15
Keliso yana yawa-vagila faina.
1 Tubuiyakuweyavo, nuwanuwaku nuwami gana talamutuna tainei Keliso anavaleya iwakana nagona galumamalena wagaimiya faine. Tainei valeya-nai wavaina ke taumiyavo waawaegemi wagaine ada bana wagaine wamidimididi toyogina, 2 ada kaduwe valeya-nai ani Yaubada yana kibababala anawai faimiya. Aku ifufu-nai galumamalena wagaimiya ani wana kidonena. Keke iwakana wanasege aenanai Keliso wavetumagane kavovona.
3 Vewala matatabuna Yaubada giveleku wagaidiya, ani vewala seyana lakai-moena gavele vedamana wagaimiya, tainei Keliso gialika yada koyona faina Buki Tabu givonayena anafaiweya.†Ais 53:8-9 4 Ada didikula luwa wagaine isena, aku yadayada anaveto wagaine Yaubada gisiveyawana alikeya.†Luk 24:46, Gug 2:24-32 Buki Tabu givonayena anafaiweya.†Sam 16:10, Ais 53:10 5 Giyawa-vagila muline, giyegemona Pita**Pita anayegana vona Giliki wagaine ani Sifasi. wagaine, ada muliya kaduwe giyegemona afositoloyavo adituwelo wagaidiya.†Mak 16:14, Luk 24:34,36, Iyo 20:19,26, Gug 10:41 6 Ada kaduwe seyana tova giyegemona anatovetumaganayavo yoo lakaina wagaidiya, adiyoo faifi analedi (500) wa anavetutamwata anafaiweya. E ani yoo-dina moyai-moedi aimo wayawaidiyavo imiyamiya, aku tufodi bademowa ivealialika. 7 Kadu muliya giyegemona Iyemesa wagaine, ada mali toveya giyegemona yana afositoloyavo matatabudi wagaidiya.†Luk 24:50 8-9 Ada anaebalauyabu-mowa Iya kaduwe wagaikuya giyegemona.†1Kol 9:1 Iya tuwaina ganaunau fafali moyaidi wagaidiya ke Yaubada yana ekalesiya anakalivayavo gakiveuloulolonidi, e ada Iya keke akulauboda ina vewagaku afositolo. Iya anafaiweya bebeta seyana gitubuga, banae yana tova tubuga keke gida nuwaga wagaine gitubuga, e ada afositolo moyaidi wagaidiya-deya Iya keke wa akuyegana. 10 Aku Yaubada yana nuwadogeya ginuwakalikaliyeku e ada gaveafositolo. Ada keke gida nuwakalikaliye-kavovoku aku giveguwa yawaiku wagaine, e ada gafaifaisewa toyogi-moena†Kol 1:29 ayo afositolo velugadiyavo. Aku ida keke vaita tauku yaku toyogineya gada gugai, aku aiyada Yaubada wa yana nuwadoga yana toyogina giveleku ke toyogina-nai wagaine gagugugai.†2Kol 3:5 11 Ada au kai afositolo velugadiyavo ina lumamala wagaimiya o kai Iya gana lumamala, yama laumamala ananuwanuwa au seyana, ada taidei wavetumaganena.
Yaubada Keliso alikeya gisiveyawana, ada kadu tovetumaganayavo alikeya gina siveyawadi.
