8
Koyona anaveimeya wagaideya ani kana segena Aluwaluwa Tabuna yana toyogineya.
1 Taidei faina tova malinai ide gavega kaveseyana Keliso nodi ani Yaubada keke gina awavekoyoyeda vaita ide wa yada koyona e ada gida matavulogeda. Keke tamo awavekoyo faideya, keke-mowa. 2 Gavaiyamu-yo ide keke wa adaveimeya adamatavuloga faina? Ide yada Kauveya Yeisu Keliso nodi kaveseyana faina, Aluwaluwa Tabuna yawai evaguna wagaine ginagoyeda ke yawai-nai wagaine kamiyamiya. Keke aimo yogoyogodeyavo kada miyami koyona ada alika adiveimeya dibune, keke-mowa. Aku bademowa etoetoyavudeyavo. 3 Faina Yaubada yana veimeya Mosese givelena ani keke anafata gina lemeda ayo yada koyona kana ilova. Ide taudeyavo yada nuwanuwa ani nuwada givai-vagaina ada keke adafaiweya veimeya-dina kana matawalewaleyedi. E ada Yaubada Tauna faideya gigugaiyena. Tauna Natuna giimilina ke Banae givekaliva-mowa ide tokoyona anafaiweya aku Banae keke gida koyona, ada Yaubada ide yada koyona gilufata Natuna wagaine vaita Banae seyana tokoyona mamauwe. E ada ide matatabuda yada koyona adimatavuloga ani Banae giwaina. 4 Taidei anafaiweya Yaubada gidewa e ada ide adafaiweya yana veimeya kana matawalewaleyedi ke yana veimeya ananuwanuwa tunutunugina gina seyegemonena ide wagaideya, ide kaliva-dana keke kada awaawaegeda taudeyavo yada nuwanuwa gagana wagaidiya aku aiyada Aluwaluwa Tabuna wagaine kaawaawaegeda.†Gal 5:16
5 Badi gavega iawaegedi taudiyavo yadi nuwanuwa gagana wagaidiya ani nuwadi gidola-vagaina yadi nuwanuwa-dina wagaidiya. Aku badi gavega iawaawaegedi Aluwaluwa Tabuna wagaine ani nuwadi isevelavelalaidi gavana Aluwaluwa Tabuna yana nuwanuwa anafaiweya. 6 Kai nuwada kanasena taudeyavo yada nuwanuwa gagana wagaidiya aga vona velemoena ina alika kana nuwagana, aku kai nuwada kanasena Yaubada Aluwaluwana wagaine, aga yawai evaguna anawai wagaine kana naunau ke wa yada nuwaniwalova kana miyamiya.†Gal 6:8 7 Faina kai gavega nuwadi gina dolana taudiyavo yadi nuwanuwa gagana wagaidiya, aga badiyavo ani Yaubada ivenibainena. Taidei kaliva-dina Yaubada nibaidi, faina keke nuwanuwadi yana veimeya ina matawalewaleyedi, ada vona velemoena badi keke adifata ina matawalewaleyedi. 8 E ada badi gavega nuwadi isena taudiyavo yadi nuwanuwa gagana wagaidiya ani keke-mowa adifaiweya Yaubada ina kivemwamwali.
9 Aku imiyavo ani kai Aluwaluwa Tabuna gimiyamiya wagaimiya, aga keke taumiyavo yami nuwanuwa gagana wagaidiya wada awaegemi ke nuwami gidavai aku aiyada Yaubada Aluwaluwana nuwami givaina.†1Kol 3:16 Aku kai badi gavega nuwainagediya Keliso Aluwaluwana keke gida miyami, aga badi keke Keliso yana kalivayavo. 10 Aku kai Keliso gimiyamiya wagaideya aga wayawaida velemoena kamiyamiya. Koyona faina vovoda ina alika, aku Yaubada giseda yegayegadeyavo Banae matane faina, e ani aluwaluwada wayawaidi imiyamiya-vagata. 11 Vona velemoena vovomi ina alika. Aku Yaubada Yeisu Keliso gisiveyawana alikeya faina, kai Banae Aluwaluwana wagaimiya gimiyamiya, au Banae Yaubada-nai kadu imi vovomi gina siveyawadi Aluwaluwana yana toyogina wagaine, Banae bademowa gimiyamiya wagaimiya.†1Kol 3:16
12 Tubuiyakuweyavo, Aluwaluwa Tabuna gimiyamiya wagaideya faina, gilubodada ke Banae yana nuwanuwa kana gugaiyena. Aku keke gida lubodada taudeyavo yada nuwanuwa gagana wagaidiya kana awaegeda. 13 Faina kai taumiyavo yami nuwanuwa gagana wagaidiya wana awaegemi ke wana gugaiyedi aga velemoena wana alika, aku kai Aluwaluwa Tabuna yana toyogineya yami dewa koyona wana dibusoyogena e ani vaita wana luvealikadi, aga wayawaimi wana miyamiya.†Gal 6:8 14 Faina ide Yaubada Aluwaluwana ginagonagoyeda ke yana nuwanuwa kagugaiyedi ani ideyavo Yaubada natunavo. 15 Nago-moena matavuloga faina Yaubada wamatausena, aku Aluwaluwa-nai Yaubada giveleda ani keke gidagai ke kada vetogugai yogoyogoda kaduwe e ada adaToveimeya kada matamatause. Aku aiyada Banae yana miya aseaseda wagaidiya e ani Yaubada giawavenatuneda. Ada Aluwaluwa-nai ide seyana seyana adalutovona giveleda ke Tamada katagivedadagena, kavona, “Kamaku, Kamaku-yo!” †2Tim 1:7, Gal 4:5-7 16 Ada Aluwaluwa Tabuna Tauna gikivemalina aluwaluwada wagaidiya ke givoneda ide Yaubada natunavo.†1Iyo 4:13 17 Ada ide Yaubada natunavo faina, ide kaduwe adanuwakabubu miyamiyani-vagaina Yaubada gikidewedewedi ani kana nuwagadi. Ada keke ideyavo gaga aku Keliso nodi adanuwakabubu-dina kana nuwagadi.†Gal 4:7, Ive 21:7 Ada kai babi taide wagaine uloulolo kana nuwagadi Keliso anayegana faina, aga aimo muliya Keliso nodi wa adavemoimoina ke wa adadava Yaubada matane.
