16
Nauwa adiseveni Yaubada yana nuwakoyo lakaina givemagadi.
1 E aku bonabona lakaina ganogalina giyegemona manuwa tabu wagaine, ani givona anelose adiseveni wagaidiya, givonaga, “Wananau ada Yaubada yana nuwakoyo lakai-moena wa nauwadi adiseveni ani wana biwana babi wagaine.” 2 Ada bana anelose nagona gina yana nauwa gibiwana babi wagaine. Ada badi kaliva-dina kevakeva lakaina manimaninina yana talakili wagaidiya, kadu anakilumina wagaine ioduodu, ani koliya koyo-moedi wa ulolodi ivaidi.
3 Aku anelose anavelu gina yana nauwa gibiwana leyaga wagaine. Ada tova-nai wagaine leyaga gisevedavedama ada givedayaga vaita toalika dayagina anafaiweya, e ada gavana wayawaina leyageya gimiyamiya ani seyana seyana ialika. Keke tamo gavana aimo wayawaina gida miyami leyageya.
4 Aku anelose anaveto gina yana nauwa gibiwana gufa wagaidiya ada tovoga wagaidiya, ada gufa-dina ivedayaga. 5 Aku kadu anelose seyana, banae anaveimeya babi matatabuna anagufa moyaidi gina itaveyabidi, ani ganogalina givona,
“Oye Totunutunugina. Tova malinai O umiyamiya kadu tova tuwaina O umiyamiya.
Oye tabutabu. Ya nuwanuwa matatabuna ani yegayega-vagaidi. Taidei faina biyavo-dina yadi dewa koyodi faidiya uvevonayavugidi tunutunugina ke adilaufata usedi wagaidiya.
6 Faina badiyavo O ya yooyavo tabutabudi ke badi ya falofitayavo ani iluvealikadi ke dayagidi gimadu.
E ada malinai keke tamo gufa faidiya aku au dayaga uveledi inayuga. Taine adilauboda anafaiweya.”
7 Ada ebavebolavoi wagaine bonabona giyegemona ani ganogalina givonavona,
“Ika, Kauveya Yaubada, Oye Totoyogi-vagai. Ya venuwadadana kaliva adilaufata faina ani nuwanuwa velemoena ke tunutunugina.”
8 Ada givona giavaina, anelose anavelaufuli yana nauwa gibiwana kauwana wagaine, ada kauwana wa yana ginaginana lakai-moena kaliva gialaidi vaita ai anafaiweya. 9 Ada kaliva ginaginana-nai toyogina wagaine gialaidi, au Yaubada anayegana ivona awadamanena, Banae-nai yana veimeya wagaine taide vita-dina koyo-moedi iyegemona badi wagaidiya. Keke ida nuwaviladi yadi dewa koyodi wagaidiya, ada keke Yaubada ida awadavadava.
10 Aku anelose anavefaifi yana nauwa gibiwana kevakeva lakaina manimaninina yana veimeya anaebavetoga kaikaiwabuna wagaine, ada maduga-mowa bana yana fafali-nai wagaine giveiveimeya, ani anamatatabuna yuyuvana gikiwafina. Ada anakaliva nigodi ialaegedi adiuloulolo lakaina wagaine, 11 aku Yaubada gabama wagaine anayegana ivona awadamanena adiuloulolo ke adikoliya faidiya. Keke ida nuwavila yadi dewa-dina wagaidiya.
