18
Paulo gilumamala melala Kolinita wagaine.
1 Ada Paulo bademowa giifufuyabu Aliyofago anayoo wagaidiya, muliya gikidewadewa ke Atenisi gisegena aku ginau melala anayegana Kolinita wagaine. 2 Ada wadedeku-deya kwana Isileli ginuwagana anayegana Akwila. Banae fafali anayegana Fonitasi wagaine gitubuga, ada vavinena adiyegana Pilisila. Adiselu fafali Itali-deya evagudiyavo ielai Kolinita wagaine. Itali imadusegena faina Kini Kolodiyasi giveimeya ke meIsileli moyaidi fafali Itali anamelala lakaina Loma wagaine-deya ina awala-yabu. Ada Paulo ginau Akwila vavinena Pilisila nodi gina madubodadi. 3 Ada badiyavo yadi gugai anafaiweya kaduwe banae yana gugai, kevakeva bubudi ionaonadi manuwa sinininila faidiya. E ada nodi imiyamiya aku ionaonaga. 4 Ada Sabate seyana seyana wagaidiya ginaunau meIsileli yadi manuwa ebavewala wagaine, ada meIsileli kaduwe badi keke meIsileli kavewagadi meGiliki ani gigaluvaluva nuwadi gina kanina e ada Yeisu ina vetumaganena.
5 Aku tova-nai Sailasi ke Timoti Masedoniya-deya ielai Kolinita wagaine, Paulo faisewa seya-moena gigugaiyena, ani tova moyaina valeya iwakana gilulumamalena meIsileli wagaidiya. Giawatalatalaina vaita Yeisu Banae Mesaiya. 6 Aku badi ivenibainena ke iawavekoyoyena faina, Paulo ananuya gisibutuna matadiya ada givonedi, “Kai keke yawai-vagata wana nuwaga, au ina taumiyavo amivita. Keke Iya akuvita. Tova malinai ke gina naunau ani gananau badi keke meIsileli wagaidiya gana lulumamala.” †Gug 13:46 7 Ada au Paulo manuwa ebavewala wagaine-deya giyegemo aku ginau Taito Yusito yana manuweya. Banae keke meIsileli aku Yaubada wagaine gioduodu, ada yana manuwa ani manuwa ebavewala lilivane. 8 Ada kaliva seyana anayegana Kilisifasi, banae manuwa ebavewala anatonagona, ani banae ke kaduwe yana manuwa anatomiyayavo matatabudi nodi Kauveya ivetumaganena. Ada kaduwe meKolinita tufona moyaidi Paulo yana laumamala inogalina ke ivetumagana ada ibabitaiso.
9 Ada bogi seyana wagaine Paulo gienoita, ada anaenoita-nai wagaine Kauveya givonena, givona, “Keke una matauta aku una atuvefaila ke tova moyaina una lulumamala. Keke una ilova. 10 Faina oye Iya nodi kamiyamiya, ada keke tamo gaito gina mununi. Faina taidei melala-nai wagaine yaku kalivayavo moyaidi imiyamiya.” 11 Ada Paulo vaikoi eitini (18) Kolinita gimiyamiya aku Yaubada yana vona givevewala kaliva wagaidiya.
MeIsileli igaluvaluva ke Paulo ina vevonayavugina.
12 Aku tova-nai Galiyo givetoveimeya fafali Akaiya wagaine, meIsileli ivagauta ke Paulo ikiveyabina ada ebavevonayavuga wagaine inauwena. 13 Ada Galiyo ivonena, ivona, “Kaliva taidei tova moyaina kaliva gisibalebaledi e ada mali waiya ina oduodu Yaubada wagaine, tayuwe wai-nai yama veimeya giyaweyawelina.”