Aimoina Yaubada natunavo yawai iwaka-vagaina ina nuwagana.
18 Tova-nai ganuwanuwayena Yaubada yana iwakana mamalina aimo gina ivemogatalina wagaideya, uloulolo-dina kaulouloloyedi Keliso faine tova malinai ani vaita gaitoma-kavokavovo. Taide tuli-vagaidi e ada keke analauboda kana itaveluveyedi.†2Kol 4:17 19 Velemoena, Yaubada yana ibuibubuna moyaidi wa yadi nuwavetumagana iveitabodaboda-mowa tova-nai wagaine Banae natunavo gina ivemogatalidi. 20 Tuwai-moena tova-nai Adama gikoyona ani ibuibubuna seyana seyana keke anafata gina miyamiya wa anaiwakana anafaiweya nagona Yaubada gibubudi. Taidei yana ibuibubuna-dina yadi miyami ani keke taudiyavo yadi nuwenuweya aku Yaubada giveimeya anafaiweya,**Tova-nai Yaubada babi gialatabutabuyena kaliva yadi koyona faina, alatabutabu-nai anavita giyegemona gaitoma matatabuna wagaidiya. (Eba 3:17-18) faina gialamanena vaita aimoina gina kiveiwakanedi. 21 Ide Yaubada natunavo ani babi anavita vaita iyogoda, aku aimo Banae gina etoyavuda ke ide yavuyavudeyavo yada miya iwaka-vagaina kana miyamiyanina, ada kaduwe anafaiweya yana ibuibubuna gina etoyavudi ada gina kiveiwakanedi velemoena.†Ive 21:1 22 Kaalamanena tuwai-moena ada gielai tova malinai ani ibuibubuna matatabuna nodi ivekovekolologa ke nodi iuloulolo, anafaiweya vavine gina vefaena yana venatuna faina ani anauloulolo au anafaiweya. 23 Keke vaita badi yana ibuibubuna gaga ida vekolologa uloulolo wagaine, aku ide yana yoo kaduwe kavekovekolologa. Velemoena Yaubada giawaegena Aluwaluwana anafaiweya yana velekavovo nago-moena wagaideya, e aku aimoina kaveitabodaboda ke wa yada uloulolo kaluluyawai vaita vovoda gida etoyavuna koyona ke uloulolo-dina wagaidiya-deya. Ide kaduwe kaveitabodaboda wa yada nuwavetumagana yadayada-nai faine, kavonaga, “Oiyoi! Gavatova-yo Yaubada gina vagauleda anaunuma wagaine e ada ide Banae natunavo wa vovoda evagudi kana miyamiya?” †2Kol 5:2-4 24 Tova-nai adakibababala-nai taidei kanuwagana ada kanaunauwena, ide kavebutu kaveitabodaboda gaitoma-dina faidiya. Badi gavega gavana iveitabodebodena aku bademowa inuwagana, ani aimo keke kaduwe ina veitabodaboda faine. Faina kai seyana kaliva bademowa gaitoma seyana givaina aga gavana faina aimo gina veitabodaboda faine? 25 Aku kai gaitoma seyana kanuwavetumagana faine aku aimo keke gida yegemona, aga wa yada atuvefaila nodi kana bodabodana.
