1 Aku imiyavo ani tova giavaina muliya-yo wavetumagana Keliso wagaine, imi vaita toalika anafaiweya, faina Yaubada yana veimeya wayaweyawelina ada dewa koyona wagaine waawaawaegemi.†Kol 2:13 2 Yami miyami wagaine babi ananuwanuwa wamulimuliyena ada Seitani wamatawalewaleyena, banae aluwaluwa bwanebwanenedi yadi kaiwabu giveiveimeya mwatugu wagaine. Banae aluwaluwa-nai malinai gifaifaisewa badi gavega Yaubada yana veimeya idibusoyogena ani wagaidiya.†Efes 6:12 3 Tuwaina ide matatabuda kaduwe togadibudibusoyoga-dina adiyoo anakalivayavo. Taudeyavo kaawaegeda vovo ananuwanuwa wagaine, e ada au tova moyaina koyona kafaifaisewadi anafaiweya vovoda ananuwanuwa ada nuwada givaina.†Tai 3:3 Yada tubuga wagaine-deya ide tova moyaina kakoyokoyona, e ada adalauboda Yaubada wa yana nuwakoyo gina vematavulogida, anafaiweya togadibudibusoyoga moyaidi. 4 Aku Yaubada Banae Tonuwakalikali velemoena, ada ginuwakabubuyeda lakai-vagaina faina, 5 Keliso alikeya gisiveyawana anafaiweya, ide alialikada gisiveyawada ke Keliso nodi wayawaida evaguna kamiyamiya. Velemoena yada dewa koyona faina, ide vaita alialikada anafaiweya kamiyamiya nonogana Yaubada yawaida evaguna giveleda. Yaubada yana nuwadoga keke kanavona! Waitana, yana nuwadoga wagaine kibababala kanuwagana, 6 ada ide Yeisu Keliso nodi kaveseyana faina, Yaubada gisivemididi-tamwaida Keliso nodi, ada Banae nodi giveiyotoda gabameya. 7 Taidei anafaiweya Yaubada ide Keliso nodi giveiyoto-tamwaida e ada tova gielaelai yana nuwadoga lakai-vagaina ide wagaideya gina seyegemonena. Ide giitanuwakabubuyeda ke Yeisu Keliso nodi kaveseyana faina, yana nuwadoga gavatubuga! Keke adafaiweya kana etowava. 8 Faina Yaubada wa yana nuwadoga gilememi e ada yami vetumagana wagaine amikibababala wanuwagana.†Lom 3:24, 2Tim 1:9 Aku keke taumiyavo nuwamiya vetumagana gida yegemo, au vetumagana-nai ani aminuwakabubu Yaubada givelemi. 9 Keke taumiyavo yami vediwe o kai yami gugai wagaine amikibababala wada nuwaga, aku Yaubada yana nuwakabubu wagaine wanuwagana.†Tai 3:5 E ada keke tamo gaito wa vuvuna ayo gina gakaikai, ginavona, “Iya tauku yaku gugai wagaine akukibababala ganuwagana.” 10 Faina ideyavo ani Bana Yaubada nimana anaiyaiyaya. Ide gavana kanagai? Yaubada gibubuda ada kaveevagu Yeisu Keliso wagaine ke gugai iwakadi kana seyegeyegemonedi yana nuwanuwa anafaiweya.†Tai 2:14 Tainei gugai-dina ani tuwai-vagaina Yaubada gikidewadewa-vagaina ke yada miyami wagaidiya kada dewadewa anafaiweya.