14 Ada Paulo gidavona aku Galiyo gimaduvona meIsileli wagaidiya, givona, “Imi meIsileli, kai kaliva taidei tamo gaito wagaine gida kiyafu o kai gida luvealika, gida lubodaku yami vona gada nogalina. 15 Aku imi yami vona ke yegana tulina tulina faidiya wagavekwavekwageyayedi, ada kaduwe taumiyavo yami veimeya gaga wagavekwavekwageyayena. E ada au imi taumiyavo wana kivetuvetunugina. Ida imi yami gaitoma faina, keke nuwanuwaku gana vevonayavuga.” 16 Ada giveimeya ke ivenegadi iyegemona ebavevonayavuga wagaine-deya. 17 Aku kaliva seyana anayegana Sosideni, banae manuwa ebavewala anatonagona, ani ikiveyabina ada ebavevonayavuga wadebaine ilumalimaliwavuna. Aku Galiyo keke faine gida nuwanuwa.
Paulo giyewana Anitiyoki wagaine.
18 Ada Paulo wadedeku Kolinita wagaine tovetumagana nodi imiya maita yadayada moyaina, ada muliya gisegedi. Ada giobu Senikeliya ke waka wagaine ginayage aku nagona kuluwana gikolina, faina bademowa Yaubada wagaine givonadabadaba e ada taidei vonadabadaba-nai anaiyaiyaya giluyabuna. Muliya tubuiyana Akwila ke vavinena Pilisila nodi waka wagaine iyage ke itauya Siliya faina. 19 Ada aimo melala seyana anayegana Efeso wagaine iluku, ada wadedeku-deya iobu ada Pilisila ke moganedi Akwila imiya aku bana Paulo ginau meIsileli yadi manuwa ebavewala wagaine giluku ada nodi iveifuifufu. 20 Ada badiyavo Paulo iveolena ke nodi inamiya maita tova manamanawena, aku givekeke. 21 Aku yana tauya wagaine givonedi, givona, “Kai Yaubada nuwanuwana,†Iyem 4:15 aga aimo gana yewaelai imi wagaimiya.” Ada gina waka wagaine giyage-vagila Efeso-deya ada inau. 22 Sisalia iluku ada wadedeku Paulo giobu ada gilaka Yelusalema ke tovetumagana adiyoo nodi ivetubuiyana, ada muliya ginau Anitiyoki.
23 Ada Anitiyoki wagaine gimiyamiya maita tova manamanawena, muliya kaduwe gimididi ginudadana ginau Galetiya ke Filidiya adifafaliya. Ada melala seyana seyana wagaidiya Yeisu yana tonogalayavo gimadumadubodadi, kaduwe gikikivetoyogidi ke tova moyaina Yeisu ina vetuvetumaganena.
Apolosa gilumamala Efeso ke Akaiya anafafali wagaidiya.
24 Aku kwana Isileli seyana, anayegana Apolosa,†1Kol 3:5 melala Efeso wagaine gielai. Banae melala lakaina anayegana Alekisanidia wagaine gitubuga, ada bana tolaumamala iwakana kaduwe Yaubada yana Veyavo Anawai Tuwaina anaBuki gialamane-dewedewena. 25 Ada Kauveya yana wai wagaine gisikulu, ada wa yana idibudibumwaiga gilulumamala ke Yeisu valeyana giifuifufuyena tunutunugina. Aku babitaiso Yeisu anayeganeya ani keke gida alamane, aku babitaiso-nai Iyoni gifaisewana†Gug 19:3-4 gaga gialamanena. 26 Ada Apolosa givebutu manuwa ebavewala wagaine wa yana asevatu gilumamala. Aku Pilisila ke Akwila inogalina wagaine, ivagaule inauwena yadi manuweya ada Yaubada yana wai aimo keke gida alamane-dewedewe faina ikivetuvetununa.
27 Ada tova seyana Apolosa nuwanuwana ginanau fafali Akaiya wagaine, e ada tovetumagana ikiveasevatuna ke fefe ivetokilumina gina nauwena tonogalayavo Akaiya wagaine ina sivaivaina faina. Tova-nai giyegemona wadedeku, badiyavo bademowa Yeisu ivetumaganena Yaubada yana nuwadogeya ani Apolosa gilemedi lakaina. 28 Faina kaliva matadiya Apolosa meIsileli nodi ivevonavona aku yana vona wagaine gitoyogisegedi, ada Buki Tabu wagaine gikivemalidi ke givewaledi vaita Yeisu ani Banae velemoena Mesaiya, Venuvenuwadadanina.†Gug 9:22