26 Ada kaduwe anafaiweya, nuwadeya ide kakabekabebena aku Banae Aluwaluwa Tabuna gilemelemeda. Faina ide keke kada alamane gavaiyamu kada veoveola, aku Aluwaluwa Tabuna nuwainagedeya veola toyogina giawaveleveleda, ananogala vaita yawaina gitunetuneveyalugena, keke wa anavona. 27 Yaubada gialamanena gavaiyamu aseasedeya kanuwanuwa.†Sam 139:1 Ada Aluwaluwa-nai yana veoveola ide Yaubada yana kaliva tabutabudeyavo faideya, ani Yaubada yana nuwanuwa mamauwe giveoveola. Ada taidei faina Yaubada gialamanena gavaiyamu Aluwaluwana yana nuwanuwa yana veoveola-dina wagaidiya.
28 Ada kaalamanena ide gavega Yaubada kanuwakabubuyena ani faideya gaitoma matatabuna wagaideya iyegemona ani Yaubada gifaifaisewa yada iwakana faina. Taidei anafaiweya gigugai faideya, ide yana yoo givenuwadadaneda yana nuwanuwa anafaiweya. 29 Faina ide gavega tova tuwaina Yaubada gimadu alamane-vagaida vaita Banae nodi kana veseyana ani kaduwe gimadu venuwadadane-vagaida ke kana uluva Banae Natuna anafaiweya. E ada Banae ani tomoinagona, tainavo moyaidi nodi. 30 E ada ide Yaubada gimadu venuwadadane-vagaida ani kaduwe gidouweda yana yoo wagaine. Ada ide gidouweda ani kaduwe giseda yegayegadeyavo e ada ide keke wa yada koyona Banae matane. Ada ide giseda yegayegadeyavo ani kaduwe adaivi ani vemoimoina ivina giveleda.†2Tes 2:13
Yaubada yana nuwakabubu wagaideya ani keke tamo gavagaitoma anafata gina seboda.
31 E ada gavaiyamu kana nuwanuwa? Yaubada gimwala ide faideya faina, gavaiyamu, anafata tamo gaito givenibaineda ani gina toyogisegeda? Keke, keke-mowa. 32 Yaubada Tauna Natuna keke gida nuwalolone aku moyaida faideya giawaegena. Ada anafaiweya Natuna giveleda, kaduwe au wa yana nuwadoga gavaleme adalauboda ani gina veleda. 33 Gavaiyamu, ide Yaubada yana kalivayavo venuvenuwadadanideyavo ani gaito anafata gina awavekoyoyeda vaita kakoyona? Keke tamo gaito! Yaubada Tauna yada koyona givenuwaegedi ke giseda yegayegadeyavo Banae matane. 34 Ada gaito anafata gina itavenuwadadaneda vaita adalauboda matavuloga kada nuwaga yada koyona faina? Keke tamo gaito! Faina Yeisu Keliso yana alika wagaine yada koyona analaufata giwaina. E, kaduwe giyawa-vagila ada Yaubada aiyatagine wa yana veimeya gimiyamiya aku giveoveola faideya.†1Iyo 2:1, Ibel 7:25 35 Keliso yana nuwakabubu wagaideya ani lakai-vagaina, keke ginaavai. E ada gavana gina yegemona ayo gina ludakada nuwakabubu-nai wagaine-deya? Keke, keke tamo. Kai vita tulina tulina inaelai wagaideya, kai kana aseuloulolo o kai mali kaliva ina gugai koyona wagaideya Keliso kavetumaganena faina, o kai mafa gilavuda loka faina, o kai nuya keke, o kai ebagilagi lilivane kamiyamiya, o kai kaliva nuwanuwadi ina luvealikada faina, taidei vita-dina ani keke adifaiweya ina ludakada Keliso yana nuwakabubu wagaine. 36 Taidei vita-dina faidiya tova tuwaina wagaine Buki Tabu wagaine ivetokilumina givonaga,
“Yaubada, imeyavo ya kalivayavo faina,
yadayada seyana seyana kaliva nuwanuwadi ina luvealikama.
Anafaiweya sifi ikiabidi ke ina luvealikadi,
badi inuwanuwa au ina luvealikama.” †Sam 44:22
37 Aku au kai taidei vita-dina ina yegemona wagaideya, Keliso ide ginuwakabubuyeda ani Banae gilemelemeda e ada vita matatabuna wagaidiya kana vetoyogi-moena ke kana toyogisege-vagaidi.†1Iyo 5:5 38-39 Iya gaalamanena velemoena ani keke tamo gavana anafata gina ludakada Yaubada yana nuwakabubu wagaine-deya. Kai kana alika o kai wayawaida kana miyamiya, kai aneloseyavo o kai aluwaluwa bwanebwanenedi badi toveimeya, keke-mowa badi faidiya Yaubada yana nuwakabubu faideya ginasege. Kai gavana gina yegemo malinai o kai aimo tova gielaelai, kai totoyogina mwatuguya o kai babi dibune-mwane, o kai ibuibubuna gavana moyaidi wagaidiya, e ani keke tamo gavana anafata gina ludakada Yaubada yana nuwakabubu gielai yada Kauveya Yeisu Keliso wagaine-deya. Au keke ada keke-bamowa.