1 Aku tubuiyakuweyavo, kaduwe ganavona. Kai tamo gaito imi tovetumagana wagaimiya tubuiyana nodi ina gavekwavekwageya, ada gavaiyamu-yo gisisidamane ada tubuiyana-nai ginaunauwe vonayavuga faine babi anakalivayavo ina vevonayavugidi, ani badi keke ida alamane Yaubada? Ina keke maita gida luboda. Tainei vita-nai ida nauwena Yaubada yana kaliva tabutabudiyavo wagaidiya, e ada badi ida kivetunugina faidiya. 2 Kai keke wada alamane ide Yaubada yana yoo tabutabudeyavo ani adaveimeya aimo babi anakalivayavo kana vevonayavugidi? E ada kai imi wagaimiya badi adivevonayavuga ina nuwagana, aga gavaiyamu? Keke amifata vita kabisodi amimwatuguya wana kivetunudi, aiyo? 3 Velemoena, ideyavo ani aneloseyavo kana vevonayavugidi. E ada kai taidei anafaiweya, aga imi amifata-mowa wana vevonayavuga gavekwavekwageya-dina yada miyami wagaidiya. 4 E ada kai yada miyami anagavekwavekwageya-dina iyegeyegemona amimwatuguya, ani gavaiyamu-yo wavai wanaunauwedi tovevonayavuga badi keke tovetumagana wagaidiya? Badi keke wa adiyegana Yaubada yana ekalesiya wagaine nonogana au nimadiya wasesedi. 5 Taidei anafaiweya gavona ke wana vovomumu. Taumada kaliva tonuwanuwa velemoena seyana gida miyamiya amimwatuguya, e ada anafata tubuiyamiyavo yadi gavekwavekwageya gida kivetununa. 6 Aku taumada tovetumagana seyana tubuiyana yana koyona faina gisimana kabemali wagaine, ada au badi keke tovetumagana aku wagaidiya inauwena ke ivevonayavugina. Tainei keke gida luboda. 7 Kai imi taumiyavo wavevevonayavuga ani keke iwakana Yaubada matane, e aku vaita Keliso anamuliya faine velemoena wakabekabebena. Aku dewa iwaka-moena ani kai tovetumagana gifwaya wagaimiya ada yami giba giyaudi-kavokavovo, aga au anauloulolo-nai wana atuvefailena.†Mad 5:39-40 8 Aku keke wada dewadewa iwakana. Imi taumiyavo wagugai koyona tubuiyamiyavo wagaidiya ada yadi giba wayaudi-kavokavovo. Badi tubuiyamiyavo nonogana au dewa-dina wagugugaiyedi wagaidiya. 9 Gavaiyamu, kai keke wada alamane? Badi gavega tova moyaina dewa koyodi ifaifaisewadi, ani keke-mowa inaluku Yaubada yana ebaveimeya wagaine. Keke vefwayafwaya wana vevetumagane e ada wana nuwanuwa sidamana. Badi gavega vovodi iawaawaege-kavokavovodi, ada badi yaubada fwayafwaya isesedi wai inagona aseasedi wagaidiya, ada badi toudoudo, ada badi kaliva ke kaliva ivetuvetubo, 10 ada badi tokiyafu, ke badi aseasediya iamoumoula, ke badi toyuga faila tova moyaina ivekwavakwava, ada kaliva gavega vona koyona ivonavonayena kaliva wagaidiya, ada gavega toyaudi-kavokavovo, ada matatabudi kaliva taidei anafaiweya ani keke seyana ginaluku Yaubada yana ebaveimeya wagaine.†Efes 5:5, Ive 22:15 11 Tuwaina, tufomi kaduwe dewa-dina anafaiweya wadewadewayedi. Aku yada Kauveya Yeisu Keliso anayeganeya Yaubada Aluwaluwana wagaine gikiveyegayeganemi, gikivetabumi, ada giawaveiwakanemi ke gisemi yegayegamiyavo Tauna matane.†Tai 3:3-7

12 Kaliva tufodi ivonavona taide anafaiweya, ivonaga, “Dewa moyaidi ani Iya wa yaku veimeya ke gana gugaiyedi. Keke adiawata aku iwakana matatabuna.”

Aku Iya gada lufata, gadavona, “Ina iwakana, aku keke dewa moyaidi wagaidiya iwakana kana nuwaga. Ada kaduwe keke tamo gavadewa gana awaege ayo gina vetoveimeya wagaikuya e ada keke akufaiweya ganasege.”

13 Ada kaliva tufodi ivonavona taide anafaiweya, ivonaga, “Aa ani bana kamoda faine, ada kamoda-nai aa faine. Ada aimo tova-nai Yaubada vovo evaguna gina veleda, gaitoma-dina iluwei ina avaidi. E ada gavadewa kagugaiyena vovoda wagaidiya, ina babi anagaitoma-kavokavovo.”

Aku Iya gada lufata taidei anafaiweya. Vovoda keke ida miyami e ada kana awaawaege-kavokavovodi, keke-mowa.†1Tes 4:3-4 Bana vovoda gimiyamiya e ada wagaidiya Kauveya yana nuwanuwa kana mulimuliyena. Ada Kauveya ani vovoda giitaitaveyabidi. 14 Waitana, Yaubada yana toyogina wagaine yada Kauveya gisivemididina alikeya, ada ide anafaiweya kaduwe aimo gina sivemididida alikeya.†Lom 8:11, 2Kol 4:14 15 Gavaiyamu, kai keke wada alamane? Moyaida Keliso nodi kaveseyana ani Banae ide nodi anafaiweya vovo seya-moena. E ada gavaiyamu, analauboda talai seyana Keliso vovone kanavai kana tubona wai dobona anavavine vovona wagaine ke nodi ina vevovo seyana? Keke, keke-mowa.†1Kol 12:27 16 Wana nuwenuwena. Kai gavakaliva gitubo wai dobona anavavine nodi ani bademowa ivevovo seyana. Vona bademowa ivetokilumina givona, “Adiselu ina vevovo seyana.” †Eba 2:24 17 Aku gavakaliva Kauveya nodi itubo, ani bana kaliva-nai aluwaluwana ke Kauveya Aluwaluwana ivealuwaluwa seyana. 18 Taidei faina koyona-nai vovo anaawaega-kavokavovo ani wana maduota wagaine. Faina koyona moyaina kaliva igugugaiyedi ani anafaiweya imiyamiya vovodi wamelaleya. Aku kai vovo anaawaega-kavokavovo ina dewayena, aga idewa koyona taudiyavo vovodi wagaidiya ke ikikivekoyodi. 19 Nuwami gida malina. Vovomi ani Aluwaluwa Tabuna yana manuwa tabu, Aluwaluwana-nai Yaubada givelemi ke gimiyamiya negenimiya.†1Kol 3:16, 2Kol 6:16 Imiyavo keke toinavuvuna taumiyavo wagaimiya. 20 Yaubada anakaibe amitoinavuvuna, faina imi faimiya fatana lakaina**Fata-nai lakaina Yaubada gisena ani Natuna Yeisu Keliso giimilina ke yawaina giawaegena faideya. (1Pi 1:18-19) gisena. E ada Yaubada wana kikilakaina yami dewa-dina wadewadewayedi vovomi wagaidiya.