6
Gavaiyamu Keliso yana togugai idadewa.
1 Imeyavo afaifaisewa Yaubada nodi seyana, e ada alulumodovemi, Yaubada wa yana nuwadoga gilememi e ada yana leme-nai wana vegugaiyena. Keke wanavai-kavovo. 2 Faina tuwai-moena Yaubada bademowa givona yana Buki wagaine, givonaga,
“Tova iwakana wagaine Iya gavenogalemi.
E ani kibababala anatoveya Iya galememi.” †Ais 49:8
Yaubada taidei anafaiweya givona, e ada yaku vona wagaimiya wana nogalina. Tova-nai iwakana malinai. Malinai ani tova iwakana ke amikibababala wana vaina.
3 Yama dewa matatabuna aitaitaveyabidi ani gina naunau aenanai tamo gaito gina itama ada ginavona, “Anaita Paulo wa tubuiyanavo ani badi Yaubada yana togugaiyavo, aku ikoyokoyona. Taine faina Keliso-nai ivonavonayena ani Iya gadibusoyogena.” Kai anafaiweya kaliva ada kivebeudi yadi vetumagana wagaine, aga kaliva ida itama ke yama faisewa ida awavekoyoyena. 4 Aku yama yauvivila matatabuna wagaidiya yama dewa iwakana aseseyegemonena, e ada kaliva ina alamanena vaita ime velemoena Yaubada yana gugai anavetogugaiyavo. Vita tulina tulina ada ebaaseuloulolo iyegemona wagaimeya, aku wa yama atuvefaila nodi matatabuna auloloyedi. 5 Tamo tova kaliva ilumalimaliwavuma, isema deli wagaine, ada yoo tonuwakoyo ilutuwatuwainema,†Gug 16:23, 17:5, 2Kol 11:23-27 ada avediwe toyogina yama faisewa-nai Yaubada faine e ani agakabekabebe. Yama faisewa faine tamo tova keke ada dauda, ada wa mafalavugimeyavo amiyamiya. 6 Kaduwe taumeyavo aawavelemoenayema yama dewa iwakanaga wagaine, Yaubada alamana givelema yana vona velemoena faine, kaliva aatuvefailedi, ada wa yama nuwadoga alemelemedi. Imeyavo aluveyabina Aluwaluwa Tabuna wagaine ke gina lemelemema. Aseasema iwakana wagaine kaliva anuwakabubuyedi. 7 Yaubada yana vona velemoena giivemogatalina wagaimeya ke aawatalatalainena, ada kaduwe yana toyogina akiveyegemonina. Wana itana, gaviya wagaidiya tolugaviya yadi lokoloko gaviya ikiabidi, aiyatagidiya yadi giyo, aimaulidiya yadi veve. E ada nuwanuwa ke dewa yegayegana ani vaita yama lokoloko gaviya anafaiweya, ada wagaidiya nibaimeyavo yadi nuwanuwa koyona aweuweudi aku kaduwe ime taumeyavo ayavayavama. 8 Kaliva tufodi ivemoimoinema, aku tufodi iitaitatagoma. Kaliva tufodi iawaveiwakanema, aku tufodi nuwanuwadi amayegana ina kikivekoyona e ada iveveloima. Ime tovona velemoena nonogana ivewagama tovefwayafwaya. 9 Kaliva moyaidi ialamanema nonogana tufona idewema anafaiweya vaita ime kaliva-kavokavovo. Tufodi imunumunuma ke inuwanuwa vaita ime aalika, aku waitana, aimo wayawaimeyavo amiyamiya. Kaduwe amauloulolo-dina wagaidiya kivetuvetunu anuwanuwagana, aku keke ida luvealikama. 10 Wa yama nuwavita amiyamiya aku Yaubada gikivemwamwalima. Amaita vaita fanifanimeyavo†Gug 3:6 nonogana Yeisu yana vewala aawatalatalainena, e ada kaliva moyaidi Yaubada yana nuwanuwa wagaine ivekaikaiwabu. Yama lokoloko moyaina keke, aku ime Yaubada natunavo faina, Banae yana giba moyaina ani ime yama gaitoma. E ada taidei anafaiweya ime Yaubada yana tofaisewa velemoena ani aseseyegemonena.