12 Ime tova moyaina aawatalatalaina avonavona, “Yaubada Keliso gisiveyawana alikeya.” E aku gavaiyamu-yo tufomi wavona kwavakwava vaita keke meyameyaganina toalika inayawa-vagila? 13 Waitana, kai toalika keke velemoena inayawa-vagila, aga kaduwe Yaubada keke Keliso gida siveyawa. 14 Ada kai Yaubada keke Keliso gida siveyawa alikeya, aga yama laumamala ani gaitoma-kavokavovo, kaduwe yami vetumagana Keliso wagaine gaitoma-kavokavovo. 15 Kaduwe kai yami vona ani vona velemoena ada velemoena kaliva keke inayawa-vagila, aga Yaubada kadu keke Keliso gida siveyawa alika wagaine. Ada kai taine anafaiweya, aga imeyavo adavetove toawatalatalaina fwayafwaya Yaubada faine, faina tova moyaina awaawamogatala, avona, “Yaubada Keliso gisiveyawana alikeya.” 16 Faina kai Yaubada keke toalika gina siveyawa alikeya, kaduwe keke Keliso Bana gida siveyawa alika wagaine. 17 Ada kai velemoena Yaubada keke Keliso gida siveyawa, aga yami vetumagana ani keke wa vuvuna ada aimo wa yami koyona wamiyamiya, faina Yaubada keke gida venuwaegedi. 18 Ada kaduwe, kai Yaubada keke Keliso gida siveyawa alikeya, aga badi gavega ivetumagana Keliso wagaine aku bademowa ialika ani bade ikwaa-mowa, keke wa adikibababala. 19 Ide malinai yawaida-nai babiya kamiyamiyanena ani Keliso nodi kaveseyana, ada Banae kanuwavetumaganena vaita yada veseyana-nai aimo gina naunau yawaida-nai yada alika muline. Aku kai keke kada nuwavetumagane vaita yada veseyana-nai aimo gina naunau yada alika muline, aga ide nuwakalikalideyavo velemoena.
20 Aku keke. Faina vona velemoena Yaubada Banae Keliso gisiveyawa-vagilena alikeya, ada tainei faina kaalamanena aimo badi yana kalivayavo ienowavulu alikeya ani kaduwe gina siveyawa-vagiledi. Keliso yana yawa-vagila wai ginagona wagaine,**Bavagu ana aa nagona meIsileli ina vaina ani wada-nai ivelevele-kavovoyena Yaubada wagaine. Ada moyaidi ivelevelena aku inuwanuwa vetumaganena vaita bavagu anamatatabuna aimo kadu gina yegemona. E ada taidei maita-nai wagaine Paulo givonaluvefosau Keliso yana yawa-vagila faine, ada ananuwanuwa ani Banae nagona giyawa-vagila e ada aimo yana yoo anamatatabuna kadu inayawa-vagila. kanuwaveyalaina ide yana kalivayavo yada yawa-vagila wai gina mulina.†1Tes 4:14 21 Waitana, kaliva seyana wagaine alika giyegemona.†Lom 5:12,18 Aku kaduwe anafaiweya, kaliva seyana wagaine yawa-vagila giyegemona.†Iyo 11:25 22 Adama wagaine alika giyegemona, e ada ide tomiyababi matatabu-moeda banae yana tubudelideli ani kaduwe kaalialika. Aku kaduwe anafaiweya, ide gavega taudeyavo kaawaegeda Keliso wagaine ke kadamana yana gabu wagaine kamiyamiya, ani Yaubada Keliso gisiveyawana alikeya anafaiweya, ide kaduwe gina siveyawada. 23 E ada kaliva seyana seyana yana tova yawa-vagila, ani gina yegemona Yaubada gisena anafaiweya. Keliso yana yawa-vagila wai ginagona, aku aimo Keliso yana yooyavo wai ina mulina. E ani Yeisu yana yewa-vagila anatoveya ani badi yana kalivayavo Yaubada gina siveyawadi.†1Tes 4:16-17 24-26 Ada gina sivemididida muline, Keliso gina vebutu gina veimeya, ada gilubodana Banae gina veiveimeya yana ebaveimeya wagaine analaba nibainavo matatabudi gina seobuyedi ke yadi toyogina gina avaina velemoena, toveimeya seyana seyana ada ebaveimeya seyana seyana.†Sam 110:1 Ada anaebalauyabu-mowa Bana nibaina gina luyavulena, anavewaga ‘alika’.†Ive 20:14 Ee, ada yana ebaveimeya gina atuegena Tamana Yaubada wagaine. 27 Tainei faina Buki Tabu wagaine givona, “Gaitoma matatabuna Yaubada gisedi Keliso age yavavane.” †Sam 8:6, Mad 22:44 Aku tova-nai givona, “Gaitoma matatabuna age yavavane” ani bademowa mamalina vaita Yaubada, Banae-nai gaitoma matatabuna gisedi Keliso age yavavane, ani keke Bana kadu Keliso age yavavane gida miyami, keke. 28 Ada aimo tova-nai gaitoma matatabuna Yaubada bademowa gisedi Keliso age yavavane ina miyamiya, e aga Keliso Tauna ginasena Tamana age yavavane, e ada fafali matatabuna wagaidiya Yaubada anakaibe-mowa gina vetoveimeya gaitoma matatabuna wagaidiya.
