3
MeKolinita yadi dewa iluvemogatalina vaita yadi nuwanuwa tuwaina wagaine-deya aimo ginagonagoyedi.
1 Tubuiyakuweyavo, tuwaina Iya nodi kamiyamiya wagaine, keke akufaiweya gana ifufuyemi anafaiweya kaliva-dina kumagidiyavo gaifuifufuyedi, badi Aluwaluwa Tabuna ginagonagoyedi. Keke. Aku aiyada gaifufuyemi anafaiweya vaita kaliva iawaawaegedi taudiyavo yadi nuwanuwa gaga wagaidiya aku keke Yaubada yana nuwanuwa wagaine. Imiyavo au anafaiweya vaita biyabiyama kabikabisodi Keliso anaalamana faina. 2 Yaku vewala wagaimiya ani anafaiweya susu-nai bebeta isususuna. Keke aa kwakwana lakaidiyavo ikani anafaiweya yaku vewala wagaine gada vekanimi, faina keke amifata wanavai. Aku kaduwe malinai aimoina aa kwakwana keke amifaiweya,†Ibel 5:12-13 3 faina imi aimo taumiyavo yami nuwanuwa gaga wagaine waawaawaegemi. Taumiyavo yami dewa wana nuwenuwedi. Tufomi aimo wagaveuveumagigi, wa yami debai toyoga taumiyavo yami nuwanuwa waimanimaniniyena, kadu nodi wagavekwavekwageya gaitoma tulina tulina faidiya. Taine yami dewa-nai giivemogatalina vaita aimo taumiyavo yami nuwanuwa gaga ginagonagoyemi, ada imi wadewadewa anafaiweya kaliva-mowa, badiyavo Yaubada keke ida alamane. 4 Faina tova-nai kaliva seyana ginavona, “Iya Paulo yana kaliva,” ada kadu kaliva seyana ginavona, “Iya Apolosa yana kaliva,” ani imi wadewadewa anafaiweya kaliva-mowa yadi dewa.†1Kol 1:12
Moyaidi gavega Kauveya yana faisewa ifaifaisewana ani badi au Bana yana togugaiyavo.
5 Apolosa banae vaita gaito? Ada Iya Paulo vaita gaito? Ida ime amaiselu au togugai, ada wagaimeya-deya Keliso wavetumaganena. Ime seyana seyana amaveimeya agugaiyena anafaiweya Kauveya givelema. 6 Iya gabakulina Yaubada yana vona aseasemiya vaita waifei anafaiweya,†Gug 18:4-11,24-28 ada Apolosa banae gikioioidi, aku Yaubada ani Banae gikivetabodi. 7 E ada gaito waifei gibakubakulina ada gaito gikioioi, ani badi keke adiyegana lakaina. Aku Yaubada Banae aa gikikivetabona ani Banae-nai anakaibe anayegana lakaina. 8 Gaito gibakubakulina ada gaito gikioioi ani badi togugai adiselu, seyana keke gida tubusege tubuiyana. Au adiyegana seya-moena. Ada seyana seyana Yaubada gina fatana yana gugai anafaiweya. 9 Ime amaiselu Yaubada nodi agugugai. Ada imiyavo ani vaita yana bakula, kadu vaita yana manuwa giyogoyogona.†Efes 2:22
Badi gavega Yaubada yana yoo ikivetuvetunudi Bana yana vona wagaine, ina vaita manuwa iyogoyogona Yaubada faine.