11 Tubuiyameyavo meKolinita, yama ifufu wagaine yama nuwanuwa moyaina aawamogatalena tunutunugina wagaimiya. Imeyavo ani anuwakabubuyemi lakai-vagaina. 12 Taidei vita-nai adamwatuguya ani ime anuwakabubuyemi, aku imiyavo ani aseasemi gikuga wagaimeya. 13 Aku malinai gaifufu wagaimiya vaita imi natukuweyavo. Imeyavo anuwakabubuyemi, ada nuwanuwama imiyavo kaduwe wa yami nuwakabubu wana awaegemi wagaimeya anafaiweya.
Yaubada yana kalivayavo keke adilauboda ida vetutamwaidi badi keke tovetumagana nodi.
14 Kaliva manamanawena ada kaliva maufona ani adivemanawe keke ida veaigaigabu, e ada kai veinuwana ina ewana, aga ina vita-moena faidiya. Ada kaduwe anafaiweya, kai seyana tovetumagana aku kaduwe seyana keke tovetumagana ani adiselu ina vetutamwaidi, aga vita-moena faidiya. Keke ida veaigaigabu. E ada imi tovetumagana, ani keke gida luboda wana vetutamwaimi badi keke ida vetumagana nodi, faina keke yami nuwanuwa seyana wagaine wana miyamiya. Gavaiyamu, meyameyaganina dewa-nai yegayegana gina vetutamwaina veimeya anagadibudibusoyoga wagaine? Keke. Ada gavaiyamu, meyameyaganina malina gina vetutamwaina yuyuvana wagaine? Keke-bamowa.†Efes 5:7-10 15 Ada gavaiyamu wanuwanuwa? Vaita Keliso ada Seitani yadi nuwanuwa seyana? Keke. Ada anafata banae gaito tovetumagana ada bana keke tovetumagana nodi ina vetubuiyana velemoena? Keke. 16 Ada kaduwe, Yaubada yana manuwa tabu ada yaubada fwayafwaya ani gavaiyamu, tamo veseyana adimwatuguya? Keke. Yaubada yana manuwa ada yaubada fwayafwaya vuvudi, ani tulina tulina. Keke maita ida veseyana. Yaubada Tomiya-vagata yana ebamiya-nai wagaine gimiyamiya, ani ide tovetumagana. Yana manuwa tabu ani ideyavo.†1Kol 3:16, Efes 2:22 Anafaiweya Yaubada yana Buki wagaine givona,
“Iya gana miyamiya yaku yoo wagaidiya
ke tova moyaina gana kwayakwayabudi.
Iya yadi Yaubada gana miyamiya
aku badiyavo yaku kalivayavo ina miyamiya.” †Iyeg 6:7, Vei 26:12, Iyel 31:33, Isik 11:20, 37:27
17 Tainei faina “wana miyayegemona badi idewadewa koyona adimwatuguya,
ada wana miyadaka wagaidiya.
Gavana bwanebwanenena matakuya ani keke maita nimami wanasei wagaine,
e ayo gana vagaulemi wanamiya wagaikuya.**Vona-dina taidei tuwaina Yaubada givonayedi yana kalivayavo wagaidiya Aiseya wagaine, tova-nai gidouwedi iyegemona yadi miya vewakawaka wagaine. (Ais 52:11, Isik 20:34,41)
18 Ada Iyayeku ani gana vetama imi wagaimiya, ada imiyavo ani natukuweyavo kaliva ada vevine.
Iya KAUVEYA Totoyogi-vagaiku gavona.” †2Sam 7:8,14, Ose 1:10
†6:2 Ais 49:8
†6:5 Gug 16:23, 17:5, 2Kol 11:23-27
†6:16 Iyeg 6:7, Vei 26:12, Iyel 31:33, Isik 11:20, 37:27
**6:17 Vona-dina taidei tuwaina Yaubada givonayedi yana kalivayavo wagaidiya Aiseya wagaine, tova-nai gidouwedi iyegemona yadi miya vewakawaka wagaine. (Ais 52:11, Isik 20:34,41)
†6:18 2Sam 7:8,14, Ose 1:10