29 Taidei wana nuwanuwayena. Tubuiyamiyavo tufodi ani bademowa ialika, e ada malinai imi yawayawamiyavo wababibabitaiso badi yadi babitaiso faine. Aku kai aimo kaliva ialika ani keke inayawa-vagila, aga gavana faina taide dewa-nai wafaifaisewa ke toalika faidiya wababibabitaiso? Taidei ani velemoena gaitoma-kavokavovo. E ada taumiyavo yami dewa-nai wagaine wavevewala vaita imi taumiyavo wavetumagana toalika ani inayawa-vagila.**Wada kaliva tufodi adigiduwa-nai wagaine kaliva ibabibabitaiso toalika fatadi faina ani Paulo keke gida awaveiwakane aku yana ifufu wagaine givegugaiyena ke toalika adisiveyawa-vagila anavona velemoena gina kiveyegemonina. 30 Yadayada seyana seyana keke ada velubwaibwaina aku todibusoyoga tova moyaina nuwanuwadi ina luvealikama. Aku kai yama yawa alikeya keke ada nuwenuwe, aga keke-mowa ebagilagi wagaidiya ada awaawaegema. 31 Tubuiyakuweyavo, imi faimiya gagakaikai, faina yaku gugai imi wagaimiya giveguwa e ada imi Keliso nodi waveseyana. Taidei vona velemoena. Ada kaduwe seyana vona velemoena, ani yadayada seyana seyana alika anavelemoena giyegeyegemona wagaikuya.†2Kol 4:10-11, 11:26 32 Idedeku Efeso wagaine Iya kevakeva walawala nodi avemunumunuga.**Paulo kai givonaluvefosau tova-nai Efeso wagaine kaliva tufodi bana nodi ivevonavona Kauveya yana vona faine. Ada badi kaliva-dina inuwakoyo lakaina ke yadi nuwakoyo-nai faine iveanafaiweya kevakeva walawala. (Gug 19:23-41) Aku kai tauku gaga faikuya o kai tauku akuyegana faina nodi ada vemunumunuga, aga gavana anaiwakana wagaikuya? Kai anafaiweya wavonavona ada velemoena toalika keke Yaubada gina siveyawadi, aga au “wa yada vemwamwala kana kanikani ke kana yuyuga, faina malabutu kana alika.” †Ais 22:13, Luk 12:19-20 E, kana alika-vagata. Keke kanayawa-vagila. 33 Aku badi gavega ivonavona anafaiweya, ani keke wana vetumaganedi e ada ina fwayanegenegemi. Faina kai kaliva iwakana ginana kaliva koyodi nodi ina luluveyau, aga badi yadi dewa koyona gina damana banae wagaine, e ada bana yana dewa kadu ginakoyo. 34 Nago-moena yami nuwanuwa ani tunutunugina, aku malinai nuwanuwa koyodi inuvuyoyemi. E ada yami nuwanuwa wana sedewedewedi ada wana vebutu wana nuwanuwa iwakana. Nuwanuwa kwavakwava wanasedi ada yami dewa koyona anavegugai wana ilovau.†Luk 15:17-18, Lom 13:11 Taidei anafaiweya gavona faina tufomi ani aimo keke amifata nuwami ginamali Yaubada faine. Imi gavega wagaimiya gavonavona ani gilubodana wana vovomumu.
Yawa-vagila wagaine vovoda evagudi ani tulina.
