1 Tainei tova-nai tonogalayavo ielai Yeisu wagaine ivonaga, “Gaito anayegana lakai-moena Yaubada yana ebaveimeya wagaine?” †Mak 9:34, Luk 9:46, 22:24-27

2 Ada Yeisu kwamana kabisona gidouwe gielai ke tonogalayavo nefanidiya givemididina 3 aku givona, “Gavona velemoena wagaimiya, kai keke yami nuwanuwa wana sevedavedame ke wana veanafaiweya biyabiyama kabisodi,†Mak 10:15, Luk 18:17 aga keke maita wanaluku Yaubada yana ebaveimeya wagaine. 4 Taidei faina kai gaito tauna gina kiobuyena anafaiweya kwamana kabisona taidei, aga banae anayegana lakai-moena Yaubada yana ebaveimeya wagaine. 5 Badi gavega kwamana kabisona taidei anafaiweya akuyeganeya ina sivaivaina, ina Iya kadu isivaivaiku.†Iyo 13:20

6 “Aku kai kwamana seyana anafaiweya taidei givetumaganeku aku dewa koyona wagaine wanagai yana vetumagana wagaikuya gina segena, aga amimatavuloga vita-moena wana nuwagana Yaubada wagaine. Ebaita ganasena. Kai kabala lakaina ina yogovefosena odomiya ada wa kabalimi ina vekamomolimi leyageya wana alika, tainei vitana. Aku kai matavuloga Yaubada wagaine wana nuwagana, tainei vita-moena.

7 “Oiyoi! Babi anakalivayavo vita lakai-moena ina nuwagana, faina tova moyaina aladibidibi tulina tulina iyegeyegemona wagaidiya ada ibeubeu. Velemoena, ebaaladibidibi moyaidi iyegeyegemona ke kaliva inagadi inabeu ke ina koyona. Aku badi gavega koyona anaebabe ikiveyegemonina ani vita lakai-moena ina nuwagana. 8 E ada kai nima o age gina sitaitaini ke una koyokoyona, aga au una dabayavule una segena. Auwe wa nima seya-moena aku unamiya wa ya dewa iwakana ada unaluku yawai-vagata wagaine. Ina iwaka-vagaina ayo kai wa nima iluwei, aku wa ya dewa koyona ani unaluku eli anaai alalata keke gida weuwe wagaine.†Mad 5:30 9 Kaduwe kai mata gina nagoyeni ke una koyokoyona, aga au una etomwamwali una segena. Auwe wa mata seya-moena aku wa ya dewa iwakana unamiya ada unaluku yawai-vagata wagaine. Ina iwaka-vagaina ayo kai wa mata iluwei aku wa ya dewa koyona ani ina batugeni unaluku aiyabeyabela eli wagaine.†Mad 5:29

10 “Wana itaveyabimi ada biyabiyama taidei anafaiweya ani keke tamo wana itatago. Faina gana vonemi, tova moyaina yadi aneloseyavo gabameya Kamaku matane imiyamiya, ada kai wana gugai koyona biyabiyama-dina wagaidiya aga faidiya ina awatalatalaina Banae wagaine. [ 11 Faina Bana Kaliva Natuna gielai e ada badi gavega Yaubada yana wai ibavuyena ani gina kibababaledi.] 12 Gavaiyamu yami nuwanuwa? Kai kaliva seyana yana sifiyavo wani analedi (100) imiyamiya aku seyana ginuvuyo, aga gavaiyamu gidagai? Yana sifi adinaeniti naeni (99) ani gina nusedi oyaoyana wagaine aku ginanau ada sifi-nai ginuvuyo gina lelena. 13 Ada kai gina nuwagana aga gavonemi velemoena, gina vemwamwala lakai-moena banae sifi-nai seyana faine ayo badi sifi-dina keke ida nuvuyo faidiya. 14 Ada tainei anafaiweya, taidei biyabiyama-dina wagaidiya ani Tamami gabameya keke nuwanuwana seyana ginavuyo yawai-vagata anawai faina.

