega badi gavega kibababala anawai wagaine inaunau, ada kaduwe giakwalelega badi gavega alika anawai wagaine inaunau.**Vona-nai ‘alika anawai’ ananuwanuwa ani badi gavega keke taudiyavo ida awaegedi Yaubada wagaine e ada keke Yaubada nodi ina miyamiya-vagata aku luludakadi Banae wagaine-deya ina miyami. 16 Badi alika anawai wagaine inaunau, ani wagaidiya Keliso anamagamaga vaita didikula analada magana anafaiweya. Aku badi kibababala anawaiya inaunau, ani magamaga-nai vaita yawai-vagata anamagamaga. Aku faisewa-nai anavita, ani gaito anafata tauna yana toyogina wagaine ginawai? Keke tamo gaito. 17 Kaliva tufodi Yaubada yana vona ilulumamalena ani inuwanuwa ivona, “Ida gaitoma-kavokavovo, aku au ana lulumamalena ke mani lakaina ana nuwagana.” Aku ime keke anafaiweya adadewa. Keliso nodi aveseyana, ada Yaubada Tauna givenuwadadanema yama faisewa faine. E ada Yaubada matane wa yama aseawaega avonavona kaliva wagaidiya.