10 Ika, imiyavo yana manuwa, aku Iya Yaubada yana nuwadoga wagaine akuvutuga giveleku manuwa iyogoyogona faina. E ada vaita tonuwauya velemoena manuwa anaavutuwa givemididina anafaiweya, Iya amiiyogona gavebutuna. Ada kadu kaliva iela imuliyeku ke manuwa iyogoyogona avutuwa-nai tabone. Aku toiyogona-dina gavega iiyogona avutuwa-nai tabone, ani gilubodana seyana seyana anaiyogoyogona gina itaveyabina. 11 Faina avutuwa Yaubada bademowa gisei gimidimididi ani au Yeisu Keliso.†1Pi 2:6 E ada keke tamo gaito anafata mali avutuwa gina vemididi. 12 E ada kai tamo gaito manuwa gina iyogoyogona avutuwa-nai tabone ada gola, siliva, o kabala fatadi lakaidi gina iyogonayedi, wada iwakana. Aku kai tamo gaito gaitoma-kavokavovo gina iyogonayedi anafaiweya ai-mowa, laimwagu, o tabugala lukuna, aga gavaiyamu wanuwanuwa? 13 Toiyogona seyana seyana yana faisewa aimo mogamogatalina. Faina yadayada-nai lakaina wagaine Yaubada toiyogona seyana seyana yana faisewa gina itavenuwadadanena, ada ai alalata wagaine faisewa-dina gina alailuvaluvadi. E ada ai-nai gina luvemogatalina kai toiyogona-nai yana iyogona iwakana o kai koyona. 14 Kai gavana kaliva giyogona avutuwa-nai tabone ani keke ai alalata ginaalai aku gina velubwaibwaina, aga toiyogona-nai analaufata iwakana gina nuwagana.†1Kol 4:5 15 Aku kai yana faisewa-nai keke wa anaiwakana ada ai gina ala-yabuna, aga toiyogona-nai aseasena gina tagiya lakaina. E aku banae tauna ani tovetumagana faina e ada auwe wa anakibababala ginamiya iwakana, aku anafaiweya vaita kaliva wa nima kagekagena giotaota aiyabeyabela wagaine.
16 Tubuiyakuweyavo, gavaiyamu, keke wada alamane? Imi moyaimi nodi ani Yaubada yana manuwa tabu, ada Aluwaluwana wagaimiya give ebaga.†1Kol 6:19 17 Kai tamo gaito Yaubada yana manuwa tabu gina luyavulena, aga kaduwe Yaubada kaliva-nai gina luyavulena. Faina Yaubada yana manuwa ani tabutabuna, ada imi taumiyavo ani manuwa tabu-mina.
18 Wana itaveyabimi. Keke iwakana taumiyavo wana fwayanegenegemi. Kai tamo gaito wagaimiya ginuwanuwa vaita banae tonuwanuwa velemoena babi taidei anaalamana wagaine, aga gilubodana banae nuwanuwa-nai gida vedomobubusena aku tauna gida kiobuyena ada gida veanafaiweya banae kaliva kwavakwavana. Taidei wagaine banae aimo gida vetonuwanuwa iwakana velemoena Yaubada matane. 19 Faina babi taidei ananuwauya Yaubada matane ani kwava velemoena. Anafaiweya Buki Tabu wagaine givona,
“Banae Yaubada badi tonuwanuwa velemoena babi taidei anaalamana wagaine, ani
givevedaidi taudiyavo yadi edaeda vefwayafwaya wagaidiya.” †Iyob 5:13
20 Ada kaduwe vona seyana givona,
“KAUVEYA gialamane-yabuna badi tonuwanuwa velemoena yadi nuwanuwa.
Au Banae wagaine ani nuwanuwa kavokavovo.” †Sam 94:11
21-22 Taidei faina keke tamo gaito wagaimiya gida gakaikai amitonagona seyana gimulimuliyena faina. Keke wadavona, “Iyayeku ani Paulo yana kaliva, e ada akuyegana lakaina,” kadu keke wadavona, “Iya Apolosa yana kaliva, e ada akuyegana lakaina.” Kai Iya Paulo, o Apolosa, o Pita, ime moyaima ani imi faimiya. Kadu anafaiweya babi taidei, o kai yawaimi-nai wamiyamiyanena, o kai yami alika, o kadu gaitoma-dina imiyamiya malinai anatova-nai o kai tova gielaelai wagaidiya, ani gaitoma-dina matatabuna taidei ani imi faimiya. 23 Ada imiyavo ani Keliso faine, ada Keliso Banae Yaubada faine.