Yaubada Yana Veyavo Anawai Evaguna Ivemogatala 15

Gabama anaanelose adiseveni wa yadi vita koyo-moedi adiseveni.

1 Aku mataku ginau ani kadu iyaiyaya seyana gaitana gabama wagaine, bana ebavetataweyana kadu ebameyasidobodobo. Anelose adiseveni ani vita koyo-moedi adiseveni ikiveyabidi. Taide vita-dina ani vita koyo-moedi adiebalauyabu, faina yadi kivekoyo ina luyabu wagaine, Yaubada yana nuwakoyo tokoyona wagaidiya ani anamatatabuna gina luyabuna. 2 Ada seyana gaitoma gaitana vaita lavu niwaniwalovina aku wada velemoena ani kelasi, ada aiyabeyabela nodi ilomwanina. Ada biyavo-dina kevakeva lakaina manimaninina anavelu wa anakilumina itoyogisegena, kadu keke ida awaega ke anayegana ananaba inavai, ani imidimididi tabone. Ada seyana seyana nimadiya ani api Yaubada giveledi. 3 Aku kweli-nai tuwaina Yaubada yana togugai Mosese gikweliyena,† kadu kweli-nai Bana Lami gikweliyena, ani badi ikwelikweliyena, taide anafaiweya.

“O Kauveya Yaubada, Totoyogi-vagai,

Ya gugai matatabuna ani lakai-vagaidi kadu ebameyasidobodobo.

Oye yoo tulina tulina adiToveimeya, badi imiyamiya babi anafafali moyaidi wagaidiya,

ada Ya veuluva ani tunutunugina ada velemoena.

4 O Kauveya, kaliva matatabudi wa yadi matauta ina vemoimoineni

ada ayegana ina kilakaina.

Faina O akaibe-mowa tabutabu ada

Ya nuwanuwa matatabuna ani yegayega-vagaidi.

Fafali tulina tulina adiyoo babi matatabuna wagaine inaelai

ada ina oduodu wagainiya,

faina Ya gugai tunutunugidi useyegemonedi ke aitaitadi.”

5 Ada ikweli giavaina, mataku ginau Yaubada yana manuwa sinininila tabutabuna ebaawavelemoena gabameya, ani negenine gaitana Tutulagolota Tabutabu-moena yavuyavuna.** 6 Ada Tutulagolota-nai wagaine anelose-dina adiseveni iyegemona wa yadi vita koyo-moedi nimadiya. Adinuya ani yegayega-moena ke kadu kwayakwaya-moena, ada adibeleta manawadiya ibalawalilivuga ani ibubudi gola wagaine. 7 Ada gaitoma-dina wayawaidiyavo adilaufuli wagaidiya, ani seyana nauwa gola adiseveni giveledi anelose-dina adiseveni seyana seyana. Taide nauwa-dina ani Yaubada yana nuwakoyo lakai-moena givemagadi, Banae gimiyamiya-vagata ke vagata. 8 Ada manuwa tabu gimaga-mowa siyo wagaine, siyo-nai Yaubada yana iwakana mamalina kadu yana toyogina adiiyaiyaya. E ada keke tamo gaito anafata ginaluku manuwa tabu-nai wagaine, analaba aneloseyavo adiseveni yadi vita koyo-moedi adiseveni adietoiwaga iluyabu.

†15:3 Iyeg 15:1, 2Vei 31:30 - 32:43

**15:5 Manuwa sinininila tabutabuna-nai, ani tova tuwai-moena Yaubada Mosese giveimeyena ke meIsileli iyogona yadi tova iwaliwalinau fafali kavovona wagaine. Wada Yaubada yana ebamiya badi adimwatuguya, ada kaduwe manuwa sinininila tabutabuna-nai wagaine meIsileli yadi vebolavoi ialialiyedi ke ina oduodu Yaubada wagaine. Manuwa sinininila tabutabuna-nai ivewagana ‘manuwa sinininila tabutabuna ebaawavelemoena’, faina negenine kabala beyabeyadi iluwei imiyamiya, kabala-dina iawavelemoenayena Yaubada yana veyavo anawai nagona gimiyamiya. (Iyeg 31:18) Manuwa sinininila-nai tabutabuna ebaawavelemoena ani ivegugaiyena malamala fowa analedi foti (440) anafaiweya, analaba Solomoni yana toveya manuwa-mowa tabutabuna iyogona. Ada manuwa sinininila tabutabuna ebaawavelemoena ke aimo manuwa-mowa tabutabuna ani adivegugai seyana. (Iyeg 25:9, daba 26, 27, 35-40, Naba 1:50-54, Ibel 9:1-28)