1 Ada imi keke meIsileli ke ime meIsileli ani Yaubada yana manuwa wagaine giyogoda seyana faina, Iya Paulo gaveoveola Yaubada wagaine imi faimiya. Iya Yeisu Keliso anavaleya iwakana gaawaawamogatalena imi keke meIsileli wagaimiya faina, iseku deliya ke Iya Keliso yana kaliva yogoyogoku gamiyamiya.†Efes 4:1, Fip 1:13, Gug 23:18 2 Kai valeyaku bademowa wanogalina, ina Yaubada wa yana nuwadoga givenuwadadaneku ke akuveimeya giveleku ada gana gugai imi keke meIsileli faimiya amileme faina. 3 Yaubada yana nuwanuwa-nai sewasewavuyena ani keke tauku yaku nuwauya wagaine gada alamane, aku Yaubada giivemogatalina Iya wagaikuya.**Tainei nuwanuwa-nai sewasewavuyena ani ananuwanuwa taidei anafaiweya. Keliso ani wai giyavuyavuna ke gikivemeyameyaganina e ada badi keke meIsileli ina vetutamwata Yaubada yana yoo, tainei meIsileli nodi, ada Yaubada yana vonadabadaba-dina yawai-vagata faina badi meIsileli wagaidiya ani kaduwe badi keke meIsileli faidiya. Yami leta wagaine kabisona bademowa gaifufuyena. 4 Kai yaku vona wana veyawana, aga yaku nuwamala tainei nuwanuwa-nai sewasewavuyena Keliso faine wana alamanena.†Kol 1:26-27 5 Yaubada yana nuwanuwa sewasewavuyena ani keke gida ivemogatali badi tova tuwaina anakalivayavo wagaidiya. Aku tova malinai ime yana afositoloyavo kadu yana falofitayavo ani wagaimeya giawamogatalena Aluwaluwa Tabuna wagaine. 6 Tainei nuwanuwa-nai sewasewavuyena ani taidei anafaiweya. Keke ime meIsileli gagana amavutuga anavai, aku kaduwe imi keke meIsileli ani nodi moyaida adavutuga kana vaina aigaigabuya Yaubada wagaine-deya. Kaduwe, imiyavo ke imeyavo ani nodi kaveyoo seyana, ada gavana iwakana Yaubada givonadabadabayena yana kalivayavo wagaidiya ani moyaida kana nuwagana, faina imi bademowa Keliso nodi waveseyana.†Efes 2:13,19 Tainei ani valeya iwakana ananuwanuwa anafaiweya.

7 Valeya-nai iwakana faina, Yaubada yana nuwadogeya givenuwadadaneku ke gavetogugai,†Kol 1:25 ada toyogina giveleku e ada taidei akuveimeya-nai akufaiweya gana gugaiyena. 8 Iyayeku ani Yaubada yana kaliva tabutabudiyavo wagaidiya au akuita kabisona nonogana Yaubada yana nuwadoga wagaine gugai taidei giveleku ke imi keke meIsileli wagaimiya gana lulumamalena Keliso yana kaikaiwabu iwakadi.†1Kol 15:9-10 Taidei kaikaiwabu-nai moyai-vagaina, keke adafaiweya kana alamane-yabu. 9 Kaduwe Yaubada akuveimeya giveleku ke tomiyababi moyaidi nuwadi gana kivemalina Yaubada yana nuwanuwa sewasewavuyena faina. Nuwanuwa-nai tuwai-bulubuluna tutuya gavaiyei bademowa kasegedi wagaidiya ada gielai malinai ani sewasewavuyena Yaubada nuwainagene, Banae gaitoma matatabuna adiToibubuna. 10 Aku tova malinai Yaubada yana nuwanuwa sewasewavuyena giivemogatalina, e ada kaiwabuyavo ke totoyogina mwatuguya ani Banae yana nuwauya adiita tulina tulina gina vewaledi ke ina itanuwagana. Aku gadedeku wagaine taidei yana nuwauya-nai tulina tulina ina itanuwaga? Ide toekalesiya kaveseyana ke adayegana Yaubada yana kalivayavo ani wagaideya. 11 Muliya-yo Yaubada babi gibubuna, ginuwanuwa taidei gaitoma-dina gina gugaiyedi, ada giyegemona anafaiweya yana nuwanuwa, ani Yeisu Keliso yada Kauveya wagaine. 12 Ide Banae kavetumagana wagaine ada nodi kaveseyana faina, wai Yaubada wagaine ani yavuyavuna ide wagaideya. E ada adafaiweya veoveola wagaine wa yada asevatu nodi kana yegemona wagaine.†Efes 2:18, Ibel 4:16 13 Tainei faina, imi waalamanena Iya uloulolo ganuwanuwagadi, aku gaveola wagaimiya ke yami vetumagana wagaidiya keke dibumi gina soyoga. Faina imi faimiya wa yaku sefaga gaulouloloyedi,†2Tim 2:10 tainei ani imi amivemoimoina faina.

14 Taidei faina, Yaubada Tamada matane tugaku gavetodonena ke gaoduodu wagaine, 15 Banae wagaine-deya ide yana gabuyavo gabameya ke babiya ani matatabuda adayegana kavaina. 16 Ada gaveoveola imi faimiya ke Banae ani yana iwakana mamalina ke yana kaikaiwabu-nai moyai-vagaina wagaine-deya, yana toyogina gina velemi ke nuwainagemiya wana toyogina Banae Aluwaluwana wagaine. 17 E ada yami vetumagana wagaine Keliso gina vemanuwa aseasemiya.†Kol 2:7 Kaduwe gaveoveola ke wana toyogina yami nuwakabubu wagaidiya. Anafaiweya ai walamina giobu-mowa babi wagaine ada gimidimididi toyogina, taidei anafaiweya gilubodana wana midimididi toyogina nuwakabubu wagaine. E, yami gugai vuvuna ani Yaubada yana nuwakabubu faimiya. 18 E ada imiyavo ke badi gavega Yaubada yana yoo nodi ani nuwami gina malina Keliso yana nuwakabubu faina. Keke kanavona! Yana nuwakabubu faideya ani lakai-vagaina. Nuwakabubu-nai anavelalafa, anavemanawe ke anaobu ada analaka ani keke adafaiweya kana etowava.

19 E ada gaveola ke Keliso yana nuwakabubu ide keke adafaiweya kana alamane-yabu ani wana lutovonina ke anaalamana wagaimiya gina veinala,†Iyo 14:23 e ada Yaubada Tauna gina vedodoga lakalakata wagaimiya ke gina vemaga-moemi.

20 E ada Banae kana awadavadavana. Yana toyogina nuwainagedeya gifaifaisewa faina,†Kol 1:29 gavaiyamu Banae wagaine kana veola o kai kana nuwanuwayena faine, tainei anafaiweya gina gugaiyena faideya, aku yana gugai-dina ani yada veola o kai yada nuwanuwa itubusegedi. 21 Yaubada anayegana kana kikilakaina! Banae anadava ginuwanuwagana ide yana ekalesiya anayoo wagaideya ada kaduwe Yeisu Keliso wagaine, ada yoo yoo aimo tova ielaelai ina tubuga ani wagaidiya, keke ginaavai, ginamiya-vagata. Ika anafaiweya.