12 Aku anelose anavesikisi yana nauwa gibiwana gufa-nai lakaina anayegana Yufeleitisi wagaine, ada anagufa matatabuna gialina. Gialina ke wai gina kidewedewena e ada kiniyavo adifata inaelai kauwana yana ebalaka anafafali wagaine-deya. 13 Au aluwaluwa bwanebwanenedi aditoto adiita vaita kalakala anafaiweya ani gaitadi. Seyana giyegemona bana umala-nai koyo-vagaina awana wagaine-deya, kadu seyana giyegemona bana kevakeva lakaina manimaninina awana wagaine-deya. Ada kadu seyana giyegemona bana falofita fwayafwaya**Bana falofita fwayafwaya-nai ani kevakeva lakaina manimaninina anavelu. (Ive 13:11) awana wagaine-deya. 14 Taide aluwaluwa koyodi-dina aditoto ani gugai ebameyasidobodobo ifaifaisewadi ke kaliva nuwadi ina vaina. Ada inau babi matatabuna anakiniyavo wagaidiya ke ina vagauwidi inaelai gaviya wagaine. Taine gaviya-nai lakai-moena gina yegemona Yaubada Totoyogi-vagaina yana yadayada lakaina wagaine. 15 Aku yada Kauveya Yeisu givona, “Wana nogalina. Iya ganaelai vaita tokiyafu yana ela anafaiweya, e ada yaku ela wagaine kaliva yaudi gina lovoga.†Mad 24:43-44, Luk 12:39-40, Ive 3:3 Gavega keke ida dauda aku itoletole Iya faikuya kadu adinuya iose-vagaidi,**Vona-nai ‘adinuya iose-vagaidi’ ani vonaluvefosa, ada ananuwanuwa ani yadi dewa iitaitaveyabidi ke ina dewadewa yegayegana e ada keke tamo gaito anafaiweya gina awavekoyoyedi ke gina kivevovomumudi. Faina Yaubada yana kalivayavo adilauboda ina miyamiya wa yadi kidewadewa yana ela faine. ani Yaubada gina awanuwakabubuyedi. E ada keke vaita konekonedi anafaiweya ina nunudadana, ke wa yadi vovomumu aku kaliva ina itavutuvutu.” Taide anafaiweya Yeisu yana ifufu. 16 Aku aluwaluwa koyodi toiye ani inau ada kini-dina ivagauwidi ke fafali seyana wagaine ivagauta. Fafali-nai meIsileli bonadiya ivewagana Amagedoni.**MeIsileli bonadiya yegana-nai ‘Amagedoni’ anakivila ani ‘Megido Oyana’. Wadedeku-deya tova tuwai-moena meIsileli gaviya moyaina ilugaviyadi. (Tovei 5:19, 2Kin 23:29-30)
17 Aku anelose anaveseveni yana nauwa gibiwana mwatugu wagaine, ada manuwa tabu wagaine-deya bonabona lakaina giyegemona Yaubada yana veimeya anaebavetoga kaikaiwabuna wagaine, givona, “Bademowa giavaina!” 18 Ada atunama iatunama, ada atala giluwatala, ke butuna gilunununuga, kadu mabibi lakai-moena gimadu. Tuwai-bulubuluna-deya tova-nai Yaubada kaliva gibubuna ke gielai malinai tova-nai, keke tamo mabibi anafaiweya gidamadu. 19 Melala-nai lakaina anayegana Babiloni**Iyoni melala-nai lakaina giveyeganina ‘Babiloni’ aku velemoena givonaluvefosau melala lakaina Loma wagaine, faina keke nuwanuwana Loma anayegana gina inana. ani yana babi giluyavalina fafali toiye, kadu yoo tulina tulina imiyamiya babi anafafali moyaidi wagaidiya, ani mabibi-nai yadi melala lakaidi giluyaweyawelidi. Ada melala-nai Babiloni wa anayegana lakaina ada anakalivayavo wa yadi koyona moyaina igugugaiyedi, ani Yaubada keke gida venuwavuluye. E ada waini wa veina giveledi inayuna. Taine waini-nai ani Tauna yana nuwakoyo lakai-moena, ada yana veimeya wagaine iyuna. 20 Ada imula seyana seyana gibwavi, ada kadu oya ani keke tamo kaduwe adiebaita gida miyami yadi ebamiya wagaidiya. 21 Ada wei matadi tubutubudi iveaisi ani iobuobu wagabameya-deya, wada vaita kabala ke kaliva ifiyafiyadi. Seyana seyana anavita ani kilo foti faifi (45) anafaiweya. Ada kaliva ivona awadamana Yaubada wagaine, faina wei matadi tubutubudi iveaisi ani gikikivekoyodi. Faina vita-nai koyo-moena ani lakaina kadu koyo-moena.
**16:13 Bana falofita fwayafwaya-nai ani kevakeva lakaina manimaninina anavelu. (Ive 13:11)
†16:15 Mad 24:43-44, Luk 12:39-40, Ive 3:3
**16:15 Vona-nai ‘adinuya iose-vagaidi’ ani vonaluvefosa, ada ananuwanuwa ani yadi dewa iitaitaveyabidi ke ina dewadewa yegayegana e ada keke tamo gaito anafaiweya gina awavekoyoyedi ke gina kivevovomumudi. Faina Yaubada yana kalivayavo adilauboda ina miyamiya wa yadi kidewadewa yana ela faine.
**16:16 MeIsileli bonadiya yegana-nai ‘Amagedoni’ anakivila ani ‘Megido Oyana’. Wadedeku-deya tova tuwai-moena meIsileli gaviya moyaina ilugaviyadi. (Tovei 5:19, 2Kin 23:29-30)
**16:19 Iyoni melala-nai lakaina giveyeganina ‘Babiloni’ aku velemoena givonaluvefosau melala lakaina Loma wagaine, faina keke nuwanuwana Loma anayegana gina inana.