Timoti Yana Leta Anavelu Paulo Givetokilumina
Kivemala
Yeisu valeyana analaumamala faina Paulo Loma wagaine deliya ise-vagilena, ada gimiyamiya aku Timoti yana leta anavelu givetokilumina. Yana vetokiluma anatova-nai wagaine gilutovonina analuvealika anatova givelilivana.
Timoti tamana kwana Giliki aku inana badi vine Isileli, adiyegana Yunisi. Ada banae Paulo anatoleme, tainei Efeso wagaine tovetumaganayavo giitaveyabidi, kaduwe bana vaita Paulo natu-moena Yeisu yana yoo wagaidiya. Taidei leta-nai wagaine Paulo tauna analutovona ke yana nuwanuwa lakaidi giinanadi Timoti wagaine, ada kaduwe givonavagadonena ke veumagigi wagaidiya gina atuvefaila ada vewala tunutunugina wagaine gina luveyabina.
Timoti anavesiule ke anavona asevatu. (1:1-18)
Vetolugaviya iwakana Yeisu Keliso faine. (2:1-13)
Gavatogugai Yaubada giawaveiwakanena? (2:14-26)
Tova anaebalauyabu wagaine kaliva inakoyo-mowa. (3:1-9)
Timoti anaveimeya. (3:10 - 4:5)
Paulo tauna analutovona faina giifufu, ada yana vetalakafoi. (4:6-22)
1
1 Iya Paulo, Yeisu Keliso yana afositolo Yaubada yana nuwanuwa wagaine. Tuwaina givonadabadaba vaita gavega Yeisu Keliso nodi ina veseyana, ani biyavo-dina yawai-vagata ina nuwagana. Ada tainei faina givenuwadadaneku ke giimiliku ada valeyana gana awatalatalainena. 2 Siule natu aseaseku Timoti. Yaubada Tamada kaduwe yada Kauveya Yeisu Keliso yadi nuwadogeya ina lemelemeni ke ina nuwakalikaliyeni, ada kaduwe asease ina kikiveniwalovina.
Timoti anavona asevatu.
3 Timoti, gavesiule lakaina Yaubada wagaine o fainiya. Kamakuweyavo nagona ani Banae wagaine iawaegedi anafaiweya, Iya kaduwe gaawaegeku ke wa nuwafouku yegayegana gafaifaisewa Bana faine.†Gug 24:16 E ada gavesivesiule Banae wagaine aku tova moyaina yadayada ke bogi gaveoveola fainiya. 4 Tuwaina gamadusegeni aku utagiya ani nuwaku ginauyena, e ada nuwanuwaku lakaina gavatoveya gada itani ada gada vemwamwala. 5 Ya vetumagana velemoena Keliso wagaine ganuwaududuna, anafaiweya nagona ina-moe Yunisi†Gug 16:1 ke tubu vavine Loise, ani badi iawaegedi velemoena Keliso anavetumagana wagaine. E ada ganuwaveyalaina oye kaduwe vetumagana-nai wagainiya gimiyamiya. 6 Tainei faina nuwa gana talafolena vaita anuwakabubu Yaubada giveleni yana gugai faina ani una atubodana ada keke ginawe, e ada una vetoyogina aveimeya giveleni anafaiweya. Tainei nuwakabubu-nai unuwagana tova-nai nimaku gasedi kuluwaniya ada gaveoveola fainiya. 7 Una atuatubodana faina Yaubada Aluwaluwa Tabuna keke gida veleda ke kana matauta o kai kana vovomumu, aku aiyada Banae toyogina giveleda ke kana asevatu, kana nuwakabubu velemoena, ada taudeyavo yada nuwanuwa kana awatadi.†Lom 8:15
8 Taidei faina keke una vovomumu yada Kauveya anaawatalatalaina faine.†Lom 1:16 Ada kaduwe Iya yana kaliva gamiyamiya deli wagaine ani keke una vovomumuyeku. Aku aiyada gavavita o kai uloulolo una nuwagadi Yeisu anavaleya iwakana faina, ani tauni una awaegeni wagaidiya e aku Yaubada yana toyogina wagaine afaiweya vita-dina una waidi. 9 Yaubada Banae gikibababaleda koyona wagaine-deya, ada gidouweda ke wa yada dewa matatabuna yegayegana kana miyamiya Banae yana yoo tabutabudeyavo. Ada kibababala-nai vuvuna ani keke yada gugai faina aku Bana Tauna nuwanuwana, kaduwe Banae Tonuwadoga faina. Tuwai-bulubuluna tova aimo keke gida vevuvu, Banae yana nuwadoga wagaine bademowa-deya gimadu venuwadadanena Keliso Yeisu gina imilina babi taidei wagaine ke gina kibababaleda.†Efes 2:8-9, Tai 3:4-5 10 E ada tova malinai adaTokibababala Yeisu Keliso yana obuela wagaine, tainei Yaubada yana nuwadoga gikiveyegemonina ke adafaiweya kana itana. Bana Yeisu Keliso alika yana toyogina giyaweli-yabuna, ada kibababala anavaleya iwakana wagaine yawai-vagata anawai giawamogatalena, ke vovoda evagudi keke ina abudala aku wa vovoda kanamiya-vagata.†Ibel 2:14-15 11 Tainei valeya iwakana faina, Yaubada givenuwadadaneku ke gana vetoawatalatalaina ke gana veafositolo, ada kaduwe gana vetovewala.†1Tim 2:7 12 Taidei vuvuna-nai faine gauloulolo anafaiweya. Aku keke maita gada vovomumu, faina Banae-nai gavetumaganena ani gaalamanena, ada ganuwaveyalaina vaita akuveimeya giveleku ani Banae anafata gina itaveyabina, ke yana itaveyabina faine anafaiweya gina naunauwena analaba ginayewa-vagilena. 13 Ada vewala-dina tunutunugina unogalina wagaikuya ani una luluveyabina wagaidiya, wada ya ebaita. Ada wa ya vetumagana ke wa ya nuwakabubu Yeisu Keliso wagaine taidei vewala tunutunugina una vevewala kaliva wagaidiya.†Tai 1:9 14 Una nuwaududuna tainei valeya iwakana Yaubada giveleni, ada keke una sivedavedama. Aluwaluwa Tabuna-nai gimiyamiya wagaideya ani gina lemeni ke valeya-nai iwakana Yaubada giveleni ani una itaveyabi-dewedewena, e ada ginamiya anafaiweya tova-nai unuwagana.
15 Bademowa ualamanena vaita tovetumagana moyaidi Eisiya anafafali wagaine ani idibusoyogeku ke imaduyabuyabuku, ada kaduwe yoo-dina wagaidiya kaliva adiselu Figelio ke Elimogi nodi.
16-17 Aku Onesifolo yana manuwa anatomiya nodi ani Kauveya gaveolena ke gina nuwakalikaliyedi. Faina tova-nai giyegemo Loma wagaine, au gilele tufotufona fafali matatabuna wagaidiya analaba ginuwagaku. Ada auwe Iya deli wagaine gamiyamiya nonogana keke faikuya gida vovomumu, aku tova ke tova gielaela gimadumadubodaku ke nuwaku gikivemwamwalina. 18 Taidei faine gaveola Kauveya wagaine ke gina nuwakalikaliyena tova-nai kaliva matatabuna Kauveya gina vevonayavugidi wagaine. Ada o tauni ualamane-dewedewena gavaiyei wai wagaidiya gilemeku tova-nai gamiyamiya Efeso wagaine.