35 E aku kai tamo gaito gina tolidadana ginavona, “Gavaiyamu Yaubada toalika gina siveyawadi? Ada gavaiyamu vovodi anaita gina yegemona?” 36 O kwavakwava. Gavana ubakulina ani keke vuvuna gina vegilili ke ginatabo iwakana aku nagona gina alika.†Iyo 12:24 37 Ada gavana una bakulina ani keke aa-moena, keke. Aku aiyada waifei gagana una bakulina. 38 Aku Yaubada waifei gigai gilukabukabu ada lukuna ke guwana vovona anaita givenuwadadanena anafaiweya. E, aa-moena seyana seyana ginakabu anaita tulina tulina.†Eba 1:11 39 Kaduwe gaitoma seyana seyana wayawaidi, ani vovodi keke seyana aku tulina tulina. Ide kaliva vovoda tulina, kevakeva vovodi tulina, manuga vovodi tulina, ada igana vovodi tulina. 40 Kadu anafaiweya gaitoma matatabuna imiyamiya wagaidiya, ani tufodi imiyamiya mwatuguya aku tufodi imiyamiya babiya. Ada gaitoma-dina imiyamiya mwatuguya ani adikaiwabu anaita tulina, ada gaitoma-dina imiyamiya babiya ani adikaiwabu anaita tulina. 41 Tainei anafaiweya kauwana anakaiwabu anaita tulina, vaikoi anakaiwabu anaita tulina, ada ailabama adikaiwabu anaita tulina. Ada kaduwe ailabama ani adiita keke seya-moena, aku seyana seyana anakaiwabu anaita tulina tulina.
42 E, gaitoma matatabuna adiita tulina tulina, ada kadu anafaiweya ani toalika-dina badi aimo Yaubada gina siveyawa-vagiledi. Faina toalika vovona ina tavuna babi wagaine ani gina abudalina, aku taine vovona-nai Yaubada gina siveyawa-vagilena ani wada tulina, keke gida abudali. 43 Toalika vovona anaitavuna wagaine ani keke wa anakaiwabu, aku anasiveyawa wagaine vovona-nai anakaiwabu iwaka-moena. Kaduwe toalika anaitavuna wagaine vovona keke wa yana toyogina, aku anasiveyawa wagaine vovona-nai wa yana toyogina lakaina.†Fip 3:20-21 44 Toalika anaitavuna wagaine vovona ani babi analauboda, aku anasivemididi wagaine, vovona-nai gina yegemona ani yana miyami gabama analauboda. Vovo babi analauboda imiyamiya, ada kadu anafaiweya vovo gabama analauboda imiyamiya. 45 E ada kaduwe anafaiweya Buki Tabu wagaine ivetokilumina, givona,
“Kaliva nago-moena bana Adama ani givekaliva ke yawaina ginuwagana.” †Eba 2:7
Aku Adama wai gimulina ani Bana givealuwaluwa ke yawai givelavelau.†Iyo 5:21, 6:68 Taine Adama-nai ani Yeisu Keliso. 46 Aku vovo gabama analauboda ani kaliva keke ida madunuwaga, aku vovo babi analauboda imadunuwagana. E aku aimo vovo gabama analauboda ina nuwagana. 47 Kaliva-nai nago-moena ani babi wagaine giyegemona. Yaubada babi wagaine gibubuna, ada bana babi anakaliva. Aku kaliva anavelu Banae wagabameya giobuelai.†Iyo 3:31 48 Badi gavega babi anakalivayavo ani anafaiweya banae kaliva nago-moena, babi anakaliva. Aku gavega tomiya gabama ani anafaiweya Banae gabama anakaliva. 49 Banae babi anakaliva anaitaita anafaiweya ani kadu ide adaitaita. Aku kadu anafaiweya aimoina ide adaitaita gina veanafaiweya Banae gabama anakaliva anaitaita.
