1 Tubuiyakuweyavo, kai gaito wagaimiya dewa koyona gifaifaisewana ada wana itanuwagana, aga imi gavega Aluwaluwa Tabuna ginagonagoyemi ani wananau nuwabikeya wana kivetunutunugina ke wana yewena wai tunutunugina wagaine.†Sam 141:5, Mad 18:15, 2Kol 2:7, Ibel 12:13, Iyem 5:19 Aku wana itaveyabimi aenanai taumiyavo kaduwe aladibidibi wana nuwagana. 2 Seyana seyana anavita wagaine wana velemalema,†Lom 15:1-2, 1Tes 5:14 ada taidei wagaine imi velemoena Keliso yana veimeya wamatawalewaleyena.†1Iyo 4:21, Iyo 13:34 3 Kai unuwanuwa vaita ayegana lakaina faina, keke alauboda kaliva wa anavita unaleme, aga ina tauni ufwayanegenegeni. Velemoena oye kaliva-kavokavovo. 4 Aku kaliva seyana seyana tauna yana gugai gida itavenuvenuwadadanena.†2Kol 13:5 Ada kai yana gugai iwakana, aga gina vemwamwala gavana gigana faina. Aku keke gina itaveluveye mali kaliva yana gugai wagaine, 5 faina gilubodana seyana seyana tauna onana gina waina.†Lom 14:12

6 Badi gavega Yaubada yana vona anavewala ivaivaina, ani gilubodadi yadi gaitoma iwakadi tufodi ina avetavetala yadi tovewala-dina wagaidiya.†1Kol 9:11,14 7 Keke uda nuwanuwa vaita oye ani nuwanuwauya ayo Yaubada, e ada afaiweya unasei vaita Banae wa anaawaveleiga. Keke meyameyaganina. Faina gavana kaliva gina bakulina tauna yawaina wagaine, kaduwe anafaiweya guwana gina yalana. 8 Kai badi gavega ina bakula vovo ananuwanuwa koyona,†Iyob 4:8 aga guwana ina yalana ani miya luyaweyawela. Aku kai badi gavega ina bakula Aluwaluwa Tabuna yana nuwanuwa anafaiweya, aimo guwana Aluwaluwa Tabuna wagaine-deya ina yalana ani yawai-vagata.†Iyo 6:63, Lom 8:13 9 Ada keke kana kabekabebe gugai iwakana wagaidiya,†2Tes 3:13 faina kai kana atuvefaila-mowa, aimo guwa iwakana kana yalana anatova velemoena wagaine.†1Kol 15:18 10 E ada tova-nai seyana gaito kana itana analauboda lema gida nuwagana, aga kana madulemena. Aku velemoena kana gugai iwakana badi tovetumagana gabuyavo wagaidiya.

11 Malinai tauku nimakuya vona anaebalauyabu gana vetokilumina, ada wana itana ani matana lakaina.**Paulo tubuiyana taidei leta-nai givetokilumina bana faine, aku anaebalauyabu wagaine Paulo feni givaina ada yana vetalakafoi givetokilumina e ada toveyawa ina alamanena banae tauna giimilina.

12 Kaliva-dina iluluyalimi ke vovo anatomogolota wana vaina, taidei anafaiweya igugai e ada vaita meIsileli ina vemwamwala faidiya. Yadi vuvu velemoena ani imatauta aenanai kai Keliso anakelose faine ina mididi toyogina, aga uloulolo ina nuwanuwagana badi gavega keke Keliso ida vetumagane wagaidiya.†Gal 5:11 13 Faina biyavo-dina vovo anatomogolota ivaina nonogana taudiyavo keke Yaubada yana veimeya ida matawalewaleye. Aku nuwanuwadi imi tomogolota wana vaina e ada badi ina gakaikai vaita badi iveimeyemi ada wagugai anafaiweya. 14 Aku Iyayeku ani keke tamo gavana faina gana gakaikai, aku tainei-mowa yada Kauveya Yeisu Keliso yana alika kelose wagaine faina. Banae yana alika wagaine babi ananuwanuwa vaita gialika wagaikuya, ada Iya anafaiweya vaita gaalika babi ananuwanuwa wagaine.**‘Babi ananuwanuwa’ ani gaitoma moyaina babi wagaidiya ada kaliva taudiyavo yadi kaiwabu ilelelena ke adiyegana ina kilakaina. Gaitoma-dina ivenibaina kelose yana wai wagaine. (Iyem 4:4, 1Iyo 2:15, Gal 2:20-21) 15 Faina kai vovo anatomogolota kavaina o kai keke, aga tainei gaitoma-kavokavovo. Aku gaitoma lakaina ani Yeisu yawaine katubuga evaguda e ada ideyavo ibuibubuna evagudeyavo.†2Kol 5:17 16 Badi gavega wai-nai imulimuliyena ani Yaubada gina veledi nuwaniwalova ke gina nuwakalikaliyedi. Badiyavo meIsileli velemoena.

17 Yaku vona anaebalauyabu aku vona seya-moena. Iya vovokuya bwaya imiyamiya ani ganuwagadi Yeisu anayegana faina.†2Kol 4:7-11 Taidei faina tova taidei ke gina naunau, keke nuwanuwaku gaito seyana kaduwe vita gina kiveyegemoni wagaikuya.

18 Tubuiyakuweyavo, gaveola yada Kauveya Yeisu Keliso yana nuwadogeya gina lemelememi ke aluwaluwamiya wana lulutovonina. Ika anafaiweya.