1 Melikisedeki faine gana ifufu ke nuwami gina malina. Banae melala anayegana Salema anakini, ke kaduwe Yaubada Togetanemwane yana veyavo anatovegugai. Aku Ebelaamo ginau ada gilugaviya kiniyavo adilaufuli wa yadi tolugaviya nodi ke giluvealika-yabudi, ada giyewayewana yana melaleya ani Melikisedeki ginuwagana ada givona, “Ebelaamo, gavoneni velemoena, Yaubada wa yana nuwadoga gina lemelemeni.” †Eba 14:17-20 2 Ada Ebelaamo gaviyeya givetoyogina ke lokoloko-dina moyaina givaidi ani givutugedi bou teni wagaidiya aku bou seyana ani Melikisedeki givelena anavutuga. Melikisedeki anayegana anakivila ani ‘dewa yegayegana anakini’. Ada kaduwe banae ani ‘kukuya anakini’ faina ‘Salema’ anakivila ‘kukuya’. 3 Banae inana ke tamana keke, ada kaduwe tamanavo nagona keke, ada yawaina anaebavevuvu ke anaebalauyabu adiyadayada ani keke tamo anaalamana. Ada veyavo anatovegugai ivi-nai giabi-vagaina anafaiweya, Yaubada Natuna ivi-nai giabiabi-vagaina.

4 Wana itana, Melikisedeki banae ani wa anavemoimoina ke wa anayegana lakai-moena. Faina Ebelaamo ani banae tamada nagona ada ide meIsileli moyaida wagaine-deya katubuyegemona ke kaduwe anayegana lakaina nonogana, Ebelaamo gialamanena Melikisedeki lakai-moena, ada taidei faina yana lokoloko-dina gaviyeya givaidi, ani anabou teni-dina wagaidiya-deya seyana givai givelena Melikisedeki. 5 Ada Livai yana tubudelideliyavo kaliva, badi veyavo anatovegugai anaivi-nai inuwagana ani Yaubada yana Veimeya anabuki wagaine adiveimeya seyana giveledi taidei anafaiweya. MeIsileli moyaidi yadi bavagu ke yadi giba inuwanuwagadi ani ina vutuvutugedi bou teni anafaiweya, aku bou seyana Livai yana tubudelideli ina veleveledi.†Naba 18:21 Taudiyavo tubuiyadiyavo, badi kaduwe Ebelaamo yana tubudelideli nonogana bou seyana ikidewedewena ke veyavo anatovegugai adiloi iveleveledi. 6 E aku Melikisedeki ani banae keke Livai unumina anakaliva, aku kaalamanena banae wa anavemoimoina faina bou seyana givaina Ebelaamo yana bou teni wagaidiya-deya. Ebelaamo banae kaliva lakaina ada Yaubada yana vonadabadaba bademowa ginuwagana†Lom 4:13 nonogana Melikisedeki giawanuwakabubuyena, givona, “Ebelaamo, o wagainiya gavona velemoena, Yaubada gina nuwanuwakabubuyeni ke gina lemelemeni.” 7 Taidei anafaiweya giawanuwakabubuyena, ada bademowa kaalamanena vaita gavakaliva anayegana lakai-moena, ani banae awanuwakabubu gina velavelau banae gaito anayegana maita lakaina wagaine. Waitana? Tamada Ebelaamo anayegana lakaina nonogana Melikisedeki giawanuwakabubuyena, faina banae kaliva-nai ani anayegana lakai-moena. 8 Badi veyavo anatovegugai-dina Livai yana tubudelideli ani tova moyaina bou teni wagaidiya-deya bou seyana ivaivaina, badiyavo au kaliva ialialika, aku Melikisedeki ani bou seyana ginuwagana Ebelaamo wagaine-deya aku aimo wayawaina gimiyamiya, anafaiweya Buki Tabu wagaine givona.†Iyo 6:57, Ive 1:17-18 9-10 Kaduwe, Melikisedeki ke Ebelaamo nodi ivenuwaga, ada bou seyana Ebelaamo givelena anatoveya, Ebelaamo gaisena Livai aimo keke gida tubuga aku anavona anafaiweya, vaita banae bademowa Ebelaamo vovone gimiyamiya. Ada Livai gimiyamiya Ebelaamo vovona wagaine faina, ada anavona anafaiweya, vaita au game-nai Livai bademowa Melikisedeki bou anaveteni givelena. Livai anaunuma biyavo-dina veyavo anatovegugai, badiyavo ani bou seyana inuwanuwagana bou teni wagaidiya-deya. Aku anavona anafaiweya, Melikisedeki bademowa bou seyana givaina Livai wagaine-deya, kaalamanena Melikisedeki anayegana lakai-moena ayo Livai ke anaunuma nodi.