50 Tubuiyakuweyavo, Iya tunutunugina ganavona wagaimiya ani taide anafaiweya. Vovoda-dina wa vidodi ke wa dayagidi, ani keke adifaiweya ina miyamiya Yaubada yana ebaveimeya gabama wagaine. Faina Yaubada yana ebaveimeya gabameya ada gaitoma moyaina wadedeku, ani keke ida abuabudalidi. Ada gaitoma-dina iabuabudala, ani keke meyameyaganina inana ina miyamiya gaitoma keke abuabudalidi nodi. †Iyo 3:3-6 51 Aku wana nogalina! Nuwanuwa seyana tuwaina-deya sewasewavuyena ani gana awamogatalena wagaimiya. Ide tovetumagana moyaida ani keke kana alika, aku aiyada moyai-moeda Yaubada gina sivedavedamada. 52 Taide sevedavedama-nai ani maduga-mowa gina yegemona, au mwatugu maufo-moena anafaiweya mata gina alovona, tova-nai Yaubada yana anelose kaula muliya-mwaeya gina yuvena. Faina kaula bonana wagaine,†Mad 24:31 au maduga-mowa badi bademowa ialika ani Yaubada gina siveyawadi alikeya,†Iyo 5:25,28 ada vovodi-dina gina veledi ani keke-mowa aimo ina alika†Luk 20:36 o kai ina abudalidi. Ada ide aimo kamiyamiya wayawaideyavo ani kaduwe gina sivedavedamada.†1Tes 4:15-17 53 Faina vovoda-dina ikoyokoyo ada ialialika, ani gilubodana gina sevedavedama aku gina vevovo evaguna,†2Kol 5:4 keke-mowa gina abudali aku miyamiyani-vagaina. E, vovo-nai kana osena. 54 Ada tova-nai wagaine vovoda-dina bademowa gina sevedavedama aku gina vevovo evaguna keke gina abudali aku miyamiyani-vagaina, ani Buki Tabu anavona seyana gina yegemona velemoena, givona,
“Keliso alika nodi ilugaviya ada wai ginagona, e ada alika giluyavulena.
Giluyavule-yabuna!” †Ais 25:8
55 “O alika, gadedeku ya toyogina ke kaliva una kiobuyedi ada una luvealikadi? Bademowa giavaina, giavai-moena.
O alika, gadedeku ya toyogina ke kaliva una onadi?
Keke tamo. Evona wai unago-moena? Keke-mowa!” †Ose 13:14
56 Faina koyona ani vaita loulo-nai yavayavalata ani kaliva gina onadi, ada guwana ani ina alika. Faina koyona fatana alika. Ada dewa koyona anatoyogina vuvuna ani Yaubada yana veimeya anaiyawela. 57 Aku Yaubada kana vesiuleyena lakai-moena! Faina Banae giimilina yada Kauveya Yeisu Keliso ada koyona ke alika gitoyogitagonedi faideya.†Lom 7:24-25
58 E ada tubuiya aseasekuweyavo, wana mididi toyogina ke yami vetumagana Keliso wagaine wana sevelavelalaina. Bademowa waalamanena vaita yada Kauveya matane, gugai-nai wagugaiyena Banae faine ani keke gugai-wayoga aku gina veguwa. E ada tova moyaina wa yami idibumwaiga taumiyavo wana awaegemi yana gugai wagaine.†Gal 6:9
†15:3 Ais 53:8-9
†15:4 Sam 16:10, Ais 53:10
**15:5 Pita anayegana vona Giliki wagaine ani Sifasi.
†15:5 Mak 16:14, Luk 24:34,36, Iyo 20:19,26, Gug 10:41
**15:20 Bavagu ana aa nagona meIsileli ina vaina ani wada-nai ivelevele-kavovoyena Yaubada wagaine. Ada moyaidi ivelevelena aku inuwanuwa vetumaganena vaita bavagu anamatatabuna aimo kadu gina yegemona. E ada taidei maita-nai wagaine Paulo givonaluvefosau Keliso yana yawa-vagila faine, ada ananuwanuwa ani Banae nagona giyawa-vagila e ada aimo yana yoo anamatatabuna kadu inayawa-vagila.
†15:24-26 Sam 110:1
**15:29 Wada kaliva tufodi adigiduwa-nai wagaine kaliva ibabibabitaiso toalika fatadi faina ani Paulo keke gida awaveiwakane aku yana ifufu wagaine givegugaiyena ke toalika adisiveyawa-vagila anavona velemoena gina kiveyegemonina.
**15:32 Paulo kai givonaluvefosau tova-nai Efeso wagaine kaliva tufodi bana nodi ivevonavona Kauveya yana vona faine. Ada badi kaliva-dina inuwakoyo lakaina ke yadi nuwakoyo-nai faine iveanafaiweya kevakeva walawala. (Gug 19:23-41)
†15:32 Ais 22:13, Luk 12:19-20
†15:34 Luk 15:17-18, Lom 13:11
†15:38 Eba 1:11
†15:45 Eba 2:7
†15:54 Ais 25:8
†15:55 Ose 13:14