15 “Kai tubuiya tovetumagana ginadewa koyona wagainiya, unanau ada yana koyona faina una kivetuvetununa.†Luk 17:3, Gal 6:1 Keke yoo matadiya unavone, aku amiselu amikavuya wana ifufu. Kai bona gina nogalina, aga aseasena bademowa ukivilana ke nodi wana veseyana-vagilemi. 16 Aku kai bona keke gina nogali, aga kaliva seyana kai iluwei una nauwedi ke badi ina nogalina. Anafaiweya adaveimeya givona, ‘Gilubodana toitavedama adiselu o aditoto ina awatalatalaina seya-moena gavana giyegemona faina. Taidei wagaine gavana velemoena ani ina kivealamanidi, e ada kaliva ina alamanena ida vona velemoena.’ †2Vei 19:15, Iyo 8:17 17 Aku kaduwe kai yadi vona keke gina venogale, aga gaitoma matatabuna una ifufuyena tovetumagana adiyoo matadiya. Ada kaduwe kai yadi kivetuvetunu keke gina nogali, aga banae wana segena ke wana dewena anafaiweya banae kaliva-kavokavovo keke Yaubada anatovetumagana, o kai tokoyona takesi anatoyaudi anafaiweya.**Takesi anatoyaudi ani badi tova moyaina tovefwayafwaya e ada meIsileli moyaidi iagougedi. 18 Gavona velemoena, gavana babiya wana awatana, anafaiweya kaduwe Yaubada bademowa giawatana gabameya. Ada gavana babiya wana awaegena, anafaiweya kaduwe Yaubada bademowa giawaegena gabameya.†Mad 16:19, Iyo 20:23 19 Kaduwe gana vonemi, kai tovetumagana amiselu wagaimiya aku gavana tamo faina idedeku babiya wana veola yami nuwanuwa seyana wagaine, aga Kamaku gabameya ani yami nuwanuwa anafaiweya gina velemi.†Iyo 15:7 20 Faina kai amiselu o amitoto wana vagauta akuyeganeya, Iya imi nodi kana miyamiya.”

21 Aku Pita gielai Yeisu wagaine gitolidadana, givona, “Kauveya, kai tubuiyaku gina koyokoyona wagaikuya aku yana koyona gavaiyei tova gana venuwaegedi? Kai tova seveni o gavaiyei tova?”†Luk 17:3-4

22 Yeisu givona, “Gana voneni, keke tova seveni gaga, aku tova ke tova yana dewa una venuvenuwaegena. Keke una ilova. 23 Taidei anafaiweya kaliva yadi koyona wana venuwaegedi. Faina Yaubada yana ebaveimeya taidei anafaiweya. Kini seyana nuwanuwana yana togugaiyavo adiketowai ina fatana. 24 Ada givebutu gidouwedi ielai aku kaliva seyana anaketowai lakai-moena, vaita gavaiyei milioni kina anafaiweya. 25 Ada togugai-nai keke anafata anaketowai ginafata, taidei faina yana kini giveimeya ada togugai-nai tauna, vavinena, ke natunavo ina vekimoneyedi ina vetogugai yogoyogodiyavo, ada kaduwe yana kevakeva ke yana lokoloko matatabuna ina vekimoneyedi aku fatadi ina vaina ada anaketowai ina fatana. 26 Taidei anafaiweya giveimeya, aku togugai-nai wa yana nuwavita lakaina tugana givetodonena yana kini matane, aku giveola tagitagiya wagaine, givona, ‘Kauveya, uda atuvefaila faikuya ada aimo akuketowai matatabuna gana fatana.’ 27 Aku kini bade gialamanena yana togugai anaketowai lakaina aimo keke anafata, e ada ginuwakalikaliyena ke anaketowai givenuwaegena aku giawaege ginau.

28 “Aku togugai-nai giyegemona ginanau ani giitana tubuiyana togugai seyana giketowai bana wagaine, ani anatubuga wani analedi kina (K100). Ada agona gikiveyabina ke gina kifuwana aku givonena, ‘Aketowai una madufatana!’

29 “Ada tubuiyana tugana givetodonena aku giveola tagitagiya, givona, ‘Tubuiyaku, uda atuvefaila faikuya ada aimo akuketowai matatabuna gana fatana.’ 30 Aku yana veola keke gida venogale. Au ginauwena deli wagaine giselukuwena ke gina miyamiya aku anaketowai gina fatana.

31 “Aku togugaiyavo tufodi iitana gavana giyegemona tubuiyadi wagaine ada inuwavita lakaina, ada inau yadi kini-nai wagaine iawatalatalaina togugai koyona yana dewa matatabuna faina. 32 E ada kini yana togugai-nai gidouwe gielai ada givonena, ‘Oye togugai koyona! Uveola-nuwakalikali wagaikuya ada aketowai lakai-moena ani matatabuna gavenuwaegena. 33 Iya oye ganuwakalikaliyeni, aku gavaiyamu-yo o keke tubuiya uda nuwakalikaliye?’ 34 Ada yana kini ginuwakoyo lakai-moena, e ada giveimeya ke togugai-nai iimili ginau deli anatoitaveyabina manimaninidiyavo nimadiya, ada ina vematavulogina aku analaba anaketowai matatabuna ginafata-yabuna.”

35 Ada Yeisu yana vona giluyabuna, givona, “Kai keke tubuiyami wana nuwakalikaliye ke yana koyona wana venuwaege aseasemiya, aga Kamaku gabameya gimiyamiya ani taidei anafaiweya ginadewa wagaimiya.” †Mad 6:15, Efes 4:32, Kol 3:13