11 Tuwai-vagaina Mosese yana toveya Livai anaunuma anakalivayavo ani veyavo anatovegugai yadi faisewa Yaubada giveledi. Ada yana veimeya tulina tulina faidiya ani vuvuna wagaine-deya Yaubada yana veimeya meIsileli moyaidi faidiya gisena. Aku veyavo anatovegugai-dina Livai yana yoo wagaidiya, ani kai yadi faisewa wagaine kaliva moyaidi ida kiveyegayegane-yabudi ke Yaubada nodi ida veseyana-vagata, aga keke tamo vuvu ayo kadu veyavo anatovegugai seyana gida yegemo. Aku keke adifaiweya ina kiveyegayegane-yabuda faina,†Gal 2:21 kadu veyavo anatovegugai seyana bademowa giyegemona, ada keke Eloni banae Livai bwanenena anafaiweya aku Melikisedeki anafaiweya. 12 Ada veyavo anatovegugai tulina gisena faina, gilubodana kaduwe yana veimeya gina sivedavedamana veyavo anatovegugai faidiya, e ada veyavo anatovegugai-nai tulina gina awaegena. 13 Ada Banae gaifufuyena ani yada Kauveya Yeisu. Banae keke Livai unumina anakaliva aku gitubuyegemo unuma tulina wagaine-deya, unuma-nai wagaine keke tamo gaito wa anaveimeya ke veyavo anatovegugai anaivi gidavai ke gida gugai vebolavoi anadidiga wagaine. 14 Faina bademowa mamalina vaita yada Kauveya ani gitubudelideli unuma-nai Iyuda wagaine-deya.†Ais 11:1, Mai 5:2, Mad 1:3, 2:6, Luk 3:33, Ive 5:5 Aku unuma-nai Iyuda ani Mosese keke gida inana veyavo anatovegugai yadi faisewa faina, keke-mowa. 15 Ada gavana ide kaifufuyena ani mamali-moena, faina kadu veyavo anatovegugai seyana bademowa giyegemona, Banae Melikisedeki anafaiweya. 16 Banae ani Yeisu, bademowa giyegemona ada veyavo anatovegugai anaivi givaina. E aku Mosese yana veimeya wagaine ani taidei anafaiweya. Gilubodana veyavo anatovegugai seyana seyana ani Livai unumina anakaliva. Aku Yeisu keke Livai yana tubudelideli wagaine gida yegemona, e ada ivi-nai ani keke gida nuwaga Mosese yana veimeya anafaiweya, keke. Aku aiyada yana faisewa vuvuna ani yawai-vagata yana toyogina wagaine gimiyamiya, ada keke-mowa gina alika. 17 Faina Buki Tabu wagaine givona,

18 Ada veimeya tuwaina veyavo anatovegugai faidiya ani iseliyedi tabae, faina veimeya-dina keke wa yadi toyogina ada ivegaitoma-kavokavovo. 19 Faina veimeya Mosese wagaine ani keke gida kiveyegayegane-yabuda ayo Yaubada nodi kada veseyana-vagata. E aku wai evaguna Yaubada giseyegemonena ani iwaka-moena, keke anafaiweya tuwaina, ada tainei wagaine ide adafaiweya kana yegemona Yaubada lilivane-mwane ke nodi kana veseyana velemoena. Ada wai-nai iwakana ani Keliso.

20 Aku Yaubada keke yana veyavo anatovegugai adiivi Yeisu gidavele-kavovo, aku yana vonadabadaba gikivetoyogina Tauna anayegana giluinanana wagaine, e ayo ivi-nai givelena. Livai yana yoo anakalivayavo ani veyavo anatovegugai yadi faisewa ivaina wagaine, keke tamo gaito Yaubada anayegana gida luinana ayo ivi-nai gidavai, keke. 21 Aku tova-nai Keliso ivi-nai veyavo anatovegugai givaina, Yaubada Tauna anayegana wagaine yana vonadabadaba-nai Banae faine ani gikivetoyogina, givona,

23 Kaduwe gaitoma seyana ani tuwaina veyavo anatovegugaiyavo moyai-moedi imiyamiya, aku aimo ina vesilakai ke ina alika e aku fatadi adiivi ina vaidi. 24 Aku Yeisu ani Banae gimiyamiya-vagata faina, Yaubada yana veyavo anatovegugai anaivi giabi-vagaina. Keke tamo gaito gidafata, keke-mowa. 25 Tainei faina ide gavega kanaunau Yaubada wagaine Yeisu anayeganeya, ani Banae anafaiweya-mowa gina kibababaleda. Faina Yeisu gimiyamiya-vagata ke ide faideya giveoveola Yaubada wagaine.†Lom 8:34, 1Iyo 2:1

26 Yeisu Banae tabutabuna, keke tamo koyona o kai bwanenene gida miyami wagaine aku yegayega-vagaina.†Mak 1:23-24, Luk 4:33-34, Ive 15:4, 16:5 Ada Yaubada gisedakana tokoyona wagaidiya-deya ke gikilakaina gabama tabone-mwane ke Bana nodi imiyamiya. Ada taidei anafaiweya Yeisu anaitaita faina, Banae yada veyavo anatovegugai aditonagona ani ide adalauboda-mowa, faina adaleme tulina tulina Bana anafata. 27 Ada kaduwe, Banae keke yadayada seyana seyana gida vevebolavoi anafaiweya veyavo anatovegugai aditonagonayavo Livai yana yoo wagaidiya. Badiyavo nagona taudiyavo yadi koyona faina ina vebolavoi, ada muliya kaliva moyaidi yadi koyona faina ina vebolavoi. Aku Yeisu ani keke tamo tova gida koyona, e ada keke Tauna faine ebaveyavo gida faisewa aku ide tokoyona ani faideya. Au Banae tova seya-moena Tauna givebolavoiyena wagaine ebaveyavo gifaisewa-vagaina,†Efes 5:2, Ibel 10:10 e ada tainei vebolavoi-nai wagaine anafata moyaida yada koyona gina venuwaegedi. 28 Mosese yana veimeya wagaine kaliva wa yadi kabekabebena ivevetonagona veyavo anatovegugai wagaidiya.†Ibel 5:1-2 Aku veimeya-nai muline ani Yaubada yana vonadabadaba toyogina wagaine Natuna anaveimeya givelena ke gina vetonagona yana veyavo anatovegugai wagaidiya.†Ibel 5:9 Banae yana nuwanuwa ke yana dewa wagaidiya keke tamo wa yana koyona aku matatabu-moena ani iwaka-vagaina.