11 Tainei faina wana nuwaududuna yami miyami tova tuwaina wagaine. Imiyavo ani keke wada tubuga Isileli anaunuma wagaine, e ada badi meIsileli tomogolota anagiduwa imulimuliyena ani ivewagami ‘imi tomogolota anagiduwa keke wada muliye’.†Eba 17:10-27, Iyeg 12:48, Luk 1:59 ke anaailabama adiebakivemala Aku ida iyaiyaya-nai vovo bubuna bwatana anatomogolota ani wada au kaliva taudiyavo nimadiya ivevegugaiyena. Vovo wamelaleya isivedavedamena aku keke asease. 12 Yami miyami tuwaina keke nuwami ginavulu. Imi keke Keliso wagaine wada luveyabina, ada keke nodi wada veyavo. Kaduwe imi keke Yaubada yana yoo anafaiweya meIsileli. Tuwai-moena ani ime meIsileli Yaubada givenuwadadanema, ada yana veyavo anawai anavonadabadaba gisena wagaimeya. Aku imi keke taidei anafaiweya gida veyavoyemi. Wamiyamiya idedeku babi wagaine aku keke Yaubada wadaalamane, kaduwe keke wada vetumagana vaita kibababala wana nuwagana. 13 Aku imi nagona wamiya atuwada Yaubada wagaine-deya ani tova malinai Keliso dayagina gimadu faina, Yaubada gialiyemi Tauna lilivane e ada Yeisu Keliso nodi waveseyana. 14 Faina Banae Tauna adaTokukuya, ada ime meIsileli kaduwe imi keke meIsileli aku Keliso givagauwida ke nodi kaveyoo seyana. Ime amaveimeya ke amaawata Mosese gisedi ani imi keke wada itaveyabi faina, kavenibaina. E ada vaita kali gida miyami nefanideya ke givemiyadakada yoo iluwei anafaiweya. Tainei anafaiweya kavevenibaina aku Keliso yana alika wagaine venibaina anakali giyawelina. 15 Banae vovona giawaegena wagaine, Mosese yana veimeya giyawelina e ada ime meIsileli ke imi keke meIsileli kana veyoo seyana.†Kol 2:14 E ada Keliso yana gugai wagaine, ide yoo iluwei aku yoo seyana evaguna katubuyegemona, ada taidei anafaiweya kukuya wagaine kana miyamiya. 16 Tuwaina yoo iluwei kavenibaina imeyavo ke imiyavo, aku Keliso yana alika kelose wagaine yoo-dana iluwei giveseyana-vagileda Yaubada nodi, e ada ideyavo yoo seyanaga ani Banae nodi kaveyoo. E ada yada venibaina-nai givaiyavulena.†Kol 1:20 17 Ada Keliso gielai babi taidei wagaine ke kukuya anavaleya iwakana gilumamalena imi keke meIsileli ani Yaubada wagaine-deya wamiya tabae-mwane, ada kaduwe ime meIsileli wagaimeya ani au Yaubada lilivane-mwane amiyamiya. E, moyaida wagaideya valeya-nai gilumamalena. 18 Keliso Banae yada wai gifaisewana e ada Banae wagaine yada yoo iluwei adafaiweya kana yegeyegemona Tamada matane. Imeyavo ke imiyavo ani Yaubada Aluwaluwana seyana-nai nuwainagedeya gimiyamiya ayo Tamada matane kayegeyegemona. 19 Taidei anafaiweya Keliso givetutamwaida kaveseyana faina, imi keke vaita aimo imi awaawala anafaiweya, aku aiyada imiyavo bademowa waluku Yaubada yana gabu anakalivayavo wagaidiya. E ada imiyavo ke imeyavo ani matatabuda yana kaliva tabutabudeyavo nodi kamiyamiya.

20 Ide Yaubada yana yoo ani vaita yana manuwa. Banae Yeisu Keliso Tauna manuwa anaunututu, ada ime afositolo ke badi falofitayavo ani manuwa-nai anaogola.†Mad 16:18, 1Kol 3:11 Ada imi gavega Yaubada yana yoo, imi manuwa-nai luluna anafaiweya giiyogoyogonemi. 21 Ada Banae unututu-nai wagaine Yaubada manuwa-nai matatabuna gietovefovefoseda ke manuwa-nai giveiveinala e ada givevemanuwa tabutabuna yada Kauveya yana veimeya dibune.†1Kol 3:16, Kol 2:19 22 Ada kadu imiyavo Keliso nodi waveseyana ani Yaubada giyogoyogomi, e ada ime moyaima nodi giyogoyogoda seyana ke ide moyaida yana ebamiya. E ada ide wagaideya Banae gimiyamiya Aluwaluwa Tabuna wagaine.†2Kol 6:16